Eksempre foe sakafasi di wi moesoe waka na baka

„Joe eigi sakafasi sa meki mi kon bigi.” — PSALM 18:35.

1. Sortoe boeweisi foe sakafasi wi kan si ini wan fosi presidenti foe a Waktitoren Genootschap?

JOSEPH F. RUTHERFORD ben de wan man di sma ben si wantronwantron, foe di a ben langa moro leki 1 meter 80 èn a ben wegi moro leki 90 kilo. A ben abi wan krakti sten toe, di a ben gebroiki no wawan foe meki a nen foe Jehovah bekènti, di a ben meki bekènti leki no wan ten na fesi, ma a ben tjari a falsifasi foe den kerki tiriman foe krestenhèit kon na krin toe, foe di a ben kari a relisi foe den „wan trapoe èn wan nèt”. Ma ala di den lezing foe en ben de kraktiwan, tokoe te a ben begi nanga a Bethelfamiri foe na edekantoro, a ben de neleki wan pikin boi di e taki nanga en papa. Na so fasi a ben boeweisi a krosibei matifasi di a ben abi nanga a Mekiman foe en èn a sakafasi foe en. Ija, a ben abi sakafasi neleki wan toti pikin. — Mateus 18:3, 4.

2. Na ini sortoe spesroetoe sani den foetoeboi foe Jehovah de heri tra fasi leki sma foe grontapoe?

² Sondro misi, ala den troe foetoeboi foe Jehovah Gado abi sakafasi. Ini a tori disi den de heri tra fasi leki sma foe grontapoe. Ini a ten disi grontapoe lai moro leki iniwan ten na fesi, nanga sma di abi bigifasi. Den di abi wan hei posisi èn di abi makti, den di goedoe èn di kisi skoro, èn srefi foeroe foe den pôti sma èn den di no abi foeroe na tapoe tra kontren, abi bigifasi.

3. San wi kan taki foe den froktoe foe bigimemre?

³ Bigimemre e meki boen foeroe strèi nanga sari sani kon. Ija, ala den heloe ini na universum ben bigin, foe di wan seiker engel ben kisi bigi fasi, èn a ben wani foe kisi na anbegi na a fasi fa Jehovah, a Mekiman, wawan moesoe kisi anbegi (Mateus 4:9, 10). Boiti dati, a sma dati, di ben meki ensrefi kon tron Didibri èn Satan, ben abi boen bakapisi foe kori a fosi oema, Eva, foe di a ben wroko na tapoe a bigimemre foe en. A ben pramisi Eva taki efoe a ben sa njan a froktoe, di a no ben mag njan, dan a ben kan de leki Gado srefi, foe di a ben sa sabi boen nanga ogri. Efoe Eva ben abi sakafasi, dan a ben sa taki: ’Foe san ede mi wani de leki Gado?’ (Genesis 3:4, 5) Te wi e go loekoe a sari situwâsi foe a libisma famiri, na skin fasi, na froestan sei èn na moreel sei, dan bigimemre na wan sani di libisma no moesoe kisi pardon foe dati! A no de foe froewondroe taki wi e leisi dati Jehovah no wani si „a hei di wan sma e hei ensrefi èn bigimemre”, na ai! (Odo 8:13) Heri tra fasi foe ala den sma di abi bigifasi, na den eksempre foe sakafasi di wi e feni ini Gado Wortoe, bijbel.

Jehovah Gado abi sakafasi

4. Sortoe bijbeltekst e sori taki Jehovah abi sakafasi?

⁴ Jehovah Gado — a Moro Hei Sma, na Universeel Soeverein, a Kownoe foe têgo — abi sakafasi (Genesis 14:22). A sani dati kan? Ija, a no de foe taki! Kownoe David ben taki, so leki fa a skrifi ini Psalm 18:35: „Joe sa gi mi joe schild foe froeloesoe èn joe eigi leti-anoe sa horibaka gi mi, èn joe eigi sakafasi sa meki mi kon bigi.” A de krin, taki kownoe David ben gi Jehovah a grani foe a sakafasi di A abi, foe di a ben meki en, David, kon bigi. Ete wan tron wi e leisi ini Psalm 113:6 taki Jehovah „e saka ensrefi foe loekoe na hemel èn na grontapoe”. Tra vertaling e taki: ’e saka kon foe kon loekoe’ (New International Version), ’no e si ensrefi toemoesi hei foe saka kon loekoe so lagi’.—The New English Bible.

5. Sortoe sani di ben pasa e sori a sakafasi foe Jehovah?

⁵ Foe troe Jehovah Gado ben saka ensrefi ini a fasi fa a ben handri nanga Abraham, foe di a ben gi Abraham pasi foe ondrosoekoe En regtfardikifasi ini a tori foe a prakseri di a ben abi foe pori den ogri foto Sodom nanga Gomoraa (Genesis 18:23-32). Èn di Jehovah ben sori a firi foe en foe pori a nâsi Israèl — wán leisi foe di den ben anbegi kroektoe gado, wan tra leisi foe di den ben opo densrefi kontrari Gado — dan na ibri foe den okasi Moses ben taki-go-taki-kon nanga Jehovah, neleki a ben taki nanga wan tra libisma. Ibritron Jehovah ben piki na wan boenfasi. A ben sori sakafasi foe En sei foe di a ben doe san Moses ben begi tranga ini a tori foe En pipel Israèl (Exodus 32:9-14; Numeri 14:11-20). Tra eksempre fa Jehovah ben handri na wan sakafasi nanga libisma persoonlijk, foe taki en so, wi kan si ini a matifasi foe en nanga Gideon èn nanga Jona, so leki fa a skrifi ini Kroetoebakra 6:36-40 èn ini Jona 4:9-11.

6. Sortoe eigifasi foe Jehovah e tjari a sakafasi foe en moro fara kon na krin?

⁶ Foe taki en leti, dan awansi fa a no fa, neigi tron, den e taki dati Jehovah „no e atibron esi”.b Taki Jehovah abi langa pasensi, èn taki a no e atibron esi te a ben e handri nanga onvolmaakti libisma mekisani ini ala den doesoendoesoen jari, na wan tra boeweisi taki a abi sakafasi. Sma di abi bigifasi no abi pasensi, den de esi-esi foe sori atibron, heri tra fasi foe langa pasensi. Fa a sakafasi foe Jehovah e meki a bigimemre foe onvolmaakti libisma sori wan soso sani! Foe di den e froeteri wi foe ’waka na Gado baka leki lobi pikin’, wi moesoe abi sakafasi neleki fa en abi sakafasi. — Efeisesma 5:1.

Krestes eksempre foe sakafasi

7, 8. San den Boekoe foe bijbel e taki foe a sakafasi foe Jesus Krestes?

⁷ A di foe toe moro moi eksempre foe sakafasi di wi moesoe waka na dati baka, den e kari ini 1 Petrus 2:21: „Foe taki en leti, oenoe ben kisi kari foe a waka nanga libi disi, bikasi Krestes toe ben pina gi oenoe, èn libi wan model gi oenoe foe waka soifri na ini en foetoemarki.” Langa bifo Jesus ben kon na grontapoe leki wan libisma, den ben froeteri foe en na fesi ini Sakaria 9:9: „Prisiri, o joe oemapikin foe Jerusalem. Loekoe! Joe kownoe srefi e kon na joe. A de regtfardiki, ija, a kisi froeloesoe; a abi sakafasi èn a e rèi na tapoe wan boeriki.” Efoe Jesus Krestes ben abi bigifasi, dan foe troe a ben sa teki a pristeri di Didibri ben pristeri en ala kownoekondre foe grontapoe ini a presi foe a wán leisi di a ben sa anbegi Didibri (Mateus 4:9, 10). A ben sori a sakafasi foe en toe, foe di a ben gi Jehovah ala grani foe den sani di a ben leri sma, di a ben taki: „Te oenoe opo a Manpikin foe libisma kaba, dan oenoe sa kon sabi taki mi na en, èn taki mi no e doe no wan sani foe misrefi; ma so leki a Tata ben leri mi, na so mi e taki den sani disi.” — Johanes 8:28.

⁸ Na wan fasi di fiti a ben kan taigi den arkiman foe en: „Teki mi tjatjari na oenoe tapoe èn leri foe mi, bika mi abi safrifasi èn sakafasi foe ati, èn oenoe sa feni kowroe-ati gi oen sili” (Mateus 11:29). Èn fa a ben gi wan moi eksempre foe sakafasi, di a ben wasi den foetoe foe den apostel foe en na a lasti neti di a ben de nanga den leki wan libisma! (Johanes 13:3-15) A fiti srefisrefi taki na apostel Paulus e gi kresten a rai ini Filipisma 2:3-8, foe abi „sakafasi foe jeje”, te a e teki Jesus Krestes leki wan eksempre: „Kibri a fasi na froestan sei disi na ini oenoe, di ben de ini Krestes Jesus toe, di, ala di a ben de na ini a fasi foe Gado, a no ben prakseri foe teki dati na wan ogrifasi, dati wani taki, foe wani de leki Gado. Nôno, ma a ben libi en glori èn a ben teki a fasi foe wan srafoe èn a ben tron leki libisma. Moro leki dati, di a ben de ini a fasi foe libisma, a ben saka ensrefi èn a ben gi jesi te na dede, ija, a dede na wan pina-oedoe.” Di a ben tanapoe na fesi a moro bigi banawtoe foe en libi, a ben begi na wan sakafasi na en Tata: „No so leki mi wani, ma so leki joe wani” (Mateus 26:39). Foe troe, efoe wi wani waka na Jesus Krestes baka, èn waka soifri ini den foetoemarki foe en, dan wi moesoe abi sakafasi.

Na apostel Paulus, wan moi eksempre foe sakafasi

9-12. Na sortoe fasi na apostel Paulus ben gi wan moi eksempre foe sakafasi?

⁹ Na apostel Paulus ben skrifi: „Waka na mi baka, so leki mi e waka na Krestes baka” (1 Korentesma 11:1). A ben de so, taki na apostel Paulus ben waka na Jesus Krestes baka, foe di a ben abi sakafasi foe jeje, èn na so fasi ben gi wi wan tra eksempre foe sakafasi di wi moesoe waka na dati baka? Wi kan de seiker taki a ben doe dati. Ini a fosi presi, a ben erken na wan sakafasi taki a ben de wan srafoe foe Jesus Krestes (Filipisma 1:1). A ben taigi den owroeman foe Efeise taki a ’ben wroko tranga gi Masra nanga a moro bigi sakafasi foe jeje èn watra-ai èn tesi di ben kon na en tapoe foe di den djoe ben meki takroe plan kontrari en’ (Tori foe den Apostel 20:17-19). Efoe a no ben abi sakafasi, dan noiti a no ben sa skrifi den wortoe di wi e feni ini Romesma 7:18, 19: „Mi sabi taki ini mi, dati wani taki, ini mi skin, no wan sani no de di boen. . . . Bika a boen di mi e winsi, mi no e doe, ma a takroe di mi no e winsi, na dati mi e doe.”

¹⁰ Wan tra sani di e sori a sakafasi foe Paulus toe, na san a ben skrifi gi den kresten na Korente so leki fa a skrifi ini 1 Korentesma 2:3: „Mi ben kon na oenoe ini swakifasi èn na ini frede èn nanga foeroe beifi.” Na wan sakafasi a ben sori go na en fosi waka nanga libi bifo a ben tron wan kresten èn a ben skrifi: „Fosi mi ben de wan gongosaman èn wan sma di ben froefolgoe trawan èn wan sma sondro sjen . . . Krestes Jesus ben kon na ini grontapoe foe froeloesoe sondari. Foe den disi mi de a moro prenspariwan.” — 1 Timoteus 1:13, 15.

¹¹ A e sori en sakafasi moro fara te a e gi Jehovah Gado a grani foe ala boen bakapisi di a ben abi ini den moeiti foe en. A ben skrifi foe a diniwroko foe en: „Mi prani, Apolos gi watra, ma Gado ben tan meki a gro, so taki a no a sma di e prani de wan sani, èn a no a sma toe di e gi watra, ma Gado, di e meki a gro” (1 Korentesma 3:6, 7). A ben aksi den brada foe en toe foe begi gi en taki a ben sa man gi wan boen kotoigi, so leki wi e leisi ini Efeisesma 6:18-20: „Tan begi . . . gi mi, so taki mi kan kisi a man di mi man taki . . . so taki mi kan taki ini a tori foe [a santa kibritori foe a boen njoensoe], di mi moesoe taki fri èn sondro frede.”

¹² Paulus ben sori en sakafasi toe ini a fasi fa a ben wroko makandra nanga den tra apostel: „Jakobus, Cefas nanga Johanes . . . ben gi mi nanga Barnabas a leti-anoe foe prati sani nanga makandra, taki wi moesoe go na den nâsi, ma den na denwan di besnij” (Galasiasma 2:9). Moro fara a ben sori a de di a ben de klariklari foe wroko makandra nanga den owroeman foe a gemeente foe Jerusalem, foe di a ben go nanga fo jonkoeman na a tempel èn a ben pai den kostoe foe den, foe di den ben abi wan sweri di den ben moesoe hori. — Tori foe den Apostel 21:23-26.

13. San ben meki a sakafasi foe Paulus so aparti?

¹³ A sakafasi foe Paulus na wan aparti sani, di de moro moi foe si te wi e loekoe o boen Jehovah Gado ben gebroiki en. Wi e leisi foe eksempre, taki „Gado ben tan doe toemoesi aparti krakti wroko nanga jepi foe den anoe foe Paulus” (Tori foe den Apostel 19:11, 12). Moro ete, Gado ben gi en a krakti foe kisi fisjoen nanga openbaring (2 Korentesma 12:1-7). Wi no moesoe frigiti toe taki nanga jepi foe santa jeje a ben skrifi 14 foe den 27 boekoe (te joe e loekoe en boen, dan den na brifi) foe den kresten Griki Boekoe foe bijbel. Ala den sani dati no ben frei go na en ede, foe taki en so. A ben tan abi sakafasi.

Disiten eksempre

14-16. (a) Fa a fosi presidenti foe a Watch Tower Society ben de wan moi eksempre foe sakafasi? (b) Na eksempre foe en de heri tra fasi foe na eksempre foe soema?

¹⁴ Ini Hebrewsma 13:7, wi e leisi a rai foe na apostel Paulus: „Memre den di e teki fesi na oen mindri, di ben taki a wortoe foe Gado gi oenoe èn waka na a bribi foe den baka, nanga ala di oenoe e loekoe na a kaba foe a waka foe den.” Efoe wi e tan na a gronprakseri disi, wi kan teki leki wan disiten eksempre a fosi presidenti foe a Watch Tower Bible and Tract Society, Charles Taze Russell, a sma di wi kan waka na en bribi baka. A ben de wan man di abi sakafasi? Ija, foe troe! So leki sma ben kan si heri boen ini san ben skrifi ini den Studies in the Scriptures foe en, wan boekoe di de ini siksi pisi di makandra abi wan sani foe 3000 bladzijde, dan no wan leisi a ben taki foe ensrefi. Den poeblikâsi foe a Watch Tower Bible and Tract Society ini a ten disi, e waka na a srefi gronprakseri disi baka, foe di den no e poti prakseri na tapoe libisma èn e taki soema na den skrifiman foe den artikel.

¹⁵ Ini a Watch Tower, Russell ben skrifi wan leisi taki a no ben sabi den sani leki „Russellisme” nanga „Russellsma”, wortoe di den gensman foe en ben gebroiki, ma di en ben trowe krinkrin. A ben skrifi: „A wroko foe wi . . . ben de foe tjari den pisipisi disi foe waarheid kon makandra, di ben panja wan heri pisi ten kaba èn pristeri den na a pipel foe Masra — no leki wan njoen sani, no leki wan sani foe wi, ma leki a di foe Masra. . . . A wroko di Masra ben abi prisiri nanga dati, foe gebroiki den saka fasi talenti foe wi, ben de moro foeroe wan wroko foe seti sani baka, kenki sani foe den kon boen baka, foe tjari wánfasi kon, leki a ben de wan wroko foe bigin nanga wan njoen sani.” Foe troe, a ben tjari kon na fesi san na apostel Paulus ben firi, so leki wi kan leisi ini 1 Korentesma 3:5-7.

¹⁶ A fasi foe en ben de heri tra fasi leki a di foe Charles Darwin. Ini a fosi pisi foe en boekoe The Origin of Species ini 1859, Darwin ben taki ibritron baka foe a „mi”-leri, èn ben frigiti san trawan bifosi en ben taki foe evolutie. Samuel Butler, wan barinen skrifiman foe a jarihondro dati, ben kosi Darwin, èn a ben tjari kon na krin taki foeroe trawan di ben de bifosi en ben horibaka gi na evolutie denki; a no ben de wan sani di ben bigin na Darwin kwetikweti.

17. Sortoe tra eksempre wi abi foe a sakafasi foe brada Rutherford?

¹⁷ Wan tra getrow foetoeboi ini a ten disi di Jehovah Gado ben gebroiki boen, ben de Joseph F. Rutherford, di wi ben taki foe en na a bigin. A ben de wan sma di ben horibaka gi bijbel waarheid fri èn sondro frede èn spesroetoe gi a nen foe Jehovah. Ala di sma ben sabi en na ala sei leki Kroetoeman Rutherford, a ben de troetroe wan man di abi sakafasi. Foe eksempre, wan leisi a ben taki wan toe sani nanga ala seiker fasi san kresten ben kan froewakti ini 1925. Di den sani di ben pasa no ben horibaka gi san a ben froewakti, dan na wan sakafasi a ben taigi a Bethelfamiri na Brooklyn, dati a ben handri na wan don fasi. Wan salfoe kresten di ben abi krosibei demakandra nanga en, ben taki dati ibritron baka a ben jere fa brada Rutherford ben aksi pardon neleki fa a skrifi ini Mateus 5:23, 24, na poebliki, so boen leki te a ben de en wawan nanga wan kompe-kresten, foe di a ben hati a kompe-kresten dati nanga wan don sani di a ben taki. A e aksi sakafasi foe wan sma di abi wan posisi foe makti, foe aksi pardon na den sma di de na en ondro. Brada Rutherford ben de wan moi eksempre gi ala opziener, efoe den de ini a gemeente, ini a wroko foe rèis noso na wan foe den bijkantoro foe a Genootschap.

18. Sortoe sani di a di foe dri presidenti foe a Genootschap ben taki, ben tjari wan jeje foe sakafasi kon na krin?

¹⁸ A di foe dri presidenti foe a Watch Tower Bible and Tract Society, Nathan H. Knorr, ben sori toe taki, ala di a ben abi wan hei posisi na mindri a pipel foe Jehovah, a no ben firi ensrefi hei foe a posisi di a ben abi. Ala di a ben man orga sani boen srefisrefi èn a ben man taki boen na poebliki, a ben abi foeroe lespeki gi san trawan ben e doe. Na so a ben go fisiti wan memre foe a Skrifi Afdeling na en kantoro wan leisi èn a ben taki: „Dja na pe a moro prenspari èn a moro moeilek wroko e doe. Dati meki mi e doe so pikinso foe en.” Ija, na wan sakafasi a ben doe a rai ini Filipisma 2:3, taki ’nanga sakafasi foe jeje wan sma moesoe loekoe a trawan moro hei leki a e loekoe ensrefi’. A ben froestan taki, ala di a wroko foe dini leki a presidenti foe a Genootschap ben de prenspari, taki tra wroko ben de prenspari toe. A ben wani taki sakafasi foe en sei foe firi a fasi dati èn foe taki en so krin. A ben de wan tra moi eksempre di ala sma moesoe waka na dati baka, spesroetoe denwan di kande abi wan hei posisi foe wan opziener.

19, 20. (a) Sortoe eksempre foe sakafasi, a di foe fo presidenti foe a Genootschap ben gi? (b) Sortoe jepi a tra artikel sa gi wi ini a tori foe a sakafasi di wi moesoe oefen?

¹⁹ A di foe fo presidenti foe a Genootschap, Fred W. Franz, ben de wan moi eksempre toe foe sakafasi. Di a ben de ondro-presidenti foe a Genootschap so wan sani foe 32 jari, a ben skrifi foeroe artikel gi den tijdschrift èn kongresprograma; tokoe foe en sei, no wan leisi a ben poti a prakseri na tapoe ensrefi èn noiti a ben soekoe foe kisi a prakseri. Wi kan kari wan eksempre foe owroeten di de a srefi. Di Joab ben poeroe den Amonsma na pasi na Raba, a ben sorgoe taki kownoe David ben kisi a grani gi a wini. — 2 Samuèl 12:26-28.

²⁰ Foe troe, foeroe moi eksempre de ini a ten di pasa kaba èn now, di e gi wi krakti reide foe abi sakafasi. Ma moro foeroe reide de gi wi foe abi sakafasi èn ini a tra artikel wi sa go loekoe den reide disi, so boen leki den jepisani foe meki wi abi sakafasi.

[Foetoewortoe]

Joe e memre disi ete?

◻ San ben de den froktoe foe bigimemre?

◻ Soema ben gi a moro moi eksempre foe sakafasi?

◻ San e sori wi soema na a di foe toe moro bigi eksempre foe sakafasi?

◻ Sortoe moi eksempre foe sakafasi na apostel Paulus ben gi?

◻ Sortoe prenspari disiten eksempre foe sakafasi wi abi?

[Prenki na tapoe bladzijde 9]

Na wan moi fasi Jesus ben sori sakafasi

[Prenki na tapoe bladzijde 10]

Paulus ben gi wan moi eksempre foe sakafasi

[Prenki na tapoe bladzijde 11]

Brada Russell no ben teki a grani foe den sani di a ben skrifi