Sani di yu kan taki fosi yu kari wan tekst

BIJBEL na a fondamenti fu a leri di wi e kisi tapu den konmakandra fu wi. Te wi de na ini a preikiwroko, dan bijbeltekst na den moro prenspari sani tu di wi wani sori den sma. Ma o furu wan bijbeltekst sa yepi wi te wi e taki nanga trawan, abi fu du nanga den sani di wi e taki fosi wi kari a tekst.

Moro de fanowdu leki fu kari a tekst nomo èn fu gi wan sma a kari fu leisi a tekst makandra nanga yu. Fosi yu taki wan sani fu wan tekst, dan meki muiti fu doro tu marki: (1) Meki taki den sma wani yere san a tekst e taki, èn (2) meki den sma si fu san ede yu e gebroiki a tekst. Den tu marki disi yu kan doro na difrenti fasi.

Poti wan aksi. Disi sa wroko moro bun te den arkiman fu yu no sabi a piki wantewante. Meki muiti fu poti na aksi na so wan fasi taki den sma musu denki fu san yu e taki. Yesus ben du dati tu. Di den Fariseiman ben waka miti en na ini a tempel èn di den ben tesi en na fesi ala sma fu kan sabi efu a e frustan den Buku fu Bijbel, dan Yesus aksi den: „San unu e denki fu Krestes? Suma manpikin na en?” Den taigi en: „Fu David.” Ne a aksi den: „Dan fa a kan, taki santa yeye ben meki David kari en ’Masra’?” Èn nanga disi a go doro fu kari den wortu di skrifi na Psalm 110:1. Den Fariseiman no ben man piki en moro. Ma den ipi sma ben arki Yesus nanga prisiri.​—Mat. 22:41-46.

Na ini a preikiwroko yu kan poti aksi tu fosi yu kari wan tekst; yu kan poti aksi soleki: „Mi nanga yu abi wan nen. Yu denki taki Gado abi wan nen tu? Wi kan feni a piki tapu na aksi dati na Yesaya 12:2.” „Oiti wán tirimakti nomo sa de gi ala libisma? Luku fa Danièl 2:44 e piki na aksi disi.” „Yu denki taki Bijbel e taki trutru fu sani di ben o pasa na ini den dei fu wi? Luku san skrifi na 2 Timoteyus 3:1-5, èn luku efu dati gersi den sani di yu sabi.” „Oiti wan kaba sa kon na pina nanga dede? A piki di Bijbel e gi, wi kan feni na ini Openbaring 21:4, 5.”

Te yu e poti bun aksi fosi yu kari wan tekst na ini wan lezing, dan dati kan gi den arkiman deki-ati fu luku a tekst na wan fasi di den no ben denki ete so fu en, srefi efu den sabi den tekst dati heri bun kaba. Ma na dati den arkiman sa du trutru? Dati kan abi fu du nanga den aksi di yu poti. Efu den aksi dati na sani nanga san den e broko den ede trutru, dan den sa du dati. Ma efu dati no de so, dan den no sa du dati. Srefi efu a tori e hari a prakseri fu den arkiman, toku den kan go prakseri tra sani te yu e leisi bijbeltekst di den yere someni leisi kaba. Fu no meki disi pasa nanga yu, dan yu musu prakseri bun na fesi fu a tori, so taki a sani di yu o pristeri, kan hari a prakseri fu den arkiman.

Tyari wan problema kon na fesi. Yu kan tyari wan problema kon na fesi, èn baka dati, poti prakseri na wan bijbeltekst di e sori fa fu lusu a problema dati. No meki den arkiman fruwakti moro leki san yu o gi den leki piki. Furu tron wan bijbeltekst e lusu soso wan pisi fu wan problema. Ma toku te yu e leisi a tekst, dan yu kan aksi den arkiman fu prakseri sortu yepi den e si na ini a tekst di kan meki den sabi san den musu du na ini a situwâsi dati.

Na a srefi fasi, yu kan kari wan gronprakseri di e sori fa wi musu tyari wisrefi na wan fasi di Gado feni bun, èn baka dati gebroiki wan Bijbel tori fu sori fa a de wan koni sani fu hori wisrefi na a gronprakseri disi. Efu wan bijbeltekst abi tu (noso kande moro) spesrutu penti di abi fu du nanga a tori di den e taki, dan wan tu takiman e aksi den arkiman fu luku efu den kan feni den penti disi. Efu wan problema muilek tumusi gi spesrutu grupu fu arkiman, dan yu kan yepi den; disi yu kan du, fu di yu e kari wan tu fasi fu lusu a problema, èn baka dati yu kan meki a tekst sori den arkiman sortuwan na a yoisti fasi.

Kari Bijbel leki a buku di e horibaka gi san yu e taki. Efu den sma e arki yu kaba èn efu yu kari wán noso moro sani fu a tori fu yu kaba, dan yu kan kari wan tekst now, fu di yu e taki nomo: „Luku san Gado Wortu e taki now fu a sani disi.” Disi e sori wan sma fu san ede a tekst di yu o leisi, e horibaka gi san yu taki.

Yehovah ben gebroiki mansma soleki Yohanes, Lukas, Paulus, nanga Petrus fu skrifi pisi fu a Bijbel. Ma den ben de soso man di yepi skrifi Bijbel; Yehovah na a trutru skrifiman fu Bijbel. Spesrutu te wi e taki nanga sma di no e studeri den Santa Buku fu Bijbel, dan efu wi ben o taki dati „Petrus ben skrifi” noso „Paulus ben taki” fosi wi leisi wan tekst, dan dati no sa abi a srefi krakti leki te wi ben o taki dati a tekst dati na a wortu fu Gado. A de moi fu si taki na ini wan tu kefal, Yehovah ben taigi Yeremia fu bigin nanga den wortu: „Yere a wortu fu Yehovah” (Yer. 7:2; 17:20; 19:3; 22:2). Awansi wi e gebroiki Yehovah nen, fosi wi kari wan tekst, noso awansi wi no e du dati, toku bifo wi o tapu nanga wi takimakandra, dan wi musu meki muiti fu sori taki san skrifi na ini Bijbel, na a wortu fu Gado.

Hori na prakseri san skrifi fosi a tekst èn baka a tekst. A bun fu yu sabi san skrifi fosi wan tekst èn baka wan tekst, te yu o luku san yu o taki, bifo yu kari a tekst. Wan tu tron, dan yu sa fruteri san skrifi lontu a tekst dati, ma sontron san skrifi lontu a tekst, kan abi krakti tapu den sani di yu o taki. Fu eksempre, yu ben o bigin taki fu den wortu fu Yob di ben abi frede gi Gado, na a srefi fasi leki fa yu ben o du dati nanga den sani di den falsi trowstuman fu en ben taki? Na Lukas ben skrifi a buku Tori fu den Apostel, ma Lukas e kari sani tu di trawan ben taki, soleki Yakobus, Petrus, Paulus, Filipus, Stefanus, nanga engel. Lukas e kari sosrefi san Gamalièl nanga tra Dyu di no ben de Kresten, ben taki. Te yu e kari so wan tekst, dan suma yu sa taki ben skrifi dati? Memre fu eksempre taki David no ben skrifi ala den psalm, èn taki Salomo no skrifi a heri buku fu Odo. A ben sa bun tu fu sabi gi suma a Bijbel skrifiman ben skrifi, èn fu sortu tori a ben e taki drape.

Gebroiki sani di e fruteri moro fu a tekst. Disi sa wroko kefalek bun te yu man sori taki den sani di ben pasa na ini a ten fu a Bijbel tori, na a srefi leki den sani di yu e taki now fu den. Na ini tra kefal, yu musu fruteri moro fu wan tekst, so taki trawan kan frustan a tekst dati. Fu eksempre, kon meki wi taki dati yu ben o gebroiki Hebrewsma 9:12, 24 na ini wan takimakandra fu a lusu-paiman. Dan kande, fosi yu leisi a tekst, yu kan fruteri pikinso fu a moro inisei kamra fu a tabernakel, di, soleki fa a tekst e sori, e prenki a presi pe Yesus go inisei di a go na hemel. Ma no go fruteri so furu sani moro fu a tekst, taki sma no man si moro fu san ede yu gebroiki a tekst di yu ben wani sori den.

Efu yu wani kon moro bun na ini a taki di yu e taki sani fosi yu kari den tekst, dan luku finifini san bun takiman e du. Pruberi fu si ala den fasi di den e gebroiki fu du dati. Ondrosuku o bun den fasi disi e wroko. Te yu e sreka yu eigi lezing, dan kon sabi san na den moro prenspari bijbeltekst, èn poti spesrutu prakseri na san ibri tekst musu tyari kon na krin. Denki bun san yu wani taki fosi yu kari den tekst disi, so taki te yu leisi en, a sa abi moro bun krakti tapu den arkiman. Te yu e kisi ondrofeni na ini a tori disi, dan gebroiki a srefi fasi disi gi ala den bijbeltekst di yu wani gebroiki. Efu yu e du a sani disi moro bun, dan yu sa poti sma prakseri moro nanga moro na a Wortu fu Gado.