Meki den moro prenspari sani kon krin na fesi

SAN na den moro prenspari penti fu wan lezing? Disi a no soso wan tu moi sani di yu e taki syatu te yu e hori yu lezing. Ma den na den moro prenspari penti fu san yu e taki furu na ini wan lezing. Disi na den penti di yu abi fanowdu fu doro san yu abi na prakseri fu doro nanga yu lezing.

A moro bun fasi fa yu kan poti krakti tapu den moro prenspari penti fu yu lezing, na fu wroko nanga koni te yu e teki den penti disi èn seti den bun. Furu tron te yu e suku sani fu hori yu lezing, dan yu o feni moro sani leki san yu abi fanowdu fu hori a lezing. Fa yu kan kon sabi sortuwan fu den sani yu musu gebroiki?

Na a fosi presi, yu musu prakseri suma na den arkiman fu yu. A de so taki den no sabi furu ete fu a tori fu yu? Noso den sabi furu fu a tori kaba? Furu fu den e agri nanga san Bijbel e taki fu a tori? Noso wan tu fu den no man agri nanga a tori disi soleki fa Bijbel e sori dati? Sortu problema den e miti na ini na aladei libi te den e meki muiti fu du san Bijbel e taki fu a tori? Leki nomru tu, sorgu taki yu sabi heri bun san yu wani doro te yu e taki a tori fu yu nanga den arkiman. Hori den tu sani disi na prakseri te yu e luku san yu o taki fu a tori èn teki soso den sani di e fiti trutru, ma puru san no de fanowdu.

Efu yu kisi wan schema nanga wan nen gi a lezing, nanga sosrefi den moro prenspari penti, dan yu musu hori yusrefi na a schema. Ma toku, efu yu hori den tu sani na tapusei na prakseri te yu e luku fa yu o poti krakti tapu den moro prenspari penti, dan a lezing fu yu sa kon moro bun. Efu yu no kisi wan schema, dan yusrefi kan go luku sortu sani yu sa teki leki den moro prenspari penti.

Te yu abi den moro prenspari penti bun na ede èn te yu seti ala den finifini tori na ondro den moro prenspari penti disi, dan a sa moro makriki gi yu fu hori yu lezing. Soleki fa a sori, dan den arkiman fu yu sa kisi moro winimarki tu fu a lezing di yu sa hori.

Difrenti fasi fa yu kan seti den sani di yu o gebroiki fu meki yu lezing. Furu fasi de fa yu kan seti den sani di yu feni fu meki yu lezing. Te yu kon sabi den fasi disi, dan yu sa si taki furu fu den kan wroko bun, ma dati sa anga fu a marki di yu wani doro nanga yu lezing.

Wan fu den sani di yu kan du, na fu brokobroko a tori pikinso. (Ibriwan fu den moro prenspari penti de fanowdu fu meki den arkiman fu yu frustan a heri tori, noso fu yepi yu doro a marki di yu wani doro nanga a lezing fu yu.) Wan tra fasi na te yu e fruteri den tori leki fa den ben pasa baka makandra. (Fu eksempre, yu kan fruteri fosi fu den sani di pasa bifo a Frudu, èn baka dati yu kan fruteri fu sani di ben pasa bifo Yerusalem ben kisi pori na ini 70 G.T. Baka dati yu kan sori tapu den sani di e pasa now na ini a ten disi.) Wan tra fasi di wi kan kari leki nomru dri, na fu fruteri fu san ede wan sani pasa, èn baka dati san ben de a bakapisi fu dati. (Disi yu kan kenki tu, fu di yu e fruteri den bakapisi fosi, èn baka dati fu san ede disi pasa. Fu eksempre, yu kan fruteri fa wan sani de now, èn baka dati yu e fruteri fu san ede a sani dati de so now.) Ete wan tra fasi di wi kan kari leki nomru fo, na fu taki fu tu sani di de heri tra fasi fu makandra. (Yu kan sori fa bun sani de heri tra fasi leki takru sani.) Sontron wan takiman kan gebroiki moro leki wán fu den fasi disi na ini a srefi lezing fu en.

Di a Dyu Sanhedrin ben krutu Stefanus, baka di sma fruteri lei fu en, dan a ben hori wan krakti lezing. Na ini a lezing dati a ben fruteri den tori leki fa den ben pasa a wan baka a trawan. Te yu e leisi dati na Tori fu den Apostel 7:2-53, dan luku taki Stefanus no ben taki sani fu soso, ma a ben sabi fu san ede a ben taki den. Na a fosi presi Stefanus ben tyari kon na krin taki a ben fruteri sani fu fositen di nowan fu den arkiman fu en ben kan taki dati den no sabi dati. Ne a sori taki aladi den brada fu Yosef no ben wani en moro, toku Gado ben teki Yosef fu tyari frulusu kon gi den. Baka dati, Stefanus ben sori taki den Dyu no ben gi yesi na Moses, wan sma di Gado ben poti na wroko. Te fu kaba, dan Stefanus ben poti krakti tapu a takru fasi fa den Dyu fu fositen ben du sani. Baka dati a sori taki den sma di kiri Yesus Krestes, ben abi a srefi fasi disi.

No gebroiki tumusi furu prenspari penti. Soso wan tu prenspari penti de fanowdu te yu o taki fu wan tori. Furu tron, wan tori no abi moro leki feifi prenspari penti nomo. A sani disi tru awansi yu sa taki 5 miniti, 10 miniti, 30 miniti, noso moro langa srefi. No pruberi fu tyari tumusi furu prenspari penti kon na fesi. Yu arkiman no sa man memre someni sani, ma furu tron den sa man hori soso wan tu sani na prakseri fu wan lezing. Èn o moro langa yu lezing de, o moro yu sa musu poti krakti tapu den prenspari penti èn yu sa musu tyari den kon na fesi moro krin.

A no abi trobi omeni prenspari penti yu sa kari na ini yu lezing, ma yu musu sorgu taki ibriwan fu den e kon krin na fesi. Gi den arkiman nofo ten fu frustan ibriwan fu den prenspari penti disi, so taki a kan sidon bun na den ede.

A lezing fu yu no musu de wan muilek sani fu arki. A no ala ten disi e anga nomo fu o furu sani yu o taki. Efu den sani di yu abi na prakseri, seti heri bun na ondro wan tu prenspari edeprakseri nomo, èn efu yu e teki yu ten fu poti krakti tapu ibriwan fu den, dan den arkiman sa man frustan a lezing fu yu bun èn den no sa frigiti en esi.

Meki den moro prenspari sani kon krin na fesi. Efu yu seti a tori fu yu bun, dan a no sa muilek fu tyari den moro prenspari sani krin kon na fesi te yu e hori yu lezing.

A moro bun fasi fa yu kan poti krakti tapu wan prenspari penti na te yu e tyari buweisi, bijbeltekst, nanga tra sani kon na fesi. Ma du en na so wan fasi taki den sani disi e sori go na a prenspari penti èn taki den e meki en kon moro krakti na fesi. Ala tra sani di yu wani kari, musu meki taki a prenspari penti disi de moro krin fu frustan, den musu buweisi taki a tru, noso den musu poti moro krakti tapu a prenspari penti disi. No fruteri tra sani di no abi noti fu du nanga a prenspari penti di yu wani tyari kon na fesi, nomo fu di yu feni taki den sani disi na moi tori. Te yu e kari tra sani, dan sori krin fa den abi fu du nanga a moro prenspari penti gi san den e horibaka. No meki a de so, taki yu e libi en gi den arkiman fu si dati. Yu kan sori fa den tra sani disi abi fu du nanga a moro prenspari penti, fu di ten na ten yu kan taki ete wan tron fu spesrutu wortu di abi fu du nanga a prenspari penti.

Wan tu takiman e poti krakti tapu den moro prenspari penti fu di den e gi den wan nomru. Aladi disi na wán fasi fu poti krakti tapu den moro prenspari penti, toku wan takiman musu sorgu tu taki a e luku bun sortu sani a e teki fu taki èn taki a lezing fu en de makriki fu frustan.

Kande yu sa wani kari den moro prenspari penti na a bigin, fosi yu e taki fu den sani di e horibaka gi den. Disi sa yepi den arkiman fu frustan o bun den sani de di yu sa fruteri baka dati, èn a sa poti krakti sosrefi tapu a moro prenspari penti. Baka te yu tyari a prenspari penti kon krin na fesi kaba, dan agen yu kan poti krakti tapu en fu di yu e taki syatu fu en ete wan tron.

Na ini a preikiwroko. Den gronprakseri di wi kari na tapusei no de soso te yu musu hori wan lezing, ma sosrefi te yu sa taki nanga wan sma na ini a preikiwroko. Te yu e sreka yusrefi, dan hori na prakseri san na den bigi problema di den sma na ini yu birti e prakseri furu fu den. Suku wan sani di yu kan taki nanga den. Meki a sani disi gi yu na okasi fu sori den sortu howpu Bijbel e gi fu lusu a problema dati. Kande yu kan teki tu prenspari penti fu taki nanga den sma. Luku sortu bijbeltekst yu sa gebroiki fu horibaka gi den prenspari penti disi. Dan baka dati, denki fa yu o bigin a takimakandra. Efu yu sreka yusrefi na so wan fasi, dan dati sa gi yu na okasi fu man kenki a tori moi te dati de fanowdu, èn dati na wan sani di yu musu man du te yu e taki nanga sma. Efu yu sreka yusrefi na so wan fasi, dan dati sa yepi yu tu fu taki wan sani di den ososma sa memre bun.