Hari sma prakseri nanga den sani di yu e taki na a bigin

DEN fosi wortu di wan takiman e taki, na wan prenspari pisi fu ibri lezing. Efu trutru yu e hari a prakseri fu den arkiman na a bigin fu yu lezing, dan den sa wani kaka yesi arki den sani di yu o taki moro fara. Efu yu no man hari wan sma prakseri nanga den fosi sani di yu e taki na ini a preikiwroko, dan kande yu no sa kisi na okasi fu taki moro fara srefi. Te yu e hori wan lezing na ini a Kownukondre zaal, dan den arkiman no sa opo gowe libi a presi, ma wan tu sma kan bigin denki tra sani efu yu no hari a prakseri fu den nanga den sani di yu e taki na a bigin.

Te yu e sreka den sani di yu sa taki na a bigin fu yu lezing, dan suku fu doro dri marki. Den dri marki na disi: (1) meki taki den arkiman kaka yesi arki yu, (2) taki krin san na a tori di yu o taki, èn (3) sori fu san ede a tori de prenspari gi den arkiman fu yu. Sontron, yu kan doro den dri marki disi na a srefi ten. Ma sontron yu musu poti prakseri na den, wan-fru-wan. A kan taki san wi kari leki nomru 3, yu musu gebroiki leki nomru 1, èn so moro fara.

Fa fu kisi den arkiman so fara taki den kaka yesi arki yu. Te den arkiman kon makandra fu kon arki wan lezing, dan dati no wani taki dati den de klariklari fu kaka yesi arki a tori di yu o fruteri. Fu san ede dati no de so? A libi fu den lai nanga so furu sani di den musu du. Kande den e broko den ede nanga wan problema di den abi na oso, noso nanga wan tra sani na ini a libi. Leki takiman yu abi a muilek wroko fu hari a prakseri fu den arkiman so taki den arki yu, èn fu sorgu taki den tan arki yu. Yu kan du dati na moro leki wán fasi nomo.

Wan fu den moro barinen lezing di oiti ben hori, na a Bergitaki. Fa dati ben bigin? Soleki fa Lukas e skrifi, dan Yesus ben taki: „Koloku fu unu di pôti, . . . koloku fu unu di de nanga angri now, . . . koloku fu unu di e krei now, . . . koloku fu unu te sma abi bita-ati gi unu” (Luk. 6:20-22). Fu san ede dati ben hari a prakseri fu den sma? Nanga wan tu wortu nomo, Yesus ben sori taki a sabi wan tu fu den seryusu problema di den arkiman fu en ben abi. Baka dati, na presi taki Yesus ben taki tumusi langa fu den problema, dan a ben sori sma taki awansi den ben abi den sortu problema dati, toku den ben kan de koloku. A ben du dati na so wan fasi taki den arkiman ben wani yere moro.

Te yu e poti aksi, dan dati kan de wan bun fasi fa yu kan hari a prakseri fu sma, ma yu musu suku fu poti aksi di fiti tu. Efu den aksi di yu poti, e sori taki yu sa taki nomo fu sani di den arkiman sabi kaba, dan heri esi den no sa kaka yesi moro fu arki yu. No poti aksi di e meki den arkiman fu yu firi syen, noso di e sori taki den a no bun sma. Na presi fu dati, dan poti yu aksi na so wan fasi taki den sma sa wani denki san na den piki tapu den aksi dati. Baka te yu poti wan aksi, dan wakti pikinso fosi yu poti a tra aksi, so taki den arkiman abi ten fu prakseri san kan de a piki tapu na aksi. Te den e firi taki yu nanga den abi wan takimakandra nanga den aksi di yu e poti, dan yu sabi taki den e kaka yesi arki yu.

Wan tra fasi fa yu kan meki den arkiman kaka yesi arki yu, na te yu e fruteri wan ondrofenitori di pasa trutru. Ma efu na soso wan ondrofenitori yu sa fruteri, dan kande yu no sa doro a marki di yu wani doro efu na ondrofenitori e meki wan tu arkiman firi syen. Efu den arkiman e memre na ondrofenitori, ma den frigiti a sani di yu ben wani leri den nanga dati, dan yu misi a marki fu yu tu. Te yu e fruteri wan ondrofenitori na a bigin fu yu lezing, dan dati musu de leki wan fondamenti di yu e poti, so taki yu kan gebroiki na ondrofenitori dati fu taki moro fara fu wan tra prenspari pisi fu yu lezing. Aladi a kan, taki yu musu fruteri wan tu finifini pisi fu na ondrofenitori tu, toku yu musu luku bun fu no fruteri wan langabere ondrofenitori.

Wan tu takiman e bigin den lezing nanga wan sani di ben de na ini a nyunsu, noso wan sani di ben skrifi na ini wan fu den koranti, noso wan sani di wan lespekiwan taki. Den sortu fasi disi fu bigin yu lezing kan wroko bun tu, efu trutru den fiti na a tori di yu o taki èn efu den fiti na den arkiman fu yu.

Efu a lezing fu yu na wan pisi fu wan symposium, noso efu na wan prati di yu abi tapu a Diniwroko Konmakandra, dan furu tron a moro bun fu hori en syatu èn fu sori wantewante san na a tori di yu o taki. Efu yu sa hori wan publikitaki, dan sorgu taki yu no pasa a ten di yu kisi gi a bigin fu yu lezing. Na den sani di yu sa taki moro fara na ini yu lezing, na dati yu arkiman abi fanowdu.

Wanwan leisi, dan kande yu sa taki nanga arkiman di e tweifri na den sani di yu e taki, noso den kan si yu leki wan feanti srefi. Fa yu kan meki taki toku den arki yu? Bijbel e taki fu Stefanus, wan Kresten fu fositen, taki a ben „furu nanga koni”. Ma nanga tranga den ben tyari en na fesi a Dyu Sanhedrin. Drape a ben opo taki gi a Kresten bribi na wan krakti fasi. Fa a ben bigin? A ben bigin na wan lespeki fasi, èn a ben bigin taki fu sani di en nanga den sma di ben arki en, ben si leki tru tori. „Un man, brada nanga tata, un arki. A Gado fu glori ben sori ensrefi na wi fositen tata Abraham” (Tori. 6:3; 7:2). Na tapu na Areopagus na ini Ateine, na apostel Paulus ben fiti den bigin wortu fu en na wan grupu fu arkiman di ben de heri tra fasi leki den di fu Stefanus. Paulus ben bigin taki nanga den wortu: „Sma fu Ateine, mi si taki na ini ala sani moro leki tra sma, a gersi taki unu abi frede gi den gado” (Tori. 17:22). Fu di Paulus nanga Stefanus ben taki bun na a bigin, dati meki ala den tu grupu arkiman disi ben wani arki den go doro.

Te yu de na ini a preikiwroko, dan yu musu man hari den sma prakseri fu arki yu tu. Fu di yu no taigi na ososma na fesi taki yu ben o kon na en, dan kande a e du tra sani te yu doro. Na wan tu presi na grontapu, wan sma di kon sondro fu taki dati na fesi, musu taki wantewante fu san ede a kon. Ma na tra presi fu grontapu dan a gwenti de tra fasi, fu di yu musu draidrai pikinso fosi yu bigin taki fu san ede yu kon.​—Luk. 10:5.

Na ini ala tu kefal, te yu de nanga switifasi trutru, dan dati kan yepi yu fu taki nanga a sma. Furu tron a bun fu bigin taki wan sani di a sma abi na prakseri. Fa yu kan sabi san yu musu taki na a bigin? We, di yu waka miti a sma, a ben wroko? Kande a e luku skapu, kaw, noso tra meti, noso kande a e wroko na ini a dyari fu en oso. Kande a e meki wan wagi, a e bori, a e wasi krosi, noso a e luku den pikin. A kan taki a ben leisi wan koranti? A ben luku wan sani na strati? San yu e si lontu en? Yu e si sani di e sori taki a lobi fisi, a lobi sport, poku, koiri, computer, noso wan tra sani? Furu tron sma e broko den ede nanga nyunsu di den ben yere no so langa pasa tapu radio noso di den ben si tapu telefisi. Te yu poti wan aksi fu so wan sani noso te yu taki syatu fu den sani dati, dan dati kan meki taki yu abi wan switi takimakandra nanga so wan sma.

Na okasi di Yesus ben teki fu taki nanga wan Samaria uma na a watrapeti fu Sikar, na wan kefalek bun eksempre di e sori fa wan sma kan bigin wan takimakandra nanga a prakseri fu preiki gi wan trawan.​—Yoh. 4:5-26.

Yu musu sreka yusrefi heri bun fu sabi nanga sortu wortu yu o bigin taki nanga wan sma, spesrutu efu yu gemeente e wroko a kontren fu yu furu tron. Efu yu no e du dati, dan kande yu no sa man preiki moro gi den sma drape.

Taigi den sma krin san na a tori di yu wani taki. Na ini a Kresten gemeente, dan furu tron wan fesiman, noso wan sma di de fosi yu na tapu a podium, sa kari a nen fu yu lezing èn baka dati a sa gi yu a kari fu kon na tapu a podium. Ma toku, te yu e bigin nanga yu lezing, dan a ben o bun fu memre yu arkiman na a tori di yu o taki nanga den. Disi yu kan du fu di yu e kari a nen fu a lezing soifri baka. Awansi fa a no fa, yu musu man tyari a nen fu yu lezing kon krin na fesi na ini a lezing. Na a wan noso tra fasi, na a bigin fu yu lezing yu musu sori tapu a tori di yu o taki.

Di Yesus ben seni den disipel fu en fu go preiki, dan a ben sori krinkrin san na a boskopu di den ben musu tyari go gi sma. „Te unu e go preiki, dan unu musu taki: ’A kownukondre fu hemel kon krosibei kaba’” (Mat. 10:7). Yesus ben taki fu a ten fu wi, di a taki: „A bun nyunsu disi fu a kownukondre o preiki” (Mat. 24:14). Wi e kisi a deki-ati fu „preiki a wortu”, dati wani taki fu hori wisrefi na Bijbel te wi e preiki (2 Tim. 4:2). Ma toku, fosi yu e opo yu Bijbel, noso fosi yu e sori go na a Kownukondre, dan furu tron a de fanowdu fu sori go na wan sani di sma e broko den ede nanga dati noyaso. Kande yu kan taki wan sani fu ogridu, fu sma di no man feni wroko, fu kruktudu, fu feti, fa fu yepi yonguwan, noso yu kan taki wan sani fu siki, noso dede. Ma no taki tumusi langa fu sani di no bun; a boskopu fu yu na wan boskopu di musu meki sma firi bun. Te yu e taki nanga sma, dan meki muiti fu sori go na san Gado Wortu e taki èn tapu a Kownukondre howpu.

Sori den arkiman fu san ede a tori de prenspari gi den. Efu yu sa taki na ini a gemeente, dan yu kan de seiker taki furu tron den arkiman sa wani sabi san yu o taki. Ma yu denki taki den sa arki yu fu di den e leri wan sani di abi fu du nanga den? A sa de so taki den sa arki yu fu di den e frustan taki san den e yere, na sani di e fiti na ini den libi? Den sa arki yu fu di yu e wiki wan firi na ini den fu du wan sani nanga san yu e taigi den? A piki tapu ala den aksi disi sa de iya, efu yu hori den arkiman fu yu bun na prakseri te yu e sreka yu lezing. Dati wani taki dati yu sa prakseri san na a situwâsi fu den, nanga sortu sani den e broko den ede, èn fa den e tyari densrefi. Efu yu du dati, dan taki wan sani na a bigin fu yu lezing di e sori dati.

Awansi yu de na tapu a podium fu taki, noso awansi yu e preiki gi wan sma, toku wan fu den moro bun fasi fu hari a prakseri fu sma gi wan tori, na fu meki densrefi firi taki den de na ini a tori. Sori den fa den problema fu den, den sani di den abi fanowdu, noso den sani di den e aksi densrefi, abi fu du nanga a tori di yu e taki. Efu yu e sori den krinkrin taki yu no sa taki frafra fu sani nomo, ma taki yu sa taki fu spesrutu sani fu na afersi, dan den sa wani arki yu srefisrefi. Efu yu wani du dati, dan yu musu sreka yusrefi bun.

A fasi fa yu musu pristeri dati. San yu e taki na a bigin na a moro prenspari sani, ma fa yu e taki dati kan hari den sma tu fu arki yu. Sobun, yu musu sreka yusrefi tapu san yu o taki, ma boiti dati, yu musu sreka yusrefi tu tapu a fasi fa yu o taki a sani dati.

A de prenspari fu luku sortu wortu yu o gebroiki fu doro a marki di yu wani doro. Dati meki yu sa si taki a bun fu sreka yusrefi heri bun tapu den fosi tu noso dri sani di yu o taki syatu na a bigin. Taki den sani syatu, èn no gebroiki wortu di sma no man frustan. Te yu o hori wan lezing na ini a gemeente, dan kande yu wani skrifi den fosi wortu di yu o taki, na tapu a srefi papira pe yu skrifi sani fu yu lezing. Noso kande yu wani hori den na ede so taki yu sa man taki den nanga ala krakti di de fanowdu. Efu yu e taki bun na a bigin sondro fu hasti yusrefi, dan dati kan yepi yu fu hori yu heri lezing bun tu.

O ten yu musu bigin sreka den wortu di yu o taki na a bigin. Ibri sma abi en eigi denki fu dati. Ma wan tu bun takiman e denki taki te yu e bigin sreka yu lezing, dan yu musu bigin nanga den fosi wortu di yu o taki na a bigin. Trawan di ondrosuku fa wan sma musu hori wan publikitaki, e taki dati te yu sreka yu heri lezing kaba, dan fosi yu musu luku san yu o taki na a bigin.

Fu tru, yu musu sabi san na a tori di yu o taki èn san na den moro prenspari sani di yu wani tyari kon na fesi. Te yu sabi disi bun, dan yu kan go luku finifini san yu o taki na a bigin. Ma san yu musu du dan efu yu e sreka yu lezing fu wan schema di seti kaba? Baka te yu leisi a schema, dan efu yu abi wan sani na prakseri fa yu o bigin, dan a kan bun fu bigin skrifi dati. No frigiti tu, taki efu yu wani taki bun na a bigin, dan yu musu prakseri den arkiman fu yu, èn sosrefi den sani di de na ini a schema.