San papa nanga mama musu du gi den pikin fu den
ALA papa nanga mama abi wan prati na wan prenspari sani di nowan libisma no man frustan dorodoro. Ibri papa nanga mama e gi wan pisi fu densrefi. Te dati pasa, dan wan pikin e bigin gro na ini a bere fu a mama. Fu dati ede, a no e fruwondru wi taki te wan beibi gebore, dan sma e kari a sani dati „wan wondru”.
Te tu sma meki wan pikin, dan dati na soso a bigin fu a frantwortu di den abi leki papa nanga mama. Na ini a bigin, wan beibi abi en papa nanga mama fanowdu fu du ala sani gi en. Ma te a e gro kon bigi, dan en papa nanga mama musu du moro leki fu sorgu en na skin sei. Den musu yepi en fu gro kon tron wan sma di e gebroiki en frustan bun, di man basi den firi fu en, di e tyari ensrefi na wan fasi di fiti, èn di e bribi na ini Gado.
Fu man gro kon tron bun sma, dan pikin-nengre musu kisi lobi fu den papa nanga mama. Aladi a de prenspari taki papa nanga mama e taigi den pikin fu den taki den lobi den, toku den musu du sani tu fu sori taki na so a de trutru. Iya, papa nanga mama musu de wan bun eksempre gi den pikin fu den. Den pikin abi tiri fanowdu; den musu leri gronprakseri di sa yepi den fu tyari densrefi na a yoisti fasi. Èn den musu leri den pikin dati frukufruku kaba. Sari sani kan pasa, èn den e pasa trutru te pikin e kisi yepi tumusi lati.
Den moro bun gronprakseri di de fu feni, na den wan di skrifi na ini Bijbel. Te papa nanga mama e gebroiki Bijbel fu gi den pikin fu den leri, dan den sa kisi tumusi bun wini fu dati. Te pikin-nengre e kisi a leri disi, dan den e kon frustan taki den sani di den e leri no e komoto fu wan libisma, ma fu a Mekiman, noso a hemel Tata fu den. Disi e meki taki den rai sa abi krakti na den tapu, moro leki iniwan tra rai di de fu gi.
Bijbel e gi papa nanga mama deki-ati fu du ala muiti fu leri den pikin bun gronprakseri, èn fu meki den frustan o prenspari a de fu hori densrefi na den. Ma te den pikin e kon moro bigi, dan furu tron papa nanga mama feni en muilek fu taki nanga den fu den moro prenspari sani. A buku disi, Teki leri fu a Bigi Leriman, meki fu sorgu taki a sani disi no e pasa. A buku disi sa gi yu nanga yu pikin na okasi fu leisi tori nanga makandra di abi fu du nanga Gado èn nanga a fasi fa den musu tyari densrefi. Ma boiti dati, a buku disi musu yepi den yonguwan èn sosrefi den sma di e leisi a buku disi nanga den, fu abi bun takimakandra.
Yu sa si taki a buku e gi pikin-nengre deki-ati fu taki san den e denki. Den furu bun aksi na ini a buku sa yepi a pikin fu du dati. Yu sa si wan strepi (—) baka den aksi disi. Disi na fu memre yu fu wakti pikinso èn fu gi a pikin deki-ati fu taki san a e denki fu a tori. Pikin-nengre lobi te den kan abi wan prati na sani. Efu den no e kisi na okasi dati, dan heri esi den sa poti den prakseri na tra sani.
Ma wan moro prenspari sani, na taki den aksi disi sa yepi unu fu kon sabi fa a pikin e denki. A tru taki a pikin ben kan gi piki di no bun. Ma den sani di skrifi baka ibri aksi na fu yepi a pikin fu kisi a yoisti denki fu sani.
Wan moi sani na ini a buku na den moro leki 230 prenki. Na furu fu den prenki disi, sani skrifi di e gi a pikin deki-ati fu taki san a e denki fu den sani di a e si èn di a leisi. Fu dati ede, luku den prenki makandra nanga a pikin. Den kan de wan bun yepi fu meki a pikin frustan san a e leri.
Te a pikin e leri leisi, dan gi en deki-ati fu leisi a buku gi yu meki yu yere, èn meki a leisi en gi ensrefi tu nanga wan tranga sten. O moro a e leisi en, o moro a sa hori den bun rai na ini a buku disi na ede, èn o moro den sa teki rutu na ini en ati. Ma efu yu wani taki yu nanga yu pikin kisi moro lobi nanga moro lespeki gi makandra, dan un musu leisi a buku makandra, èn un musu du dati doronomo.
Na ini a ten disi, pikin-nengre e kisi fu du nanga seks di no fiti, afkodrei, nanga tra takru sani, èn disi na wan sani di no ben pasa srefisrefi wan tu yari bifo. Fu dati ede pikin-nengre musu kisi kibri, èn a buku disi e yepi yu fu du dati na wan lespeki fasi, aladi a e taki sani soleki fa den de. Toku, papa nanga mama musu yepi den pikin fu kisi wan banti spesrutu nanga a Sma di abi ala koni, wi hemel Tata, Yehovah Gado. Na disi Yesus, a Bigi Leriman, ben e du ala ten. Wi e howpu trutru taki a buku disi sa yepi yu nanga yu osofamiri fu tyari un libi na so wan fasi taki Yehovah sa feni en bun. Disi sa meki taki unu sa kisi blesi fu têgo.