Sreka yusrefi gi den lezing di yu musu hori tapu a skoro

IBRI lezing di yu musu hori tapu a skoro, e gi yu na okasi fu gro. Du muiti fu hori den lezing fu yu bun, dan safrisafri yu sa si taki yu e go na fesi, èn trawan sa si dati tu (1 Tim. 4:15). A skoro disi sa yepi yu kon moro bun nanga den sani di yu man du kaba.

Senwe e naki yu te yu sabi taki yu musu hori wan lezing gi a gemeente? Disi kan pasa nanga ala sma, srefi nanga sma di de wan pisi ten kaba tapu a skoro. Ma yu kan du wan tu sani di sa meki taki yu no abi fu senwe so furu moro. Teki a gwenti fu leisi nanga wan tranga sten te yu de na oso. Du dati furu tron. Gi komentaar tapu den gemeente konmakandra ala ten, èn efu yu de wan preikiman, dan go na ini a preikiwroko doronomo. Na so wan fasi yu leri sabi fa fu taki nanga tra sma. Moro fara, te yu musu hori wan lezing tapu a skoro, dan sreka yusrefi langa na fesi, èn oefen dati nanga wan tranga sten. Memre taki yu sa taki nanga arkiman di trutru wani arki san yu o taki. Awansi sortu lezing yu o hori, yu musu begi Yehovah fosi. A lobi fu gi santa yeye na den futuboi fu en di e aksi en gi dati.​—Luk. 11:13; Fil. 4:6, 7.

No fruwakti tumusi furu fu yusrefi. A e teki ten fu kisi ondrofeni leki wan takiman èn fu tron wan bun leriman (Mika 6:8). Efu yu no de so langa ete tapu a skoro, dan no denki taki yu sa gi wan kefalek bun lezing wantewante. Na presi fu dati, wroko na wán penti nomo ibri tron te yu musu hori wan lezing. Studeri a pisi ini a buku disi di e taki fu a penti di yu musu wroko na en. Efu a kan, dan pruberi fu wroko nanga den eksempre di skrifi drape. Disi sa meki taki yu sa man du tra sani bun di abi fu du nanga a penti disi, bifo yu hori a lezing gi a gemeente. Yu sa si taki yu e go na fesi.

Fa fu sreka yusrefi te yu musu leisi

Te yu e sreka yusrefi fu leisi gi trawan, dan yu sa musu du moro leki fu leisi den wortu nomo. Du muiti fu kon frustan a tori krin. A momenti di yu yere taki yu musu hori wan lezing, yu musu bigin leisi a pisi, fu di yu wani kon frustan a tori bun. Pruberi fu frustan san ibri grupu fu wortu e taki, èn san na a sani di ibri paragraaf wani sori wi. Te yu e du dati, dan yu sa man leisi soifri san a skrifiman abi na prakseri, èn yu sa man abi a yoisti firi te yu e leisi. Yu kan aksi den sma di sabi a tongo heri bun, fu taigi yu fa fu leisi den wortu di yu no sabi so bun. Yu musu kon sabi bun san yu musu leisi. Kande papa nanga mama wani yepi den yongu pikin fu den nanga disi.

Kande yu musu leisi wan pisi fu Bijbel noso kande yu musu leisi wan pisi fu wan artikel na ini A Waktitoren. San yu kan du dan? We, kande yu kan aksi wan sma di sabi leisi bun, fu leisi gi yu nanga wan tranga sten. Dan yu kan luku fa en e leisi, tapu sortu wortu a e poti krakti, èn pe a e kenki en sten. Baka dati pruberi fu du den srefi sani disi te yusrefi musu leisi.

Te yu bigin sreka yusrefi gi a lezing fu yu, dan sorgu taki yu studeri a les bun di e taki fu a penti di yu musu wroko na en. Efu a kan, dan luku a les disi ete wan tron. Du dati baka te yu leisi a tori wan tu tron kaba nanga wan krakti sten. Meki muiti fu du ala san skrifi na ini a les dati.

Efu yu e du en na so wan fasi, dan dati sa yepi yu furu na ini a diniwroko fu yu. Efu yu de na ini a preikiwroko, dan yu abi furu okasi fu leisi gi trawan. Fu di Gado Wortu abi a krakti fu kenki a libi fu sma, dati meki a de prenspari fu leisi en bun (Hebr. 4:12). Yu no musu denki taki yu sa man leisi heri bun kaba, baka wán noso tu tron di yu leisi tapu a skoro. Na apostel Paulus ben skrifi wan Kresten owruman di ben e leisi yari langa kaba: „Go doro fu meki muiti fu leisi na fesi sma.”​—1 Tim. 4:13.

Fa fu gebroiki a tori di yu musu taki fu en èn fa yu o pristeri a bun nyunsu

Te den e aksi yu fu hori wan lezing tapu a skoro pe yu musu sori fa yu o pristeri a bun nyunsu, dan san yu kan du dan?

Dri prenspari sani yu musu hori na prakseri: (1) a tori di yu kisi fu taki fu en, (2) a fasi fa yu o pristeri a bun nyunsu èn a sma nanga suma yu o taki, èn (3) a penti di yu musu wroko na en.

Yu musu leisi sani di abi fu du nanga a tori di yu musu taki fu en. Ma fosi yu du dati, dan yu musu prakseri seryusu fa yu o pristeri a bun nyunsu, èn sosrefi yu musu prakseri seryusu nanga suma yu o taki. Yu musu du den sani disi bika den sa abi krakti tapu den sani di yu sa taki na ini a lezing èn a fasi fa yu o hori a lezing. Fa yu sa pristeri a bun nyunsu na ini a lezing fu yu? Yu o sori fa fu pristeri a bun nyunsu na wan sma di yu sabi? Noso yu o sori san kan pasa te yu miti wan sma a fosi tron? A sma owru moro yu, noso a yongu moro yu? Fa a sma dati e denki fu a tori di yu sa taki nanga en? O furu a sabi kaba fu a tori? San yu wani doro nanga a tori di yu o taki nanga a sma? Te yu man piki den aksi dati, dan a sa yepi yu kon frustan sortu prenspari sani yu kan gebroiki na ini a lezing fu yu.

Pe yu sa man feni sani fu a tori di yu sa taki fu en? Na tapu bladzijde 33 te go miti 38 fu a buku disi, dan wan takimakandra de fu a tori „Fa fu ondrosuku sani moro fini”. Leisi en, èn baka dati gebroiki san yu abi fu ondrosuku wan tori moro fara. Furu tron yu sa feni moro leki san yu man gebroiki. Leisi nofo fu den sani di yu feni, so taki yu sa sabi san yu man gebroiki gi a tori di yu o taki fu en. Ma te yu e du dati, dan yu musu hori na prakseri tu fa yu o pristeri a bun nyunsu na ini a lezing fu yu, èn sosrefi a sma nanga suma yu o taki. Poti wan marki gi den sani di yu man gebroiki bun gi a lezing fu yu.

Bifo yu orga a lezing fu yu èn yu teki sani di yu wani gebroiki, dan teki yu ten fu leisi a pisi di e taki fu a penti di yu musu wroko na en. Wan fu den moro prenspari sani fu san ede yu musu hori a lezing fu yu, na fu luku efu yu man gebroiki a penti dati.

Te yu sa hori yu lezing na ini a ten di yu kisi fu du dati, dan yu sa firi bun fu taki den lasti wortu fu yu tu, fosi den brada warskow yu taki ten no de moro gi yu fu taki. Ma dati no de so ala ten na ini a preikiwroko, pe wi no abi fu hori wisrefi ala ten na wan spesrutu ten. Sobun, te yu e sreka yusrefi, dan yu musu hori a ten na prakseri di yu kisi fu hori a lezing, ma yu musu hori na prakseri tu dati a moro prenspari sani na taki yu musu gi bun leri.

Wan sani di wi wani taki fu a fasi fa yu kan pristeri a bun nyunsu na ini a lezing fu yu. Luku den rai di gi na tapu bladzijde 82. Teki wan di yu sa man gebroiki bun na ini yu diniwroko èn di sa gi yu na okasi fu tyari a tori di yu kisi, bun na fesi. Efu yu de wan pisi ten kaba tapu a skoro, dan si disi leki wan okasi fu leri tra fasi fu du yu diniwroko.

Efu na a opziener fu a Theokrasia Diniwroko-skoro e taigi yu a fasi fa yu musu pristeri a bun nyunsu na ini a lezing fu yu, dan no frede, ma abi deki-ati èn du san a taigi yu. Furu fu den fasi fa yu o pristeri a bun nyunsu, abi fu du nanga a gi di wi e gi kotoigi na trawan. Efu noiti ete yu gi kotoigi na a fasi dati di yu kisi fu a skoro-opziener, dan aksi tra preikiman di preiki kaba na so wan fasi, san yu kan du. Efu a kan, dan pruberi fu taki fu a tori di yu kisi fu taki fu en, èn pristeri a bun nyunsu na a srefi fasi leki fa yu sa musu du dati tapu a skoro. Disi sa yepi yu fu doro wan prenspari marki fu a leri di yu e kisi tapu a skoro.

Te yu musu hori wan lezing

Efu yu na wan mansma, dan den brada kan aksi yu fu hori wan syatu lezing gi a gemeente. Te yu sa sreka den lezing disi, dan den moro prenspari sani di yu kan du, na den srefi sani di wan sma sa du te a sa sreka ensrefi fu taki wan tori nanga wan tra sma. A sani di de tra fasi, na taki yu sa taki nanga den arkiman èn yu sa musu hori a lezing na wan tra fasi tu.

Furu tron a moro bun fu sreka yusrefi na so wan fasi taki ala den arkiman sa nyan bun fu san yu o taki. Furu fu den arkiman sa sabi wan tu prenspari Bijbel waarheid kaba. A kan, taki a tori di yu kisi fu taki nanga den arkiman, na wan tori di den sabi kaba. Hori na prakseri san den sabi kaba fu a tori di yu o taki. Du muiti so taki na a wan noso tra fasi, den kan nyan bun fu san yu sa taki. Aksi yusrefi: ’Fa mi kan gebroiki a tori disi fu meki mi nanga den arkiman kisi moro warderi gi a fasi fa Yehovah de? Sortu sani na ini a lezing kan yepi wi fu si krin san Gado wani? Fa a tori disi kan yepi wi fu teki bun bosroiti na ini wan grontapu pe furu sma e denki soso den lostu fu a skin?’ (Ef. 2:3) Fu feni bun piki tapu den aksi dati, dan yu musu ondrosuku sani. Te yu e gebroiki Bijbel, dan pruberi fu no leisi den tekst nomo. Tyari den tekst di yu e gebroiki kon na krin, èn sori den arkiman fa den tekst disi e horibaka gi den sani di yu e taki (Tori. 17:2, 3). No pruberi fu taki tumusi furu sani. Tyari den sani fu yu kon na fesi, na wan fasi di sa meki taki trawan sa man memre den bun.

Te yu e sreka yusrefi, dan yu musu prakseri tu fa yu sa hori yu lezing. No oefen wanwan leisi nomo. Oefen a lezing fu yu nanga wan tranga sten. Den muiti di yu e meki fu studeri èn fu fiti den rai di yu e kisi fu den difrenti fasi fu taki nanga trawan, sa yepi yu furu fu go na fesi. Awansi yu na wan nyun takiman, noso wan takiman di hori furu lezing kaba, toku yu musu sreka yusrefi bun so taki yu kan de seiker fu den sani di yu e taki, èn yu kan taki nanga a firi di fiti na a lezing fu yu. Nanga ibri lezing di yu e hori tapu a skoro, yu musu hori na prakseri taki san yu wani du na fu gebroiki a presenti di Gado gi yu, namku a taki di yu man taki, fu gi Yehovah glori.​—Ps. 150:6.