Meki wan schema

TE SMA musu hori wan lezing, dan furu fu den e meki muiti fu skrifi ala sani na tapu papira. Den e bigin skrifi den fosi wortu fu a lezing èn den e go doro fu skrifi ala sani te go miti den lasti wortu di den o taki. Fosi den kaba nanga a heri lezing, dan den sma disi meki furu schema kaba. A sani disi kan teki furu yuru.

Na so yu e sreka den lezing fu yu tu? Yu ben sa wani leri wan moro makriki fasi? Efu yu leri fa fu meki wan schema, dan yu no sa abi fu skrifi ala sani moro. Disi sa gi yu moro ten fu sreka yusrefi fu hori a lezing fu yu. Na so fasi a sa de moro makriki gi yu fu hori a lezing, ma boiti dati, a sa de wan lezing tu di sma sa wani arki èn a sa gi den deki-ati.

A no de fu taki dati te wan brada e hori wan publiki taki na ini a gemeente, dan a e kisi wan schema di meki kaba. Ma furu fu den tra lezing no de so. Kande yu kisi soso a nen fu wan tori di yu musu taki fu en. Noso kande den brada aksi yu fu taki fu wan tori di skrifi na ini wan fu den buku fu wi. Sontron yu e kisi wan tu sani nomo di yu musu gebroiki fu meki a lezing fu yu. Gi ala den sortu lezing disi, yu sa musu meki yu eigi schema.

A schema na tapu bladzijde 41 e sori yu fa yu kan meki wan syatu schema. Luku taki ibriwan fu den prenspari penti e bigin na a kruktu-anusei fu a schema èn a skrifi nanga bigi letter. Na ondro ibriwan fu den prenspari penti disi, wan tu prakseri skrifi di e horibaka gi den prenspari penti. Tra penti di sa gebroiki fu fruklari den prakseri dati, skrifi pikinso moro fara na a kruktu-anusei. Luku a schema disi bun. Luku taki den tu prenspari penti abi langalanga fu du nanga a nen fu a lezing. Luku tu taki den tra penti di kari, no skrifi fu soso. Na presi fu dati, ibriwan fu den abi fu du nanga na edepenti di skrifi tapusei fu den.

Te yu e meki wan schema, dan a kan taki a no de soifri leki a schema disi di gi leki eksempre. Ma efu yu frustan san yu musu du fu meki so wan schema, dan dati sa yepi yu fu orga den sani di yu abi fanowdu fu meki yu lezing, èn a sa yepi yu fu sreka wan bun lezing sondro taki yu e teki tumusi furu ten gi dati. San yu kan du moro fara?

Ondrosuku a tori, luku san yu abi fanowdu, èn orga dati

Yu abi wan nen fanowdu gi a lezing. A nen fu yu lezing no musu meki sma prakseri ala sortu sani, soleki fa dati kan pasa te a de wán wortu nomo. Ma a nen fu yu lezing musu sori a moro prenspari tori di yu sa taki fu en, èn a musu sori na sortu fasi yu sa hori a lezing fu yu. Efu a lezing di yu kisi, abi wan nen kaba, dan luku ibri wortu fu a nen disi bun. Efu yu musu hori wan lezing di komoto fu sani di skrifi na ini wan fu den buku fu wi, dan studeri a pisi disi èn hori a nen na prakseri tu di yu kisi gi a lezing disi. Efu yu musu taki fu wan pisi tori nomo, dan yusrefi sa musu luku sortu nen yu sa gi a lezing fu yu. Ma fosi yu du dati, dan yu sa si taki a bun fu go ondrosuku sani pikinso. Efu yu na wan sma di wani leri nyun sani ala ten, dan furu tron yu sa feni nyun fasi fu meki yu lezing.

Te yu e du den sani disi, tan aksi yusrefi: ’Fu san ede a tori disi de prenspari gi den wan di sa arki mi? San na a marki di mi wani doro?’ Yu no musu hori wan lezing nomo fu di yu musu taki wan sani, noso fu di yu wani hori wan moi lezing nomo, ma a lezing fu yu musu du wan sani gi den arkiman so taki den kan feni winimarki fu dati. Te yu e bigin frustan san yu wani doro nanga yu lezing, dan skrifi dati. Tan memre a sani disi di yu wani doro te yu e sreka yusrefi moro fara.

Te yu sabi kaba san yu wani doro nanga a lezing èn te yu poti wan nen gi a lezing di e kruderi nanga a sani dati (noso te yu luku fa a nen di yu kisi gi a lezing, e fiti nanga a sani di yu wani doro), dan yu kan go suku spesrutu sani now. Luku sortuwan fu den sani sa bun gi den arkiman fu yu. No de tevrede nanga sani di ala sma sabi kaba, ma suku spesrutu penti di sa leri den arkiman fu yu wan sani èn di sa man yepi den trutru. Te yu e ondrosuku sani, dan luku omeni yu sa man ondrosuku trutru. Furu tron yu sa feni moro sani leki san yu kan gebroiki na ini yu lezing, dati meki yu sa musu puru wan tu sani fu a lezing èn luku sortuwan yu sa gebroiki.

Kon sabi fu sortu prenspari penti yu sa musu taki. Disi sa yepi yu fu fruklari a nen fu yu lezing èn fu doro a marki fu yu. Nanga den prenspari penti disi yu kan bigin meki yu schema. O furu prenspari penti yu musu abi? Kande tu penti nofo kaba efu yu o hori wan syatu takimakandra. Ma feifi penti sa nofo kaba, srefi te yu o taki wán yuru langa. Efu yu no abi furu prenspari penti, dan dati sa moro bun gi den arkiman, bika dan den sa man memre moro fu a lezing fu yu.

Te yu sabi kaba san na a nen fu yu lezing èn san na den prenspari penti, dan orga den pisi tori di yu feni fu meki a lezing fu yu. Luku sortuwan fu den sani abi wantewante fu du nanga den prenspari penti fu yu. Teki wan tu finifini tori di sa meki a lezing fu yu kon moro moi. Te yu teki bijbeltekst fu horibaka gi den prenspari penti, dan suku sani di ben sa kan yepi yu fu taki bun fu den tekst dati. Poti ibriwan fu den sani disi na ondro a prenspari penti pe a musu de. Efu wan tu fu den tori di yu feni no e fiti na nowan fu den prenspari penti fu yu, dan libi den tori dati, srefi efu yu feni taki den moi kefalek fu sabi. Yu kan kibri den tori disi tu na wan presi so taki yu sa man gebroiki den na wan tra okasi. Hori soso den moro bun sani di yu feni. Efu yu sa pruberi fu taki tumusi furu sani, dan yu sa abi fu taki tumusi esi, èn dati baka sa meki taki yu no sa man poti nofo krakti tapu den sani di yu sa taki fu den. A moro bun efu yu e taki fu wan tu sani nomo di sa warti trutru gi den arkiman, èn fu du dati bun. No pasa a ten di yu kisi gi a lezing fu yu.

Te yu doro so fara, dan seti a tori fu yu na so wan fasi taki yu e fruteri fa sani e pasa baka makandra. Na dati na Evangelie skrifiman Lukas ben du tu. Baka di a ben ondrosuku ala den sani di ben abi fu du nanga a tori di a ben wani skrifi, dan a skrifi ala sani „fa den ben waka trutru” (Luk. 1:3). Kande yu kan seti a tori na so wan fasi taki san pasa fosi, e kon fosi èn den sani di pasa baka dati, e kon baka dati. Noso yu kan seti en so taki yu e fruteri san pasa, èn san na a bakapisi fu a sani di pasa. Noso kande yu kan fruteri fosi fu wan problema, èn baka dati fa fu lusu a problema dati. Ma a prenspari sani na taki a fasi fa yu e seti a tori, musu de a moro bun fasi di sa yepi yu fu doro a marki fu yu. Yu no musu dyompo wantronso fu a wan tori go na wan tra tori. Te den arkiman e arki yu, dan den sa musu frustan fa ala sani abi fu du nanga makandra, èn a no musu de so taki den no man frustan san a sani di yu fruteri abi fu du nanga san yu ben taki bifo. Den buweisi di yu e gi, musu yepi den arkiman fu si sortu bun bosroiti den kan teki. Te yu e seti den penti disi, dan prakseri fa den arkiman sa feni den, te den o arki a lezing fu yu. Den o frustan wantewante san yu e taki? A sani di den sa yere, sa gi den deki-ati fu du san yu abi na prakseri nanga a lezing fu yu?

Baka dati, sreka wan tu bigin wortu di sa meki taki den arkiman sa wani arki yu. Den bigin wortu fu yu musu sori den arkiman tu taki den sani di yu sa fruteri den, na trutru warti sani gi den. A kan yepi yu furu te yu e skrifi den bigin wortu dati na tapu papira. Te fu kaba, dan sreka yusrefi gi san yu sa taki na a kaba, so taki yu sa gi den arkiman deki-ati fu du soifri san yu abi na prakseri nanga a lezing fu yu.

Efu yu e bigin fu sreka yu schema biten, dan yu sa abi nofo ten fu meki en kon moro bun fosi yu hori yu lezing. Kande yu wani poti krakti tapu wan sani di yu e taki, fu di yu e sori wan tu nomru di abi fu du nanga a tori, noso fu di yu e gebroiki wan agersitori, noso wan ondrofenitori. Te yu e taki fu wan sani di pasa no so langa ete, noso fu wan sani di pasa na ini a birti fu yu, dan dati kan yepi den arkiman fu si fa den kan gebroiki den sani di yu e taki. Te yu luku a lezing fu yu ete wan tron, dan kande yu sa si moro sani di yu kan gebroiki fu meki den arkiman frustan a tori moro bun. A fasi disi fu ondrosuku sani èn fu seti den moro bun, de prenspari fu hori wan bun lezing.

Kande wan tu takiman musu skrifi moro sani na tapu papira leki trawan. Ma efu yu e orga den sani di yu o taki, ondro wan tu prenspari penti nomo, efu yu e puru san no de fanowdu èn seti sani so taki yu kan fruteri den baka makandra, dan yu sa si taki baka wan pisi ten, yu no sa abi fu skrifi ala sani na tapu papira. Na so yu kan wini furu ten! Den lezing fu yu sa kon moro bun tu. Fu tru, ala sma sa si taki yu e kisi winimarki fu a leri di yu e kisi tapu a Theokrasia Diniwroko-skoro.