LES 28
Taki soleki fa yu gwenti fu taki
FURU TRON sma e firi bun te den e taki nanga den mati fu den. Den sani di den e taki e kon fu densrefi. Wan tu sma de fayafaya te den e taki; tra sma baka no e sori so furu faya te den e taki. Ma toku, te a sma e taki neleki fa a gwenti fu taki, dan dati e hari tra sma fu arki en.
Te yu e waka miti wan sma di yu no sabi kwetikweti, dan a no fiti fu taki neleki a sma na wan bunbun mati fu yu. Fu taki en leti, na ini son kulturu, ala leisi te wan sma e taki nanga wan tra sma di a no sabi kwetikweti, dan a gwenti de fu bigin taki na wan seryusu fasi. Baka te a sma sori lespeki gi a freimde sma, dan efu a fiti, a kan go doro fu taki neleki fa a gwenti taki nanga trawan.
Te yu de na tapu a podium èn yu e taki, dan yu musu luku bun tu. Efu yu e taki neleki yu e taki nanga wan bunbun mati, dan sma no sa si den Kresten konmakandra leki wan warti sani moro, èn a sa gersi leki den sani di e taki tapu a konmakandra, no de so seryusu. Na ini wan tu tongo, dan wan sma musu gebroiki spesrutu wortu te a e taki nanga wan owru sma, nanga wan skoromeester noso wan skoromisi, nanga wan heihei lantiman, noso nanga wan papa noso wan mama. (Luku den wortu di Stefanus nanga Paulus ben gebroiki na ini Tori fu den Apostel 7:2 nanga 13:16.) Wan sma e gebroiki tra wortu baka, te a e taki nanga en trowpatna noso nanga wan bunbun mati. Aladi a fasi fa wi e taki na tapu a podium no musu de tumusi seryusu, toku wi musu taki na wan lespeki fasi.
Ma wan tu sani de di kan meki taki wan sma e taki na wan tumusi seryusu fasi te a e hori wan lezing. Wan fu den sani disi na a fasi fa wortu seti na ini a tongo. Wan problema e opo kon te wan takiman e pruberi fu taki den srefi wortu baka soleki fa den skrifi na ini den buku. A fasi fa sani skrifi na ini buku, furu tron de tra fasi leki fa wan sma e taki. A tru taki te wi e ondrosuku tori fu sreka wisrefi gi wan lezing, dan furu tron na buku wi abi fanowdu. Kande wi kisi wan schema fu hori a lezing fu wi. Ma efu yu e taki sani neleki fa den skrifi na ini wan buku, noso efu yu e leisi den langalanga fu wan schema te yu e hori yu lezing, dan yu no sa taki neleki fa yu gwenti taki nanga trawan. Efu yu wani taki neleki fa yu gwenti taki nanga trawan, dan taki sani nanga yu eigi wortu, èn no taki den wortu na so wan fasi taki a muilek fu frustan san yu e taki.
Wan tra sani na taki yu musu taki moro gaw noso moro slow sontron. Te wan sma e taki na wan tumusi seryusu fasi, dan furu tron a e taki na wán fasi nomo, sondro fu taki moro gaw noso moro slow. Te wi e taki nanga trawan, dan wi no e taki na wán fasi nomo, ma sontron wi e taki moro gaw noso moro slow, èn furu tron wi e wakti pikinso fosi wi e taki go doro.
Te yu e taki nanga wan bigi grupu fu arkiman, dan yu musu taki neleki fa yu gwenti taki nanga trawan. Ma boiti dati, dan sontron yu musu taki moro tranga, yu musu taki nanga moro firi, èn yu musu taki nanga moro faya tu. Ala den sani disi yu musu du fu man meki den arkiman tan poti prakseri na san yu e taki.
Efu yu de na ini a preikiwroko èn yu wani taki na wan fasi di fiti a preikiwroko, ma na a srefi ten yu wani taki neleki fa yu gwenti fu taki, dan yu musu teki a gwenti fu taki bun ibri dei. Disi no wani taki dati yu musu abi kefalek bun skoroleri. Ma a bun fu teki a gwenti fu leri taki na wan bun fasi so taki trawan arki yu nanga lespeki. Hori disi na prakseri te yu e luku efu yu musu wroko na den sani di e kon now te yu e taki nanga trawan ala dei.
No taki sani tra fasi leki fa sma gwenti taki den wortu na ini a tongo di yu e taki. No taki sani tu di e meki sma si yu leki den wan di e libi na wan fasi di no e sori lespeki gi Gado. Soleki fa a skrifi na Kolosesma 3:8, dan no taki sani di grofu, noso no taki dotitaki. Na a tra sei a no de so, taki yu no musu taki leki fa trawan gwenti taki ibri dei. Bika a fasi fa trawan gwenti taki ibri dei, no de so seryusu, ma toku a fasi dati na fa sma gwenti fu taki.
No taki den srefi wortu ibri tron baka, ala leisi te yu wani tyari wan tra sani kon na fesi. Leri fu gebroiki wortu di e sori krinkrin san yu wani taki.
No taki den srefi sani ibri tron baka, ma prakseri bun fosi san yu wani taki; baka dati, dan yu kan bigin taki.
No meki a de so taki yu abi bunbun sani fu taki, ma yu e gebroiki tumusi furu wortu so dati trawan no man frustan yu moro. Efu yu wani taki yu arkiman no musu frigiti san yu taki, dan yu musu teki a gwenti fu taki sani krin èn nanga wan tu wortu nomo.
Taki na wan fasi di e sori taki yu e lespeki trawan.