Jezus libi nanga diniwroko

Leri foe den tesi foe Jezus

WANTEWANTE na baka en dopoe a jeje foe Gado e tjari Jezus go na a sabana foe Judéa. A abi foeroe sani foe prakseri foe den, bika na a ten foe en dopoe ’den hemel ben opo densrefi’ sodati a ben kan si hemel sani. Now Jezus e memre soboen baka ala sani foe en libi leki wan jeje Manpikin foe Gado, ooktoe ala sani san Gado ben taigi en. Ija, a abi foeroe sani foe go prakseri dipi foe den.

Fotenti dé nanga fotenti neti Jezus e tan na ini a sabana èn na ini a ten dati a no e njan noti. Te a kisi angri srefsrefi, dan Didibri e kon na en foe tesi en foe di ai taki: „Efoe joe de wan manpikin foe Gado, taki dan gi den ston dati den tron brede.” Ma Jezus sabi dati a de wan fowtoe sani foe gebroiki en makti foe kan doe wan wondroe foe kowroe den persoonlek lostoe foe en. Soboen ai wégri foe den kóri en.

Ma Didibri no e tapoe. Ai proeberi en tapoe wan tra fasi. Ai tjalansi Jezus foe djompo foe den skotoe foe na tempel, sodati den engel foe Gado sa kon ferloesoe en. Ma Jezus no e meki den kori en foe go doe so wan kefarlek sani. Ai gebroiki den boekoe foe meki kon na fesi dati a fowtoe foe tesi Gado na a fasi dati.

Na ini wan di foe dri moeiti foe kori Jezus, Dididri e sori en nanga jepi foe wan ofoe tra wondroe ala kownoekondre foe na grontapoe èn e taki: „Mi sa gi joe ala den sani disi efoe joe fadon na doti èn doe wan fasi foe anbegi mi.” Ma agen Jezus e wégri foe gi ensrefi abra na a kori foe doe ogri, bika a ben teki a bosroiti foe tan getrow na Gado.

Wi kan leri wan sani foe den tesi disi foe Jezus. Den e meki wi si foe eksempre dati Didibri no de wawan na ogri na ini libisma, soleki son sma e taki ma dati a de wan troetroe persoon di de èn di no de foe si. Na tesi foe Jezus e meki wi si ooktoe dati ala tiri foe na grontapoe de a goedoe foe Didibri. Bika fa a ben kan de wan troetroe tesi dati Didibri ben pristeri den na Kristus efoe den no ben de troetroe foe en?

Èn prakseri disi pikinso: Didibri ben taki dati a ben de klari foe pai Jezus foe wán doe foe anbegi, ija, dati a ben sa gi en ala kownoekondre foe a grontapoe. A kan psa heri boen dati Didibri kan proberi foe kori wi net so, kande foe hori na wi fesi kans foe kisi goedoe ofoe makti foe wan hé positsi na grontapoe. Ma wi sa doe heri boen foe waka baka na eksempre foe Jezus foe di wi e tan getrow na Gado, san na tesi mag de ooktoe. Mattéus 3:16; 4:1-11; Markus 1:12, 13; Lukas 4:1-13.

◆ San a wani taki dati hemel ben opo ensrefi gi Jezus?

◆ Fa Didibri ben proberi foo tesi Jezus?

◆ San wi kan leri foe den tesi foe Jezus?

[Prenki di e tapoe heri bladzijde 12]