Jezus libi nanga diniwroko

Den fosi discipel foe Jezus

BAKA fotenti dé di Jezus ben de na ini na sabana, a e drai go baka na Johannes, di ben dopoe en. Te a e waka go na Johannes, Johannes e bari taki: „Loekoe, na Lam foe Gado, di e poeroe na sondoe foe grontapoe gowe! Disi na a sma foe soema mi ben taki: Baka mi wan man e kon di ben waka na mi fesi, bika a ben de bifo mi.” Aladi Johannes ben moro owroe leki en neef Jezus, tokoe Johannes ben sabi dati Jezus ben de bifo en, leki wan jeje persoon na ini hemel.

Na tra dé Johannes tanapoe drape baka, nanga toe foe en discipel. Te Jezus e kon na en, a e taki ete wantron: „Loekoe, na Lam foe Gado!” Tapoe disi den toe discipel foe Johannes na Dopoeman ben bigin waka wantewante na baka Jezus. Wan foe den na Andreas èn na trawan a de krin de a sma di ben skrifi den sani disi, ooktoe wan sma di ben nen Johannes. Na Johannes disi soleki wi kan feni disi ini a bijbel de ooktoe wan neef foe Jezus, bika a de na manpikin foe wan sisa foe Maria, Salome.

Te Jezus drai ensrefi èn e si dati Andreas nanga Johannes e waka na en baka, a e aksi: „San oenoe e soekoe?”

„Leriman”, den e aksi, „pe joe e libi?”

„Kon, dan joe sa si dati”, Jezus e piki.

A de so wan fo joeroe bakadina èn Andreas nanga Johannes e tan a tra pisi dati foe a dé nanga Jezus. Bakadati Andréas e de nanga someni prisirifasi dati a e lon gwe foe soekoe en brada di nen Petrus. „Wi ben feni na Messias”, a e ferteri en. Èn a e tjari Petrus go na Jezus. Kande a ben de na srefi momenti dati Johannes e feni en brada Jakobus èn e tjari en go na Jezus; ma a de aparti dati Johannes no poti den persoonlek bodoi disi ini en evangelium.

Na tra dé Jezus e feni Filippus èn a e kari en te a e taki: „Kon waka na mi baka.” Filippus e feni Nathanaël, di den e kari ooktoe Bartholoméüs, èn a e taki: „Wi feni na sma foe oema Mozes ben skrifi foe en na ini na Wet èn den proféti, Jezus, na manpikin foe Jozef foe Nazareth.” Ma Nathanaël e degedege. „Wan boen sani kan konrto foe Nazareth?” a e aksi.

„Kon loekoe dan”, Filippus e kari en. Te den e kon na Jezus, Jezus e taki gi Nathanaël: „Bifo Filippus ben kari joe, aladi joe ben de na ondro na figabon mi ben si joe.”

Nathanaël e ferwondroe: ’Leriman, joe de na manpikin foe Gado, joe de Kownoe foe Israël’, a e plki.

No langa a baka Jezus e gwe nanga den discipel di a feni njoen na a lagipresi foe na Jordaan èn e reis go na Galiléa. Johannes 1:29-51.

◆ Soema ben de den fosi discipel foe Jezus?

◆ Fa den ben tja Petrus èn kande Jakobus foe go sabi Jezus?

◆ San meki Nathanaël kisi na overtoigi dati Jezus ben de na Manpikin foe Gado?