Den sma di ben tron disipel fu Yesus

SUMA na a moro bun futuboi fu Gado di oiti ben libi?— Yu piki bun, dati na Yesus Krestes. Yu denki taki wi kan de leki en?— We, Bijbel e taki dati a ben de leki wan eksempre gi wi. Èn a e gi wi a kari fu de en disipel.

Yu sabi san a wani taki fu de wan disipel fu Yesus?— A wani taki difrenti sani. A fosi sani, na taki wi musu teki leri fu en. Ma dati a no ala. Wi musu bribi trutru sosrefi san a e taki. Te wi e du dati, dan wi sa du san a e taigi wi fu du.

Furu sma e taki dati den e bribi na ini Yesus. Yu denki taki ala den sma disi na disipel fu en trutru?— Nôno, furu fu den no de disipel fu en. Kande den e go na kerki. Ma furu fu den noiti no teki ten fu kon sabi san Yesus ben leri sma. Iya, soso den sma di e teki na eksempre fu Yesus na disipel fu en.

Meki wi taki fu wan tu fu den sma di ben de disipel fu Yesus di a ben de wan libisma na grontapu. Wan fu den fosi sma di tron wan disipel na Filipus. Filipus go suku en mati Natanael (sma ben e kari en sosrefi Bartolomeyus), di yu e si na tapu a prenki e sidon na ondro wan bon. Te Natanael kon na Yesus, dan Yesus e taki: ’Luku, disi na wan opregti man, wan trutru manpikin fu Israel.’ Natanael fruwondru èn a e aksi: ’Fa yu du sabi mi?’

Yesus piki en taki: „Fosi Filipus kari yu, di yu ben de na ondro a figabon, mi ben si yu kaba.” Natanael fruwondru srefisrefi taki Yesus ben sabi soifri pe a ben de, èn fu dati ede Natanael e taki: „Yu na a Manpikin fu Gado, yu na a Kownu fu Israel.”​—Yohanes 1:49.

Tra sma tron disipel fu Yesus a dei bifo Filipus nanga Natanael tron disipel. Disi na Andreas nanga en brada Petrus, èn sosrefi Yohanes. Kande Yakobus, a brada fu Yohanes, ben de wan fu den sma tu di ben tron disipel wan pisi ten na fesi (Yohanes 1:35-51). Ma baka wan pisi ten, den fo man disi go du a fisiwroko fu den baka. Ma wan dei, Yesus ben e waka na a lanki fu a Se fu Galilea, èn a si Petrus nanga Andreas di ben e saka wan fisinèt go na ini a se. Yesus bari kari: „Un kon waka na mi baka.”

Yesus waka pikinso moro fara, èn a si Yakobus nanga Yohanes. Den ben de na ini wan boto makandra nanga a papa fu den, èn den ben e meki den fisinèt fu den. Yesus kari den man disi tu fu waka na en baka. San yu ben o du efu Yesus ben kari yu? Yu ben o go nanga en wantewante?— Den man disi ben sabi suma na Yesus. Den ben sabi taki na Gado ben seni en. Fu dati ede den libi a fisiwroko fu den wantewante èn den waka baka Yesus.​—Mateyus 4:18-22.

Di den man disi tron bakaman fu Yesus, dan a ben de so taki baka dati ala ten den ben du san bun?— Nôno. Kande yu e memre taki den man disi ben e haritaki nanga makandra srefi suma fu den ben de a moro prenspariwan. Ma den arki Yesus, èn den ben de klariklari fu kenki den fasi fu den. Efu wi de klariklari fu kenki den fasi fu wi, dan wi tu kan de disipel fu Yesus.

Yesus gi ala sortu sma wan kari fu tron en disipel. Wan leisi, wan yonkuman di ben de wan gudu tiriman kon na Yesus èn a aksi en fa a ben kan kisi têgo libi. Di a gudu tiriman taki dati a ben e gi yesi na den wet fu Gado fu sensi a ben de pikin, dan Yesus gi en a kari: „Tron wan bakaman fu mi.” Yu sabi san ben pasa?—

We, di a man yere taki a moro prenspari fu de wan disipel fu Yesus leki fu de wan guduman, dan a ben sari srefisrefi. A no tron wan disipel fu Yesus fu di a ben lobi en moni moro leki a ben lobi Gado.​—Lukas 18:18-25.

Baka di Yesus ben preiki pikinmoro wán nanga afu yari, dan a teki twarfu fu en disipel fu tron apostel. Den apostel ben de man di a ben seni fu go du spesrutu wroko. Yu sabi den nen?— Meki wi pruberi fu leri den. Luku den prenki fu den apostel dyaso, èn pruberi fu taki den nen. Baka dati, pruberi fu taki den nen sondro fu luku den prenki.

Te fu kaba, wan fu den 12 apostel kon tron wan ogrisma. Dati ben de Yudas Iskariot. Bakaten, wan tra disipel kisi na okasi fu tron wan apostel. Yu sabi en nen?— A ben de Matias. Baka wan pisi ten, Paulus nanga Barnabas tron apostel tu, ma den no ben de fu a grupu fu den twarfu apostel.​—Tori fu den Apostel 1:23-26; 14:14.

Soleki fa wi leri na ini Kapitel 1 fu a buku disi, dan Yesus ben teki ten gi yongu pikin. Fu san ede a ben du dati?— Fu di a ben sabi taki den ben kan tron disipel fu en tu. Fu taki en leti, furu tron pikin-nengre kan taki sani na wan fasi di kan meki taki bigisma srefi e arki èn sa wani leri moro fu a Bigi Leriman.

Furu uma ben tron disipel fu Yesus tu. Wan tu fu den ben teki waka makandra nanga en te a ben go preiki na tra foto. Maria Magdalena, Yohana, nanga Susana ben du dati. A kan taki den yepi tu fu sreka nyanyan, èn fu wasi en krosi.​—Lukas 8:1-3.

Yu wani tron wan disipel fu Yesus?— Memre taki a no te wi e taki nomo dati wi na wan disipel fu en, dan wi de wan disipel trutru. A no soso te wi e go na Kresten konmakandra wi musu tyari wisrefi leki disipel fu en, ma wi musu du dati na ala presi pe wi de. Yu kan denki fu wan tu presi pe a de prenspari taki wi e tyari wisrefi leki wan disipel fu Yesus?—

Iya, wi musu du dati na oso. Ma skoro na wan tra presi pe wi kan du dati tu. San yu nanga mi noiti musu frigiti, na taki efu wi wani de wan tru disipel fu Yesus, dan wi musu tyari wisrefi soleki fa en ben du dati, èn wi musu du so heri dei, ibri dei, awansi pe wi de.