„Yesus ben sari den”

1-3. (a) San Yesus du di tu breniman di ben e begi moni aksi en fu kisi yepi? (b) San a wortu „sari” wani taki? (Luku san skrifi na ondrosei fu bladzijde 178.)

TU BRENIMAN e sidon na seipasi, krosibei fu Yerikow. Den e kon drape ibri dei èn den e sidon na wan presi pe furu sma e pasa, fu begi moni. Ma a dei disi den man disi o ondrofeni wan sani di o kenki a libi fu den dorodoro.

² Wantronso, den man disi di e begi moni, e yere wan dyugudyugu. Fu di den no man si san e pasa, meki wan fu den e aksi san na a dyugudyugu di den e yere. Sma e taigi en: „Yesus fu Nasaret e pasa!” Yesus de na pasi e go na Yerusalem fu a lasti leisi. Ma a no de en wawan, furu sma e waka na en baka. Di den man di e begi moni yere suma e pasa, dan den bigin bari: „Masra, Manpikin fu David, abi sari-ati nanga wi!” Fu di a sani dati e fruferi sma, meki den taigi den man fu tapu den mofo, ma den man wani kisi yepi nomonomo. Fu dati ede den e weigri fu tapu den mofo.

³ Yesus e yere den man disi e bari na mindri den furu sma. San a o du? A abi furu sani na prakseri, bika a abi pikinmoro wán wiki ete na grontapu. A sabi taki a o nyan pina èn taki a o dede na wan ogri-ati fasi na ini Yerusalem. Ma toku, a no e du leki a no e yere den man di e bari fu kisi yepi. A e tan tanapu èn a e aksi den sma fu tyari den man kon na en. Den man e begi en: „Masra, meki wi ai kon opo.” Fu di „Yesus ben sari den”, meki a e fasi den ai èn den ben man si baka.a Wantewante den bigin waka baka Yesus.​—Lukas 18:35-43; Mateyus 20:29-34.

4. Fa Yesus meki a profeititori kon tru di e taki dati a ben o „firi sari gi a mofinawan”?

⁴ Disi no ben de a wan-enkri leisi di Yesus sori sari-ati gi sma. Na furu okasi èn na furu difrenti situwâsi, Yesus ben sori sari-ati trutru gi sma. Bijbel profeititori ben taki na fesi taki a o „firi sari gi a mofinawan” (Psalm 72:13). Soleki fa den wortu dati e sori, dan Yesus ben e firi trutru gi sma. A no ben wakti fu sma aksi en fu sori sari-ati, ma en ben teki na okasi fu yepi den. Na fu di a ben abi sari-ati gi sma, meki a ben du a preikiwroko. Meki wi go luku fa den Evangelietori e sori taki den sani di Yesus taki èn du sori taki a ben abi sari-ati trutru. Wi o si tu fa wi kan sori sari-ati neleki en.

A ben hori den firi fu trawan na prakseri

5, 6. Sortu eksempre e sori taki Yesus ben de wan man di ben e firi gi sma?

⁵ Yesus ben de wan man di e firi trutru gi sma. A ben frustan fa sma ben firi èn a ben firi gi den sma di ben e pina. Aladi a no ben ondrofeni ala sani di den sma ben ondrofeni, toku a ben firi trutru gi den (Hebrewsma 4:15). Di a dresi wan uma di ben lasi brudu 12 yari langa, a kari a siki fu na uma wan „takru siki”. Na so fasi a sori taki a ben frustan taki a siki ben gi na uma furu broko-ede èn a ben meki a pina srefisrefi (Markus 5:25-34). Di a si fa Maria nanga den sma di ben de nanga en ben e krei fu di Lasarus dede, dan a sani dati ben naki en ati so te, taki a ben kon hebi gi en srefisrefi. Aladi Yesus ben sabi taki a ben o gi Lasarus wan opobaka, toku a ben sari so te, taki en ai kon furu nanga watra.​—Yohanes 11:33, 35.

⁶ Na wan tra okasi, wan gwasiman kon na Yesus èn a begi en: „Efu yu wani nomo, yu kan meki mi kon krin.” San Yesus, wan man di no ben abi sondu èn di no ben siki noiti, taigi a man? A ben sori taki a e firi gi a gwasiman. Iya, „a firi sari” gi a man (Markus 1:40-42). Ne a du wan aparti sani. A ben sabi heri bun taki gwasiman no ben krin soleki fa a Wet ben taki èn den no ben musu de na mindri tra sma (Lefitikus 13:45, 46). A no de fu taki dati Yesus ben man dresi a man disi sondro fu fasi en (Mateyus 8:5-13). Toku, a langa en anu, a fasi a gwasiman, èn a taki: „Mi wani. Kon krin.” Wantewante a gwasi komoto fu a man en skin. Yesus trutru sori taki a e firi gi sma!

7. San kan yepi wi fu firi gi sma, èn fa wi kan sori dati?

⁷ Wi leki Kresten, e kisi a deki-ati fu firi gi sma neleki fa Yesus ben du dati. Bijbel e gi wi a deki-ati fu „firi gi tra sma” (1 Petrus 3:8).b A no makriki kande fu frustan fa sma e firi te den siki seryusu noso te den brokosaka srefisrefi, spesrutu efu so wan sani no miti wi noiti. Hori na prakseri taki wi no abi fu ondrofeni wan sani fosi, fu man sori taki wi e firi gi sma. Yesus ben e firi gi den sikisma, aladi ensrefi no siki noiti. Ma fa wi kan sori taki wi e firi gi trawan? Wi kan du dati te wi arki nanga pasensi te sma di e pina e fruteri wi san de na tapu den ati èn fa den e firi. Wi kan aksi wisrefi: ’Efu mi ben o de na ini a situwâsi fu a sma dati, fa mi ben o firi?’ (1 Korentesma 12:26) Efu wi e du moro muiti fu kon frustan fa trawan e firi, dan wi o man „trowstu den sma di lasi-ati”, moro bun (1 Tesalonikasma 5:14). Boiti taki wi e taki sani fu trowstu sma, a kan taki wi e krei nanga den son leisi tu. Romesma 12:15 e taki: „Krei nanga sma di e krei.”

8, 9. Fa Yesus sori taki a ben hori den firi fu trawan na prakseri?

⁸ Yesus ben e hori den firi fu trawan na prakseri èn a no ben du sani fu hati den firi. Prakseri a ten di sma ben tyari wan dofuman di no ben man taki bun, go na Yesus. Soleki fa a sori, dan Yesus ben si taki a man ben syensyen. Fu dati ede a du wan sani di a no ben gwenti du te a ben dresi trawan. „A puru a man na mindri den sma.” Di den wawan ben de, èn den ipi sma no ben de drape e luku, dan Yesus dresi a man.​—Markus 7:31-35.

⁹ Yesus handri na a srefi fasi di sma ben tyari wan breniman kon na en èn den aksi en fu dresi a man. Yesus „hori a breniman na en anu èn a tyari en go dorosei fu a dorpu”. Baka dati a dresi a man safrisafri teleki a ben man si krin baka. Kande a du disi so taki safrisafri a man ben kan frustan san na den difrenti sani di a e si, èn taki en ai ben kan kon gwenti a krin leti fu a son (Markus 8:22-26). Iya, Yesus hori a man na prakseri trutru!

10. Na sortu fasi wi kan sori taki wi e hori a firi fu trawan na prakseri?

¹⁰ Wi leki bakaman fu Yesus, musu hori a firi fu trawan na prakseri tu. Fu dati ede wi e luku bun san wi e taki, fu di wi e hori na prakseri taki efu wi e taki sani sondro fu denki, dan wi kan hati a firi fu trawan (Odo 12:18; 18:21). Fu di Kresten no wani hati a firi fu trawan, meki den no e taki grofu, èn den no e taki sani fu wisiwasi trawan (Efeisesma 4:31). Owruman, fa unu kan sori taki unu e hori a firi fu trawan na prakseri? Te unu e gi sma rai, dan taki na wan switifasi, so taki unu e tan sori lespeki gi den (Galasiasma 6:1). Papa nanga mama, fa unu kan hori a firi fu un pikin na prakseri? Te unu e gi den trangaleri, dan meki muiti fu du dati na wan fasi di no o meki den pikin kisi syen.​—Kolosesma 3:21.

Yesus no ben wakti fu sma aksi en yepi

11, 12. Sortu tori na ini Bijbel e sori taki Yesus no ben wakti fu sma aksi en fosi a sori sari-ati gi den?

¹¹ Yesus no ben sori sari-ati nomo te sma ben aksi en fu yepi den. Fu taki en leti, sari-ati na wan fasi di e meki taki wan sma e du wan sani fu yepi trawan. Fu dati ede a no e fruwondru wi taki a sari-ati di Yesus ben abi, meki taki a no ben wakti fu sma aksi en yepi. Fu eksempre, di wan bigi ipi sma ben de nanga en dri dei langa sondro fu nyan, dan nowan sma ben abi fu taigi Yesus taki angri ben kiri den sma, noso taki a ben musu du wan sani fu yepi den. A tori e taki: „Yesus kari den disipel fu en kon èn a taki: ’Mi e sari den sma, bika na dri dei kaba den de nanga mi èn den no abi noti fu nyan; mi no wani seni den gowe sondro fu den nyan fosi. Den kan fadon flaw te den de na pasi.’” Baka dati, a gi den ipi sma nyanyan na wan wondru fasi fu di ensrefi ben wani dati.​—Mateyus 15:32-38.

¹² Luku wan tra eksempre. Na ini a yari 31, di Yesus ben kon krosibei fu a foto Nain, dan a si wan sari sani. Sma ben e tyari wan dede man go beri, èn soleki fa a sori dan den sma ben e go na den grebi di de na den bergi krosibei. Drape den ben o beri ’a wan-enkri manpikin fu wan uma di lasi en masra na ini dede’. Yu kan frustan fa a mama disi ben e sari? A ben de fu beri en wan-enkri manpikin, èn a no ben abi wan masra moro fu trowstu en. Fu ala den sma di ben de drape, Yesus „si” na uma disi di no ben abi pikin moro. A sani disi di Yesus si, naki en ati, iya, „a firi sari gi en”. Nowan sma ben abi fu aksi en fu du wan sani. A sari-ati di a ben abi, meki taki ensrefi du wan sani sondro taki sma aksi en fosi. Dati meki a „waka go moro krosibei, dan a fasi a dragi”, èn a gi a yonkuman libi baka. San pasa baka dati? Yesus no aksi a yonkuman fu kon makandra nanga a bigi ipi sma di ben de nanga en. Na presi fu dati, Yesus „gi en baka na en mama”, so taki den ben kan de wan famiri baka, èn so taki na uma disi di lasi en masra na ini dede, ben abi wan sma fu sorgu gi en.​—Lukas 7:11-15.

13. Fa wi kan teki na eksempre fu Yesus fu yepi sma di de na nowtu?

¹³ Fa wi kan teki na eksempre fu Yesus? A no de fu taki dati wi no kan gi sma nyanyan na wan wondru fasi èn wi no man gi sma libi baka. Ma wi kan de leki Yesus te wi e yepi den wan di de na nowtu, fosi densrefi kon aksi wi. Kande wan brada noso sisa abi seryusu moni problema noso a lasi en wroko (1 Yohanes 3:17). Kande wan uma di lasi en masra na ini dede, abi yepi fanowdu fu meki wan tu sani di broko na a oso fu en (Yakobus 1:27). A kan de so taki wi sabi wan osofamiri di lasi wan sma na ini dede èn di abi trowstu nanga yepi fanowdu (1 Tesalonikasma 5:11). Na ini situwâsi pe sma abi trutru yepi fanowdu, wi no abi fu wakti fu sma kon aksi wi fosi fu yepi den (Odo 3:27). Sari-ati o meki taki wi e du san wi man fu yepi sma. Hori na prakseri taki efu wi e du wan pikin sani fu sori switifasi, noso efu wi e taki sani di komoto fu wi ati fu trowstu sma, dan na so fasi wi e sori kaba taki wi abi trutru sari-ati.​—Kolosesma 3:12.

Sari-ati meki taki Yesus preiki gi sma

14. Fu san ede Yesus ben si a preiki di a ben preiki a bun nyunsu leki a moro prenspari wroko?

¹⁴ Soleki fa wi si na ini Pisi 2 fu a buku disi, dan Yesus gi wi wan heri moi eksempre na ini a fasi fa a ben preiki a bun nyunsu. A ben taki: „Mi musu go fruteri a bun nyunsu fu Gado kownukondre na tra foto tu, bika na fu disi Gado ben seni mi kon” (Lukas 4:43). Fu san ede a wroko disi ben de a moro prenspari wroko gi en? Na a fosi presi, fu di a ben lobi Gado. Ma wan tra reide na taki a ben abi sari-ati trutru, èn dati ben meki taki a yepi sma fu kon abi wan bun matifasi nanga Gado. Na ala den fasi fa a sori sari-ati, disi ben de a moro prenspari fasi fa a sori dati. Meki wi go luku tu situwâsi di e sori fa Yesus ben si den sma di a ben preiki gi. Te wi o go luku den tori disi, dan dati kan yepi wi fu ondrosuku fu san ede wi e du a preikiwroko.

15, 16. Fruteri fu tu okasi di e sori fa Yesus ben si den sma di a ben e preiki gi.

¹⁵ Na ini a yari 31, sowan tu yari baka di Yesus du a diniwroko fu en fayafaya, a du moro fu di a „go na ala den foto nanga dorpu” na ini Galilea fu preiki gi sma drape. Den sani di a ben si ben naki en ati. Na apostel Mateyus e taki: „Di a si ala den sma, a ben sari den, bika sma ben pina den èn den ben waka bruyabruya leki skapu di no abi skapuman” (Mateyus 9:35, 36). Yesus ben firi gi den sma. A ben sabi heri bun taki den abi yepi fanowdu fu kon sabi Gado. Den kerki fesiman di ben musu yepi den, no ben handri bun nanga den sma èn den no ben poti prakseri na sma kwetikweti. Fu di Yesus ben abi trutru sari-ati gi sma, meki a ben e du tranga muiti fu miti sma nanga a boskopu fu en di e gi howpu. A sani di den ben abi tranga fanowdu, na a bun nyunsu fu Gado Kownukondre.

¹⁶ Wan srefi sortu sani pasa wan tu mun baka dati, na a ten fosi a Paskafesa na ini a yari 32. Na a okasi disi, Yesus nanga den apostel fu en go na ini wan boto èn den seiri abra a Se fu Galilea fu feni wan tiri presi pe den ben kan rostu. Ma wan ipi sma na syoro ben lon go na a presi dati èn den doro drape fosi a boto. San Yesus du? „Di a komopo na ini a boto, a si wan heri ipi sma; ma a ben sari den, bika den ben de leki skapu di no abi wan skapuman. Dan a bigin leri den furu sani” (Markus 6:31-34). Na okasi disi tu, Yesus „ben sari den” sma, fu di den ben angri fu kon sabi moro fu Gado. Neleki „skapu di no abi wan skapuman” fu sorgu gi den, na so den sma disi ben angri fu kisi leri, ma den no ben abi nowan sma fu gi den leri. Yesus no preiki gi sma fu di a ben musu du dati, ma fu di a ben abi sari-ati gi den.

17, 18. (a) Fu san ede wi e teki prati na ini a diniwroko? (b) Fa wi kan kon abi sari-ati gi trawan?

¹⁷ Fu san ede wi leki bakaman fu Yesus e preiki? Soleki fa wi si na ini Kapitel 9 fu a buku disi, dan wi kisi a komando, noso a frantwortu fu preiki èn fu meki disipel (Mateyus 28:19, 20; 1 Korentesma 9:16). Ma wi no e du a wroko disi soso fu di na wan komando noso wan plekti. Ma san de moro prenspari na taki wi lobi Yehovah èn dati e meki taki wi e preiki a bun nyunsu fu en Kownukondre. Boiti dati, wi e preiki tu fu di wi abi sari-ati gi den sma di no abi a srefi bribi leki wi (Markus 12:28-31). We, dan fa wi kan kon abi sari-ati gi trawan?

¹⁸ Wi musu si sma soleki fa Yesus ben si den. „Sma ben pina den èn den ben waka bruyabruya leki skapu di no abi skapuman.” Kon meki wi taki dati yu feni wan pikin skapu di lasi. Angri e kiri a pôti meti èn watra e kiri en tu, fu di a no abi skapuman fu tyari en go na wan presi pe grun grasi nanga watra de. Yu no ben o sari a pikin skapu dati? Yu no ben o du ala san yu man fu gi en pikinso nyanyan èn watra fu dringi? Furu sma di no sabi a bun nyunsu ete de leki a pikin skapu dati. Fu di den falsi kerki fesiman no e poti prakseri na den, meki den e angri fu kon sabi a bun nyunsu èn den no abi wan trutru howpu gi a ten di e kon. Wi abi san den abi fanowdu. Na agersi fasi wi e gi den nyanyan nanga watra, fu di wi e fruteri den san na den tru tori na ini Gado Wortu (Yesaya 55:1, 2). Te wi e prakseri taki den sma na wi lontu abi den tru tori fu Gado Wortu fanowdu, dan dati e naki wi ati. Efu wi e firi gi sma neleki Yesus, dan wi o du ala san wi man fu fruteri den a Kownukondre howpu.

19. San wi kan du fu yepi wan Bijbelstudenti di doro den markitiki fu teki prati na a preikiwroko?

¹⁹ Fa wi kan yepi sma fu teki na eksempre fu Yesus? Kon meki wi taki dati wan Bijbelstudenti doro den markitiki fu bigin teki prati na a preikiwroko, èn wi wani gi en deki-ati. Noso kande wi wani yepi wan sma di no e preiki moro, fu teki prati fayafaya baka na a diniwroko. Fa wi kan yepi den sma disi? Wi musu du muiti fu doro na ati fu den. Hori na prakseri taki Yesus ben „sari” den sma fosi, èn baka dati a gi den leri (Markus 6:34). Sobun, efu wi kan yepi den fu kon abi sari-ati, dan dati kan naki den ati fu de leki Yesus èn na so fasi den kan fruteri trawan a bun nyunsu. Wi kan aksi den: ’Fa yu libi kon moro bun fu di yu arki a Kownukondre boskopu? Fa a de nanga sma di no sabi a boskopu disi ete? Den no musu yere a bun nyunsu tu? San yu kan du fu yepi den?’ A no de fu taki dati a moro prenspari reide fu san ede wi e du a diniwroko, na fu di wi lobi Gado èn wi wani dini en.

20. (a) San a wani taki fu de wan bakaman fu Yesus? (b) San wi o go luku na ini a tra kapitel?

²⁰ Fu de wan bakaman fu Yesus, wani taki moro leki fu leri sma den sani di a taki èn fu handri leki en. Wi musu kisi a srefi „denki” leki en (Filipisma 2:5). Fu dati ede wi de nanga tangi taki Bijbel e sori krin sortu denki nanga firi ben meki taki Yesus taki èn du son sani! Te wi o kon sabi „fa Krestes e denki”, dan a o de moro makriki gi wi fu firi gi trawan èn fu kon abi trutru sari-ati gi den. Disi o meki taki wi handri nanga trawan soleki fa Yesus ben du dati (1 Korentesma 2:16). Na ini a tra kapitel, wi o go luku den difrenti fasi fa Yesus sori lobi, spesrutu gi den bakaman fu en.