Aksi boksoe

◼ San wi moesoe hori na prakseri te wi e leisi den paragraaf na den konmakandra?

Foeroe foe a ten di wi kisi foe hori a Waktitoren-studie nanga a gemeente boekoestudie, e gebroiki foe leisi den paragraaf. Disi wani taki dati a brada di kisi a wroko foe leisi, e tjari wan hebi frantiwortoe leki wan leriman. A moesoe leisi na wan fasi di sa ’meki sma kon sabi san [a materiaal] wani taki’, so taki den arkiman no wawan sa froestan en, ma a sa boeweigi den toe foe handri (Neh. 8:8). Foe dati ede, a leisiman moesoe sreka ensrefi boen gi a leisi di a moesoe leisi (1 Tim. 4:13; loekoe studie 6 foe a Handleiding-boekoe.) Djaso wan toe prenspari sani de foe man leisi na poebliki na wan fasi di wani taki wan sani.

Gebroiki a joisti krakti: Bepaal na fesi na tapoe sortoe wortoe noso pisi foe wan prakserilin joe moesoe poti krakti, so taki joe kan tjari a joisti fasi kon abra foe froestan a tori.

Taki den wortoe na wan joisti fasi: A de fanowdoe foe taki den wortoe na wan joisti fasi èn na wan krin fasi efoe wi wani, taki den sma di e arki froestan den wortoe di de na ini a poeblikâsi. Soekoe wortoe di joe no sabi noso di sma no e gebroiki foeroe na ini wan wortoeboekoe, noso arki den cassette-lolo foe a Genootschap.

Taki tranga èn nanga faja: Te joe e taki tranga, krin èn nanga faja, dan dati e wiki a belangstelling, e wiki den firi èn e boeweigi na arkiman foe handri.

Leisi nanga waran firi èn leki joe ben o taki nanga wan sma: Te joe e leisi grati, dan joe o man leisi leki fa joe gwenti foe taki. Efoe a leisiman sreka ensrefi èn oefen, dan en no sa de spanspan èn disi sa abi leki bakapisi taki a leisi foe en e taki nanga sma ati, na presi foe meki sma sribi èn froeferi sma. — Hab. 2:2.

Leisi a materiaal soleki fa a skrifi: Normaal wi e leisi den foetoewortoe nanga bodoi tranga di de na mindri akamarki, efoe den e tjari den wortoe di skrifi kon moro na krin. Soso den verwijstekst, di e sori nomo foe sortoe fonten a materiaal komoto, joe no abi foe leisi. Wan foetoewortoe moesoe leisi na a ten te a paragraaf e sori go na dati èn taki na fesi taki: „A foetoewortoe e taki . . . ” Baka te joe kaba leisi en, go gewoon doro nanga a tra pisi foe a paragraaf.

Te wi leisi boen na poebliki, dan dati na wan foe den prenspari fasi di wi kan ’leri tra sma foe doe ala den sani di [wi Bigi Leriman] komanderi wi’. — Mat. 28:20.