Gebroiki yu fesi nanga yu heri skin srefi te yu e taki

SMA fu son kulturu e gebroiki den anu nanga den heri skin srefi te den e taki. Den e du dati moro furu leki fa sma fu tra kulturu e du dati. Ma te yu luku en bun, dan ala sma e gebroiki den anu nanga den fesi, noso den heri skin srefi, te den e taki. A sani disi den e du te den e taki nanga tra sma, èn sosrefi te den e hori wan lezing gi furu sma.

Yesus nanga den fosi disipel fu en ben abi a gwenti fu gebroiki den anu te den ben taki. Na wan okasi, wan sma ben kon taigi Yesus taki en mama nanga den brada fu en ben wani taki nanga en. Yesus ben piki a sma: „Suma na mi mama, èn suma na den brada fu mi?” Dan a Bijbel e taki moro fara: „A langa en anu sori go na den disipel fu en, èn a taki: ’Luku! Mi mama nanga den brada fu mi!’” (Mat. 12:48, 49) Tra presi na ini Bijbel, soleki na ini Tori fu den Apostel 12:17 nanga 13:16, e sori taki den apostel Petrus nanga Paulus ben gwenti fu meki sani nanga den anu te den ben taki.

Te wan sma wani meki wan trawan frustan san a e prakseri èn fa a e firi, dan a no e du dati wawan nanga san a e taki, ma sosrefi nanga sani di a e meki nanga en fesi èn sosrefi nanga en heri skin. Efu wan takiman no e du disi, dan den arkiman kan denki taki a no e span nanga den sani di a e taki. Ma efu wan takiman e gebroiki den sani disi fu yepi trawan frustan san a e taki, dan a sa tron wan moro bun takiman. Srefi efu yu e taki na a telefon, dan efu yu e meki sani nanga yu anu noso nanga yu fesi, dan trawan sa yere krinkrin na yu sten o prenspari yu boskopu de. Ma den sa yere tu fa yusrefi e firi fu den sani di yu e taki. Sobun, awansi yu e taki noso e leisi, awansi yu arkiman e luku yu, noso awansi den e leisi na ini den eigi Bijbel, toku a ben o bun fu gebroiki yu fesi nanga yu heri skin srefi te yu e taki.

A fasi fa yu e poti yu fesi èn sosrefi den sani di yu e meki nanga yu heri skin te yu e taki, no musu de leki yu leri den fu wan buku, ma den musu kon fu yusrefi. Yu no go na skoro noiti fu leri fa yu musu lafu noso fa yu musu atibron. A fasi fa yu e poti yu fesi èn san yu e du nanga yu heri skin srefi te yu e taki, musu sori sosrefi fa yu e firi trutru. O moro yu kan du disi fu yusrefi, o moro bun dati sa de.

Tu sortu sani de di wan sma kan du te a e meki sani nanga en fesi noso nanga en heri skin sosrefi. Den tu sani disi na taki a kan sori fa sani de, èn a kan poti krakti tapu wan sani. Te yu e sori fa sani de, dan yu e meki sani nanga yu anu fu sori o bigi wan sani de noso pe wan sani de. Te yu musu du a sani disi tapu a skoro, dan no du en wán noso tu leisi nomo te yu e taki. Pruberi fu meki sani nanga yu anu èn nanga yu fesi leki fa yu gwenti, èn pruberi fu du dati na ini yu heri lezing. Efu yu feni en muilek fu du disi, dan kande a sa de wan yepi gi yu fu suku den wortu di e sori sortu sei wan sani de, o fara wan sani de, o bigi wan sani de, pe a sani de, noso o fara a sani de fu tra presi. Ma furu tron, a wan-enkri sani di yu abi fu du na fu poti ala yu prakseri na a lezing di yu e hori. No broko yu ede nanga san sma o denki fu yu, ma taki èn du sani neleki fa yu ben o du dati na ini na aladei libi. Te wan sma no e broko en ede nanga noti, dan a sa si taki a moro makriki gi en fu gebroiki en anu, noso en heri skin srefi, te a e taki.

Gebroiki yu anu, noso yu heri skin srefi, fu poti krakti tapu wan sani. Te yu e du disi, dan yu e sori sma fa yu e firi èn taki yu de seiker fu san yu e taki. Nanga den sani di yu e meki nanga yu anu, noso nanga yu heri skin srefi, yu kan sori taki wan sani de moro prenspari, noso yu kan poti moro krakti tapu wan sani. A de tumusi prenspari fu meki sani nanga yu anu, noso nanga yu heri skin srefi, te yu wani poti krakti tapu san yu e taki. Ma luku bun! Den sani di yu e meki nanga yu anu, noso nanga yu heri skin srefi, fu poti krakti tapu san yu e taki, kan tron wan fruferi gwenti. Efu ibri tron baka yu e meki a srefi sani nanga yu anu te yu e taki, dan sma sa luku a sani disi nomo di yu e du na presi fu den poti prakseri na a lezing fu yu, èn dati no sa meki yu lezing kon moro bun. Efu a skoro-opziener e sori yu taki yu abi a problema disi, dan pruberi fu gebroiki yu anu soso fu sori o bigi wan sani de noso pe wan sani de, èn du disi gi wan pisi ten. Baka a pisi ten dati, dan bigin meki sani baka nanga yu anu fu poti krakti tapu san yu e taki.

Efu yu wani kon sabi o furu sani yu musu du nanga yu anu, noso nanga yu heri skin srefi fu poti krakti tapu san yu e taki, èn efu yu wani kon sabi sortu sani yu musu du nanga yu anu, dan poti prakseri na den sma di e arki yu èn a fasi fa den e firi. Efu yu e sori yu finga go tapu den arkiman, dan dati kan meki taki den no sa firi bun. Na ini wan tu kulturu a de so, taki efu wan man-nengre e poti en anu na tapu en mofo te a skreki fu wan sani, dan den sma kan denki taki a e du neleki wan umasma. Na wan tu kondre na grontapu, umasma no kan meki furu sani nanga den anu te den e taki, bika tra sma kan si dati neleki na uma no abi maniri. Sobun na den sortu presi dati, den sisa musu sori nanga den fesi san den e taki. Èn pikinmoro na ala presi fu grontapu, dan trawan kan lafu te wan sma e meki tumusi furu sani nanga en anu te a e taki nanga wan pikin grupu fu sma.

Te yu e leri fa fu taki moro bun, èn te yu e firi moro switi te yu e taki, dan iniwan sani di yu e meki nanga yu anu fu poti krakti tapu san yu e taki, sa sori fa yu e firi trutru. Den sa sori tu taki yu de seiker fu den sani di yu e taki, èn taki yu e taki komoto fu yu ati. Disi sa meki taki sma sa man leri wan sani trutru te yu e taki.

A fasi fa yu e poti yu fesi te yu e taki. Furu tron sma man si spesrutu na yu fesi, fa yu e firi trutru. Den ai fu yu, a fasi fa yu e poti yu mofo èn a fasi fa yu e drai yu ede, kan sori fa yu e firi. Sondro fu yu taki wan sani, dan sma kan si na a fesi fu yu taki yu no e span nanga wan tori, taki yu e teige wan sani, taki yu no de seiker fu wan sani, taki yu e fruwondru, noso taki yu breiti. Efu den sani disi de fu si tapu yu fesi te yu e taki, dan disi sa meki taki trawan sa man si san yu e taki èn den sa man firi san yu e taki. Gado leki a Mekiman poti moro leki 30 titei na ini yu fesi wawan. Moro leki afu fu ala den titei disi de na wroko te yu e lafu pikinso.

Awansi yu de na tapu a podium fu hori wan lezing, noso yu de na ini a preikiwroko, toku yu e meki muiti fu prati wan switi boskopu nanga tra sma, di kan meki na ati fu den firi prisiri. Te yu e lafu switi, dan dati sa sori den taki yu abi wan switi boskopu gi den. Na a tra sei, efu sma no man si fa yu e firi te den e luku yu fesi, dan den kan aksi densrefi efu trutru den sani di yu e taki e komoto fu yu ati.

Moro prenspari srefi, te yu e lafu pikinso dan dati e sori tra sma taki yu e firi switi nanga den. A sani disi de kefalek prenspari, spesrutu na ini a ten disi pe sma frede tra sma di den no sabi. Efu yu e lafu pikinso, dan dati kan yepi den sma fu firi bun èn den sa wani arki san yu e taki.