Suma abi a tru bribi?

1. San wi musu du fu plisi Gado?

EFU wi wani abi wan tranga, lobi-ati banti nanga Gado, dan wi no musu abi noti fu du nanga falsi bribi. Wi musu hori wisrefi na den markitiki fu a tru bribi. Na ini a ten disi, milyunmilyun sma na heri grontapu e du dati.

2. Pe Yehovah Kotoigi de fu feni, èn san na a wroko fu den?

² Soleki fa Bijbel ben taki na fesi kaba, den tru anbegiman na „wan bigi ipi sma” di komoto „fu ala kondre, lo, pipel, nanga tongo” (Openbaring 7:9). Na ini 235 kondre, milyunmilyun fayafaya Kotoigi fu Yehovah e yepi tra sma fu kon sabi a lobi-ati fasi fa Yehovah e handri èn den sani di a e aksi fu wi.

Sani di e sori suma na den tru anbegiman

3. Suma den Kotoigi e anbegi, èn na sortu fasi fu anbegi den no e teki prati?

³ Den Kotoigi e frustan krin taki na Yehovah wawan warti fu sma anbegi en. Fu dati ede, den e weigri fu anbegi popki, noso prenki fu tra gado (1 Yohanes 5:21). Den no e gi grani na den dedewan, kande fu di den o hori brokodei, noso fu di den o hori densrefi na tra gwenti di e horibaka gi falsi bribi nanga „den leri fu ogri yeye” (1 Timoteyus 4:1). Ma na a tra sei, den e trowstu den sma di e sari fu di den lasi wan lobiwan fu den na ini dede. Iya, den e fruteri den sma fu a pramisi fu Gado taki den dedewan sa kisi wan opobaka na ini wan paradijs grontapu.​—Yohanes 5:28, 29; Tori fu den Apostel 24:15.

4. Fa a pipel fu Gado e denki fu bonu?

⁴ Den Kotoigi no abi noti fu du nanga sani soleki bonu nanga wisi, fu di den sabi taki den sani disi na fu Didibri. Den no e bribi taki bonu kan kibri den, ma den e bribi taki na Yehovah man kibri den.​—Odo 18:10.

5. Na sortu fasi Yehovah Kotoigi „no de wan pisi fu grontapu”?

⁵ Yesus ben taki dati den disipel fu en „no de wan pisi fu grontapu” (Yohanes 17:16). Yesus srefi ben weigri fu teki prati na a politiek fu en ten (Yohanes 6:15). Na so a de tu taki den Kotoigi no e teki prati na politiek, den no e feni taki a kondre fu den na a moro bunwan di de, èn den no e feti fu kisi wan moro hei posisi na ini a grontapu disi. Ma toku a de so, taki den e pai belasting moni èn den e gi yesi na den wet fu a kondre pe den e libi.​—Yohanes 15:19; Romesma 13:1, 7.

6. Na sortu wet futuboi fu Gado e hori densrefi te a abi fu du nanga trow èn brokotrow?

⁶ Fu di den Kotoigi e gi yesi na lanti, meki den e sorgu taki den e trow soleki fa lantiwet e taki (Titus 3:1). Den e gi yesi na Gado, èn dati meki den no abi moro leki wán trowpatna (1 Timoteyus 3:2). Sosrefi, fu di den e gebroiki Bijbel gronprakseri na ini den libi, meki nofo tron den futuboi fu Gado no e brokotrow.

7. Fa den Kotoigi e sori lobi gi makandra?

⁷ Den Kotoigi lobi makandra. A lobi disi èn sosrefi a lobi di den abi gi Gado, e meki taki den e libi na ini wánfasi leki trutru brada nanga sisa, aladi den de fu someni lo nanga kondre. Te wan rampu pasa, noso te nowtu de, dan esi-esi den Kotoigi e kon yepi makandra. A lobi fu den Kotoigi de fu si na ini a fasi fa den e libi.​—Yohanes 13:35.

8. Sortu ogri sani a pipel fu Gado no e du?

⁸ A pipel fu Yehovah e du ala muiti fu libi wan opregti libi. Den no e fufuru, den no e lei, den no e du hurudu, den no e drungu, èn den no e bedrigi sma te den e du bisnis. Den masra no e fon den wefi. Sonwan fu den ben e du den sani disi fosi den tron Kotoigi, ma nanga a yepi fu Yehovah den tapu nanga den sani disi. Na ini Gado ai, den „wasi kon krin”.​—1 Korentesma 6:9-11.

Sma di e du a wani fu Gado

9. San wan buku taki fu den kerki na ini Afrika di teki Afrikan kulturu gwenti abra?

⁹ Soleki fa wi sabi, dan furu kerki e taki dati den abi a tru bribi. Furu fu den feni taki disi de so, fu di den man du ala sortu kefalek sani. Fu eksempre, luku san wan buku e taki fu den kerki na ini Afrika di teki Afrikan kulturu gwenti abra: „Na ini furu [nyun Kresten grupu] yu abi sma di e du a wroko fu wan bonuman, noso fu wan obiaman. . . . Den sma disi e feni taki den e taki profeititori èn taki den e du wondru. Den profeiti na ini den kerki disi e si fisyun èn den e fruklari dren. Den e gebroiki santa watra, santa oli, asisi, kandra, nanga switismeri di den e bron fu dresi sma èn fu meki taki wan sma no kon siki.”

10, 11. Fu san ede den sani di sma e si leki wondru no e buweisi taki wan kerki na fu Gado?

¹⁰ Den sma di de na ini den sortu kerki disi, feni taki den wondru na wan buweisi taki Gado e blesi a kerki fu den. Ma den sani disi di sma e si leki wondru no e buweisi taki Yehovah feni wan kerki bun. Satan e gi son falsi anbegiman a makti fu du „krakti wroko” (2 Tesalonikasma 2:9). Boiti dati, Bijbel ben taki na fesi dati a krakti di Gado ben gi libisma fu man du sani soleki fu taki profeititori, fu taki na ini tra tongo, èn fu abi spesrutu sortu sabi, ben o „kon na wan kaba”.​—1 Korentesma 13:8.

¹¹ Yesus ben warskow: „A no ala sma di e taigi mi: ’Masra, Masra’, sa go na ini a kownukondre fu hemel, ma na a sma di e du a wani fu mi Tata na hemel, sa go na ini. Furu sma sa taigi mi na a dei dati: ’Masra, Masra, a no na ini yu nen wi ben taki profeititori? A no na ini yu nen wi ben puru ogri yeye na sma tapu? A no na ini yu nen wi ben du furu bigi wondru?’ Toku mi sa taigi den krin: Mi no sabi unu kwetikweti! Komoto na mi fesi, un sma di e du kruktudu.”​—Mateyus 7:21-23.

12. Suma sa go na ini a Kownukondre fu hemel?

¹² Ma suma sa go na ini a Kownukondre fu hemel dan? Na den wan di e du a wani fu Yehovah.

Preikiman fu Gado Kownukondre

13. Sortu wroko Gado wani en pipel fu du na ini a ten disi, èn suma na den sma di e du dati?

¹³ San Gado wani en pipel fu du na ini a ten disi? Yesus ben taki: „A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mateyus 24:14). Disi na a wroko di Yehovah Kotoigi e du fayafaya.

14. San na Gado Kownukondre, èn suma o tiri na ini a Kownukondre dati?

¹⁴ „Na heri grontapu” Yehovah Kotoigi e meki bekènti taki Gado Kownukondre na wan hemel tirimakti di o tiri heri grontapu na wan regtfardiki fasi. Den e leri sma taki Yehovah poti Krestes Yesus leki Kownu fu a Kownukondre dati, èn taki a o tiri makandra nanga 144.000 tra sma di Gado teki puru na mindri den libisma na grontapu.​—Danièl 7:14, 18; Openbaring 14:1, 4.

15. San a Kownukondre o pori?

¹⁵ Nanga yepi fu Bijbel, den Kotoigi e sori sma taki Gado Kownukondre o pori a heri sistema fu Satan. Nowan falsi bribi nanga falsi leri o de moro, di e pori Gado nen èn di e gi glori na Didibri! (Openbaring 18:8) Sosrefi, nowan libisma tirimakti o de moro, di e opo ensrefi teige Gado!​—Danièl 2:44.

16. Suma na den sma di Krestes Yesus sa tiri, èn pe den sa libi?

¹⁶ Boiti dati, Yehovah Kotoigi e meki bekènti taki Krestes Yesus sa du bigi wondru di o tyari wini kon gi ala sma di e du san Gado wani. Na den sma disi, Yesus sa tiri na grontapu. Bijbel e pramisi: „A sa frulusu a pôtiwan di e bari fu kisi yepi, sosrefi a sma di e kisi kwinsi èn ibri sma di no abi yepiman. A sa firi sari gi a mofinawan èn gi a pôtiwan, èn a sa frulusu den sili fu den pôtiwan.”​—Psalm 72:12, 13.

17. Suma na den wan-enkri sma di e meki Gado Kownukondre bekènti?

¹⁷ Nowan tra grupu sma de di e du a wani fu Gado, namku fu preiki a Kownukondre bun nyunsu. Na Yehovah Kotoigi wawan e meki Gado Kownukondre bekènti gi sma na heri grontapu.