Frantiwortoe e go makandra nanga a sabi di wan sma sabi a joisti relisi
„Kolokoe foe den sma di e jere a wortoe foe Gado èn e ondrow en!” — LUKAS 11:28.
1. Sortoe sma e bow a libi foe den lontoe a joisti relisi, so esi leki den kon sabi disi?
A NO DE nofo foe kon sabi a joisti relisi nomo. Efoe wi na sma di lobi san joisti èn san troe, dan, so esi leki wi feni a joisti relisi, wi sa bow wi libi na dati lontoe. A troe relisi a no soso wan filosofia na froestan sei; a de wan fasi foe libi. — Psalm 119:105; Jesaja 2:3; teki gersi Tori foe den Apostel 9:2.
2, 3. (a) Fa Jesus ben poti krakti na tapoe a prensparifasi foe doe a wani foe Gado? (b) Sortoe frantiwortoe de na tapoe ala sma di sabi a joisti relisi?
2 Jesus Krestes ben poti krakti na tapoe a prensparifasi foe doe san Gado ben meki kon na krin ini a tori foe En wani. Di Jesus ben kaba nanga san sma kon sabi leki a Bergitaki, a ben meki bekènti taki a no ala sma di ben kari en Masra (so boen, den sma di e taki dati den na kresten) ben sa go na ini a Kownoekondre; soso den sma di e doe a wani foe en Tata ben sa go. Trawan, na so a ben taki, a ben sa trowe den leki „wrokoman foe kroektoedoe”. Foe san ede kroektoedoe? Bika so leki fa bijbel e taki en, te wan sma e misi foe doe Gado wani, dan dati na sondoe, èn ala sondoe na kroektoedoe. (Mateus 7:21-23; 1 Johanes 3:4; teki gersi Romesma 10:2, 3.) A kan taki wan sma sabi a joisti relisi, a e prèisi den sma kande di e leri dati na sma, èn kande a e prèise den sma di e libi akroederi a joisti relisi, ma en toe abi a frantiwortoe foe poti a joisti relisi ini en eigi libi (Jakobus 4:17). Efoe a e teki a frantiwortoe dati, dan a sa kon si taki a libi foe en sa wani taki moro, èn a sa ondrofeni prisiri di no kan kon na no wan tra fasi.
3 Ini na artikel di ben de fosi a wan disi, wi ben loekoe siksi marki di kan meki taki sma kan kon sabi a troe relisi. Ibriwan foe den no wawan e jepi wi foe kon sabi a joisti relisi, ma den e sori wi persoonlijk den tjalensi nanga den okasi toe. Fa so?
San joe e doe na tapoe a Wortoe foe Gado?
4. (a) San den sma di de moro njoen, te den e bigin foe abi demakandra nanga den Kotoigi foe Jehovah, e si heri esi na den Kotoigi disi ini a tori fa den e gebroiki bijbel? (b) Sortoe krakti a abi na tapoe den foetoeboi foe Jehovah te den e kisi boen njanjan na jeje fasi?
4 Te Jehovah Kotoigi e studeri bijbel nanga sma di no so langa pasa ben kisi belangstelling, dan foeroe foe den sma disi di de moro njoen, esi-esi e kisi a koni foe si krin taki den sani di den e leri, e kon foe bijbel. Te den sma moesoe kisi wan piki na tapoe den aksi foe den, dan den Kotoigi no e sori den go na den fondamenti kerkileri, na den bribi nanga gwenti foe libisma, noso na den fasi fa prenspari sma e prakseri. Gado en eigi Wortoe na a troe fonten. Te den e go na a Kownoekondrezaal, dan den e si taki drape toe, bijbel na a moro prenspari leriboekoe. Sma di e soekoe waarheid serjoesoe, no abi foeroe ten fanowdoe foe kon froestan taki a prisiri di den e si na Jehovah Kotoigi abi wan moro bigi reide, èn dati na foe di den e kisi boen njanjan na jeje fasi foe Gado Wortoe. — Jesaja 65:13, 14.
5. (a) Sortoe tjalensi e kon gi denwan di e loekoe na den Kotoigi foe Jehovah? (b) Fa den kan abi wan prati na ini a prisiri di den Kotoigi abi?
5 Te joe e si disi, dan san joe e doe na dati tapoe? Efoe joe e kon froestan disi, dan a no e fiti taki joe e tan e loekoe nomo, ma no e doe noti, èn joe no moesoe wani foe de so toe. Bijbel e sori taki den sma di de „sma di e jere nomo”, ma di no de „sma di e doe san a wortoe e taki” e ’kori densrefi nanga falsi prakseri’ (Jakobus 1:22). Den e kori densrefi, bika den e misi foe si taki, awansi san den e taki kande, a misi di den e misi foe gi jesi na Gado e sori taki den no lobi en troetroe. Te wan sma e taki dati a abi bribi, ma a no e doe sani ini akroederi nanga a bribi, dan a bribi dati na wan bribi di dede (Jakobus 2:18-26; 1 Johanes 5:3). Na kontrari, a sma di, foe di a abi lobi gi Jehovah, de „wan sma di e doe a wroko”, sa de „kolokoe foe di a e doe en”. Ija, a de so leki fa Jesus Krestes ben tjari kon na krin, taki „kolokoe foe den sma di e jere a wortoe foe Gado èn e doe en”! — Jakobus 1:25; Lukas 11:28; Johanes 13:17.
6. Gi sortoe okasi wi srefi sa doe moeiti foe kisi, efoe wi e warderi Gado Wortoe troetroe?
6 A prisiri dati sa kon moro dipi te joe e gro ini a sabi foe Gado wani èn e doe den tra sani di joe sa leri ete. Omeni moeiti joe sa doe foe studeri Gado Wortoe? Tindoesoen tron tindoesoen sma di no ben sabi fa foe leisi nanga fa foe skrifi, wroko tranga foe leri fa foe leisi, èn den ben doe disi spesroetoe foe man leisi den Boekoe foe bijbel èn foe leri den na tra sma. Trawan e opo ibri mamanten froekoefroekoe, so taki ibri dei den kan gebroiki pikinso ten foe leisi bijbel nanga den bijbelstudie jepisani, so leki A Waktitoren. Te joesrefi e leisi bijbel doronomo noso e soekoe den bijbeltekst di den skrifi ini den tra sani di joe e studeri, dan poti prakseri finifini tapoe den wet nanga den komando foe Jehovah, èn proeberi foe si krin den foeroe gronprakseri, di de drape foe gi wi tiri. Prakseri dipi foe san ibri pisi e meki kon na krin foe Gado, a prakseri foe en, nanga a fasi fa a e handri nanga a libisma famiri. Gi a ten pasi foe meki disi abi krakti na tapoe joe ati. Go prakseri efoe fasi de, foe poti bijbel rai moro finifini ini joe eigi libi. — Psalm 1:1, 2; 19:7-11; 1 Tesalonikasma 4:1.
Joe e gi joesrefi dorodoro na a dini foe Jehovah?
7. (a) Fa a leri foe a Dri-wánfasi ben abi krakti na tapoe a moeiti di sma e doe foe anbegi Gado? (b) San kan pasa te wan sma e leri a waarheid di abi foe doe nanga Jehovah?
7 Gi miljoenmiljoen sma a ben de wan froelekti foe leri taki a troe Gado no de wan Dri-wánfasi. A froeklari taki „a de wan kibritori”, noiti ben satisferi den. Fa den ben kan kon moro krosibei na wan Gado di den no ben man froestan? Leki wan bakapisi foe a leri dati, den ben abi a fasi foe denki nanga firi foe no poti prakseri tapoe a Tata (di a nen foe en, den noiti no ben jere ini kerki) èn foe anbegi Jesus leki Gado noso foe gi na anbegi foe den na Maria (di sma ben leri den, taki en na a „Mama foe Gado”). Ma na ati foe den ben breiti te wan Kotoigi foe Jehovah ben e opo bijbel èn ben e sori den a persoonlijk nen foe Gado, Jehovah (Psalm 83:18). Wan oema foe Venezuela ben breiti sote di wan jongoe oema-Kotoigi ben sori en a nen foe Gado, taki a ben brasa na Kotoigi dati, di ben prati a diri waarheid dati nanga en, èn na oema ben agri foe teki wan oso-bijbelstudie. Te den sortoe sma dati e leri taki Jesus ben taki foe en Tata leki „mi Gado èn oen Gado” èn taki Jesus ben kari en Tata, „a wan-enkri troe Gado”, dan den e froestan taki san bijbel e leri foe Gado no de wan sani di sma no man froestan (Johanes 17:3; 20:17). Te den kon sabi den eigifasi foe Jehovah, dan den e firi densrefi moro krosibei foe en, den e bigin foe begi en, èn wani foe plisi en. San na a bakapisi?
8. (a) San miljoenmiljoen sma doe kaba, foe di den lobi Jehovah èn den angri foe plisi en? (b) Foe san ede a kresten dopoe de toemoesi prenspari?
8 Ini den tin jari di pasa, 2.528.524 sma ini siksi pisi foe grontapoe èn na tapoe wan lo èilanti, gi a libi foe den abra kaba na Jehovah èn den ben simboliseer a gi disi di den ben gi densrefi abra nanga a teki di den ben teki dopoe ini watra. Joe ben de wan foe den, noso joe e sreka joesrefi now foe teki dopoe? A dopoe na wan prenspari sani ini a libi foe ibri troe kresten. Jesus ben gi den bakaman foe en a komando foe meki disipel foe sma foe ala nâsi èn foe dopoe den (Mateus 28:19, 20). A de wan moi sani foe si toe, taki a ben de wantewante baka di Jesus srefi ben teki dopoe, taki Jehovah srefi ben taki komoto na hemel, èn ben taki: „Joe na mi Manpikin, a lobiwan; mi feni joe boen.” — Lukas 3:21, 22.
9. San wi moesoe doe foe wi sei, foe tan abi wan matifasi nanga Jehovah di a feni boen?
9 Wan matifasi nanga Jehovah di a feni boen, na wan sani di sma moesoe hori waran. Efoe joe kon abi so wan matifasi, foe di joe gi joesrefi abra èn teki dopoe, dan tan farawe foe iniwan sani di ben sa pori a matifasi dati. No meki den broko-ede foe a libi nanga den sorgoe foe sani na skin fasi poesoe a matifasi dati go na wan di foe toe presi (1 Timoteus 6:8-12). Libi troetroe ini akroederi nanga a rai foe Odo 3:6: „Poti prakseri na tapoe en [Jehovah] ini ala joe fasi foe libi, èn a sa meki joe pasi kon reti.”
Omeni krakti a lobi foe Krestes abi na joe tapoe?
10. Foe san ede na anbegi di wi e anbegi Jehovah no e meki taki wi no e poti prakseri na tapoe Jesus?
10 A no de foe taki, dati wan joisti warderi gi Jehovah leki a wan-enkri troe Gado, no e meki taki wan sma no e poti prakseri na tapoe Jesus Krestes. Na kontrari, Openbaring 19:10 e taki: „Bika a kotoigi di wan sma e gi foe Jesus, e meki en taki profeititori nanga jepi foe santa jeje.” Foe Genesis te kon miti Openbaring, den profeititori di taki nanga jepi foe santa jeje, e taki finifini foe a prati di Jesus Krestes abi ini a prakseri foe Jehovah. Te wan sma kon sabi den finifini tori dati, dan a e kisi wan heri moi fasi foe si sani, di fri foe den tori di drai èn foe den fowtoe prakseri, di e kon foe den falsi leri foe krestenhèit.
11. Fa a ben abi krakti na tapoe wan oema na Polen di a ben leri san bijbel e leri troetroe foe Gado Manpikin?
11 A froestan di wan sma e kon froestan a waarheid foe Gado Manpikin moro boen, kan abi boen foeroe krakti na tapoe a sma dati. Dati ben de a kefal nanga Danoeta, wan oema na Polen. Aiti jari kaba a ben abi demakandra nanga Jehovah Kotoigi, èn a ben prisiri foe san den ben leri en, ma a no ben meki a troe anbegi kon tron a fasi fa a ben libi. Ne a ben kisi wan eksemplaar foe a boekoe De grootste mens die ooit heeft geleefd (A moro bigi man di oiti ben libi), di e taki foe a libi foe Krestes na wan fasi di sma kan froestan makriki.a Latilati na neti, a ben opo a boekoe, nanga a prakseri foe leisi soso wán kapitel. Ma a no ben de te son-opo, di a kaba leisi a boekoe, èn ben poti en na wan sei. A bigin krei. „Jehovah, gi mi pardon”, a ben begi tranga. Leki wan bakapisi foe san a ben e leisi, a ben si moro krin leki oiti na fesi, a lobi di Jehovah nanga en Manpikin ben sori. A ben froestan, taki aiti jari langa, sondro foe taki tangi, a ben drai en baka gi a jepi di Gado ben e gi en nanga ala pasensi. Ini 1993 a ben teki dopoe leki wan simbôl foe a gi di a ben gi ensrefi abra na Jehovah tapoe a gron foe bribi di a ben poti ini Jesus Krestes.
12. Fa na abi di wi abi a soifri sabi foe Jesus Krestes, abi krakti na tapoe a libi foe wi?
12 „Soifri sabi foe wi Masra Jesus Krestes”, e go makandra nanga a wroko di wan sma e wroko fajafaja leki wan kresten èn den boen bakapisi di e kon foe dati (2 Petrus 1:8). Na sortoe fasi joe sa abi wan prati ini a sortoe wroko dati, foe di joe e prati a Kownoekondre boskopoe nanga trawan? Foeroe omstandigheid abi krakti na tapoe a ten di ibriwan sma aparti kan gi na a wroko disi (Mateus 13:18-23). Sonwan foe den omstandigheid wi no kan kenki; trawan wi kan kenki. San sa poesoe wi foe kon sabi sortoe kenki wi kan tjari kon èn foe tjari den kenki dati kon? Na apostel Paulus ben skrifi: „A lobi foe Krestes ben e poesoe wi”; nanga tra wortoe, a lobi di a ben sori foe di a ben gi en libi foe wi ede, de so wan aparti sani, taki te a warderi foe wi gi san a doe e gro, dan dati sa abi boen foeroe krakti na tapoe wi eigi ati. A bakapisi de, taki wi e froestan taki a no ben sa fiti srefisrefi foe e tan feti foe doro marki, foe di wi e prakseri wisrefi nomo èn e libi moro foeroe foe satisferi wisrefi nomo. Na presi foe dati, wi e tjari kenki kon ini den afersi foe wi foe poti a wroko di Krestes ben leri den disipel foe en foe doe, tapoe a fosi presi. — 2 Korentesma 5:14, 15.
De aparti foe grontapoe — Na sortoe fasi?
13. Foe san ede wi no moesoe wani foe de wan pisi foe wan relisi di meki ensrefi kon tron wan pisi foe grontapoe?
13 A no moeilek foe si a nen di krestenhèit nanga tra relisi ben meki, bika den wani foe de wan pisi foe grontapoe. Den ben gebroiki a moni foe kerki foe pai gi den sani di revo-groepoe e doe. Priester kon tron guerrilla fetiman. Ibri dei, njoensoe koranti e sori tori foe a feti di den groepoe ini relisi e feti nanga makandra ini difrenti pisi foe grontapoe. Den anoe foe den lai nanga broedoe (Jesaja 1:15). Èn na heri grontapoe den tiriman foe krestenhèit e go doro foe proeberi foe abi krakti na tapoe san e pasa na politiek sei. Troe anbegiman no abi wan prati na ini disi. — Jakobus 4:1-4.
14. (a) Foe sortoe sani wi srefi moesoe tan farawe, efoe wi sa tan de aparti foe grontapoe? (b) San kan jepi wi foe tan farawe foe kon ini a trapoe foe den fasi nanga den doe foe grontapoe?
14 Ma foe de aparti foe grontapoe wani taki moro leki dati. Grontapoe abi leki eigifasi, a lobi gi moni èn san sma kan bai nanga moni, na angri di sma angri foe kisi bigi nen èn a feti di den e feti na wan gridifasi na baka prisiri, makandra nanga den sortoe sani leki a broko di den no e broko den ede troetroe nanga tra sma, a lei di den e lei nanga a dotitaki di den e taki, na opo di den e opo densrefi kontrari makti, èn a man di den no man dwengi densrefi (2 Timoteus 3:2-5; 1 Johanes 2:15, 16). Bika wisrefi de onvolmaakti, meki sontron, na a wan noso tra fasi, wi kan sori wan toe foe den sortoe eigifasi dati. San kan jepi wi ini a feti di wi e feti foe tan farawe foe den sortoe trapoe dati? Wi moesoe foe memre wisrefi soema de na baka ala den sani disi. „Heri grontapoe de ini a makti foe na ogriwan” (1 Johanes 5:19). Awansi o moi wan fasi fa wan sma e tjari ensrefi e sori kande, awansi omeni tra sma e libi na a fasi dati, tokoe te wi e si taki Jehovah en moro prenspari feanti, Satan Didibri, de na baka ala den sani disi, dan wi e froestan o takroe dati de troetroe. — Psalm 97:10.
O fara a lobi foe joe e go?
15. Fa lobi di no e prakseri ensrefi nomo, di joe ben si, ben jepi joe foe kon sabi a troe relisi?
15 Di joe ben bigin foe abi demakandra nanga Jehovah Kotoigi foe a fosi leisi, a lobi di de foe si na mindri den, sondro misi ben hari joe, bika a de heri tra fasi leki a jeje foe grontapoe. A poti di den e poti krakti na tapoe lobi di no e prakseri ensrefi nomo, e meki a soifri anbegi foe Jehovah de tra fasi foe ala tra fasi foe anbegi. Kande disi na san ben overtoigi joe, taki Jehovah Kotoigi troetroe e libi ini akroederi nanga a joisti relisi. Jesus Krestes srefi ben taki: „Nanga disi ala sma sa sabi taki oenoe na mi disipel, efoe oenoe abi lobi gi makandra.” — Johanes 13:35.
16. Sortoe okasi de kande gi ibriwan foe wi aparti, foe bradi a lobi foe wi?
16 Na eigifasi dati e meki toe taki sma e kon sabi joe leki wan disipel foe Krestes? Fasi de, fa joe kan sori joe lobi na wan moro bradi fasi? Sondro misi wi alamala kan doe dati. Lobi de moro leki foe abi switifasi gi trawan na a Kownoekondrezaal. Èn efoe wi ben sa moesoe sori lobi soso gi den sma di e lobi wi, wi ben sa de tra fasi dan leki grontapoe? „Na tapoe foe dati, abi tranga lobi gi makandra”, bijbel e froemane (1 Petrus 4:8). Gi soema a ben sa kan, taki wi sori moro lobi gi en? Na wan kresten brada noso sisa di a background foe en de tra fasi leki di foe wi èn di a fasi fa a e doe bepaalde sani, e tanteri wi? Noso na wan sma, di foe di a siki noso foe di a owroe, no ben man foe kon na den konmakandra ala ten? Noso na wi trowpatna? Noso a de kande, wi papa nanga mama di kon owroe? Son sma di na wan heri boen fasi ben sori a froktoe foe a jeje, pe lobi de na ini toe, ben firi neleki den ben leri ala den sani disi njoen baka. Disi ben de, di den ben kisi foe doe nanga den toemoesi moeilek situwâsi, di kan kon te wan sma moesoe sorgoe gi pikinmoro ala sani foe wan memre foe na osofamiri di ben kon malengri serjoesoe. A no de foe taki, dati srefi te wi e kisi foe doe nanga den omstandigheid disi, dan a lobi foe wi moesoe go moro fara toe leki a lobi gi wi eigi osofamiri.
Kownoekondre kotoigiwroko — O prenspari a de gi joe?
17. San wi moesoe firi foe doe now, te wi srefi abi wini foe di Jehovah Kotoigi ben kon na wi?
17 Wan prenspari fasi fa wi kan sori lobi gi den sma na wi sei, na foe gi kotoigi na den foe a Kownoekondre foe Gado. Soso wán groepoe sma e doe a wroko disi di Jesus ben froeteri na fesi foe dati (Markus 13:10). Den sma disi na Jehovah Kotoigi. Wi srefi ben abi wini foe dati. Now a de a grani foe wi foe jepi trawan. Efoe wi e si a wroko disi leki fa Gado e si en, dan a sa de a moro prenspari sani ini wi libi.
18. Fa a leisi di wi e leisi a boekoe Jehovah’s Getuigen — Verkondigers van Gods Koninkrijk, ben sa kan abi krakti na tapoe a prati di wi sa abi ini a Kownoekondre kotoigiwroko?
18 Ini a boekoe Jehovah’s Getuigen — Verkondigers van Gods Koninkrijk (Jehovah Kotoigi — Preikiman foe Gado Kownoekondre), den e froeteri a span tori, fa a Kownoekondre boskopoe ben tjari go na den moro farawe presi foe grontapoe ini den lasti dei disi. Efoe joe sabi a Bakratongo, dan no misi foe leisi en. Èn te joe e doe dati, poti spesroetoe prakseri dan na tapoe ala den fasi fa ibriwan sma aparti ben abi wan prati na a wroko foe gi kotoigi foe a Kownoekondre. Wan toe foe den sma de, di joe kan waka na baka na eksempre foe den? Foeroe okasi de gi wi alamala. Meki a lobi di wi abi gi Jehovah, poesoe wi foe gebroiki den eksempre boen.
19. Fa wi abi wini te wi e teki a frantiwortoe di abi foe doe nanga a sabi di wi sabi a joisti relisi?
19 So boen, te wi e poti a wani foe Jehovah na ini wi libi, dan wi e feni a piki na tapoe na aksi: San a libi wani taki? (Openbaring 4:11) Wi no e waka na ini doengroe moro, èn wi no e tan nanga wan leigi firi. No wan libiwroko no de, di joe kan gi joesrefi na dati, di sa tjari moro satisfaksi kon leki foe gi joesrefi nanga joe heri ati na a doe foe a diniwroko foe Jehovah Gado. Èn fa dati sa tjari wan moi tamara kon! Wan têgo libi na ini satisfaksi ini a njoen grontapoe foe Gado, pe wi sa man gebroiki a man di wi man doe sani dorodoro, ini akroederi nanga a lobi prakseri di Gado ben abi di a ben meki a libisma famiri.
[Foetoewortoe]
a A Watchtower Bible and Tract Society of New York, Inc., tjari en kon na doro.
San joe ben sa piki?
◻ Foe san ede a de prenspari gi wan relisi foe teki bijbel leki a Wortoe foe Gado èn foe gi Jehovah grani leki a troe Gado?
◻ San a troe relisi e leri ini a tori foe a prati di Jesus abi leki wan Froeloesoeman?
◻ Foe san ede kresten moesoe tan aparti foe grontapoe èn sori lobi di no e prakseri ensrefi nomo?
◻ Sortoe prati a Kownoekondre kotoigiwroko abi ini a joisti relisi?
[Prenki na tapoe bladzijde 16]
Te wan sma e teki dopoe dan dati na wan prenspari sani di a e doe, foe teki den frantiwortoe foe a troe anbegi. Ibri moen so wan 25.000 sma na heri grontapoe e doe a sani dati
Rosiakondre
Senegal
Papoea Njoen Guinea
Verenigde Staten foe Amerkankondre
[Prenki na tapoe bladzijde 17]
Foe prati bijbel waarheid nanga trawan, de wan pisi foe a troe anbegi
Verenigde Staten foe Amerkankondre
Verenigde Staten foe Amerkankondre
Brasjonkondre
Hong Kong