Wi musu kakafutu gi tesi

OITI wan sma aksi yu fu du wan sani di no bun?— A sma dati ben feni taki yu e frede tumusi fu du a sani dati? Noso a ben taigi yu taki a sani dati ben o gi yu prisiri èn taki a no de wan takru sani trutru?— Te wan sma e du disi nanga wi, dan a e pruberi fu tesi wi.

San wi musu du te tesi e miti wi? Wi musu gi abra èn du san no bun?— Yehovah Gado no ben o prisiri nanga dati. Ma yu sabi suma ben o prisiri?— Iya, Satan Didibri ben o prisiri.

Satan na a feanti fu Gado, èn Satan na wi feanti tu. Wi no kan si en fu di a de wan yeye. Ma en kan si wi. Wan dei Didibri ben taki nanga Yesus, a Bigi Leriman, èn a pruberi fu tesi en. Meki wi luku san Yesus ben du. Dan wi sa kon sabi san na a yoisti sani fu du te wi e kisi tesi.

Ala ten Yesus ben wani du san Gado wani. A sori dati krinkrin fu di a teki dopu na ini a Yordanliba. A ben de syatu baka di Yesus teki dopu, di Satan pruberi fu tesi En. Bijbel e taki dati „hemel opo” gi Yesus (Mateyus 3:16). Kande a sani disi ben wani taki dati now Yesus bigin memre ala den sani fu a ten di a ben e libi na ini hemel nanga Gado.

Baka di Yesus teki dopu, dan a go na ini a sabana fu denki dipi fu den sani di a bigin memre baka. Fotenti dei nanga neti ben pasa. A heri pisi ten disi Yesus no nyan nowan sani, èn fu dati ede angri ben e kiri en srefisrefi now. Na a momenti disi Satan pruberi fu tesi Yesus.

Didibri taki: „Efu yu na wan manpikin fu Gado, dan taigi den ston disi fu tron brede.” Yesus ben musu fu lostu wan pisi brede now! Ma Yesus ben kan kenki den ston kon tron brede?— Iya, a ben kan du dati. Fu san ede? Fu di Yesus, a Manpikin fu Gado, ben abi aparti krakti.

Yu ben o kenki wan ston kon tron wan pisi brede efu Didibri ben aksi yu fu du dati?— Angri ben e kiri Yesus. Sobun, a no ben o bun fu du a sani dati wán leisi nomo?— Yesus ben sabi taki a no ben bun fu gebroiki den krakti fu en na a fasi dati. Yehovah no ben gi en den krakti dati fu gebroiki gi ensrefi, ma a ben musu gebroiki den fu hari sma kon na Gado.

Sobun, Yesus no du san Satan ben wani, ma a taigi en san skrifi na ini Bijbel: „Sma no musu libi fu brede wawan, ma fu ibri wortu di Yehovah mofo taki.” Yesus ben sabi taki a de moro prenspari fu du san e gi Yehovah prisiri, leki fu abi sani fu nyan.

Ma Didibri pruberi ete wan leisi. A tyari Yesus go na ini Yerusalem èn a meki a tanapu na tapu wan hei pisi fu a tempel. Ne Satan taki: ’Efu yu na wan manpikin fu Gado, dan fringi yusrefi go na gron. Bika buku taki dati den engel fu Gado sa sorgu taki noti no e pasa nanga yu.’

Fu san ede Satan ben taki a sani disi?— A ben taki dati fu di a ben wani meki Yesus du wan don sani. Ma agen Yesus no arki Satan. A taigi Satan: „Buku taki: ’Yu no musu tesi Yehovah yu Gado.’ ” Yesus ben sabi taki a no ben bun fu prei nanga en libi, soso fu tesi Yehovah.

Toku Satan no ben kaba nanga Yesus. A tyari Yesus go na tapu wan bun hei bergi now. Drape a sori en ala den kownukondre, noso tirimakti, fu grontapu nanga a glori fu den. Ne Satan taigi Yesus: „Mi o gi yu ala den sani disi efu yu e boigi èn e anbegi mi wan leisi nomo.”

Prakseri san Didibri ben wani gi Yesus. Ala den kownukondre disi, noso den tirimakti fu libisma, ben de fu Satan trutru?— We, Yesus no ben taki dati den no ben de fu Satan. Efu den no ben de fu Satan, dan Yesus ben o taki so. Iya, Satan na a trutru tiriman fu ala den kondre fu grontapu. Bijbel srefi e kari en „a tiriman fu a grontapu disi”.​—Yohanes 12:31.

San yu ben o du efu Didibri pramisi taki a o gi yu wan sani efu yu anbegi en?— Yesus ben sabi taki a no ben bun fu anbegi Didibri, awansi san a ben o kisi fu en. Fu dati ede Yesus taki: ’Gowe fu dya, Satan! Bika Bijbel e taki dati na Yehovah yu Gado yu musu anbegi, èn taki na en wawan yu musu dini.’​—Mateyus 4:1-10; Lukas 4:1-13.

Wisrefi e kisi tesi tu. Yu sabi san na wan tu fu den?— Luku wan eksempre dyaso. Kande yu mama baka wan switi kuku. Kande a e taigi yu fu no fasi a kuku te baka a brekten nyanyan. Ma angri e kiri yu srefisrefi, èn fu dati ede yu e lostu fu nyan wan pisi fu a kuku. Yu sa du san yu mama taigi yu?— Satan no wani taki yu arki yu mama.

Memre Yesus. Angri ben e kiri en srefisrefi tu. Ma a ben sabi taki a ben de moro prenspari fu gi Gado prisiri, leki fu nyan. Yu e sori taki yu de leki Yesus te yu e du san yu mama taigi yu.

Kande tra pikin sa aksi yu fu smoko wiwiri. Kande den e taigi yu taki den wiwiri disi sa meki yu firi switi. Ma kande den wiwiri disi na marwana. A sani disi kan meki yu kon siki seryusu, èn a kan kiri yu sosrefi. Noso kande wan sma e gi yu wan sigaret, wan sani di abi drugs na ini tu, èn a sma dati kan gi yu deki-ati fu smoko en. San yu o du?—

Memre Yesus. Satan ben wani Yesus fu prei nanga en libi, èn fu dati ede a taigi en fu dyompo komoto fu a tempel. Ma Yesus no ben wani du dati. San yu o du te wan sma e gi yu deki-ati fu du wan sani di kan meki taki wan ogri e pasa nanga yu?— Yesus no ben arki Satan. Yu no musu arki nowan sma tu di e pruberi fu meki yu du sani di no bun.

Wan dei wan sma ben kan aksi yu fu anbegi wan popki, noso wan prenki. Bijbel e taki dati wi no musu du a sani disi (Exodus 20:4, 5). A sani dati ben kan pasa na wan seremonia na skoro. Kande sma sa taigi yu sosrefi taki yu no man go na skoro moro efu yu e weigri fu anbegi a sani dati. San yu o du?—

A makriki fu du san bun te ala sma e du bun. Ma a kan muilek srefisrefi fu du san bun te tra sma e pruberi fu meki wi du sani di no bun. Den ben kan taki dati a sani di den e du no ogri so. Ma a prenspari sani san yu musu aksi yusrefi na: ’San Gado e taki fu a tori disi?’ Gado sabi ala ten san na a moro bun sani fu du.

Sobun, awansi san tra sma e taki, noiti wi musu du sani di Gado no feni bun. Na so fasi Gado sa breiti nanga wi ala ten, èn noiti wi sa du sani di e gi Didibri prisiri.