Kapitel neigi
A howpu fu na opobaka e gi wi krakti
1. San ben o pasa nanga den dedewan efu wi no ben abi a howpu taki den o kisi wan opobaka?
YU LASI lobiwan fu yu na ini dede? Efu na opobaka no ben de, dan wi no ben o abi a howpu kwetikweti fu si den baka. Den ben o tan leki fa Bijbel e taki: „Fu a sei fu den dedewan, den no sabi notinoti, . . . bika nowan wroko noso prakseri noso sabi noso koni no de na ini Syeol [a grebi], a presi pe yu e go.”—Preikiman 9:5, 10.
2. Sortu kefalek moi howpu wi kisi nanga yepi fu na opobaka?
2 Nanga yepi fu na opobaka, Yehovah sori taki a abi sari-ati gi sma, fu di a e gi kefalek furu sma di dede, a tumusi moi okasi fu opo baka na dede èn fu libi fu têgo. Disi wani taki dati yu kan abi a tumusi moi howpu taki wan dei, na ini a nyun grontapu fu Gado, yu sa de makandra baka nanga den lobiwan fu yu di go sribi na ini dede.—Markus 5:35, 41, 42; Tori fu den Apostel 9:36-41.
3. (a) Sortu sani e sori taki na opobaka de prenspari fu meki a prakseri fu Yehovah kon tru? (b) O ten spesrutu a howpu fu na opobaka e gi wi krakti?
3 Fu di wi abi a howpu fu kisi wan opobaka, dati meki wi no abi fu frede so furu gi dede. Yehovah kan gi Satan pasi fu du furu ogri nanga den getrow futuboi fu En, fu di Satan e pruberi fu buweisi na ogri-ati lei fu en taki „ala san wan libisma abi, a sa gi fu en sili ede”. Ma awinsi den futuboi fu Gado lasi den libi leki bakapisi fu dati, toku A sa gi den wan opobaka (Yob 2:4). Yesus ben de getrow na Gado te na dede srefi, èn fu dati ede Gado ben gi en wan opobaka fu libi na hemel. Na so fasi Yesus ben man go na fesi a hemel kownusturu fu en Tata fu pristeri en volmaakti libi di a ben gi leki ofrandi. Fu di a du dati, meki wi kan kisi libi. Nanga yepi fu na opobaka, dan den wan fu a „pikin ipi” di sa de nanga Krestes, abi a howpu fu tiri makandra nanga en na ini a hemel Kownukondre (Lukas 12:32). Tra sma abi a howpu fu kisi wan opobaka fu libi na ini wan paradijs grontapu fu têgo (Psalm 37:11, 29). Ala Kresten kon si taki te den e kisi fu du nanga tesi pe den ben kan lasi den libi, dan a howpu fu na opobaka e gi den krakti „di bigi pasa marki”.—2 Korentesma 4:7.
Fu san ede a de prenspari taki Kresten e bribi na ini na opobaka
4. (a) Fu san ede wi kan taki dati na opobaka na wan fu den „fosi leri”? (b) Fa furu sma fu grontapu e denki fu na opobaka?
4 Soleki fa Hebrewsma 6:1, 2 e sori, dan wan fu den „fosi leri” na a di fu na opobaka. A de wan fu den tumusi prenspari leri fu a bribi fu wi. Sondro a leri dati wi no ben o man tron lepi Kresten kwetikweti (1 Korentesma 15:16-19). Ma furu sma fu grontapu e denki taki sma no man kisi wan opobaka trutru soleki fa Bijbel e taki fu en. Fu di den no e si sani soleki fa Gado e si den, meki furu fu den e denki taki a trutru libi na a libi di den abi now. Fu dati ede den e suku fu abi prisiri nomo na ini den libi. Boiti dati, den bakaman fu den bigi kerki fu Krestenhèit nanga di fu tra kerki e denki taki libisma abi wan sili di no man dede. Ma a bribi disi no e kruderi nanga san Bijbel e leri fu na opobaka, bika efu libisma ben abi wan sili di no man dede, dan wan opobaka no ben o de fanowdu. Efu sma e pruberi fu moksi den tu leri disi kon na wan, dan dati no e gi den howpu, ma a e bruya den srefisrefi. Fa wi kan yepi opregti sma di wani kon sabi fa sani de trutru?
5. (a) San wan sma musu sabi, bifo a kan frustan san na a opobaka? (b) Sortu bijbeltekst yu ben o gebroiki fu fruteri sma san na a sili? Sortu tekst yu ben o gebroiki fu fruteri san e pasa nanga den dedewan? (c) San yu kan du te wan sma e gebroiki wan Bijbel di no e sori den tori disi krin?
5 Bifo den sma disi kan frustan o moi a seti fu na opobaka de trutru, dan den musu frustan bun fosi san na a sili èn san e pasa nanga den dedewan. Furu tron wan tu bijbeltekst nofo kaba fu tyari den tori disi kon na krin gi wan sma di e angri fu kon sabi san Bijbel e leri trutru (Genesis 2:7; Psalm 146:3, 4; Esekièl 18:4). Ma wan tu Bijbel fu a ten disi nanga wan tu buku di e fruklari pisi fu Bijbel, no e sori krin san na a sili trutru. Fu dati ede a kan de fanowdu taki wi poti prakseri na den wortu fu den fosi tongo di sma ben gebroiki fu skrifi Bijbel.
6. Fa yu kan yepi wan sma fu frustan san na a sili?
6 A Nieuwe-Wereldvertaling van de Heilige Schrift na wan heri bun sani di wi kan gebroiki fu du disi. Ala ten baka a Bijbel disi e gebroiki a wortu „sili” gi a Hebrew wortu neʹfesj èn a Griki wortu psuʹche. Na a kaba fu a Bijbel disi, wan tu bladzijde de di e kari furu bijbeltekst pe den wortu disi de fu feni. Furu tra Bijbel no e gebroiki den srefi wortu ala ten, ma a kan taki den e gebroiki a wortu „sili” èn sosrefi den wortu „mekisani”, „libisani”, „sma”, nanga „libi” na ini a presi fu a Griki nanga a Hebrew wortu. Na presi fu „mi neʹfesj” den kan taki „mi”, èn na presi fu „yu neʹfesj” den kan taki „yu”. Te wan opregti sma e teki tra Bijbel gersi nanga a Nieuwe-Wereldvertaling, dan dati sa yepi en fu si taki a Hebrew nanga a Griki wortu gi „sili”, abi fu du nanga libisma èn nanga meti. Ma noiti den wortu disi wani taki dati a sili na wan sani di wi no man si, noso wan sani di wi no man fasi. Noiti den wortu disi wani taki tu dati a sili na wan sani di e gowe libi a libisma skin te a dede èn taki a e go libi na wan tra presi.
7. Fa yu ben o tyari kon na krin san e pasa nanga den wan di de na ini a grebi, èn den wan di de na ini Gehena?
7 Boiti dati, a Nieuwe-Wereldvertaling e gebroiki a wortu „Syeol” doronomo gi a Hebrew wortu sjeʼōlʹ. A e gebroiki a wortu „Hades” gi a Griki wortu haiʹdes, èn „Gehena” gi a Griki wortu geʹen·na. „Syeol” nanga „Hades” wani taki a srefi sani (Psalm 16:10; Tori fu den Apostel 2:27). Bijbel e sori krin taki Syeol nanga Hades wani taki a grebi fu libisma, èn den wortu disi no abi fu du nanga libi, ma nanga dede (Psalm 89:48; Openbaring 20:13). Den Buku fu Bijbel e taki sosrefi fu a howpu di sma abi fu komoto na ini a grebi nanga yepi fu wan opobaka (Yob 14:13; Tori fu den Apostel 2:31). Ma tra fasi leki dati, Bijbel no e taki dati den sma di e go na Gehena sa kisi libi, èn a no e taki tu dati a sili e libi drape.—Mateyus 10:28.
8. Te wan sma e frustan san na opobaka wani taki trutru, dan fa dati kan abi krakti tapu a denki fu en èn tapu den sani di a e du?
8 Te wi tyari den tori disi kon na krin gi wan sma, dan wi kan yepi en now fu frustan o warti na opobaka kan de gi en. A sma kan bigin kisi warderi gi a lobi di Yehovah sori fu di a seti so wan moi sani. Boiti dati, a howpu fu miti lobiwan baka na ini a nyun grontapu fu Gado, kan yepi den sma di lasi lobiwan na ini dede, fu no sari so furu moro. Te wi e frustan den sani disi, dan dati kan yepi wi tu fu frustan san a dede fu Krestes wani taki. Den Kresten fu a fosi yarihondro ben frustan taki a ben de prenspari taki wan Kresten e bribi na ini na opobaka fu Yesus Krestes, fu di na opobaka fu en e gi trawan na okasi fu kisi wan opobaka tu. Den ben e preiki fayafaya fu na opobaka fu Yesus èn fu a howpu di sma ben kisi leki bakapisi fu dati. Na so yu abi sma na ini a ten disi di e frustan san na opobaka wani taki èn den breiti trutru taki den abi a howpu disi. Den sma disi de klariklari tu fu fruteri trawan a prenspari tru tori disi.—Tori fu den Apostel 5:30-32; 10:42, 43.
A sa gebroiki ’a sroto fu Hades’
9. Fa Yesus e gebroiki „den sroto fu dede èn fu Hades” fosi?
9 Ala den sma di sa de nanga Krestes na ini en hemel Kownukondre musu dede te fu kaba. Ma den sabi heri bun sortu dyaranti a ben gi den di a ben taki: „Mi ben dede, ma now mi e libi fu têgo, iya, fu ala ten èn mi abi den sroto fu dede èn fu Hades” (Openbaring 1:18). San den wortu fu en ben wani taki? Yesus ben fruteri san ben pasa nanga ensrefi. Ensrefi ben dede tu. Ma Gado no ben libi en na ini Hades. Tapu a di fu dri dei, Yehovah srefi gi en wan opobaka èn Yehovah gi en libi leki wan yeye di no man dede (Tori fu den Apostel 2:32, 33; 10:40). Boiti dati, Gado ben gi en „den sroto fu dede èn fu Hades”. Yesus ben musu gebroiki den sroto disi fu frulusu tra libisma fu a grebi èn fu den bakapisi fu a sondu fu Adam. Fu di Yesus abi den sroto dati, meki a man gi den getrow bakaman fu en wan opobaka na dede. Den fosiwan di a e gi wan opobaka na den memre fu en gemeente di salfu nanga santa yeye. A e gi den sma disi na okasi fu libi na ini hemel sondro fu man dede, soleki fa en hemel Tata ben gi en a libi dati.—Romesma 6:5; Filipisma 3:20, 21.
10. O ten den getrow salfu Kresten e kisi wan opobaka?
10 O ten den getrow salfu Kresten ben o kisi wan opobaka fu libi na hemel? Bijbel e sori taki na opobaka dati bigin kaba. Na apostel Paulus ben fruteri taki den ben o kisi wan opobaka ’na a ten fu Krestes en denoya’, èn a denoya fu en bigin na ini 1914 (1 Korentesma 15:23). Te getrow salfuwan e dede now na ini a denoya fu Krestes, dan den no abi fu tan na ini dede. Te den e dede, dan wantewante den e kisi wan opobaka leki yeye; den e „kenki, na ini wan momenti, nanga wan pingi fu na ai”. Den e prisiri fu tru, fu di den bun wroko di den du „e go makandra nanga den”!—1 Korentesma 15:51, 52; Openbaring 14:13.
11. Sortu opobaka furu sma sa kisi, èn o ten disi sa bigin?
11 Ma a no de so taki soso den wan di sa tron kownu fu a hemel Kownukondre e kisi wan opobaka. Openbaring 20:6 e kari na opobaka disi „a fosi opobaka”. Disi e sori taki wan tra opobaka sa de baka dati. Den wan di sa kisi a tra opobaka disi sa abi a howpu fu libi fu têgo na ini wan paradijs grontapu. O ten sma sa kisi na opobaka disi? A buku Openbaring e sori taki disi o pasa baka a pori fu „grontapu nanga hemel”, dati na a ogri grontapu fu now èn den tirimakti fu en. A grontapu disi sa kon na wan kaba heri esi. Baka dati, te a ten fu Gado doro, dan na opobaka fu den sma na grontapu sa bigin.—Openbaring 20:11, 12.
12. Sortu getrow sma sa kisi wan opobaka na grontapu, èn fu san ede dati de wan kefalek moi howpu?
12 Suma sa kisi wan opobaka na grontapu? Sonwan fu den sma di sa kisi na opobaka disi na den getrow futuboi fu Yehovah fu fositen. Fu di den man nanga uma disi ben abi wan tranga bribi na ini na opobaka, meki den „no ben wani kon fri nanga nowan sortu lusu-paiman”. Disi wani taki dati den no ben drai den baka gi Gado soso fu no lasi den libi na wan ogri-ati fasi. A sa de wan prisiri ten trutru fu kon leri sabi den sma disi èn fu yere den fruteri finifini fa den sani ben pasa di Bijbel e taki syatu fu den nomo! Wan tu fu den sma di sa kisi wan opobaka na grontapu tu na Abel, a fosi getrow kotoigi fu Yehovah; Heinok nanga Noa, preikiman fu Gado di no ben frede fu panya boskopu fu warskow bifo a Frudu; Abraham nanga Sara, di ben teki engel na ini den oso; Moses, di ben kisi a Wet na tapu a Sinaibergi; profeiti soleki Yeremia di ben abi furu deki-ati èn di ben si fa Yerusalem kisi pori na ini 607 b.G.T.; èn Yohanes a Dopuman, di ben yere fa Gado srefi ben taki dati Yesus na En Manpikin. Boiti dati, furu getrow man nanga uma di dede na ini den lasti dei fu a disiten ogri grontapu sa kisi wan opobaka tu.—Hebrewsma 11:4-38; Mateyus 11:11.
13, 14. (a) San o pasa nanga Hades èn nanga den dedewan di de na ini? (b) Suma sa kisi wan opobaka tu, èn fu san ede?
13 Baka wan pisi ten, tra sma boiti den getrow futuboi fu Gado sa kisi wan opobaka tu. Nowan sma sa de na ini a grebi moro. Na a fasi fa Yesus sa gebroiki ’a sroto fu Hades’ gi a bun fu libisma, wi kan si taki bun furu sma sa kisi wan opobaka. Disi de fu si na ini a fisyun di na apostel Yohanes ben kisi. A ben si fa Yesus ben „fringi” Hades „go na ini a se fu faya” (Openbaring 20:14). San disi wani taki? Disi wani taki dati Hades, noso a grebi fu libisma, kisi pori krinkrin. A no sa de moro kwetikweti. Nowan dedesma no sa de na ini moro, bika Yesus sa gi ala den getrow futuboi fu Yehovah libi baka, èn boiti dati, a sa gi onregtfardiki sma srefi wan opobaka tu fu di a abi sari-ati nanga den. Gado Wortu e gi wi a dyaranti: „Wan opobaka o de fu den regtfardikiwan nanga den onregtfardikiwan.”—Tori fu den Apostel 24:15.
14 Nowan fu den onregtfardikiwan disi sa kisi wan opobaka soso fu kisi dedestrafu baka. Na ini a regtfardiki grontapu di sa de na ondro a Kownukondre fu Gado, den sma disi sa kisi leri so taki den kan go libi soleki fa Yehovah wani. A fisyun ben sori taki „a bukulolo fu libi” sa opo. Sobun, den sa kisi na okasi taki a nen fu den skrifi na ini a bukulolo dati. Gado sa „krutu ibriwan fu den . . . fu san den du” baka di den kisi wan opobaka (Openbaring 20:12, 13). Fu dati ede, te wi e prakseri fu san den sma disi sa du te fu kaba, dan na opobaka fu den kan de „wan opobaka fu libi”. A no abi fu de so nomonomo taki den sa kisi „wan opobaka fu kisi krutu”.—Yohanes 5:28, 29.
15. (a) Suma no sa kisi wan opobaka? (b) San wi musu du now di wi kon sabi san na opobaka trutru?
15 Ma a no de so taki ala sma di oiti ben libi èn di dede sa kisi wan opobaka. Son sma du sondu fu san den no man kisi pardon kwetikweti. Den sma disi no de na ini Hades, ma na ini Gehena, pe den e kisi pori fu têgo. Na mindri den sma disi, yu sa abi sma tu di kisi pori na ini a „bigi banawtu” di de heri krosibei (Mateyus 12:31, 32; 23:33; 24:21, 22; 25:41, 46; 2 Tesalonikasma 1:6-9). Sobun, Yehovah e sori furu sari-ati fu di a e frulusu den dedewan fu Hades. Ma na abi di wi abi a howpu fu kisi wan opobaka no wani taki dati wi no abi fu broko wi ede nanga a fasi fa wi e libi now. Den sma di e opo densrefi fu espresi teige Yehovah leki a Moro Hei Tiriman, no sa kisi wan opobaka. Now di wi kon frustan disi, dan dati musu gi wi deki-ati fu sori taki wi abi warderi trutru gi a lobi bun-ati fu Gado. Wi kan sori dati te wi e libi soleki fa en wani.
Wi e kisi krakti fu di wi abi a howpu fu na opobaka
16. Fa a howpu fu na opobaka kan gi wi furu krakti?
16 Den sma di e bribi trutru taki den sa kisi wan opobaka, kan kisi krakti fu dati. Now, te wi kon owru, dan wi sabi taki te fu kaba wi sa dede, awinsi sortu dresi wi e gebroiki fu man libi pikinso moro langa (Preikiman 8:8). Efu wi dini Yehovah na wan getrow fasi makandra nanga en organisâsi, dan wi kan abi na overtoigi taki wi sa abi wan bun tamara. Wi sabi taki nanga yepi fu na opobaka, wi sa kisi libi baka, te a ten fu Gado doro. A sa de wan switi libi fu tru! Disi sa de „a trutru libi”, soleki fa na apostel Paulus ben kari en.—1 Timoteyus 6:19; Hebrewsma 6:10-12.
17. San kan yepi wi fu tan getrow na Yehovah?
17 Fu di wi sabi taki wan opobaka de èn fu di wi sabi a Sma di sa gi wi dati, dan dati e yepi wi fu abi wan tranga bribi. Disi e gi wi a krakti fu de getrow na Gado, awinsi ogri-ati frufolguman wani kiri wi. Langa ten kaba Satan hori sma na katibo fu di a sabi taki sma frede fu dede tumusi fruku. Ma Yesus no ben frede fu dede. A ben tan getrow na Yehovah te na dede. Fu di Yesus gi ensrefi leki wan frulusu-ofrandi, meki sma no abi fu frede gi dede moro.—Hebrewsma 2:14, 15.
18. San yepi den futuboi fu Yehovah fu tan hori den soifri retifasi?
18 Fu di den futuboi fu Yehovah poti bribi na ini a srakti-ofrandi fu Krestes èn na ini na opobaka, meki den ben man tan hori den soifri retifasi. Te den ben kisi tesi, dan den ben sori taki ’den no lobi a libi fu den’ moro leki den lobi Yehovah (Openbaring 12:11). Den e handri nanga koni, fu di den no e poti Kresten gronprakseri na wan sei soso fu man kibri a libi di den abi now (Lukas 9:24, 25). Den sabi taki awinsi den e lasi den libi now fu di den horibaka na wan getrow fasi gi a tiri fu Yehovah, a sa gi den libi baka nanga yepi fu wan opobaka. Yu abi so wan bribi tu? Yu sa abi so wan bribi te yu lobi Yehovah trutru èn te yu e frustan taki a howpu fu na opobaka warti trutru.
Takimakandra fu luku baka san wi leri
• Fu san ede wan sma musu frustan fosi san na a sili èn san e pasa nanga den dedewan, bifo a kan frustan o warti na opobaka de?
• Suma sa kisi wan opobaka na dede? San disi wani taki gi wi, now di wi kon sabi dati?
• Fa a howpu fu na opobaka e gi wi krakti?
[Prenki na tapu bladzijde 84, 85]
Yehovah e pramisi wi taki wan opobaka sa de fu den regtfardikiwan nanga den onregtfardikiwan