„Noiti ete wan sma taki leki a man disi”

1, 2. (a) Fu san ede den skowtu di ben musu go grabu Yesus, ben drai kon baka sondro en? (b) Fu san ede Yesus ben de wan heri bun leriman?

DEN Fariseiman e ati bron srefisrefi. Yesus de na ini a tempel, èn a e gi leri fu en Tata. Furu fu den sma drape e poti bribi na ini Yesus, aladi trawan wani taki sma musu grabu en tyari go sroto. Fu di den kerki fesiman no man hori densrefi moro, meki den e seni skowtu fu go grabu Yesus. Ma den skowtu e drai kon baka sondro Yesus. Fu dati ede, den edeman fu den priester nanga den Fariseiman e aksi den: „Fu san ede unu no tyari en kon dya?” Den skowtu e piki: „Noiti ete wan sma taki leki a man disi.” A fasi fa Yesus ben e gi leri, ben abi so furu krakti tapu den skowtu taki den no ben abi na ati fu grabu en tyari go sroto.a​—Yohanes 7:45, 46.

² A fasi fa Yesus ben e gi leri, no ben abi krakti wawan tapu den skowtu. Ipi-ipi sma ben e kon makandra fu yere fa a ben e gi leri (Markus 3:7, 9; 4:1; Lukas 5:1-3). Fu san ede Yesus ben de so wan bun leriman? Soleki fa wi si kaba na ini Kapitel 8, dan a ben lobi den tru tori di a ben e tyari kon na krin èn a ben lobi den sma di a ben e gi leri. Boiti dati, a ben sabi heri bun fa fu gi leri na difrenti fasi. Meki wi go luku dri moi fasi fa a ben e gi leri èn fa wi kan teki na eksempre fu en.

A ben e gi leri na wan makriki fasi

3, 4. (a) Fu san ede Yesus ben gebroiki makriki wortu te a ben e gi leri? (b) Na sortu fasi a Bergitaki e sori taki Yesus ben e gi leri na wan makriki fasi?

³ Yu prakseri omeni kefalek wortu Yesus ben kan gebroiki? Ma toku, te a ben e gi leri, dan noiti a ben e taki sani di ben muilek tumusi fu frustan gi den arkiman fu en, di nofo tron „no ben kisi furu skoro” (Tori fu den Apostel 4:13). A ben hori den arkiman fu en na prakseri èn noiti a ben e leri den so furu sani taki den no ben man frustan en (Yohanes 16:12). A ben e gebroiki makriki wortu, ma den tru tori di a ben e leri ben de heri prenspari.

⁴ Luku fu eksempre a Bergitaki di skrifi na ini Mateyus 5:3–7:27. Den rai di Yesus gi na ini a Bergitaki ben meki sma denki dipi fu sani fu di a ben taki fu a rutu fu a problema. A no ben taki fu sani di ben o de muilek gi sma fu frustan. Fu taki en leti, nofo tron Yesus ben gebroiki wortu di wan pikin-nengre srefi ben o frustan wantewante! Fu dati ede, a no de fu taki dati di Yesus kaba nanga a taki fu en, dan den ipi-ipi sma, di ben de gronman, skapuman, nanga fisiman, ben „fruwondru fu a fasi fa a ben gi leri”.​—Mateyus 7:28.

5. Gi wan tu eksempre fu makriki sani di Yesus ben taki, ma di ben wani taki furu.

⁵ Nofo tron te Yesus ben e gi leri, a no ben gebroiki furu wortu èn a ben taki sani di ben wani taki furu. Na ini a pisi ten dati, di sma no ben abi buku, Yesus ben man tyari a boskopu fu en kon na krin na so wan fasi taki a ben doro na ati fu den arkiman fu en. Luku wan tu eksempre: „No krutu sma moro, so taki trawan no krutu unu.” „Sma di de gosontu no abi datra fanowdu, ma na sikisma abi datra fanowdu.” „A yeye wani, ma a skin swaki.” „Pai Caesar den sani di de fu Caesar, ma pai Gado den sani di de fu Gado.” „Wan sma sa de moro koloku te a e gi sani, leki te a e kisi sani”b (Mateyus 7:1; 9:12; 26:41; Markus 12:17; Tori fu den Apostel 20:35). Pikinmoro 2000 yari baka dati, den wortu disi na wortu di furu sma sabi te now ete.

6, 7. (a) Fu san ede a de prenspari fu gebroiki makriki wortu te wi e gi leri? (b) San wi kan du fu no taki fu tumusi furu sani te wi e studeri Bijbel nanga sma?

⁶ Fa wi kan gi leri na wan makriki fasi? Wan prenspari sani di wi musu du, na taki wi musu gebroiki makriki wortu di furu sma man frustan wantewante. Den moro prenspari tru tori fu Gado Wortu, no muilek fu frustan. Yehovah tyari den sani di a abi na prakseri kon na krin gi reti-ati sma di abi sakafasi (1 Korentesma 1:26-28). Makriki wortu di wi e gebroiki na wan koni fasi, kan tyari den tru tori fu Gado Wortu kon na krin.

⁷ Efu wi wani gi leri na wan makriki fasi, dan wi musu luku bun fu no taki fu tumusi furu sani nanga wan Bijbelstudenti. Sobun, te wi e hori wan Bijbelstudie, wi no musu fruklari ibri pikinpikin sani. A no de fanowdu tu fu studeri esi-esi, neleki a de prenspari omeni bladzijde wi e studeri. Na presi fu dati, a de wan koni sani fu hori a situwâsi fu a studenti na prakseri èn wi musu luku omeni a man studeri. A marki di wi abi, na fu yepi a studenti fu tron wan bakaman fu Krestes èn wan anbegiman fu Yehovah. Fu dati ede, wi musu gi a studenti a ten di a abi fanowdu fu kon frustan den sani di a e leri. Na a fasi disi wawan den tru tori fu Bijbel o naki na ati fu en èn o meki taki a fiti den sani di a leri.​—Romesma 12:2.

A ben e poti bun aksi gi sma

8, 9. (a) Fu san ede Yesus ben poti aksi? (b) Fu san ede Yesus ben gebroiki aksi fu yepi Petrus kisi a yoisti denki te a ben abi fu du nanga a belasting moni fu a tempel?

⁸ Na wan heri moi fasi, Yesus ben gebroiki aksi, srefi efu a ben kan taigi den arkiman fu en wantewante san a ben wani tyari kon na krin. Ma fu san ede a ben e poti aksi? Son leisi, a ben e poti aksi na so wan fasi taki a ben kon na krin sortu fowtu denki den gensman fu en ben abi, èn na so fasi a ben tapu den mofo gi den (Mateyus 21:23-27; 22:41-46). Ma na furu okasi a ben gebroiki aksi fu meki den disipel fu en taki fa den ben prakseri fu wan tori èn na so a ben leri den fu denki bun fu sani. Fu dati ede a ben poti aksi soleki „San unu e denki?” noso „Yu e bribi disi?” (Mateyus 18:12; Yohanes 11:26) Nanga yepi fu aksi, Yesus ben doro na ati fu den disipel fu en. Meki wi go luku wan eksempre.

⁹ Wan leisi, den man di ben piki belasting moni gi lanti, aksi Petrus efu Yesus ben pai a belasting moni fu a tempel.c Wantewante Petrus piki den: „Iya.” Bakaten Yesus taki nanga Petrus, èn a aksi en: „San yu denki, Simon? Fu suma den kownu fu grontapu e kisi edemoni noso belasting moni? Fu den manpikin fu den, noso fu den freimdesma?” Petrus taki: „Fu den freimdesma”, dan Yesus taigi en: „Sobun, den manpikin no abi fu pai belasting moni” (Mateyus 17:24-27). A no de fu taki dati Petrus ben frustan fu san ede Yesus ben poti den aksi dati. A ben sabi taki den famiriman fu den kownu no ben abi fu pai belasting moni. Fu dati ede, leki a wan-enkri Manpikin fu a Kownu fu hemel di sma ben e anbegi na ini a tempel, Yesus no ben abi fu pai belasting moni. Luku taki na presi fu gi Petrus a yoisti piki, Yesus gebroiki aksi na wan koni fasi fu yepi Petrus kisi a yoisti denki. Kande a ben wani meki a frustan taki a de fanowdu fu denki moro bun fosi a gi piki.

10. Fa wi kan gebroiki aksi na wan bun fasi te wi e preiki oso fu oso?

¹⁰ Fa wi kan gebroiki aksi na wan bun fasi na ini wi diniwroko? Te wi e preiki oso fu oso, wi kan gebroiki aksi fu hari sma prakseri, so taki wi kan kisi na okasi fu fruteri den a bun nyunsu. Fu eksempre, efu wan owrusma kon na a doro, wi kan poti na aksi disi na wan lespeki fasi: „Te yu e prakseri fa a ben de fosi, dan fa grontapu kon kenki now?” Baka te wi gi a sma na okasi fu piki, dan wi kan aksi: „San yu denki de fanowdu fu meki a grontapu disi kon tron wan moro bun presi?” (Mateyus 6:9, 10) Efu wan mama di abi pikin, e kon na a doro, dan wi kan aksi: „Yu aksi yusrefi wan leisi fa a grontapu disi o de te yu pikin kon bigi?” (Psalm 37:10, 11) Te wi e luku sani bun te wi e waka go na wan oso, dan wi o man poti wan aksi di o hari a prakseri fu na ososma.

11. Fa wi kan gebroiki aksi na wan bun fasi te wi e hori wan Bijbelstudie?

¹¹ Fa wi kan gebroiki aksi na wan bun fasi te wi e hori wan Bijbelstudie? Te wi e poti bun aksi, dan dati sa meki taki a studenti fruteri san de tapu en ati (Odo 20:5). Fu eksempre, kon meki wi taki dati wi e studeri a kapitel di nen „Fa fu libi na wan fasi di e plisi Gado”, na ini a buku San Bijbel e leri wi trutru?d A kapitel disi e sori fa Gado e si sani soleki hurudu, a dringi di sma e dringi sopi pasa marki, èn a lei di sma e lei. Den piki di a studenti e gi e sori kande taki a e frustan san Bijbel e leri, ma a e agri nanga den sani di a e leri? Kande wi kan aksi en: „Yu feni taki a fasi fa Gado e si den sortu sani disi, bun?” Wi kan aksi a studenti sosrefi: „Fa yu kan fiti den sani disi na ini yu libi ?” Ma no frigiti taki wi musu hori den firi fu sma na prakseri, èn wi musu tan sori lespeki gi a studenti. Noiti wi wani poti aksi gi sma di o meki den firi syen.​—Odo 12:18.

A ben taki-go-taki-kon na wan heri bun fasi

12-14. (a) Na sortu fasi Yesus ben gebroiki a koni di a ben abi fu taki-go-taki-kon? (b) Na sortu moi fasi Yesus taki-go-taki-kon nanga den Fariseiman di ben feni taki a e wroko nanga a krakti fu Satan?

¹² Fu di Yesus no ben abi sondu èn en frustan ben bun dorodoro, meki a ben man taki-go-taki-kon na wan heri bun fasi nanga trawan. Son leisi, a ben taki-go-taki-kon na so wan bun fasi taki a ben man sori krin sortu fowtu denki den gensman fu en ben abi. Na furu okasi, Yesus ben taki-go-taki-kon nanga overtoigi fu leri den bakaman fu en prenspari sani. Meki wi go luku wan tu eksempre.

¹³ Baka di Yesus dresi wan breniman di ben babaw èn di ben abi wan ogri yeye na en tapu, dan de Fariseiman taki: „A man disi e yagi ogri yeye puru na sma tapu soso nanga yepi fu Beèlsebub [Satan], a tiriman fu den ogri yeye.” Den ben agri taki wan sma ben musu abi wan krakti fanowdu di tranga moro leki di fu libisma, fu man yagi ogri yeye puru. Ma den ben feni taki Yesus ben kisi krakti fu Satan. Dati no ben tru, èn a no ben kan de so tu. Fu sori den taki a denki fu den fowtu, Yesus taigi den: „Ibri kownukondre di prati sa fadon èn nowan foto noso oso di prati sa tan. Sosrefi, efu Satan e yagi Satan puru, dan ensrefi prati tu; we, dan fa a kownukondre fu en sa man tan?” (Mateyus 12:22-26) Te yu luku en bun, Yesus ben taigi den: „Efu mi ben de wan wrokoman fu Satan, di e du tra fasi leki san Satan du, dan Satan ben o de teige den sani fu ensrefi èn a ben o fadon.” Den no ben man taki dati a no abi leti.

¹⁴ Yesus no ben kaba nanga a tori ete. Fu di a ben sabi taki sonwan fu den disipel fu den Fariseiman ben yagi ogri yeye puru, meki a poti makriki aksi gi den di ben e sori krin san a ben wani taki: „Efu mi e yagi ogri yeye puru na sma tapu nanga yepi fu Beèlsebub, dan nanga suma den manpikin [noso disipel] fu unu e yagi ogri yeye puru na sma tapu?” (Mateyus 12:27) Fu taki en leti, Yesus ben wani tyari a sani disi kon na krin: „Efu mi e yagi ogri yeye puru nanga yepi fu a krakti fu Satan, dan a musu de so taki den disipel fu unu e gebroiki a srefi krakti tu.” San den Fariseiman ben kan taki? Noiti den ben o taki dati den disipel fu den ben gebroiki a krakti fu Satan. Sobun Yesus ben gebroiki den sani di den ben taki, fu meki den kon frustan fa sani ben de trutru. A no moi fu si fa Yesus ben taki-go-taki-kon nanga den? Prakseri fa a ben de gi den ipi-ipi sma fu yere fa Yesus taki. Den ben man si en èn den ben man yere en sten. A no de fu taki dati a sani disi ben meki den wortu fu Yesus abi moro krakti.

15-17. Gi wan eksempre fu a fasi fa Yesus ben teki sani gersi nanga makandra fu leri sma moi tru tori fu en Tata.

¹⁵ Yesus ben taki-go-taki-kon nanga overtoigi èn na wan fasi di sma ben man frustan. Na so a ben leri den moi tru tori fu en Tata èn den sani dati ben gi sma deki-ati trutru. Nofo tron a ben teki sani gersi nanga makandra fu tyari kon na krin taki a wan sani bun moro a trawan. Na so fasi a ben yepi den arkiman fu en fu kon abi wan moro tranga overtoigi fu wan tru tori di den ben sabi kaba. Te Yesus ben taki-go-taki-kon na a fasi disi, dan dati ben abi furu krakti tapu sma. Meki wi go luku tu eksempre.

¹⁶ Di den disipel fu Yesus aksi en fu leri den begi, dan Yesus ben taki fu sondu papa nanga mama di de klariklari fu ’gi den pikin fu den bun sani’. Dan a taki: „Fu dati ede, efu unu di abi takru fasi, sabi fa fu gi un pikin bun sani, dan a no abi misi taki a Tata di de na hemel sa gi santa yeye na den sma di e aksi en!” (Lukas 11:1-13) Dyaso Yesus e teki sani gersi nanga makandra, fu tyari wan tori kon na krin. Efu sondu papa nanga mama e sorgu gi den sani di den pikin fu den abi fanowdu, dan a no de fu taki dati wi hemel Tata di no abi sondu èn di e du san reti ala ten, o du bun gi den anbegiman fu en di e tai hori na en. Iya, a o gi den santa yeye te den e begi en nanga sakafasi!

¹⁷ Yesus ben taki-go-taki-kon na a srefi fasi disi di a ben gi sma koni rai fa fu du te sani ben gi den broko-ede. A ben taki: „Luku den fowru bun; den no e sai, den no e koti nyanyan, èn den no abi maksin noso wan presi fu kibri nyanyan, ma toku Gado e gi den nyanyan. Unu no warti moro leki den fowru? Luku bun fa den leili e gro; den no e wroko tranga èn den no e brei titei . . . We, Gado e meki den sani di e gro na ini a sabana weri so moi, aladi den na sani di de tide, ma tamara sma e trowe den go na ini onfu; efu dati de so, dan a de seiker taki a sa gi unu sani fu weri, unu di no e bribi nofo” (Lukas 12:24, 27, 28). Efu Yehovah e sorgu gi den fowru nanga den bromki, dan a de seiker taki a o sorgu gi libisma di lobi en èn di e anbegi en! A no de fu taki dati di Yesus taki-go-taki-kon na a fasi disi, dan a naki na ati fu den arkiman fu en.

18, 19. Fa wi kan taki-go-taki-kon nanga wan sma di e taki dati a no e bribi na ini wan Gado di a no man si?

¹⁸ Na ini wi diniwroko, wi musu taki-go-taki-kon na so wan fasi taki sma srefi kan kon si taki wan leri no bun. Boiti dati, wi wani taki-go-taki-kon nanga overtoigi, te wi e leri sma den moi tru tori fu Yehovah (Tori fu den Apostel 19:8; 28:23, 24). A de so taki wi musu taki-go-taki-kon na wan muilek fasi? Nôno, kwetikweti. Te wi e luku a fasi fa Yesus ben gi leri, dan wi e si taki a abi moro bun bakapisi te wi e taki-go-taki-kon na wan makriki fasi.

¹⁹ Fu eksempre, san wi ben o piki te wan sma taki dati a no e bribi na ini wan Gado di a no man si? Wi ben kan sori en taki noti no e kon fu ensrefi. Te wi e si wan sani, dan wi e frustan taki a no kon fu ensrefi. Wi ben kan taigi a sma: „Kon meki wi taki dati yu de na wan farawe presi pe nowan sma e tan. Yu e si wan moi oso drape, èn den kukru kasi fu na oso lai nanga nyanyan. Yu ben o agri taki na wan sma bow na oso èn taki na en lai den kukru kasi nanga nyanyan, a no so? We, te wi e luku a tumusi moi fasi fa grontapu meki èn ala den nyanyan sani di de na grontapu, dan wi kan frustan taki wan Sma musu de di meki den sani dati, a no so? Bijbel srefi e sori krin: ’Ibri oso abi wan sma di bow en, ma a sma di bow ala sani na Gado’” (Hebrewsma 3:4). Ma a no de fu taki dati wi no o man overtoigi ala sma awinsi fa wi e taki-go-taki-kon nanga den.​—2 Tesalonikasma 3:2.

20, 21. (a) Fa wi kan taki-go-taki-kon nanga sma fu sori den sortu fasi Yehovah abi? (b) Fu san wi o taki na ini a tra kapitel?

²⁰ Te wi e gi leri na ini a preikiwroko, noso na ini a gemeente, dan wi kan taki-go-taki-kon na a srefi fasi dati tu fu sori sma den moi fasi fu Yehovah. Fu eksempre, te wi wani sori wan sma taki a leri di e taki dati Gado e bron sma na ini hel, e gi Yehovah porinen, dan wi kan taki: „Sortu lobi-ati papa ben o strafu en pikin fu di a e hori na anu fu a pikin na ini faya? A no abi misi taki wi lobi-ati hemel Tata noiti no o prakseri fu bron sma na ini faya!” (Yeremia 7:31) Te wan Kresten e firi brokosaka èn wi wani gi en a dyaranti taki Yehovah lobi en, dan wi kan taki: „Efu wan pikin fowru srefi warti na ini Yehovah ai, dan wi kan de seiker taki a lobi den anbegiman fu en na grontapu èn a e broko en ede nanga den. Iya, a lobi yu tu èn a e broko en ede nanga yu!” (Mateyus 10:29-31) Wi kan doro na ati fu trawan te wi e taki-go-taki-kon na so wan fasi.

²¹ Baka di wi luku dri fasi nomo fa Yesus ben e gi leri, wi kan frustan taki den skowtu di no ben grabu Yesus, ben abi leti di den taki: „Noiti ete wan sma taki leki a man disi.” Na ini a tra kapitel wi o taki fu a fasi fa furu sma sabi taki Yesus ben e gi leri, èn dati na taki a ben e gebroiki agersitori.