„Mi abi . . . sakafasi”

1-3. Na sortu fasi Yesus e kon na ini Yerusalem, èn fu san ede a kan de so taki son sma ben fruwondru fu si dati?

SMA na ini Yerusalem breiti srefisrefi. Wan prenspari man e kon! Dorosei fu a foto, sma e kon tanapu na sei pasi. Den wani gi a man disi wan switikon trutru, fu di sonwan fu den e taki dati en na a bakapikin fu Kownu David èn a Sma di abi a reti fu tiri Israel. Wan tu sma e tyari palmtaki kon fu taki en odi, èn trawan e bradi den krosi nanga taki fu bon na tapu a pasi, so taki a pasi kon moi (Mateyus 21:7, 8; Yohanes 12:12, 13). Furu fu den e aksi densrefi na sortu fasi a o kon na ini a foto.

² Kande sonwan fu den e fruwakti taki a o kon nanga furu opo-opo. A no de fu taki dati den sabi fa prenspari man ben gwenti kon na ini a foto. Fu eksempre, di Absalom, a manpikin fu David, meki ensrefi tron kownu, a ben meki 50 mansma lon na fesi na asiwagi fu en (2 Samuel 15:1, 10). A Rome tiriman Julius Caesar ben kon nanga moro opo-opo. Wan leisi di a ben wini wan feti èn a ben waka wan prodowaka go na a presi pe den tiriman e kon makandra, dan a meki 40 asaw di ben tyari lampu, waka na ala tu sei fu en. Ma now, den sma fu Yerusalem e wakti wan moro prenspari man. Aladi a kan de so taki a no ala sma trutru e frustan dati, toku a man disi na a Mesias, iya, a moro prenspari man di libi na grontapu. Ma te den sma e si a man disi di o tron kownu, e kon na ini a foto, dan kande sonwan fu den e fruwondru.

³ Den no e si asiwagi, nowan sma e lon na en fesi, den no e si asi, èn a no de fu taki dati den no e si asaw. Nôno, Yesus e rèi nomo na tapu wan buriki, wan meti di e tyari lai.a A man disi no e weri kefalek diri krosi èn nowan kefalek krosi de tu na tapu a meti di e tyari en. Na presi fu abi wan diri sadri, den krosibei bakaman fu Yesus poti wan tu krosi na tapu a baka fu a meti. Fu san ede Yesus kon na ini Yerusalem sondro furu opo-opo, aladi man di no ben de so prenspari leki en ben kon nanga moro bigi opo-opo nanga pranpran?

4. San Bijbel ben taki na fesi fu a fasi fa a Mesias Kownu ben o kon na ini Yerusalem?

⁴ Yesus e meki a profeititori disi kon tru: „Prisiri pasa marki . . . Bari fu prisiri, o yu umapikin fu Yerusalem. Luku! Yu kownu srefi e kon na yu. A de regtfardiki, iya, a kisi frulusu; a abi sakafasi èn a e rèi na tapu wan buriki” (Sakaria 9:9). A profeititori disi e sori krin taki wan dei a Mesias, noso a Salfuwan fu Gado, ben o sori ensrefi na den sma fu Yerusalem leki a Kownu di Gado poti. Boiti dati, a fasi fa a sori taki en na kownu, èn sosrefi a meti di a rèi na tapu, ben sori wan tumusi moi fasi fu en. Iya, dati na sakafasi.

5. Fu san ede a sakafasi di Yesus sori e naki wi ati te wi e denki dipi fu dati, èn fu san ede a de prenspari taki wi e leri fu abi sakafasi neleki Yesus?

⁵ A sakafasi di Yesus sori, na wan fu den moro moi fasi fu en, di e naki wi ati trutru te wi e denki dipi fu dati. Soleki fa wi ben taki na ini a kapitel na fesi, dan Yesus wawan na „a pasi, a waarheid nanga a libi” (Yohanes 14:6). A de krin fu si taki nowan fu den milyunmilyun sma di libi na grontapu, ben de so prenspari leki a Manpikin fu Gado. Ma tra fasi leki fa a de nanga furu sondu libisma, Yesus no sori na nowan fasi taki a abi bigifasi, heimemre, noso taki a ben si ensrefi moro prenspari leki trawan. Efu wi wani de bakaman fu Krestes, dan wi musu luku bun taki wi no e kon kisi heimemre (Yakobus 4:6). Hori na prakseri taki Yehovah no lobi en kwetikweti te sma abi heimemre. Fu dati ede, a de tumusi prenspari taki wi e leri fu abi sakafasi neleki Yesus.

Yesus sori sakafasi ala ten

6. San a wani taki fu abi sakafasi, èn fa Yehovah ben sabi taki a Mesias ben o sori sakafasi?

⁶ Wan sma di abi sakafasi, no abi heimemre noso bigifasi. A sani disi e bigin na ini na ati, èn a de fu si na a fasi fa wan sma e taki, fa a e tyari ensrefi, èn fa a e handri nanga trawan. Fa Yehovah ben sabi taki a Mesias ben o sori sakafasi? A ben sabi taki en Manpikin ben o teki na eksempre fu en fu sori sakafasi na wan tumusi bun fasi (Yohanes 10:15). A ben si sosrefi fa en Manpikin sori sakafasi. Fa so?

7-9. (a) Fa Mikael sori sakafasi di en nanga Satan ben abi trobi? (b) Fa Kresten kan teki na eksempre fu Mikael di ben sori sakafasi?

⁷ A Bijbel buku Yudas e sori wi wan heri moi eksempre ini a tori disi: „Di a gran engel Mikael ben abi wan trobi nanga Didibri èn ben haritaki nanga en fu Moses skin, dan a no ben prefuru fu krutu Didibri èn fu kosi en, ma a ben taki: ’Yehovah o strafu yu’” (Yudas 9). Mikael na a nen di Yesus abi leki gran engel, noso fesiman fu ala den engel fu Yehovah na hemel. A ben abi a nen disi bifo a kon na grontapu èn di a go baka na hemel (1 Tesalonikasma 4:16).b Ma luku san Mikael du di en nanga Satan ben abi trobi.

⁸ A tori fu Yudas no e fruteri wi san Satan ben wani du nanga a skin fu Moses. Ma wi kan de seiker taki Didibri ben abi na prakseri fu du takru sani. Kande a ben wani gi sma deki-ati fu gebroiki a dedeskin fu Moses na ini falsi anbegi. Aladi Mikael ben tapu Satan fu du san a ben abi na prakseri, toku a sori na wan moi fasi taki a man hori ensrefi. A no de fu taki dati Satan ben musu kisi strafu, ma na a ten di Mikael nanga Satan ben haritaki nanga makandra, dan Mikael no ben kisi „ala a wroko fu krutu sma” ete. Mikael ben feni taki na Yehovah Gado wawan ben musu krutu Satan (Yohanes 5:22). Leki gran engel, Mikael ben abi furu makti. Toku, a saka ensrefi na Yehovah ondro, na presi fu pruberi fu kisi moro makti. Boiti taki a sori sakafasi, a sori tu taki a no man du ala sani.

⁹ Wan reide ben de fu san ede Gado meki Yudas skrifi a tori disi. A de wan sari sani taki son Kresten na ini a ten fu Yudas, no ben abi sakafasi. Den ben abi heimemre, èn den ben „taki takru fu ala sani di den no [ben] sabi srefisrefi” (Yudas 10). A kan pasa makriki taki wi leki sondu libisma e kon kisi heimemre! San wi e du te wi no frustan fu san ede wan spesrutu sani seti na ini a Kresten gemeente, kande wan bosroiti di den owruman teki? Efu wi e taki ogri noso efu wi e krutukrutu aladi wi no sabi finifini fu san ede den teki so wan bosroiti, dan wi e sori taki wi no abi sakafasi, a no so? Na presi fu dati, meki wi teki na eksempre fu Mikael, noso Yesus, èn meki wi luku bun fu no krutu tori di Gado no gi wi a frantwortu fu dati.

10, 11. (a) Fu san ede a de wan bigi sani taki a Manpikin fu Gado ben de klariklari fu kon na grontapu? (b) Fa wi kan sori sakafasi neleki Yesus?

¹⁰ A Manpikin fu Gado ben sori sakafasi tu, di a gi yesi èn kon na grontapu. Luku san a ben musu libi na baka. A ben de a gran engel. A ben de sosrefi „a Wortu”, noso a Sma di e taki gi Yehovah (Yohanes 1:1-3). A ben libi na ini hemel, Yehovah en ’hei tanpresi fu santafasi nanga moifasi’ (Yesaya 63:15). Toku a Manpikin „gowe libi ala san a ben abi, a tron leki wan srafu èn a ben tron leki libisma” (Filipisma 2:7). Prakseri san a ben wani taki fu kon na grontapu! Gado ben poti a libi fu en na ini a bere fu wan Dyu nyunwenke, pe a ben gro leki wan beibi neigi mun langa. A gebore leki wan beibi di no man yepi ensrefi, na ini wan osofamiri fu wan pôti temreman, pe a gro kon tron wan tini. Aladi Yesus no ben abi sondu, toku di a ben yongu a tan saka ensrefi na ondro en papa nanga mama di ben abi sondu (Lukas 2:40, 51, 52). Iya, a sori sakafasi na wan tumusi moi fasi!

¹¹ Wi kan sori sakafasi neleki Yesus te wi de klariklari fu du wan wroko di kan gersi wan lagi wroko. Fu eksempre, a wroko di wi abi fu preiki a bun nyunsu fu Gado Kownukondre kan gersi wan lagi wroko te sma no wani arki wi, te den e spotu wi, noso te den e frufolgu wi (Mateyus 28:19, 20). Ma efu wi horidoro na ini a wroko disi, wi kan yepi fu kibri sma libi. Awansi fa a no fa, wi sa leri furu sani di abi fu du nanga sakafasi, èn wi sa waka baka na eksempre fu wi Masra, Yesus Krestes.

Yesus sori sakafasi leki libisma

12-14. (a) Fa Yesus sori sakafasi te sma ben e prèise en? (b) Fa Yesus sori sakafasi te a ben e handri nanga trawan? (c) San e sori taki Yesus no ben sori sakafasi soso fu di a ben musu du dati, noso fu di a ben abi bun maniri?

¹² Sensi a bigin te na a kaba fu Yesus en diniwroko na grontapu, sma ben sabi en leki wan man di abi sakafasi. Yesus ben sori sakafasi, fu di ala ten a ben e meki en Tata kisi ala prèise nanga glori. Son leisi, sma ben e prèise Yesus fu a koni fu en, a makti di a ben abi fu du wondru, èn srefi fu den bun fasi di a ben abi. Ibri tron baka, Yesus ben weigri fu teki a grani disi, ma na presi fu dati a ben meki Yehovah kisi grani.​—Markus 10:17, 18; Yohanes 7:15, 16.

¹³ A fasi fa Yesus ben handri nanga sma, e sori taki a ben abi sakafasi. Fu taki en leti, a taki krin dati a no kon na grontapu fu sma dini en, ma a kon fu dini sma (Mateyus 20:28). A ben sori sakafasi fu di a ben handri na wan safri-ati fasi nanga sma, èn a no ben fruwakti tumusi furu fu den. Te den bakaman fu en no ben du san a leri den, dan a no ben e ati bron nanga den, ma a ben pruberi fu doro na ati fu den (Mateyus 26:39-41). Aladi ipi-ipi sma ben kon na en te a ben wani de en wawan na wan tiri presi fu rostu, toku a no ben seni den gowe, ma a ben du ala san a man fu leri den „furu sani” (Markus 6:30-34). Di wan uma di no ben de wan Israelsma tan begi en fu dresi en umapikin, dan na a bigin a ben taki dati a no ben o du dati. Ma a no ben taki grofu nanga na uma disi. Te fu kaba a yepi en, fu di a ben si taki a abi wan tranga bribi. Wi sa taki fu a tori dati na ini Kapitel 14.​—Mateyus 15:22-28.

¹⁴ Na furu difrenti fasi Yesus ben du soleki fa a ben taki fu ensrefi: „Mi abi safri-ati nanga sakafasi” (Mateyus 11:29). A no ben sori sakafasi soso fu di a ben musu du dati, noso fu di a ben wani sori taki a abi bun maniri. Ma a ben komoto fu en ati. Fu dati ede, Yesus ben si en leki wan tumusi prenspari sani fu leri den bakaman fu en fu abi sakafasi!

A leri den bakaman fu en fu abi sakafasi

15, 16. Soleki fa Yesus sori, dan sortu fasi den tiriman fu grontapu abi, èn fa dati e difrenti fu a fasi di den bakaman fu en musu abi?

¹⁵ Den apostel fu Yesus no ben de gaw fu sori sakafasi. Ibri tron baka, Yesus ben musu leri den fu sori sakafasi. Fu eksempre, wan leisi Yakobus nanga Yohanes seni den mama fu aksi Yesus fu gi den wan hei posisi na ini Gado Kownukondre. Na wan sakafasi, Yesus piki: „A no mi musu taki suma kan go sidon na mi reti-anusei èn suma kan go sidon na mi kruktu-anusei, ma na mi Tata sreka a presi dati gi suma a wani.” Den tra tin apostel ben „mandi” tapu Yakobus nanga Yohanes (Mateyus 20:20-24). Fa Yesus lusu a problema disi?

¹⁶ Na wan switi fasi a piri-ai gi den alamala, èn a taki: „Unu sabi taki den tiriman fu den grontapusma, e basi den èn den bigiman abi makti na den tapu. A no de so nanga unu, ma efu wan sma wani de wan bigiwan na un mindri, dan a musu de un dinari; efu wan sma wani de a fosiwan na un mindri, dan a musu de un srafu” (Mateyus 20:25-27). A musu de so taki den apostel ben si taki den „tiriman fu den grontapusma” ben abi heimemre, den ben suku fu kisi moro makti èn den ben denki densrefi nomo. Yesus ben sori taki den bakaman fu en no musu de leki den tiriman disi di e pina a pipel, èn di e du ala san den man fu kisi moro makti. Den bakaman fu en ben musu abi sakafasi. Den apostel ben frustan a tori?

17-19. (a) Na sortu heri moi fasi Yesus leri den apostel fu en fu sori sakafasi, na a neti bifo a dede? (b) San na a moro prenspari sani di Yesus du leki libisma fu leri den bakaman fu en sakafasi?

¹⁷ A no ben makriki gi den apostel fu leri sakafasi. Disi no ben de a fosi leisi di Yesus leri den so wan sani, èn a no ben de a lasti leisi tu. Wan leisi, di den ben haritaki suma fu den na a moro bigiwan, dan Yesus poti wan yongu pikin na den mindri, èn a taigi den fu tron leki yongu pikin. Tra fasi leki bigisma, pikin-nengre no abi heimemre, den no e feti fu kisi grani, èn den no e luku sortu posisi wan sma abi (Mateyus 18:1-4). Toku, na a neti bifo Yesus dede, a si taki den apostel fu en ben abi heimemre ete. Ne a leri den wan heri moi sani. A tai wan duku na en mindribere, èn a du a moro lagi wroko, di nofo tron wan futuboi ben e du gi fisitiman. Yesus ben wasi den futu fu ibriwan fu den apostel fu en, sosrefi a di fu Yudas, di ben o tori en bakaten!​—Yohanes 13:1-11.

¹⁸ Yesus yepi den fu frustan a tori, di a taigi den: „Mi gi unu na eksempre” (Yohanes 13:15). A sani di a du ben doro na ati fu den? We, tapu a srefi neti dati, den bigin haritaki baka suma fu den na a moro bigiwan! (Lukas 22:24-27) Toku, Yesus tan abi pasensi nanga den èn na wan sakafasi a tan gi den leri. Baka dati, a du wan moro prenspari sani di ben o leri den fu abi sakafasi: „A saka ensrefi èn a gi yesi te na dede, iya, a dede na wan pina-postu” (Filipisma 2:8). Yesus ben de klariklari fu saka ensrefi awinsi dati ben wani taki dati a dede na wan syen fasi. Iya, sma krutu en leki wan ogriman èn leki wan sma di kosi Gado, aladi dati no ben de so. Na so fasi Gado Manpikin sori taki fu ala den sma di Yehovah meki, en wawan sori sakafasi dorodoro.

¹⁹ Kande na a lasti sani disi di Yesus du leki libisma, naki na ati fu den bakaman fu en fu sori sakafasi. Bijbel e taki dati furu yari langa, srefi someni tenti yari baka dati, den man disi ben sori sakafasi di den ben e du a wroko fu den. Fa a de nanga wi?

Yu o teki na eksempre fu Yesus?

20. Fa wi kan kon sabi efu wi abi trutru sakafasi?

²⁰ Paulus e gi ibriwan fu wi a rai disi: „Tan abi a srefi denki disi di Krestes Yesus ben abi tu” (Filipisma 2:5). Neleki Yesus, wi musu abi sakafasi. Fa wi kan sabi efu wi abi trutru sakafasi? We, Paulus e memre wi taki wi no musu ’strei nanga makandra èn wi no musu prakseri tumusi furu fu wisrefi, ma nanga sakafasi wi musu si trawan moro hei leki wisrefi’ (Filipisma 2:3). Sobun, a piki tapu na aksi dati abi fu du nanga a fasi fa wi e si trawan. Wi musu si trawan moro hei noso moro prenspari leki wisrefi. Yu o fiti a rai dati?

21, 22. (a) Fu san ede Kresten owruman musu abi sakafasi? (b) Fa wi kan sori taki wi abi trutru sakafasi?

²¹ Furu yari baka di Yesus dede, na apostel Petrus ben e denki ete o prenspari a de fu sori sakafasi. Petrus ben leri den Kresten owruman fu du a wroko fu den nanga sakafasi, èn taki noiti den musu prei basi gi den skapu fu Yehovah (1 Petrus 5:2, 3). A no fu di wan sma abi frantwortu, meki taki a kan abi heimemre. Ma o moro wan sma abi frantwortu, o moro a musu sori trutru sakafasi (Lukas 12:48). A no de fu taki dati a fasi disi no prenspari wawan gi owruman, ma gi ala Kresten.

²² Wi kan de seiker taki Petrus noiti no frigiti a neti di Yesus wasi en futu, srefi efu a no ben wani dati! (Yohanes 13:6-10) Petrus ben skrifi den Kresten: „Un alamala musu abi sakafasi, iya, tai en leki wan banti na un mindribere te unu e handri nanga makandra” (1 Petrus 5:5). Den wortu „tai en leki wan banti na un mindribere” e meki wi prakseri wan futuboi di ben tai wan fesikoki na en mindri te a ben o du wan lagi wroko. Kande a tekst disi e memre wi na a okasi di Yesus ben tai wan duku na en mindribere, fosi a saka kindi fu wasi den futu fu en apostel. Te wi e waka baka Yesus, dan nowan wroko di Gado gi wi fu du o lagi tumusi gi wi, a no so? Ala sma musu man si taki wi abi trutru sakafasi, neleki a de wan banti na wi mindribere.

23, 24. (a) Fu san ede wi musu luku bun taki wi no e kisi heimemre na nowan fasi? (b) Sortu fowtu denki di sma abi te a abi fu du nanga sakafasi, wi sa go luku na ini a tra kapitel?

²³ Heimemre de leki vergif. A abi takru bakapisi te wan sma abi heimemre. Srefi efu wan sma abi a koni fu man du furu sani, ma a abi heimemre, Gado no man gebroiki en kwetikweti. Ma na a tra sei, Yehovah kan gebroiki wan sma di abi sakafasi, srefi efu trawan no e si en leki wan prenspari sma. Wi musu du muiti ibri dei fu kon abi a moi fasi disi. Wi kan du dati te wi e du ala san wi man fu waka baka Krestes na wan sakafasi. Wan tumusi moi blesi e wakti wi te wi e du dati. Petrus ben skrifi: „Saka unsrefi na ondro a makti anu fu Gado, so taki a kan hei unu na a reti ten” (1 Petrus 5:6). A no de fu taki dati Yehovah hei Yesus, fu di a ben saka ensrefi dorodoro. Na so a de tu taki a Gado fu wi, o blesi yu te yu e sori sakafasi.

²⁴ A sari fu si taki son sma e denki taki sakafasi na wan swakifasi. Na eksempre fu Yesus e yepi wi fu si taki dati no tru, fu di a moro sakafasi man ben de sosrefi a moro deki-ati man. Na dati wi sa go luku na ini a tra kapitel.