„A no ben taki nanga den sondro fu gi wan agersitori”

1-3. (a) Sortu tumusi moi grani den disipel abi di e waka nanga Yesus, èn fa Yesus e meki en makriki gi den fu no frigiti den sani di a leri? (b) Fu san ede wi no e frigiti wan bun agersitori so makriki?

DEN disipel di e waka nanga Yesus abi wan tumusi moi grani. Den e kisi leri langalanga fu a Bigi Leriman. Densrefi e yere fa a e fruklari Gado Wortu èn fa a e leri den tumusi moi tru tori. Na a ten dati, den no musu frigiti den tumusi moi sani di a taki, fu di a ten no doro ete fu sma skrifi den sani di Yesus taki.a Ma Yesus e meki en makriki gi den fu no frigiti den sani di a leri den. Fa a e du dati? Na a fasi fa a e gi leri, spesrutu a tumusi moi fasi fa a e gebroiki agersitori.

² A tru taki sma no e frigiti bun agersitori so makriki. Wan skrifiman ben taki dati agersitori „e meki yesi tron ai, fu di a de neleki den arkiman man si den sani di den e yere”. Disi de so fu di nofo tron wi man frustan wan sani moro bun te a de neleki wi e si a sani dati e pasa leti na wi fesi. Fu dati ede, agersitori kan meki taki wi frustan sani moro makriki. Agersitori kan meki wi frustan sani moro krin, èn wi e leri sani di wi no sa frigiti noiti.

³ Nowan tra leriman na grontapu ben man gebroiki agersitori so bun leki Yesus Krestes. Te na a dei fu tide, sma sabi den agersitori disi ete. Fu san ede Yesus ben e gebroiki a fasi disi fu gi leri, so furu? San ben meki taki den agersitori fu en ben abi so furu krakti tapu sma? Fa wi kan leri fu gebroiki a fasi disi fa a ben e gi leri?

Fu san ede Yesus ben e gi leri nanga yepi fu agersitori

4, 5. Fu san ede Yesus ben e gebroiki agersitori?

⁴ Bijbel e gi tu prenspari reide fu san ede Yesus ben e gebroiki agersitori. A fosiwan na taki a meki profeititori kon tru di a du dati. Na ini Mateyus 13:34, 35 wi e leisi: „Yesus gebroiki agersitori fu fruteri den sma ala den sani disi. Iya, a no ben taki nanga den sondro fu gi wan agersitori, so taki den sani di a profeiti taki ben kan kon tru, namku: ’Mi sa opo mi mofo fu taki agersitori.’” A profeiti di Mateyus e taki fu en, ben de a skrifiman fu Psalm 78:2. Hondrohondro yari bifo Yesus gebore, Gado meki a psalm skrifiman skrifi den sani dati. Prakseri san disi wani taki. Hondrohondro yari na fesi, Yehovah ben bosroiti taki a Mesias ben o gi leri nanga yepi fu agersitori. A musu fu de so taki Yehovah e si en leki wan prenspari sani te sma e gi leri na a fasi disi.

⁵ A di fu tu sani na taki Yesus taki dati a ben e gebroiki agersitori fu tyari kon na krin suma na den sma di ’ati kon tranga’ (Mateyus 13:10-15; Yesaya 6:9, 10). Fa den agersitori fu en ben tyari kon na krin san de na ini sma ati? Son leisi a ben wani taki den arkiman fu en aksi en fu fruklari den sani di a taki. Na so fasi den ben o man frustan en. Sma di ben abi sakafasi ben de klariklari fu poti aksi gi en, aladi heimemre sma, noso sma di no ben poti prakseri na san a e taki, no ben poti aksi gi en (Mateyus 13:36; Markus 4:34). Sobun, den agersitori fu Yesus ben meki tru tori kon na krin gi den sma di ben angri fu kon sabi den sani dati. Ma na a tra sei, den agersitori fu en ben meki taki sma di abi bigifasi, no ben man kon sabi den tru tori di a ben fruteri.

6. Fu san ede den agersitori fu Yesus ben bun?

⁶ Furu tra reide de fu san ede den agersitori fu Yesus ben bun. Den agersitori ben hari sma prakseri, èn a ben meki taki sma wani arki en. Den ben meki taki sma si den sani di den ben yere, èn dati ben meki en makriki gi den fu frustan en. Soleki fa wi si na a bigin, dan den agersitori fu Yesus ben yepi den arkiman fu en fu memre den sani di a ben taki. A Bergitaki di skrifi na ini Mateyus 5:3–7:27, na wan heri moi eksempre di e sori o furu agersitori Yesus ben e gebroiki. Soleki fa wan sma kon si, dan na ini a Bergitaki disi, moro leki 50 leisi Yesus e teki sani gersi nanga makandra. Fu man frustan san disi wani taki, dan wi musu hori na prakseri taki wi kan leisi a Bergitaki disi na ini sowan 20 miniti. Sobun, wi kan taki dati baka ibri 20 sekonde, Yesus ben teki wan sani gersi nanga wan tra sani. A de krin fu si taki Yesus ben sabi o prenspari a de fu gebroiki agersitori!

7. Fu san ede wi musu gebroiki agersitori neleki Yesus?

⁷ Leki bakaman fu Krestes, wi wani gi leri tu neleki en, èn wi wani gebroiki agersitori tu. Neleki fa spesrei e meki wan nyanyan kon moro switi, na so bun agersitori kan meki den sani di wi e leri trawan, kon moro moi. Te wi e prakseri bun sortu agersitori wi wani gebroiki, dan dati kan meki prenspari tru tori moro makriki fu frustan. Meki wi go luku moro fini now, san ben meki taki den agersitori fu Yesus ben de so bun. Baka dati, wi o man si fa wisrefi kan gebroiki a prenspari fasi disi fu gi leri.

Na wan makriki fasi a ben teki sani gersi nanga makandra

8, 9. Fa Yesus ben teki sani gersi nanga makandra na wan makriki fasi, èn fu san ede den agersitori dati ben de so bun?

⁸ Nofo tron te Yesus ben e gi leri, a ben e teki sani gersi nanga makandra na wan makriki fasi, èn a ben gebroiki wan tu wortu nomo. Ma toku, a makriki fasi fa ben e taki ben abi krakti tapu sma fu di a ben de neleki den ben man si a sani na den fesi, èn den ben frustan prenspari tru tori di abi fu du nanga Gado, krin. Fu eksempre, di Yesus ben gi den disipel deki-ati fu no broko den ede nanga den sani di den abi fanowdu ibri dei, dan a ben agersi a situwâsi fu den nanga ’den fowru di e frei na loktu’ èn nanga „den bromki na ini a sabana”. Den fowru no e prani èn den no e koti nyanyan, èn den bromki no e brei titei. Ma toku, Gado e sorgu gi den. A makriki fu frustan taki efu Gado e sorgu gi den fowru nanga den bromki, dan seiker a sa sorgu gi libisma di e „tan suku a kownukondre . . . fosi”.​—Mateyus 6:26, 28-33.

⁹ Wan tra sortu fasi fa Yesus ben gebroiki agersitori, na te a ben taki fu wán sani neleki a de wan tra sani. Ma a ben du disi na wan makriki fasi tu. Na wan okasi, a taigi den disipel fu en: „Unu na a leti fu grontapu.” Den disipel ben man frustan krin san disi wani taki. Den ben frustan taki nanga den sani di den ben taki èn du, den ben o man meki a leti fu a tru anbegi skèin èn den o ben o man yepi trawan fu gi glori na Gado (Mateyus 5:14-16). Luku wan tu tra eksempre fu a sortu agersitori disi di Yesus gebroiki: „Unu na a sowtu fu grontapu”, èn „mi na a droifibon, unu na den taki” (Mateyus 5:13; Yohanes 15:5). Den sortu agersitori disi ben abi furu krakti tapu sma, aladi den ben de makriki fu frustan.

10. San na wan tu eksempre di e sori fa fu gebroiki agersitori te yu e gi leri?

¹⁰ Fa yu kan gebroiki agersitori te yu e gi leri? Yu no abi fu taki fu wan langabere tori di muilek fu frustan. Pruberi fu prakseri sortu makriki sani yu kan teki gersi nanga makandra. Kon meki wi taki dati yu e taki fu na opobaka èn yu wani sori taki a no de wan muilek sani gi Yehovah fu gi dedesma wan opobaka. Nanga sortu sani yu ben o agersi a tori disi? Bijbel e agersi dede nanga a sribi di wan sma e sribi. Yu kan taki: „A de makriki gi Gado fu gi sma wan opobaka, neleki fa a makriki gi wi fu wiki wan sma di e sribi” (Yohanes 11:11-14). Kon meki wi taki dati yu wani gebroiki wan agersitori fu sori taki pikin musu kisi a firi taki sma lobi den èn e broko den ede nanga den. Na so fasi sani o go bun nanga den pikin. Sortu eksempre yu ben kan gebroiki? Bijbel e gebroiki na agersitori disi: Pikin de „leki pransun fu olèifbon” (Psalm 128:3). Yu ben kan taki: „Neleki fa wan bon abi leti fu a son fanowdu èn watra fu man gro bun, na so wan pikin abi lobi fanowdu èn a musu kisi a firi taki sma e broko den ede nanga en.” O moro makriki den sani de di yu e teki gersi nanga makandra, o moro makriki den arkiman fu yu o frustan yu.

A ben gebroiki agersitori di teki puru fu na aladei libi

11. Gi wan tu eksempre di e sori fa den agersitori fu Yesus ben abi fu du nanga den sani di a ben si di a gro kon bigi na ini Galilea.

¹¹ Yesus ben sabi heri bun fa fu gebroiki agersitori di abi fu du nanga a libi fu sma. Furu fu den agersitori fu en ben taki fu aladei sani di a ben si di a gro kon bigi na ini Galilea. Prakseri a ten di Yesus ben pikin. Nofo tron a ben si en mama e mara sani soleki karu fu meki blon, a ben si fa a ben poti srudeki na ini a blon, fa a ben leti wan lampu, noso fa a ben sibi na oso (Mateyus 13:33; 24:41; Lukas 15:8). Furu leisi a ben luku den fisiman di ben saka den nèt na ini a Se fu Galilea (Mateyus 13:47). Nofo tron a ben si pikin-nengre e prei tu na wowoyo (Mateyus 11:16). A no de fu taki dati Yesus ben si tra sani di ben e pasa na ini na aladei libi èn di a ben gebroiki na ini den furu agersitori fu en. Iya, a ben si sani soleki fa sma e sai siri, fa sma e prisiri na trow fesa, èn fa den sani soleki aleisi ben kon lepi na ini a son.​—Mateyus 13:3-8; 25:1-12; Markus 4:26-29.

12, 13. Fu san ede a moi fu si taki Yesus ben taki fu a pasi di ben de „fu Yerusalem go na Yerikow”, fu sori san a ben wani taki nanga na agersitori fu a bun Samariasma?

¹² Na ini den agersitori, Yesus ben taki fu spesrutu sani di den arkiman fu en ben sabi heri bun. Fu eksempre, a bigin nanga na agersitori fu a bun Samariasma, nanga den wortu disi: „Wan man ben saka komoto fu Yerusalem go na Yerikow, di fufuruman ròs en; den puru en krosi na en skin èn den fon en te fu dede” (Lukas 10:30). A moi fu si taki Yesus ben taki dati a pasi ben de „fu Yerusalem go na Yerikow”, fu sori sma san a ben wani taki. Di a fruteri na agersitori disi, a ben de na ini Yudea, di no de so fara fu Yerusalem. Sobun, a no de fu taki dati den arkiman fu en ben sabi fu sortu pasi a ben taki. Den ben sabi taki ogri ben e miti sma na tapu a pasi dati, spesrutu efu wan sma e waka en wawan. A pasi ben waka na den boitipresi, a ben lai boktu, furu sma no ben waka na tapu, èn dati ben meki taki fufuruman ben e luru sma drape.

¹³ Yesus ben taki fu tra sani di abi fu du nanga a pasi di ben de „fu Yerusalem go na Yerikow”. Soleki fa na agersitori e sori, dan wan priester ben waka fosi na tapu a pasi èn baka dati wan Leifisma. Den man disi waka go doro sondro fu yepi a man di ben kisi mankeri (Lukas 10:31, 32). Den priester ben du wroko na a tempel na ini Yerusalem èn den Leifisma ben yepi den. Furu priester nanga Leifisma ben tan na ini Yerikow te den no ben e wroko na ini a tempel. Yerikow ben de 23 kilometer nomo fu Yerusalem, èn dati meki den sma disi ben e waka a pasi dati. Luku tu, taki Yesus ben taki dati den sma ben „saka komoto fu Yerusalem”, den no ben kren go drape. Den arkiman ben kan frustan a sani disi, fu di Yerusalem ben de moro hei leki Yerikow. Fu dati ede, te wan sma ben o „komoto fu Yerusalem”, dan a ben o „saka” a pasi kon.b A de krin fu si taki Yesus ben hori den arkiman fu en na prakseri.

14. Fa wi kan hori den arkiman fu wi na prakseri te wi o gebroiki agersitori?

¹⁴ Te wi e gebroiki agersitori, dan wi musu hori den arkiman fu wi na prakseri tu. Te wi o luku sortu agersitori wi o gebroiki, dan san na wan tu sani di wi musu hori na prakseri fu den arkiman fu wi? Kande wi musu luku sani soleki a yari fu den sma, a kulturu fu den noso a fasi fa den kweki, nanga a wroko di den e du. Fu eksempre, sma na ini kontren pe den e du gronwroko kan frustan wan agersitori di abi fu du nanga gronwroko, moro bun leki sma na ini wan bigi foto. Den sani fu na aladei libi fu den arkiman fu wi, soleki den pikin, den oso, den sani di den lobi du, nanga den sani di den e nyan, kan de sani di wi kan gebroiki tu na ini agersitori.

A ben gebroiki agersitori di teki puru fu den sani di Gado meki

15. Fu san ede a no e fruwondru wi taki Yesus ben sabi den sani di Gado meki, dorodoro?

¹⁵ Furu fu den agersitori fu Yesus e sori taki a ben sabi furu fu den sani na grontapu, soleki bon, meti, nanga a weer (Mateyus 16:2, 3; Lukas 12:24, 27). Fa a kon sabi den sani disi? A no de fu taki dati di a gro kon bigi na ini Galilea, a ben abi furu okasi fu luku den sani di Gado meki. Ma san de moro prenspari, na taki Yesus na „a fosiwan fu ala sani di Gado meki”, èn di Yehovah ben e meki ala sani a gebroiki en leki a „tumusi bun wrokoman” (Kolosesma 1:15, 16; Odo 8:30, 31). A no e fruwondru wi taki Yesus ben sabi den sani di Gado meki, dorodoro. Meki wi go luku fa a gebroiki a sabi disi na wan koni fasi.

16, 17. (a) San e sori taki Yesus ben sabi heri bun fa skapu de? (b) Sortu eksempre e sori taki skapu trutru e arki a sten fu den skapuman?

¹⁶ Hori na prakseri taki Yesus ben kari ensrefi „a tumusi bun skapuman” èn a kari den bakaman fu en „skapu”. Den wortu fu Yesus e sori taki a ben sabi heri bun fa skapu de di sma e kweki. A ben sabi fa skapuman nanga skapu ben de nanga makandra. A ben sori taki den meti disi di no e du ogri, de klariklari fu teki a tiri fu den skapuman èn den e tan waka na en baka. Fu san ede skapu e waka baka den skapuman? „Fu di den sabi en sten”, na so Yesus taki (Yohanes 10:2-4, 11). A de so trutru taki skapu sabi a sten fu den skapuman?

¹⁷ George A. Smith, di ben si a sani disi, ben skrifi na ini en buku: „Son leisi wi e go rostu brekten na wan fu den peti na ini Yudea, pe sowan dri noso fo skapuman e kon makandra nanga den ipi skapu. Den ipi skapu e moksi nanga makandra, èn wi ben aksi wisrefi fa ibri skapuman o feni en eigi skapu baka. Ma baka te den skapu dringi watra èn prei nanga makandra, ibri skapuman ben go na difrenti sei fu a lagipresi. Dan ibriwan fu den kari den skapu na a fasi fa a gwenti, èn na wan moi fasi ibri skapu waka go na en eigi skapuman. Na so den ipi skapu gowe nanga den eigi skapuman, soleki fa den ben kon” (The Historical Geography of the Holy Land). Wan moro betre agersitori no ben de di Yesus ben kan gebroiki fu tyari kon na krin san a ben wani leri sma. A ben wani tyari kon na krin taki efu wi e teki den leri fu en, efu wi e gi yesi na den leri dati, èn efu wi e teki a tiri fu en, dan a sa sorgu wi na wan lobi-ati fasi leki wan „bun skapuman”.

18. Pe wi kan feni tori di abi fu du nanga den sani di Yehovah meki?

¹⁸ Fa wi kan leri fu gebroiki agersitori di teki puru fu den sani di Gado meki? A moi fasi fa meti de kan de sani di wi kan gebroiki fu teki sani gersi nanga makandra na wan makriki fasi. Pe wi kan feni moro tori di abi fu du nanga den sani di Yehovah meki? Bijbel e taki fu furu difrenti meti, èn son leisi a e gebroiki den fasi fu den meti disi fu taki fu wan sani na agersifasi. Bijbel e sori taki sma e lon leki dia noso penitigri, taki sma musu luku bun neleki sneki, èn taki den musu de leki doifi di no e du ogri (1 Kroniki 12:8; Habakuk 1:8; Mateyus 10:16).c Wi kan feni tra moi tori tu na ini A Waktitoren, Ontwaakt!, nanga tra publikâsi di Yehovah Kotoigi meki. Yu kan leri furu te yu e luku fa den publikâsi disi e teki den furu sani di Yehovah meki, gersi nanga makandra na wan makriki fasi.

A ben gebroiki agersitori di teki puru fu sani di sma sabi

19, 20. (a) Fa Yesus gebroiki wan sani di pasa fu sori taki wan denki di sma ben abi no ben bun? (b) Fa wi kan gebroiki ondrofenitori èn sani di pasa trutru te wi e gi leri?

¹⁹ Wi kan gebroiki sani di pasa trutru leki bun agersitori. Wán leisi, Yesus ben gebroiki wan tori di ben pasa, fu sori taki wan denki di sma abi no bun, èn dati na taki ogri e miti den wan di frudini en. A ben taki: „Den tina-aiti sma di a toren fu Siloam ben fadon na den tapu, èn kiri den; un denki taki den ben de moro bigi sondari leki ala den tra sma di e libi na ini Yerusalem?” (Lukas 13:4) Iya, den 18 sma no ben dede fu di den ben du wan sondu di meki taki Gado ati bron na den tapu. Na presi fu dati, a rampu ben miti den fu di „ten nanga sani di e pasa sondro fu sma fruwakti dati” e miti ala sma (Preikiman 9:11). Sobun, Yesus sori taki a leri disi no tru, nanga yepi fu wan sani di den arkiman fu en ben sabi heri bun.

²⁰ Fa wi kan gebroiki ondrofenitori èn sani di pasa trutru te wi e gi leri? Kon meki wi taki dati yu e taki fu a kontru fu a profeititori fu Yesus di abi fu du nanga a marki fu en denoya (Mateyus 24:3-14). Yu kan taki fu sani di kon na ini a nyunsu di abi fu du nanga feti, angriten, noso gronseki fu sori taki wan spesrutu pisi fu a marki kon tru. Noso kon meki wi taki dati yu wani gebroiki wan ondrofenitori fu sori taki wan sma musu tyari kenki kon efu a wani tron wan nyun sma soleki fa Gado wani (Efeisesma 4:20-24). Pe yu kan feni so wan ondrofenitori? Yu kan poti prakseri na den difrenti fasi fa wi Kresten brada nanga sisa kweki, noso yu kan gebroiki wan ondrofenitori di skrifi na ini wan fu den publikâsi fu Yehovah Kotoigi.

21. Sortu wini wi e kisi te wi na bun leriman fu Gado Wortu?

²¹ Iya, Yesus trutru ben de a Bigi Leriman! Soleki fa wi si na ini a pisi disi, dan a moro prenspari wroko di a ben e du na taki a ’ben e gi leri èn a ben e preiki a bun nyunsu’ (Mateyus 4:23). Disi na a moro prenspari wroko fu wi tu. Wi o kisi furu wini te wi na wan bun leriman. Te wi e gi leri, dan wi e gi trawan wan sani, èn fu gi sani na so wan fasi e meki taki wi de koloku (Tori fu den Apostel 20:35). Wi de koloku fu di wi sabi taki wi e gi den wan sani di warti srefisrefi èn di e tan fu ala ten. A sani dati na den tru tori di abi fu du nanga Yehovah. Wi e prisiri tu fu di wi sabi taki wi e waka baka na eksempre fu Yesus, a Moro Bigi Leriman di ben de na grontapu.