Du soleki fa yu gwenti du

TE YU e taki soleki fa yu gwenti taki ala dei, dan dati e meki taki tra sma e frutrow yu. Yu ben o frutrow san wan sma e taki te a no e sori suma a de trutru? Wi no denki taki yu ben o du dati. Sobun, na presi taki yu pruberi fu de wan tra sma, dan pruberi fu du èn taki soleki fa yu gwenti.

Ma te yu e du leki fa yu gwenti du ala dei, dan dati no wani taki dati yu no e span nanga notinoti. A no ben o fiti fu taki sani na wan fowtu fasi, èn a no ben o fiti tu fu taki so, taki trawan no e frustan so bun moro san yu e taki. Luku bun tu fu no taki leki wan wakaman. Ala ten wi wani sori lespeki nanga a fasi fa wi e taki, èn sosrefi nanga a fasi fa wi e tyari wisrefi. Wan sma di e du soleki fa a gwenti du ala dei, no sa de tumusi seryusu, ma a no sa broko en ede tumusi tu nanga san trawan o denki fu en.

Na ini a preikiwroko. Te yu e go na wan oso, noso te yu e go na wan sma fu preiki gi en, dan senwe e naki yu? Furu fu wi e firi taki senwe e naki den pikinso, ma gi son wan fu wi a firi dati e tan moro langa. Te wi e span wisrefi, dan dati kan meki taki a sten fu wi e beifi pikinso èn a sten fu wi no de leki fa trawan gwenti yere en. Noso te senwe e naki wi, dan dati kan de fu si na den bruya sani di wi e du nanga wi anu noso nanga wi ede.

Wan lo sani kan meki wan preikiman abi a problema disi. Kande a e hati en ede nanga san trawan o prakseri fu en. Noso kande a e aksi ensrefi efu sani sa waka bun nanga a fasi fa a e preiki. We, disi kan pasa, ma a problema e kon te a preikiman sa poti tumusi furu prakseri na den sani disi. Efu senwe e naki yu fosi yu go preiki, dan san kan yepi yu dan? Sreka yusrefi bun èn begi Yehovah fayafaya (Tori 4:29). Prakseri o bigi a sari-ati fu Yehovah de, di a kari sma fu nyan bun fu wan bun gosontu èn fu libi fu têgo na ini Paradijs. Prakseri den wan di yu wani yepi trutru, èn prakseri taki a de fanowdu fu den yere a bun nyunsu tu.

Memre tu, taki libisma abi wan fri wani, so taki den kan teki a boskopu, ma na a tra sei, den kan taki tu dati den no wani yere a boskopu. A srefi sani ben pasa nanga Yesus di a ben preiki na ini Israel fu owruten. A wroko di yu kisi na fu preiki (Mat. 24:14). Srefi efu den sma no e gi yu na okasi fu taki, dan toku a de di yu de drape na wan kotoigi kaba gi den. Sani sa waka bun nanga yu, fu di yu meki Yehovah gebroiki yu fu du a wani fu en. Ma te yu abi na okasi fu taki, dan san na den sani di yu kan taki so? Efu yu e leri fu prakseri nomonomo san den tra sma abi fanowdu, dan dati sa meki taki yu o taki moi èn yu sa taki leki fa sma gwenti fu taki.

Te yu e gi kotoigi, dan efu yu e du èn yu e taki neleki fa yu gwenti, dan dati sa meki taki den sma di e arki yu sa firi bun te den e arki yu. A kan srefi, taki den sa de klariklari fu yere den sani di yu wani fruteri den fu Bijbel. Na presi fu hori wan lezing gi den, dan taki nanga den. De nanga switifasi. Sori taki yu wani kon sabi den moro bun, èn sori den taki yu breiti te den e taigi yu san den e denki. A no de fu taki, dati te a kulturu noso a tongo di yu e taki, wani taki yu musu hori yusrefi na wan tu sani fu sori lespeki gi sma di yu no sabi, dan yu sa musu hori yusrefi na den sani dati. Ma yu kan de klariklari fu du dati ala ten, nanga wan lafu fesi di e meki sma firi bun.

Na tapu a podium. Te yu e taki nanga wan grupu fu sma, dan a moro bun fu taki leki fa yu gwenti taki ala dei. A no de fu taki, dati te a grupu bigi èn furu arkiman de, dan yu sa musu taki moro tranga. Efu yu e pruberi fu hori wan lezing na ede noso efu yu e skrifi ala sani finifini fu taki den kefalek soifri, dan soleki fa a sori, yu e broko yu ede tumusi furu nanga den wortu di yu musu taki. A de prenspari fu taki sani soifri, ma efu yu e poti tumusi furu prakseri na a sani dati, dan a lezing fu yu sa kan tron wan tumusi seryusu sani. Yu no sa hori wan lezing moro pe yu e taki soleki fa yu gwenti taki ibri dei. Na fesi kaba yu sa musu denki bun san yu o taki; ma poti yu prakseri na san yu o taki, èn no na ibri wortu di yu musu taki.

A srefi sani wi kan taki te wan brada sa aksi yu wan tu sani na tapu a podium na wan konmakandra. Sreka yusrefi bun, ma no leisi a piki di yu musu gi, èn no leri en na ede. Ma taki en neleki fa yu gwenti taki den sortu tori dati. Disi sa meki taki te trawan e yere yu, dan den o yere fa densrefi gwenti taki den sani disi, èn dati sa meki taki den sa lobi fu arki yu.

Ma awansi wan sma man taki bun, toku efu a e meki en tumusi, dan den arkiman sa si wantewante taki a no e taki leki fa a gwenti. Fu eksempre, yu musu taki krin èn yu musu taki wortu soifri leki fa den de, ma yu no musu meki en tumusi, bika dan sma sa si taki na meki yu e meki a fasi fa yu e taki. Te yu e meki den yoisti sani nanga yu anu fu sori fa sani de èn fu poti krakti tapu sani, dan dati kan meki yu lezing kon moro moi. Ma efu yu e meki sani nanga yu anu neleki yu anu steifi noso efu yu e meki tumusi furu sani nanga yu anu, dan dati kan puru sma prakseri fu a tori di yu e taki. Taki tranga nofo, ma no taki tumusi tranga baka. Wanwan leisi a bun fu poti faya na ini yu lezing, ma no du dati nanga furu pranpran. Yu musu man drai yu sten, yu musu man taki nanga faya èn yu musu man taki nanga firi. Yu musu du ala den sani disi na so wan fasi taki yu no e poti prakseri na yusrefi, noso yu no musu meki den arkiman feni en wan fruferi sani fu arki yu.

Wan tu sma abi a gwenti fu taki wortu kefalek soifri, srefi te den no e hori wan lezing. Trawan baka, no lobi taki seryusu fasi, ma den lobi taki fa den gwenti taki nanga den mati. A prenspari sani na taki ibri dei yu musu taki bun èn yu musu tyari yusrefi na wan fasi di fiti gi wan Kresten. Dan te yu de na tapu a podium, yu sa man du soleki fa yu gwenti du èn yu sa man taki moro makriki soleki fa yu gwenti taki. Disi sa meki taki yu arkiman sa lobi fu arki yu.

Te yu e leisi na fesi sma. Te yu musu leisi na fesi sma èn yu wani du dati soleki fa yu gwenti taki ibri dei, dan yu sa musu meki muiti gi dati. Fu man du disi, dan luku san na den moro prenspari sani na ini a pisi di yu musu leisi, èn luku fa den moro prenspari sani disi e tyari kon na krin. Hori disi bun na prakseri, bika efu yu no du dati, dan yu sa leisi soso wortu. Luku fa yu musu taki den wortu di yu no sabi. Pruberi fu leisi tranga, so taki yu kan kon sabi o ten yu musu leisi moro gaw, moro slow, moro tranga, èn sortu wortu yu musu leisi makandra, so taki ala prenspari sani kon krin na fesi. Du dati ibri tron baka, teleki yu e leisi en grati. Kon sabi bun san yu musu leisi, so taki te yu e leisi nanga wan tranga sten, dan a sa gersi leki na taki yu e taki nanga den sma na wan fayafaya fasi.

A tru, taki furu fu den sani di wi e leisi na fesi sma, e komoto fu den buku di e yepi wi frustan a Bijbel. Boiti den sani di wi e leisi tapu a Theokrasia Diniwroko-skoro, dan wi e leisi bijbeltekst na ini a preikiwroko èn te wi e hori lezing na tapu a podium. Brada e kisi a grani fu leisi tu tapu a Waktitoren-studie èn tapu a Gemeente Bukustudie konmakandra. Wan tu brada di e hori bun lezing, e kisi a grani fu leisi manuscript tapu a kongres. Te yu e leisi Bijbel noso te yu e leisi wan tra sani, dan son pisi e sori yu taki na wan sma e taki drape. Leisi den pisi disi tra fasi, kande na so wan fasi taki a gersi leki na a sma srefi e taki. Efu yu e leisi wan pisi pe moro sma e taki, dan pruberi fu fiti yu sten so taki yu abi wan tra sten gi ibriwan fu den sma di e taki na ini a pisi dati. Toku wi wani taigi yu fu luku bun nanga wan sani: No go leisi leki na wan drama yu e prei, ma leisi nanga faya èn leisi leki fa yu gwenti.

Efu wan sma e leisi soleki fa a gwenti taki ibri dei, dan a sa de neleki a e taki nanga den sma gi suma a e leisi. Te a e leisi na so wan fasi, dan a no meki a e meki en, ma a sa man overtoigi den sma di e arki en.