Aksi fu leisiman

Bijbel no e taki noti fu a gwenti di sma abi fu opo den grasi nanga win go na loktu fu gi grani na wan sani noso na wan sma. Fu di dati de so, dan fu san ede Yehovah Kotoigi no e du a sani disi?

Sma na ala sei abi a gwenti langa ten kaba fu opo den grasi nanga win (noso wan tra sopi) go na loktu fu gi grani na wan sani noso na wan sma, èn na ini ibri kondre den e du a sani disi tra fasi. Son leisi te sma e du a sani disi, dan den e meki den grasi tuka. Nofo tron a sma di e gi grani e aksi noso e winsi taki wan tra sma de koloku, taki a abi wan bun gosontu, taki a libi langa, noso taki tra bun sani pasa nanga en. Den tra sma di de drape kan taki wan sani fu sori taki den e agri, noso den kan opo den grasi go na loktu èn dringi pikinso win. Aladi furu sma feni taki noti no fowtu na a gwenti disi èn taki a de wan fasi nomo fu sori switifasi gi trawan, toku bun reide de fu san ede Yehovah Kotoigi no e du a sani disi.

Dati no de so fu di Kresten no wani taki wan trawan de koloku èn taki a abi wan bun gosontu. Na ini wan brifi di a tiri skin fu a fosi yarihondro ben skrifi gi den gemeente, wan wortu ben de na a kaba fu a brifi, èn a wortu disi wani taki „wan bun gosontu gi unu”, „tan bun”, noso „meki sani waka bun nanga unu” (Tori fu den Apostel 15:29). Èn sonwan fu den tru anbegiman ben taigi kownu: „Meki mi masra . . . libi te ten di no skotu”, noso „Meki a kownu libi fu têgo”.—1 Kownu 1:31; Nehemia 2:3.

Ma pe a gwenti disi komoto? The Watchtower fu 1 yanuari 1968, ben teki wan pisi puru fu wan buku pe skrifi: „A kan taki a gwenti di sma abi fu opo den grasi nanga win go na loktu fu winsi trawan wan bun gosontu, komoto fu wan owruten gwenti di sma ben abi na ini na anbegi fu den. Den sma disi ben gwenti fu dringi sani leki wan ofrandi gi den gado èn gi den dedewan. Te den Grikisma nanga den Romesma ben e nyan, dan den ben e kanti sopi leki ofrandi gi den gado fu den, èn te den ben e hori den bigi fesa-nyanyan fu den, dan den ben e dringi sopi fu gi grani na den gado èn na den dedewan.” A buku e taki moro fara: „A ben musu de so tu taki te den ben e tyari den sortu ofrandi disi, dan den ben e dringi sopi fu winsi wan sma wan bun gosontu” (The Encyclopædia Britannica (1910), Volume 13, bladzijde 121).

Wi musu si a tori disi so na ini a ten disi? Wan buku e taki: „A kan taki na opo di sma abi fu opo den grasi go na loktu fu gi grani na wan sma noso na wan sani, no abi fu du nanga anbegi. Kande a sani disi e komoto fu wan gwenti di sma fu owruten ben abi fu dringi wan santa sani, fu gi grani na den gado fu den. Den ben e kanti brudu noso win fosi den ben e winsi wan sma den sani disi: ’Meki a de so taki yu libi langa!’ noso ’meki a de so taki yu tan gosontu!’” (International Handbook on Alcohol and Culture fu 1995)

A no ala ten te wan sani noso wan gwenti komoto fu owruten falsi anbegi noso te a abi fu du nanga dati, dan tru anbegiman no mag abi a sani dati noso den no mag du a sani dati tu. Fu eksempre, luku a granaki-apra. Na ini wan prenspari buku di e taki fu Bijbel tori, a skrifi taki: „Soleki fa a sori, dan sma ben e gebroiki a granaki-apra tu leki wan santa sani na ini falsi anbegi.” Ma toku, Gado ben meki sma gebroiki tetei fu meki prenki fu granaki-apra na tapu den krosi fu den granpriester, èn prenki fu granaki-apra ben de tu na den kopro postu fu a tempel fu Salomo (Exodus 28:33; 2 Kownu 25:17). Boiti dati, wan ten ben de di trowlinga ben abi fu du nanga anbegi. Ma toku, furu sma na ini a ten disi no sabi dati, èn den e si wan trowlinga leki wan buweisi nomo taki wan sma trow.

Fa a de te sma e gebroiki win fu du sani di abi fu du nanga na anbegi fu den? Fu eksempre, wan leisi den man fu Sikem di ben e anbegi Bâal, „go na ini na oso fu a gado fu den. Drape den nyan èn dringi, ne den bigin fluku Abimeilek”, a manpikin fu Gideon (Krutuman 9:22-28). Yu denki taki wan getrow anbegiman fu Yehovah ben o dringi sopi makandra nanga den sma dati fu horibaka gi a sani di den ben e du? Yu denki taki so wan sma ben o aksi wan gado fu du ogri nanga Abimeilek? Amos ben taki disi fu a ten di furu sma na ini Israel ben e opo densrefi teige Gado: „Den e go didon langalanga na sei ibri altari; èn na a win fu den wan di pai butu, den e dringi na ini na oso fu den gado fu den” (Amos 2:8). Yu denki taki tru anbegiman ben o du a sani disi, awansi a ben de so taki sma ben kanti win dringi fu gi grani na den gado, noso taki den ben dringi a win fu di den ben de drape? (Yeremia 7:18) Iya, yu denki taki wan tru anbegiman ben o opo wan grasi nanga win go na loktu fu aksi wan gado fu tyari problema kon gi wan sma noso fu meki a sma dati en libi waka bun?

A moi fu sabi taki anbegiman fu Yehovah ben e opo den anu go na loktu son leisi fu aksi Gado taki sani waka bun. Den ben e opo den anu go na loktu fu begi a tru Gado. Bijbel e taki: „Salomo go tanapu na fesi na altari fu Yehovah . . . èn a opo en anu bradi go na hemel; èn a taki: ’O, Yehovah, Gado fu Israel, nowan Gado de leki yu . . . èn meki a de so taki yusrefi e yere den na a presi pe yu e tan, namku na ini hemel, èn grantangi yere den èn gi den pardon’” (1 Kownu 8:22, 23, 30). Na so a de tu taki „Esra ben blesi Yehovah . . . ne a heri pipel ben piki: ’Amen! Amen!’ aladi den ben opo den anu go na loktu. Baka dati, den boigi dipi èn go didon langalanga na gron na fesi Yehovah” (Nehemia 8:6; 1 Timoteyus 2:8). A de krin fu si taki den getrowsma dati no ben e opo den anu go na hemel fu aksi wan gado fu koloku fu blesi den.—Yesaya 65:11.

Na ini a ten disi, furu sma e opo den grasi go na loktu fu gi grani na wan sma noso na wan sani. Kande den sma disi no feni taki den e aksi wan gado fu gi den wan sani noso fu blesi den. Ma den sma disi no man fruklari tu fu san ede den e opo den grasi nanga win go na loktu. Ma a no fu di den sma disi no e poti prakseri na a tori dati, meki tru Kresten musu firi fruplekti fu du san den sma dati e du.

Ala sma sabi taki te a abi fu du nanga tra afersi sosrefi, dan Yehovah Kotoigi no e du san furu sma e du. Fu eksempre, furu sma di e gi grani na sani di e prenki a kondre fu den, noso na a fraga, no feni taki den e du wan sani di abi fu du nanga anbegi. Tru Kresten no e tapu sma fu du so, ma densrefi no abi noti fu du nanga den sani dati. Furu Kotoigi di ben sabi o ten den seremonia disi ben o hori, no go na den fu di den no ben wani afrontu sma. Awansi fa a no fa, Kotoigi abi a fasti bosroiti fu no du sani di e sori taki den e horibaka gi a kondre fu den, fu di den sani dati no e kruderi nanga Bijbel (Exodus 20:4, 5; 1 Yohanes 5:21). Kande furu sma na ini a ten disi feni taki na opo di den e opo den grasi fu den go na loktu fu gi grani na wan sma noso wan sani, no abi noti fu du nanga anbegi. Ma toku, Kresten abi bun reide fu no du a sani disi, fu di a abi fu du nanga anbegi. Boiti dati, srefi na ini a ten disi a sani disi na leki te sma e aksi ’hemel’ fu blesi den, iya, a de neleki te den e suku yepi na wan gado.—Exodus 23:2.