Gi leri nanga inzicht èn nanga a koni foe man overtoigi sma
„Na ati foe a koni sma e meki en mofo sori inzicht, èn a e gi en mofoboeba a koni foe man overtoigi sma.” — ODO 16:23.
1. Foe san ede a leri di wi e leri sma a Wortoe foe Gado wani taki moro leki nomo foe gi den bodoi?
A MARKI foe wi leki leriman foe Gado Wortoe a no soso foe opo a froestan foe den studenti foe wi, ma so srefi na ati foe den (Efeisesma 1:18). Foe dati ede a leri di wi e gi sma leri wani taki moro leki nomo foe gi sma bodoi. Odo 16:23 e taki: „Na ati foe a koni sma e meki en mofo sori inzicht, èn a e gi en mofoboeba a koni foe man overtoigi sma.”
2. (a) San a wani taki foe overtoigi sma? (b) Fa ala kresten kan tron leriman di abi a koni foe man overtoigi sma?
2 Na apostel Paulus ben gebroiki a gronprakseri disi troetroe na ini en leriwroko. Di a ben de na ini Korente, „a ben gi wan lezing na ini a snoga èn a ben overtoigi den djoe nanga den Grikisma” (Tori foe den Apostel 18:4). Soleki fa wan sabiman e taki, a Griki wortoe di vertaal djaso nanga „overtoigi” wani taki „a kenki di wan sma en denki e kenki te a e rideneri foe sani noso te a e prakseri foe moreel afersi”. Nanga den tranga boeweisi foe en, Paulus ben man boeweigi sma foe kenki srefi a fasi fa den e prakseri. A man di a ben man overtoigi sma ben de so kefalek boen taki den feanti foe en ben frede gi en (Tori foe den Apostel 19:24-27). Ma tokoe a leri di Paulus ben e gi no ben de foe sori san a man doe leki libisma. A ben taigi den Korentesma: „A fasi fa mi ben taki èn den sani di mi ben preiki, no ben de nanga koni wortoe foe man overtoigi sma, ma foe di jeje nanga krakti ben sori densrefi, so taki oenoe no ben sa kan bribi na ini a koni foe libisma, ma na ini a krakti foe Gado” (1 Korentesma 2:4, 5). Foe di ala kresten abi a jepi foe Jehovah Gado en jeje, meki den alamala kan tron leriman di man overtoigi sma. Ma fa? Meki wi go loekoe wan toe boen tèknik foe gi leri.
De wan sma di e arki boen
3. Foe san ede inzicht de fanowdoe te wi e gi tra sma leri, èn fa wi kan doro na ati foe wan bijbelstudenti?
3 A fosi tèknik foe gi leri, no abi foe doe nanga a taki di sma man taki, ma nanga na arki di wan sma moesoe arki. Soleki fa a skrifi na Odo 16:23, wi moesoe abi inzicht foe man overtoigi sma. Jesus ben abi inzicht troetroe te a ben gi sma leri. Johanes 2:25 e taki: „Ensrefi ben sabi san ben de na ini libisma.” Ma fa wi kan sabi san de na ini na ati foe den sma di wi e gi leri? Wan fasi na foe de wan sma di e arki boen. Jakobus 1:19 e taki: „Ibri sma moesoe de esi foe jere, no esi foe taki.” A troe, a no ala sma e taki wantewante san den e denki. Te den bijbelstudenti foe wi de seiker foe a troetroe belangstelling di wi abi gi den, dan den kan firi moro esi foe taki san den e firi troetroe. Aksi di poti na wan switi fasi èn di e sori taki joe e froestan a sma, kan jepi wi nofo tron foe doro na ati èn foe ’hari [den wortoe dati] kon na tapoe’. — Odo 20:5.
4. Foe san ede kresten owroeman moesoe de boen arkiman?
4 A de spesroetoe prenspari taki kresten owroeman de sma di e arki boen. Soso na a fasi disi den kan „sabi fa [den] moesoe gi ibriwan sma wan piki” (Kolosesma 4:6). Odo 18:13 e warskow: „Te wan sma e gi piki tapoe wan afersi bifo a jere en, dan dati na wan law sani foe en sei èn sjen.” Toe brada di ben abi boen prakseri, ben gi wan sisa rai foe grontapoe afersi bika a sisa ben misi wan toe konmakandra. A ben hati a sisa srefisrefi bika den no ben aksi en foe san ede a no ben de na den konmakandra. A ben e kon betre foe wan oparâsi di a ben doe no so langa pasa. Foe dati ede a de prenspari taki wi e arki bifo wi e gi rai!
5. Fa den owroeman kan handri nanga den kesekese di de na mindri brada nanga sisa?
5 Gi den owroeman, a gi di den e gi sma leri wani taki nofo tron taki den moesoe gi tra sma rai. Na ini a kefal disi a de prenspari toe foe arki boen. A de spesroetoe fanowdoe foe arki te kesekese de na mindri kresten. Soso baka te den owroeman e arki, den kan waka na baka na eksempre foe „a Tata di e kroetoe sani sondro foe teki sma partèi” (1 Petrus 1:17). Nofo tron den firi e faja srefisrefi na ini den sortoe situwâsi disi, èn wan owroeman moesoe hori a rai foe Odo 18:17 na prakseri: „A fosiwan regtfardiki na ini en kroetoe afersi; en kompe e kon èn troetroe e ondrosoekoe en dorodoro.” Wan boen leriman sa arki ala toe sei. Te a e begi, dan a e jepi foe meki a situwâsi kowroe (Jakobus 3:18). Te den firi e kon faja, dan a ben kan gi a rai taki ibriwan foe den e taki langalanga nanga en foe den problema foe en, na presi taki ala toe sei e haritaki nanga makandra. Nanga joisti aksi na owroeman sa man kande foe kon sabi krin san na den penti di den e taki foe den. Na ini foeroe kefal, kesekese e kon foe di boen komunikâsi no de, èn a no de foe di na ogri den sma ogri. Ma efoe den no handri akroederi bijbel gronprakseri, dan wan lobi-ati leriman kan gi leri now nanga inzicht, foe di a ben jere ala toe sei.
A prenspari foe de eenvoudig
6. Fa Paulus nanga Jesus ben gi wan eksempre foe gi sma leri na wan eenvoudig fasi?
6 Wan tra prenspari bekwaamfasi foe gi sma leri na foe doe sani eenvoudig. A troe taki wi wani meki den bijbelstudenti kon „froestan krinkrin nanga ala den santawan san na a bradi nanga a langa nanga a hei nanga a dipi” foe waarheid (Efeisesma 3:18). Wan toe penti foe den bijbel-leri moi srefisrefi èn nofo tron den kan de wan tjalensi (Romesma 11:33). Ma tokoe, di Paulus ben preiki gi den Grikisma, a ben taki foe na eenvoudig boskopoe taki ’Krestes ben spikri na wan postoe’ (1 Korentesma 2:1, 2). Na a srefi fasi Jesus ben preiki na wan eenvoudig fasi di sma ben lobi. A ben gebroiki eenvoudig wortoe na ini en Bergitaki. Ma tokoe a ben abi wan toe foe den moro dipi waarheid di oiti ben taki. — Mateus, kapitel 5-7.
7. Fa wi kan doe sani eenvoudig te wi e hori bijbelstudie?
7 Wi kan doe sani eenvoudig toe te wi e gi den bijbelstudenti leri. Fa? Te wi e poti prakseri na tapoe „den moro prenspari sani” (Filipisma 1:10). Te wi e froeklari moeilek tori, dan wi moesoe proeberi foe taki na wan fasi di makriki foe froestan. Wi moesoe poti prakseri na tapoe den prenspari tekst, na presi foe leisi èn taki foe ibri bijbeltekst di kari na ini wan poeblikâsi. Foe wi sei a de fanowdoe taki wi moesoe sreka wisrefi boen. Wi no moesoe lai a studenti nanga finifini tori, èn wi no moesoe meki penti di no de so prenspari poeroe wi prakseri. Efoe wan studenti abi wan aksi di no abi langalanga foe doe nanga a lès, dan na wan koni fasi wi kan taigi en taki wi kan taki foe a tori te wi kaba nanga a lès.
Gebroiki aksi na wan boen fasi
8. Fa Jesus ben gebroiki aksi na wan boen fasi?
8 Wan tra boen bekwaamfasi foe gi sma leri, na foe poti boen aksi. Jesus Krestes ben gebroiki foeroe aksi te a ben e gi leri. Foe eksempre, Jesus ben aksi Petrus: „San joe prakseri, Simon? Foe soema den kownoe foe grontapoe e kisi edemoni noso belasting? Foe den manpikin foe den noso foe den freimdesma?’ Di a ben taki: ’Foe den freimdesma’, dan Jesus ben taigi en: ’So boen, dan den manpikin no abi foe pai belasting’” (Mateus 17:24-26). Leki a wan-enkri gebore Manpikin foe a Sma di den e anbegi na ini a tempel, Jesus no ben de froeplekti srefisrefi foe pai wan tempel belasting. Ma Jesus ben froeteri a waarheid disi nanga jepi foe wan toe boen aksi. Na so fasi Jesus ben jepi Petrus foe kon na wan joisti bosroiti tapoe gron foe sani di Petrus ben sabi kaba.
9. Fa wi ben sa kan gebroiki aksi na den bijbelstudie?
9 Wi kan gebroiki aksi boen te wi e hori bijbelstudie. Efoe wan studenti e gi wan fowtoe piki, dan wi kan abi a firi foe gi en a joisti piki, ma a studenti sa memre a bodoi troetroe? Nofo tron a moro boen foe proeberi foe meki a studenti kon na a joisti bosroiti te wi e poti aksi. Foe eksempre, efoe a moeilek gi en foe froestan foe san ede a moesoe gebroiki a nen foe Gado, wi ben sa kan aksi, ’A nen foe joe prenspari gi joe? . . . Foe san ede? Fa joe ben sa firi te wan sma ben sa weigri foe gebroiki joe nen? . . . A no de reidelek taki Gado wani taki wi moesoe gebroiki en eigi nen?’
10. Fa owroeman ben kan gebroiki aksi te den e jepi sma di abi emotioneel problema?
10 Den owroeman kan gebroiki aksi boen toe te den e tjari herder fisiti na a ipi. A grontapoe foe Satan masi èn malengri foeroe sma na ini a gemeente na emotioneel sei èn den kan denki taki den no krin èn taki sma no lobi den. Wan owroeman ben sa kan rideneri nanga so wan sma te a e taki: ’Ala di joe e taki dati joe e denki taki joe no krin na jeje sei, ma fa Jehovah e prakseri foe joe? Efoe wi lobi-ati hemel Tata ben gi pasi meki en Manpikin dede gi joe èn gi wan loesoe-ofrandi gi joe, dan dati no wani taki dan taki Gado lobi joe?’ — Johanes 3:16.
11. San na a marki foe den aksi pe sma no e gi piki na tapoe, èn fa wi kan gebroiki den te wi e taki na poebliki?
11 Wan tra boen tèknik foe gi sma leri na foe poti aksi pe wan piki no moesoe gi na tapoe. Den sma di e arki den aksi disi no abi foe piki den tranga, ma den aksi e jepi den foe denki foe den tori. Den profeiti foe owroeten nofo tron ben poti den sortoe aksi disi foe meki den arkiman foe den prakseri dipi (Jeremia 18:14, 15). Jesus ben gebroiki den sortoe aksi disi na wan boen fasi (Mateus 11:7-11). Den sortoe aksi disi de spesroetoe boen na ini poeblikitaki. Na presi foe taigi a poebliki nomo taki den moesoe dini Jehovah nanga den heri sili foe plisi Jehovah, dan a kan moro boen foe aksi: ’Efoe wi no e dini nanga wi heri sili, dan Jehovah sa plisi nanga dati?’
12. San na a waarde te wi e poti aksi di e meki a sma taki san a e denki?
12 Den aksi di wi e poti foe kon sabi san sma e denki, e jepi wi foe sabi efoe wan bijbelstudenti e bribi troetroe san a e leri (Mateus 16:13-16). Wan studenti kan piki boen taki hoeroedoe no boen. Ma a ben sa boen foe go doro nanga den aksi soleki: Fa joesrefi e prakseri foe den markitiki di Gado abi na ini moreel afersi? Joe denki taki a strak toemoesi? Joe denki taki a abi trobi troetroe efoe joe e handri akroederi den markitiki foe Gado ofoe no?
Agersitori di e doro na ati
13, 14. (a) San a wani taki foe agersi wan sani? (b) Foe san ede boen agersitori abi boen bakapisi?
13 Wan tra fasi foe doro na ati foe den arkiman nanga foe bijbelstudenti, de nanga jepi foe boen agersitori. A Griki wortoe di vertaal nanga „agersitori” wani taki troetroe „poti na sei wan sani noso poti na makandra”. Te joe e gi wan agersitori, joe e froeklari wan sani te joe e ’poti en na sei’ wan srefi sortoe sani. Foe eksempre, Jesus ben aksi: „Nanga san wi sa gersi a kownoekondre foe Gado, noso na ini sortoe agersitori wi sa tjari en kon na krin?” Leki piki, Jesus ben taki foe a mosterdsiri di sma sabi. — Markus 4:30-32.
14 Den profeiti foe Gado ben gebroiki foeroe krakti agersitori. Di den Asiriasma di ben de leki a wrokosani foe Gado foe strafoe den Israèlsma, ben doe ogridoe na wan ogri-ati fasi, dan Jesaja ben tjari na asrantifasi foe den kon na krin nanga wan agersitori: „Na aksi sa opo ensrefi na tapoe a sma di e kapoe nanga en, noso a sà sa hei ensrefi na tapoe a sma di e poesoe en go-kon?” (Jesaja 10:15) Te Jesus ben gi tra sma leri, dan ensrefi ben gebroiki foeroe agersitori. A skrifi taki „a no ben taki nanga den sondro wan agersitori” (Markus 4:34). Boen agersitori abi boen bakapisi bika den e wroko na tapoe a froestan èn na tapoe na ati foe sma. Den e meki den arkiman teki njoen bodoi na ini den wantewante, te den e teki den gersi nanga sani di den sabi kaba.
15, 16. San sa meki den agersitori abi moro boen bakapisi? Gi wan toe eksempre.
15 Fa wi kan gebroiki agersitori di e doro na ati troetroe? Na a fosi presi, wan agersitori moesoe de a srefi leki a sani di wi e froeklari. Te a sani di wi e agersi no e fiti troetroe, dan na agersitori sa poeroe a prakseri foe den arkiman, na presi foe meki den froestan sani moro boen. Wan takiman di ben abi boen prakseri ben proeberi wan leisi foe sori taki a salfoe fikapisi e saka ensrefi na ondro Jesus Krestes, di a ben gersi den nanga wan getrow dagoe. Ma so wan lagi fasi foe agersi sani e fiti troetroe? Bijbel e gi a srefi prakseri na wan moro moi èn warti fasi. A e gersi den 144.000 salfoe bakaman foe Jesus nanga „wan trowmisi di meki ensrefi kon moi gi en masra”. — Openbaring 21:2.
16 Agersitori abi moro boen bakapisi te den abi foe doe nanga a libi foe sma. Na agersitori foe Natan di abi foe doe nanga a pikin skapoe di ben slakti, ben naki na ati foe Kownoe David bika a ben lobi skapoe, èn a ben wroko leki wan skapoeman na ini en jongoe jari (1 Samuèl 16:11-13; 2 Samuèl 12:1-7). Efoe na agersitori ben abi foe doe nanga wan mankaw, dan kande a no ben o abi so wan boen bakapisi srefisrefi. Na a srefi fasi, den agersitori di abi foe doe nanga sabidensi sani noso historia tori di sma no sabi, kande no sa wani taki foeroe gi den arkiman foe wi. Jesus ben teki den agersitori foe en na ini na aladei libi. A ben taki foe sani di de foe feni na ala presi, soleki wan lampoe, den fowroe foe hemel èn den leili na tapoe a veld (Mateus 5:15, 16; 6:26, 28). A ben makriki gi den arkiman foe Jesus foe sabi san den sani disi wani taki.
17. (a) Tapoe san den agersitori foe wi kan gron? (b) Fa wi kan fiti den agersitori di gebroiki na ini den poeblikâsi foe wi akroederi a situwâsi foe den studenti foe wi?
17 Na ini a diniwroko foe wi, wi abi foeroe okasi foe gebroiki eenvoudig, ma boen agersitori. De na ai foe si sani (Tori foe den Apostel 17:22, 23). Kande wan agersitori ben kan abi foe doe nanga den pikin foe wan arkiman, en oso, en wroko, noso a sani di a lobi foe doe. Noso wi kan gebroiki a sabi di wi abi foe wan bijbelstudenti foe taki moro dipi foe den agersitori di gi kaba na ini a pisi di wi e studeri. Foe eksempre, loekoe a boen agersitori na ini paragraaf 14 foe kapitel 8 na ini a boekoe Sabi di e tjari joe go na têgo libi. A abi foe doe nanga wan lobi-ati papa noso wan lobi-ati mama di wan birtiman ben taki ogri-ati lei foe en. Wi kan prakseri fa wi ben sa kan kenki na agersitori dati akroederi a situwâsi foe wan bijbelstudenti di de wan papa noso wan mama toe.
Leisi den tekst na wan bekwaam fasi
18. Foe san ede wi moesoe doe moeiti foe de sma di e leisi grati?
18 Paulus ben froemane Timoteus: „Go doro nanga a poti di joe e poti joesrefi na tapoe a leisi na poebliki, a gi foe froemane, a gi di joe e gi leri” (1 Timoteus 4:13). Foe di bijbel na a fondamenti foe a leri di wi e gi, meki a abi wini te wi man leisi en grati. Den Leifisma ben abi a grani foe leisi a Wet foe Moses gi a pipel foe Gado. Den ben aka-aka te den ben leisi noso den ben leisi na wán fasi nomo? Nôno, bijbel e taki na Nehemia 8:8: „Den ben tan leisi nanga wan tranga sten na ini a boekoe, na ini a wet foe a troe Gado, èn den ben tjari en kon na krin, èn drape den ben sori san a wani taki; èn den ben tan meki sma kon froestan san den ben leisi.”
19. Fa wi kan gro na ini a fasi fa wi e leisi den Boekoe foe bijbel?
19 Wan toe kresten brada di de grati takiman, no man leisi grati. Fa den kan leisi moro boen? Te den e oefen. Ija, te den e leisi tranga ibri tron baka teleki den kan doe dati grati.
20. Fa wi kan ’poti prakseri na tapoe den sani di wi e leri sma’?
20 Leki pipel foe Jehovah wi abi wan bigi grani taki A e gebroiki wi foe gi sma leri! Meki ibriwan foe wi foe dati ede, si a frantiwortoe dati leki wan serjoesoe sani. Meki wi ’poti prakseri doronomo na tapoe wisrefi èn na tapoe den sani di wi e leri sma’ (1 Timoteus 4:16). Wi kan de boen leriman te wi e arki boen, te wi e doe sani eenvoudig, te wi e gebroiki aksi foe kisi inzicht, te wi e gebroiki boen agersitori, èn te wi e leisi den tekst na wan bekwaam fasi. Meki wi alamala kisi wini foe a leri di Jehovah e gi nanga jepi foe en organisâsi, bika disi kan jepi wi foe abi „a tongo foe den wan di kisi leri” (Jesaja 50:4). Te wi e meki boen gebroiki foe ala den wrokosani gi wi diniwroko, soleki brochure, cassette lolo, nanga videocassette, dan wi kan leri fa foe gi sma leri nanga inzicht èn nanga a koni foe man overtoigi sma.
Joe e memre disi ete
◻ Fa a arki di wi e arki boen kan jepi wi te wi e gi sma leri?
◻ Fa wi kan waka na baka na eksempre foe Paulus nanga Jesus foe gi sma leri na wan eenvoudig fasi?
◻ Sortoe aksi wi kan gebroiki te wi e gi tra sma leri?
◻ Sortoe agersitori e wroko moro boen?
◻ Fa wi kan meki a bekwaamfasi foe wi leki sma di e leisi na poebliki, kon moro boen?
[Prenki na tapoe bladzijde 16]
Wan boen leriman e arki foe kisi inzicht
[Prenki na tapoe bladzijde 18]
Jesus ben teki den agersitori foe en na ini na aladei libi