Waktitoren LIBRARY TAPU INTERNET
Waktitoren
LIBRARY TAPU INTERNET
Sranantongo
  • BIJBEL
  • BUKU
  • KONMAKANDRA
  • cf kap. 14 blz. 163-175
  • „Furu sma kon na en”

Felem no de na a pisi disi.

Sorry, wan sani no go bun di wi pruberi fu drai a felem.

  • „Furu sma kon na en”
  • ’Kon, èn tron wan bakaman fu mi’
  • Edeprakseri
  • A srefi sortu tori
  • Sortu sma ben lobi fu go na Yesus?
  • San meki taki a ben makriki gi sma fu go na Yesus?
  • Sma e feni en makriki fu kon na yu?
  • Sori warderi gi den moi fasi fu Yehovah
    A Waktitoren—A e taki fu Yehovah Kownukondre 2013
  • ¿Yu Abi „a Denki fu Krestes”?
    A Waktitoren—A e taki fu Yehovah Kownukondre 2000
  • Joe abi na denki foe Kristus?
    A Waktitoren—A e taki fu Yehovah Kownukondre 1986
  • Suma ben de Yesus?
    Arki Gado èn libi fu têgo
Moro sani
’Kon, èn tron wan bakaman fu mi’
cf kap. 14 blz. 163-175

KAPITEL TINAFO

„Furu sma kon na en”

„Meki den pikin-nengre kon na mi”

1-3. San e pasa te papa nanga mama e tyari den pikin fu den go na Yesus, èn san a pisi tori disi e sori fu Yesus?

YESUS sabi taki a o dede heri esi. A abi ete wan tu wiki èn a abi furu fu du ete! A e preiki makandra nanga den apostel fu en na ini Perea, wan kontren di de na a owstusei fu Yordan-liba. Den e preiki go na a zuidsei na Yerusalem, pe Yesus sa abi a lasti Paskafesa fu en èn drape wan tumusi prenspari sani o pasa.

2 Baka di Yesus abi wan seryusu takimakandra nanga wan tu fu den kerki fesiman, wan pikin dyugudyugu e opo kon. Sma e tyari den pikin-nengre kon na Yesus. Soleki fa a sori, dan den pikin no owru a srefi, bika a Griki wortu di vertaal nanga pikin-nengre na ini den vers disi wani taki beibi noso yongu pikin (Lukas 18:15; Markus 5:41, 42; 10:13). A no de fu taki dati nofo tron te pikin-nengre de na wan presi, dan furu takitaki nanga babari de fu yere. Den disipel fu Yesus e bari den papa nanga mama, kande fu di den e denki taki a Masra abi tumusi furu fu du, èn a no abi ten fu poti prakseri na den pikin. San Yesus e du?

3 Te Yesus e si san e pasa, en ati e bron. Nanga suma en ati e bron? Nanga den pikin? Nanga den papa nanga mama? Nôno, en ati e bron nanga den disipel fu en! A e taki: „Meki den pikin-nengre kon na mi; no pruberi fu tapu den fu kon na mi, bika den sma di de leki den pikin disi sa kisi a kownukondre fu Gado. Fu tru, mi e taigi unu: Efu wan sma no e teki a kownukondre fu Gado leki wan yongu pikin, dan a no sa go na ini a kownukondre kwetikweti.” Dan Yesus e „brasa” den pikin, èn a e blesi den (Markus 10:13-16). Wan sma di e vertaal sani taki dati den wortu fu Markus e sori taki na wan switi fasi Yesus ben e brasa den pikin, èn kande a ben e „hori den na ini en anu” srefi. A de krin fu si taki Yesus lobi pikin. Ma wi e leri wan tra sani fu Yesus dyaso, èn dati na taki sma ben feni en makriki fu go na en.

4, 5. (a) Fu san ede wi kan de seiker taki sma ben feni en makriki fu go na Yesus? (b) Sortu aksi wi sa go luku na ini a kapitel disi?

4 Efu Yesus no ben abi switifasi, efu a no ben firi gi sma, noso efu a ben abi bigifasi, dan a no de fu taki dati den pikin no ben o wani go na en. Boiti dati, den papa nanga mama fu den pikin, no ben o wani go na en tu. Prakseri a tori disi: Yu e si fa den papa nanga mama e lafu èn breiti te den e si a man disi di abi switifasi, e sori lobi gi den pikin fu den? Yu kan si fa den e breiti te Yesus e blesi den pikin èn te a e sori taki Gado lobi den? Iya, aladi Yesus ben abi wan tumusi bigi frantwortu, toku sma ben kan kon na en.

5 Sortu tra sma ben lobi fu go na Yesus? San meki taki a ben makriki gi den fu go na en? Fa wi kan leri fu de neleki Yesus ini a tori disi? Meki wi go luku dati.

Sortu sma ben lobi fu go na Yesus?

6-8. Nanga sortu sma Yesus ben abi demakandra? Fa a fasi fa a ben denki fu den sma disi ben difrenti fu a fasi fa den kerki fesiman ben denki?

6 Te yu e leisi den Evangelietori, dan kande yu e fruwondru fu si taki so furu sma no ben e frede fu go na Yesus. Fu eksempre, nofo tron te wi e leisi fu Yesus, dan „bun furu sma” ben de nanga en. „Bun furu sma fu Galilea . . . ben go waka na en baka.” „Furu sma kon na en.” „Wan heri ipi sma ben e waka nanga Yesus” (Mateyus 4:25; 15:30; Lukas 14:25). Iya, nofo tron bun furu sma ben de lontu Yesus.

7 Nofo tron den sma disi no ben de prenspari sma. Den kerki fesiman ben wisiwasi den sma disi èn den ben kari den „sma fu a kondre”. Den Fariseiman nanga priester ben taki sondro fu syen: „A pipel disi di no sabi a Wet, na frufruktu sma” (Yohanes 7:49). Bakaten, den sani di den Dyu leriman ben skrifi e sori taki disi de so trutru. Furu kerki fesiman ben si den sortu sma disi leki lagi sma, èn den ben weigri fu nyan nanga den, fu bai sani fu den, èn fu abi demakandra nanga den. Fu taki en leti, sonwan fu den ben taki srefi dati na opobaka howpu no ben de gi den sortu sma disi di no sabi den wet di den fositen leriman ben meki! A ben musu de so taki furu fu den sma disi ben wai pasi gi den kerki fesiman, na presi fu aksi den yepi noso tiri. Ma Yesus ben de tra fasi.

8 Yesus ben moksi nanga den sma disi di no ben de prenspari. A ben nyan nanga den, a ben dresi den, a ben gi den leri, èn a ben gi den howpu. A no de fu taki dati Yesus ben sabi taki furu fu den no ben o teki na okasi fu dini Yehovah (Mateyus 7:13, 14). Ma toku a ben abi wan bun denki fu ibriwan fu den sma dati èn a ben sabi taki furu fu den ben man tron wan futuboi fu Gado. Yesus ben de heri tra fasi leki den priester nanga den Fariseiman di no ben e firi gi sma! Ma a moi fu si taki srefi priester nanga Fariseiman ben go na Yesus èn bun furu fu den drai den libi èn waka baka en (Tori fu den Apostel 6:7; 15:5). Son gudusma nanga sma di abi makti ben feni en makriki fu go na Yesus tu.​—Markus 10:17, 22.

9. Fu san ede umasma ben feni en makriki fu go na Yesus?

9 Umasma no ben frede fu go na Yesus. A musu de so taki nofo tron den umasma disi ben ondrofeni taki den kerki fesiman ben e wisiwasi den. Den Dyu leriman ben wisiwasi iniwan sma di ben e gi umasma leri. Fu taki en leti, umasma no ben mag gi kotoigi na ini krutu afersi, fu di den ben si den leki kotoigi di den no kan frutrow. Den Dyu leriman ben abi wan begi srefi pe den ben taki Gado tangi taki den a no umasma! Ma umasma no ben ondrofeni dati te de ben go na Yesus. Furu umasma ben go na en, èn den ben de fayafaya fu kisi leri fu en. Fu eksempre, Maria, di ben de Lasarus en sisa, ben sidon na den futu fu Masra, èn a ben arki bun san Yesus ben taki, aladi en sisa Marta ben poti prakseri na den wroko di a ben musu du èn a ben broko en ede nanga a nyanyan di a ben e sreka. Yesus ben prèise Maria fu di a ben sabi san de moro prenspari.​—Lukas 10:39-42.

10. Fa Yesus ben de tra fasi leki den kerki fesiman te wi e luku a fasi fa a ben handri nanga sikisma?

10 Sma di ben e siki ben go na Yesus tu, aladi den kerki fesiman no ben e bemui nanga den. A Wet di Gado ben gi Moses ben taki dati gwasiman ben musu tan aparti so taki tra sma no kisi a siki fu den. Ma a Wet no ben taki dati sma no ben musu sori switifasi gi den sikisma disi (Lefitikus, kapitel 13). Bakaten, den wet di den Dyu leriman ben meki ben taki dati wan gwasiman ben de wan tegu sani neleki pupe. Son kerki fesiman ben go so fara srefi taki den ben trowe ston na tapu den gwasiman so taki den no kon krosibei fu den! Wi kan frustan o muilek a ben de gi den sma disi fu teki a deki-ati fu go na iniwan leriman. Ma toku, wan tu gwasiman ben go na Yesus. Wan fu den ben taki den wortu disi di e sori taki a ben abi bribi: „Masra, efu yu wani nomo, yu kan meki mi kon krin” (Lukas 5:12). Na ini a tra kapitel wi sa go luku fa Yesus piki en. Ma a tori disi wawan e buweisi taki sma ben feni en makriki fu go na Yesus.

11. Sortu eksempre e sori taki den sma di brokosaka srefisrefi fu di den du wan sondu, ben feni en makriki fu go na Yesus? Fu san ede a sani disi prenspari?

11 Den sma di ben firi brokosaka srefisrefi fu di den du wan sondu, no ben frede fu go na Yesus. Fu eksempre, prakseri a ten di Yesus ben go nyan na a oso fu wan Fariseiman. Wan uma di ala sma ben sabi leki wan sondusma, ben kon na inisei, a saka kindi na Yesus futusei, èn a ben krei fu den sondu di a ben du. Den watra-ai fu en ben nati Yesus futu, èn a drei den futu fu Yesus nanga en wiwiri. A Fariseiman di ben kari Yesus kon na en oso ben tegu gi a sani disi èn a ben krutu Yesus taki a gi pasi taki na uma disi kon krosibei fu en. Ma na wan switi fasi Yesus taki bun fu na uma disi fu di a ben abi trutru berow èn a gi en a dyaranti taki Yehovah gi en pardon (Lukas 7:36-50). Moro leki iniwan ten na fesi, sma di firi brokosaka srefisrefi fu di den du wan sondu, musu feni en makriki fu go na den wan di kan yepi den fu meki en bun baka nanga Gado. San meki taki a ben makriki gi sma fu go na Yesus?

San meki taki a ben makriki gi sma fu go na Yesus?

12. Fu san ede a no e fruwondru wi taki sma ben feni en makriki fu go na Yesus?

12 Hori na prakseri taki Yesus ben e handri soifri soleki fa en lobi-ati hemel Tata e handri (Yohanes 14:9). Bijbel e memre wi taki Yehovah „no de fara fu nowan fu wi” (Tori fu den Apostel 17:27). Ala ten den futuboi fu Gado, èn sosrefi iniwan tra sma di trutru wani feni en èn dini en, kan go na Yehovah, di de a „Yereman fu begi” (Psalm 65:2). Prakseri a sani disi: Aladi Yehovah na a moro maktiwan èn a moro prenspari sma fu hemel nanga grontapu, toku a makriki fu go na en moro leki na iniwan tra sma! Neleki en Tata, na so Yesus lobi sma tu. Na ini den kapitel di e kon, wi sa taki fu a bigi lobi dati di Yesus ben abi gi sma. Ma a moro prenspari reide fu san ede sma ben feni en makriki fu go na Yesus, na fu di den ben man si taki a lobi den. Meki wi go luku wan tu fu den fasi fu Yesus di ben sori taki a lobi sma trutru.

13. Fa papa nanga mama kan teki na eksempre fu Yesus?

13 Sma ben man si wantewante taki Yesus ben broko en ede nanga den. Yesus ben tan du disi, aladi a ben de na ini muilek situwâsi. Soleki fa wi si kaba, dan di den papa nanga mama tyari den pikin fu den go na Yesus, dan Yesus no ben tapu den aladi a ben abi furu fu du èn a ben abi bigi frantwortu. Disi na wan heri moi eksempre gi papa nanga mama! A no makriki fu kweki pikin na ini a grontapu disi. Ma toku, a de tumusi prenspari taki pikin sabi taki den no abi fu frede fu go na den papa nanga mama. Efu yu na wan papa noso mama, dan yu sabi taki son leisi yu abi so furu fu du, taki yu no man poti prakseri na yu pikin te a kon na yu. Ma toku, yu kan gi en a dyaranti taki yu sa meki ten gi en so esi leki a kan. Te yu e hori yusrefi na dati, dan yu pikin sa leri taki a e tyari wini kon te a abi pasensi. A o leri tu taki a kan kon ala ten na yu nanga iniwan problema noso broko-ede di a abi.

14-16. (a) Fu san ede Yesus du a fosi wondru fu en, èn fu san ede dati ben de so wan bigi sani? (b) Te wi e luku a wondru di Yesus du na ini Kana, dan san dati e sori fu en, èn san papa nanga mama kan leri fu en?

14 Yesus ben meki sma sabi taki den broko-ede fu den, prenspari gi en. Fu eksempre, luku a fosi wondru di Yesus du. A ben go na wan trow-oso na ini Kana, wan foto na ini Galilea. Ne wan fruferi problema opo kon, den no ben abi win moro! Maria, a mama fu Yesus, taigi en san ben pasa. San Yesus du? A taigi den yepiman fu lai siksi ston watrakan nanga watra. Di den tyari pikinso gi a fesiman fu a fesa, dan a ben fruwondru taki a win ben de so bun! Na kori Yesus ben wani kori sma nanga a sani di a du? Nôno, trutru a watra „ben kenki kon tron win” (Yohanes 2:1-11). Langa ten kaba, libisma wani kenki a wan sani kon tron wan tra sani. Hondrohondro yari kaba, son man pruberi fu kenki loto tron gowtu. Noiti den ben man du dati. Ma fa a de nanga watra nanga win? Watra nanga win e difrenti furu fu makandra. Fu san ede Yesus ben du so wan bigi wondru aladi a de wan pikin sani taki nofo win no de na wan trow-oso?

15 A problema disi no ben de wan pikin sani gi a trowmisi nanga a trowmasra. Na ini owruten Israel nanga den kondre drape, sma ben feni en tumusi prenspari fu sori switifasi gi sma di den ben kari kon na den oso. A ben o de wan syen gi a trowmisi nanga trowmasra taki win no ben de moro na a trow-oso fu den. Disi ben o meki den sari tapu den trow-dei, èn den no ben o frigiti a fruferi sani dati. Gi a trowpaar a sani disi ben de prenspari, èn a ben de prenspari tu gi Yesus. Fu dati ede a du wan sani fu lusu a problema. Yu kan si fu san ede sma ben go na Yesus nanga den broko-ede fu den?

Sori yu pikin taki a kan kon na yu èn taki yu e broko yu ede trutru nanga en

16 Ini a tori disi tu, papa nanga mama kan leri wan moi sani. Kon meki wi taki dati yu pikin e kon na yu nanga wan problema di e gi en broko-ede. Kande yu wani taigi en taki a sani dati na wan lawlaw sani. Kande yu o wani lafu srefi fu a sani di a kon taigi yu. Te yu e agersi den problema di yu abi, nanga a problema di yu pikin abi, dan a kan gersi leki a problema fu yu pikin no prenspari. Ma hori na prakseri taki a pikin fu yu no e si a sani dati leki wan lawlaw sani! Efu wan sani prenspari gi a sma di yu lobi so te, dan a musu de prenspari gi yu tu, a no so? Te yu e sori yu pikin taki yu e broko yu ede nanga den sani di prenspari gi en, dan dati sa meki taki a feni en makriki fu kon na yu.

17. Fa Yesus sori safri-ati fasi, èn fu san ede a fasi disi e sori taki wan sma tranga?

17 Soleki fa wi si na ini Kapitel 3, dan Yesus ben abi safri-ati nanga sakafasi (Mateyus 11:29). Safri-ati na wan tumusi moi fasi, fu di a e sori krin taki wan sma abi trutru sakafasi. A fasi disi na wan pisi fu a froktu fu Gado santa yeye èn a abi fu du nanga a koni fu Gado (Galasiasma 5:22, 23; Yakobus 3:13). Awansi san sma ben du fu meki Yesus ati bron, toku a ben hori ensrefi. A safri-ati fasi fu en no ben de wan swakifasi kwetikweti. Wan sabiman e taki disi fu a fasi dati: „Wan safri-ati sma abi switifasi, ma na a srefi ten a sma dati tranga neleki isri.” Iya, nofo tron wi musu tranga fu hori wisrefi fu no ati bron èn fu handri nanga trawan na wan safri-ati fasi. Ma te Yehovah e horibaka gi wi te wi e du muiti fu sori safri-ati, dan wi o man waka baka na eksempre fu Yesus èn dati o meki taki sma o feni en makriki fu kon na wi.

18. Sortu eksempre e sori taki Yesus no ben de wan muilek sma, èn fu san ede yu denki taki a fasi disi e meki en makriki gi sma fu go na wan trawan?

18 Yesus no ben de wan muilek sma. Di Yesus ben de na ini Tirus, dan wan uma kon na en fu di ’wan ogri yeye ben e pina en umapikin kefalek’. Na dri fasi Yesus sori en taki a no ben wani du san a aksi en. A fosi sani di Yesus du na taki a no piki na uma. Baka dati a taigi en fu san ede a no o du san a aksi en. Dan a fruteri na uma wan agersitori fu meki a frustan moro krin fu san ede a no ben o du san a aksi en. Ma disi e sori taki Yesus no ben abi firi gi na uma èn taki a no ben wani arki en? Yesus ben sori na uma taki sani ben o miti en efu a ben prefuru fu piki baka te so wan bigi man e taki nanga en? Nôno, a de krin fu si taki na uma no ben frede. A no ben aksi yepi nomo, ma a ben tan begi Yesus aladi a ben de krin taki Yesus no ben wani yepi en. Yesus ben si taki na uma ben abi wan tranga bribi di ben meki taki a tan aksi en fu dresi en umapikin. Fu dati ede Yesus dresi na umapikin (Mateyus 15:22-28). A no de fu taki dati sma trutru ben wani go na Yesus fu di a no ben de wan muilek sma, èn a ben de klariklari fu arki èn fu yepi den te dati ben fiti!

Sma e feni en makriki fu kon na yu?

19. Fa wi o kon sabi efu a de makriki trutru gi sma fu kon na wi?

19 Nofo tron sma e denki taki trawan kan kon makriki na den. Fu eksempre, son sma di abi makti, lobi fu taki dati den sma di de na den ondro ala ten kan kon na den. Ma Bijbel e gi a prenspari warskow disi: „Furu sma o taki dati den lobi du bun gi trawan, ma suma kan feni wan sma di e du san reti?” (Odo 20:6) A makriki fu taki dati sma kan kon na wi, ma a de so trutru taki wi e tan teki na eksempre fu Yesus fu sori lobi na a fasi disi? Fu feni a piki tapu na aksi disi, dan wi no musu luku a fasi fa wi e si wisrefi, ma wi musu luku fa trawan e si wi. Paulus ben taki: „Meki ala sma kon sabi taki unu de klariklari fu fiti unsrefi” (Filipisma 4:5). A ben o bun fu aksi wisrefi: ’Fa trawan e denki fu mi? Sortu nen mi abi na tra sma?’

Owruman e sorgu taki trawan kan feni en makriki fu kon na den

20. (a) Fu san ede a de prenspari taki sma musu feni en makriki fu go na Kresten owruman? (b) Fu san ede wi no musu fruwakti tumusi furu fu den owruman na ini a gemeente?

20 Spesrutu Kresten owruman musu sorgu taki sma e feni en makriki fu kon na den. Den e du muiti trutru fu du san skrifi na ini Yesaya 32:1, 2. A tekst disi e taki: „Ibriwan fu den o de leki wan kibripresi gi tranga winti èn gi sibibusi. Den o de leki wan liba di e lon na wan kontren sondro watra èn leki a kowrupe fu wan bigi ston na ini wan kontren di drei.” Wan owruman kan de leki wan kibripresi, wan kowrupe, èn leki watra na ini wan drei kontren, soso te trawan e feni en makriki fu kon na en. A tru taki a sani disi no makriki ala ten gi owruman, fu di den abi wan hebi frantwortu na ini a muilek ten disi. Ma toku, owruman e du muiti fu no meki sma kisi a denki taki den abi tumusi furu fu du èn taki den no abi ten gi den skapu fu Yehovah (1 Petrus 5:2). Tra memre fu a gemeente e pruberi fu hori den owruman disi na prakseri, fu di den no o fruwakti tumusi furu fu den. Boiti dati, den o sori taki den abi sakafasi èn taki den e wroko makandra nanga den.​—Hebrewsma 13:17.

21. Fa papa nanga mama kan sorgu taki den pikin kan kon makriki na den, èn san wi sa go luku na ini a tra kapitel?

21 Papa nanga mama e du muiti ala ten taki den pikin fu den e feni en makriki fu go na den. A sani disi na wan seryusu sani! Den wani taki den pikin fu den sabi taki den kan frutrow den papa nanga mama. Fu dati ede, Kresten papa nanga mama e sorgu taki den abi safri-ati fasi èn taki den a no muilek sma. Den no e ati bron esi, te a pikin fu den e fruteri den fu wan fowtu di a meki, noso te a e kon na krin taki a pikin abi wan fowtu denki. Te papa nanga mama e gi den pikin leri aladi den e du dati nanga pasensi, dan den e du muiti tu fu tan abi bun takimakandra nanga den pikin. Iya, wi alamala wani sorgu taki sma e feni en makriki fu kon na wi neleki fa a ben de nanga Yesus. Na ini a tra kapitel, wi sa go luku na sortu fasi Yesus sori taki a abi trutru sari-ati. Disi na wan fu den prenspari fasi di meki taki sma ben feni en makriki fu go na en.

Fa yu kan waka baka Yesus?

  • Fu san ede sma o feni en makriki fu kon na wi te wi e poti aksi gi den èn e arki bun te den e piki?​—Mateyus 16:13-17.

  • Fa Yesus sori taki sma ben kan kon na en aladi a ben wani rostu pikinso, èn fa wi kan waka baka na eksempre fu en?​—Markus 6:31-34.

  • Fa Yesus ben si sma di no ben de na bribi, èn fa a teki di wi e teki na eksempre fu en o meki en makriki gi sma fu kon na wi?​—Lukas 5:29-32.

  • Na sortu fasi sma o feni en moro makriki fu kon na wi te wi abi wan bun denki fu den neleki Yesus?​—Yohanes 1:47.

    Sranantongo buku (1978-2025)
    Log Out
    Log In
    • Sranantongo
    • Seni en gi wan sma
    • Settings
    • Copyright © 2025 Watch Tower Bible and Tract Society of Pennsylvania
    • Gebruiksvoorwaarden
    • Privacybeleid
    • Privacyinstellingen
    • JW.ORG
    • Log In
    Seni en gi wan sma