Yesus makti moro den ogri yeye

YU E memre fu san ede wan fu den engel fu Gado kon tron Satan Didibri?— Na engel disi di ben e prakseri ensrefi nomo ben wani taki sma anbegi en. A sani dati meki taki a tron wan feanti fu Gado. Tra engel ben tron bakaman fu Satan?— Iya. Bijbel e kari den bakaman disi ’engel fu Satan’, noso ogri yeye.​—Openbaring 12:9.

Den takru engel, noso den ogri yeye disi e bribi na ini Gado?— ’Den ogri yeye e bribi taki Gado de’, na so Bijbel e taki (Yakobus 2:19). Ma nownowde den frede. Dati e kon fu di den sabi taki Gado sa strafu den gi den takru sani di den du. Sortu ogri den du?—

Bijbel e taki dati den engel dati gowe libi den eigi tanpresi na ini hemel, èn den kon na grontapu fu libi leki libisma. Den du disi fu di den ben wani abi seks demakandra nanga den moi uma na grontapu (Genesis 6:1, 2; Yudas 6). Yu sabi san na seks demakandra?—

Seks demakandra na te wan man nanga wan uma e kon na wán na wan tumusi aparti fasi. Bakaten, wan beibi kan gro na ini a bere fu a mama. Ma a no fiti taki engel abi seks demakandra. Gado wani taki soso wan man nanga wan uma di trow nanga makandra musu abi seks demakandra. Na so fasi, te wan beibi gebore, dan a masra nanga a wefi kan sorgu gi en.

Di engel ben teki libisma skin èn ben abi seks demakandra nanga umasma na grontapu, dan den beibi fu den gro kon tron langa bigi-skin man. Den ben ogri srefisrefi, èn den ben gwenti fu gi sma mankeri. Fu dati ede, Gado tyari wan bigi frudu kon di kiri den bigi-skin man disi makandra nanga ala den tra ogri sma. Ma a meki Noa bow wan ark, noso wan bigi boto, fu kibri a pikin grupu fu sma di ben e du san bun. A Bigi Leriman ben taki dati a de prenspari fu memre san ben pasa na a Frudu.​—Genesis 6:3, 4, 13, 14; Lukas 17:26, 27.

Yu sabi san pasa nanga den takru engel di a Frudu kon?— Den tapu fu gebroiki a libisma skin di den ben meki gi densrefi, èn den go baka na hemel. Ma den no ben man de engel fu Gado moro, sobun den tron engel fu Satan, noso ogri yeye. Èn san pasa nanga den pikin fu den, den bigi-skin man?— Den dede na ini a Frudu. Èn dati pasa tu nanga ala tra sma di no ben gi yesi na Gado.

Sensi a ten fu a Frudu, Gado no gi pasi moro taki den ogri yeye kon de leki libisma. Ma aladi wi no man si den ogri yeye, toku den e pruberi ete fu meki sma du tumusi ogri sani. Den e tyari problema kon, moro leki oiti bifo. Disi e kon fu di Yesus fringi den komoto fu hemel kon na grontapu.

Yu sabi fu san ede wi no kan si den ogri yeye?— Na fu di den no abi wan libisma skin. Ma wi kan de seiker taki den de na libi. Bijbel e taki dati Satan e ’kori sma na heri grontapu’, èn den ogri yeye fu en e yepi en.​—Openbaring 12:9, 12.

Didibri nanga den ogri yeye fu en kan kori wi tu?— Iya, den kan du dati efu wi no luku bun. Ma wi no abi fu frede. A Bigi Leriman ben taki: ’Didibri no abi krakti na mi tapu.’ Te wi e tan krosibei fu Gado, dan a sa kibri wi so taki Didibri nanga den ogri yeye fu en no kori wi.​—Yohanes 14:30.

A de prenspari taki wi sabi sortu ogri sani den ogri yeye sa pruberi fu meki wi du. Sobun, denki a sani disi pikinso. Sortu ogri sani den ogri yeye du di den kon na grontapu?— Bifo a Frudu, den ben abi seks demakandra nanga umasma, èn a no ben fiti taki engel ben e du a sani disi. Na ini a ten disi, ogri yeye lobi te sma no e gi yesi na den wet fu Gado di abi fu du nanga seks demakandra. Meki mi aksi yu: Suma wawan mag abi seks demakandra?— Yu piki bun, soso sma di trow.

Na ini a ten disi, son yongu boi nanga yongu meisje abi seks demakandra, ma a sani disi no fiti. Bijbel e taki fu a „syenpresi” fu a man, noso a toitoi (Lefitikus 15:1-3). Sma e kari a syenpresi fu na uma a puni. Yehovah meki den pisi disi fu wi skin so taki sma kan gebroiki den gi wan spesrutu sani, èn a sani dati de soso gi sma di trow. Den ogri yeye e prisiri te sma e du sani di Yehovah no feni bun. Fu gi wan eksempre, den ogri yeye lobi te wan boi nanga wan meisje e prei nanga makandra toitoi noso puni. Wi no wani meki den ogri yeye prisiri, a no so?—

Wan tra sani de di den ogri yeye lobi, ma di Yehovah no feni bun kwetikweti. Yu sabi san na dati?— Dati na a ogri di sma e du nanga tranga (Psalm 11:5). Te sma e du ogri nanga tranga, dan den e du ogri-ati sani fu espresi fu gi trawan mankeri. Memre taki disi na san den langa bigi-skin man, noso den manpikin fu den ogri yeye, ben e du.

Den ogri yeye lobi sosrefi fu meki sma kon frede. Son leisi den e du neleki den na sma di dede. Den kan teki srefi a sten fu sma di dede. Na a fasi disi den ogri yeye e kori furu sma fu bribi taki dede sma de na libi èn taki den kan taki nanga libisma di de na libi. Iya, den ogri yeye e meki taki furu sma e bribi na ini spuku.

Fu dati ede wi musu luku bun taki Satan nanga den ogri yeye fu en no e kori wi. Bijbel e warskow: ’Satan e pruberi fu du neleki en na wan bun engel, èn den futuboi fu en e du a srefi’ (2 Korentesma 11:14, 15). Ma fu taki en leti, den ogri yeye takru srefisrefi. Meki wi si fa den ben kan pruberi fu meki wi de neleki den.

Fa sma e kon leri sabi furu fu na ogri di trawan e du nanga tranga, fu seks demakandra di no fiti, èn fu yeye fu den dedewan?— A no te den e luku spesrutu felem na telefisi, te den e leisi spesrutu buku, noso te den e moksi nanga takru mati na skoro? Den sani disi e tyari wi moro krosibei na Gado, noso moro krosibei na Didibri nanga den ogri yeye fu en? San yu denki?—

Suma yu denki wani taki wi musu arki takru sani? Suma wani taki wi musu du ogri?— Iya, Satan nanga den ogri yeye fu en wani dati. Sobun, san yu nanga mi musu du?— Wi musu leisi, wi musu arki, èn wi musu luku sani di bun gi wi èn di sa yepi wi fu dini Yehovah. Yu kan prakseri fu wan tu fu den bun sani disi di wi kan du?—

Te wi e du san bun, dan wi no abi fu frede gi den ogri yeye. Yesus tranga moro den, èn den frede gi en. Wan dei, den ogri yeye bari gi Yesus: „Yu kon dya fu kiri wi?” (Markus 1:24) Wi no sa breiti te a ten kon pe Yesus sa kiri Satan nanga den ogri yeye fu en?— Ma nownow kaba, wi kan de seiker taki Yesus sa kibri wi gi den ogri yeye, te wi e tan krosibei fu en èn fu en hemel Tata.