Jehovah — Wi Tata di abi safoe sari-atifasi
„Jehovah safoe srefisrefi na ini firi foe lobi èn a abi sari-atifasi.” — JAKOBUS 5:11, foetoewortoe.
1. Foe san ede den mendriwan e firi foe go na Jehovah Gado?
NA UNIVERSUM bigi sote taki astronoom-man no man teri ala den stari sistema foe en srefi. A stari sistema foe wi, a Melkweg Sistema, de so kefalek bigi, taki libisma no man teri ala den stari foe en srefi. Wan toe stari, so leki Antares, bigi èn e brenki doesoendoesoen tron moro leki a son foe wi. Omeni krakti a Gran Mekiman foe ala den stari ini na universum moesoe abi! Ija, en na „a Sma di e tjari srefi a nomroe foe a legre foe den go na doro, di e kari den alamala srefi na den nen” (Jesaja 40:26). Tokoe, a srefi Gado disi di e meki taki wi e kisi respeki gi en, de so srefi „safoe srefisrefi na ini firi foe lobi èn a abi sari-atifasi”. Fa a sabi di den sabi disi e kowroe na ati troetroe foe den foetoeboi foe Jehovah di abi sakafasi, spesroetoe gi denwan di e pina foe froefolgoe, siki, depressie, noso tra problema!
2. Fa den sma foe a grontapoe disi e si den safoe firi?
2 Foeroe sma e si den moro safoe firi leki swakifasi, so leki den „safoe firi foe lobi èn sari-ati” foe Krestes (Filipisma 2:1). Foe di na evolutie filosofia abi krakti na den tapoe, meki den e gi sma deki-ati foe soekoe den eigi wini, srefi efoe dati wani taki dati den moesoe hati den firi foe tra sma. Foeroe sma di wi e si ini show, kino nanga sport, di trawan e waka na baka wan spesroetoe eigifasi foe den, na macho noso sma di e sori man-nengrefasi pasa marki, di no e krei noso di no e sori safoe firi foe lobi. Wan toe politiek tiriman e handri na a srefi fasi. A Stoïcijn filosoofman Seneca, di ben gi leri na a ogri-ati kèiser Nero, ben poti krakti na tapoe taki „a firi di wan sma e firi sari, na wan swakifasi”. A Cyclopædia foe M’Clintock nanga Strong e froeklari: „A krakti di a Stoïcisme abi na tapoe sma . . . e tan abi krakti ete na tapoe a froestan foe sma, srefi ini a ten disi.”
3. Fa Jehovah ben taki nanga Moses foe Ensrefi?
3 Kontrari dati, a persoonlijkheid foe a Mekiman foe a libisma famiri e prisiri na ati foe sma. A ben taki nanga Moses foe Ensrefi nanga den wortoe disi: „Jehovah, Jehovah, wan Gado di abi sari-atifasi nanga switifasi, di no e kisi atibron esi-esi èn di abi lobi boen-atifasi nanga waarheid pasa marki, . . . di e gi pardon foe fowtoe nanga foe a pasa di sma e pasa a wet, nanga foe sondoe, ma a no sa fri sma foe strafoe kwetikweti” (Exodus 34:6, 7). A troe taki Jehovah kaba a fasi disi fa a e taki foe ensrefi, foe di a e poti krakti na tapoe a gerègtigheit foe en. A no sa fri den sma di e sondoe foe espresi, foe a strafoe di den e froedini. Tokoe a e taki foe ensrefi na a fosi presi leki wan Gado di abi sari-atifasi, san wani taki troetroe „foeroe nanga sari-ati”.
4. San a Hebrew wortoe, di foeroetron den e vertaal nanga „sari-ati” èn di e prisiri sma ati, wani taki?
4 Sontron sma e denki foe a wortoe „sari-ati” soso leki a gi di sma no e gi strafoe na wan kroetoe, sondro taki firi e boeweigi den. Ma te wi e teki bijbelvertaling gersi nanga makandra, dan a e tjari a Hebrew bijwortoe kon na krin, di wani taki foeroe sani, èn di teki foe a werkwortoe ra·chamʹ. So leki fa wan toe sabiman e taki, dan a gronprakseri foe en wani taki „foe de safoe”. A boekoe Synonyms of the Old Testament e froeklari taki „ra·cham e sori wan dipi èn safoe firi foe sari-ati, so leki a firi di e kon te wi e si a swakifasi noso pina foe denwan di wi lobi noso di abi wi jepi fanowdoe”. Tra wortoe di e taki wan sani foe a diri eigifasi disi, di e prisiri na ati foe sma, de foe feni ini Insight on the Scriptures, Pisi 2, bladzijde 375-379.
5. Fa sari-ati ben de krin foe si ini a Wet foe Moses?
5 A safoe sari-ati foe Gado de krin foe si ini a Wet di a ben gi a nâsi Israèl. Den ben moesoe handri na wan sari-atifasi nanga denwan di no ben abi en so boen, so leki weduwe, pikin di no ben abi papa nanga mama, nanga den pôtiwan (Exodus 22:22-27; Lefitikus 19:9, 10; Deuteronomium 15:7-11). Ala sma, so srefi den srafoe nanga den meti ben moesoe kisi wini foe a rostoe foe na alawiki Sabatdei (Exodus 20:10). Na tapoe foe dati, Gado ben poti en prakseri na tapoe ibri sma di ben handri na wan safoe fasi nanga den mendriwan. Odo 19:17 e taki: „En di e sori boen-ati na den mendriwan e leni Jehovah èn A sa pai en gi den sani di a doe.”
A sori di Gado e sori sari-ati, skotoe
6. Foe san ede Jehovah ben seni profeiti nanga boskopoeman go na a pipel foe en?
6 Den Israèlsma ben tjari a nen foe Gado èn den ben anbegi en na a tempel foe Jerusalem, di ben de „wan oso gi a nen foe Jehovah” (2 Kroniki 2:4; 6:33). Ma baka ten, den ben gi pasi taki hoeroedoe, na anbegi foe kroektoe gado, nanga a kiri foe sma, ben e tjari bigi sjen kon na tapoe a nen foe Jehovah. Akroederi en sari-ati persoonlijkheid, Gado ben proeberi nanga pasensi foe poti a takroe situwâsi disi kon reti sondro foe tjari rampoe kon na tapoe a heri nâsi. „Ala tron baka, [a] ben tan seni [warskow] gi den nanga jepi foe den boskopoeman foe en, foe di a ben firi sari-ati gi en pipel èn gi en tanpresi. Ma ala ten baka den ben e tan dreigi den boskopoeman foe a troe Gado èn den ben wisiwasi den wortoe foe en èn den ben spotoe den profeiti foe en, te leki na atibron foe Jehovah kon na den tapoe, te leki den no ben man kon betre moro.” — 2 Kroniki 36:15, 16.
7. San ben pasa nanga a kownoekondre Juda, di a sari-ati foe Jehovah ben doro a skotoe foe en?
7 Ala di Jehovah abi sari-atifasi èn a no e atibron esi-esi, tokoe, te a de fanowdoe, a e sori atibron di de regtfardiki. Ini a ten dati, a sari-ati foe Gado ben doro en skotoe. Wi e leisi san ben de den bakapisi: „So boen, [Jehovah] ben meki a kownoe foe den Kaldewsma kon feti nanga den, èn a ben bigin kiri den jongoeman foe den nanga a feti-owroe ini na oso foe a santa presi foe den èn a no ben firi sari-ati toe gi den jongoeman noso njoenwenke, den owroewan, noso denwan di no kan doe noti moro. Ala sani A ben gi na ini na anoe foe en” (2 Kroniki 36:17). So boen, Jerusalem nanga a tempel foe en ben kisi pori, èn den ben teki a nâsi ini katibo go na Babilon.
Sari-ati gi a nen foe En
8, 9. (a) Foe san ede Jehovah ben froeklari taki a ben sa abi sari-ati gi a nen foe en? (b) Fa den feanti foe Jehovah ben moesoe tapoe den mofo?
8 Den nâsi di ben de lontoe den ben prisiri nanga a rampoe disi. Na wan spotoe fasi den ben taki: „Den disi na a pipel foe Jehovah, èn na foe a kondre foe en den ben gowe.” Foe di Jehovah ben firi a sjen disi, meki a ben froeklari: „Mi sa abi sari-ati gi mi santa nen . . . Èn troetroe mi sa santa mi bigi nen, . . . èn den nâsi sa moesoe sabi taki mi na Jehovah.” — Esekièl 36:20-23.
9 Baka di a nâsi foe en ben de ini katibo 70 jari langa, Jehovah, a Gado di abi sari-atifasi, ben fri den èn ben gi den na okasi foe drai go baka èn foe bow a tempel baka na Jerusalem. Disi ben tapoe a mofo foe den nâsi di ben de lontoe den, èn den ben e loekoe nanga froewondroe (Esekièl 36:35, 36). Ma a de wan sari sani, taki a nâsi Israèl ben go doe takroedoe baka. Nehemia, wan getrow djoe, ben jepi foe meki a situwâsi kon reti baka. Ini wan poebliki begi a ben loekoe den fasi baka fa Gado ben handri na wan sari-atifasi nanga a nâsi, di a ben taki:
10. Fa Nehemia ben poti krakti na tapoe a sari-ati foe Jehovah?
10 „Ini a ten foe a banawtoe foe den, den ben sa kari joe, èn joesrefi ben sa jere komoto na hemel srefi; èn akroederi joe sari-ati di pasa marki, joe ben sa gi den froeloesoeman di ben sa froeloesoe den foe na anoe foe den gensman foe den. Ma so esi leki den ben rostoe, agen den ben sa doe san takroe na joe fesi, èn joe ben sa libi den na ini na anoe foe den feanti foe den, di ben sa trapoe na den tapoe. Dan den ben sa drai kon baka èn ben sa kari joe foe kisi jepi, èn joesrefi ben sa jere komoto na hemel srefi èn froeloesoe den akroederi joe sari-ati di pasa marki, ibri tron baka. . . . Foeroe jari joe ben abi langa pasensi nanga den.” — Nehemia 9:26-30; loekoe toe Jesaja 63:9, 10.
11. Sortoe difrenti de na mindri Jehovah nanga den gado foe libisma?
11 Te foe kaba, baka di a djoe nâsi ben weigri na wan ogri-atifasi foe erken a lobi Manpikin foe Gado, den lasi a posisi foe den di ben de wan grani, foe têgo. A loyaal tranga lobi di Gado ben abi gi den, ben tan moro leki 1500 jari. A de wan kotoigi foe ala ten taki Jehovah troetroe na wan Gado di abi sari-ati. Fa disi de krinkrin tra fasi leki den ogri-ati gado nanga den gado di no abi firi, di sondoe libisma ben meki! — Loekoe bladzijde 3.
A moro bigi fasi foe sori sari-ati
12. San ben de a moro bigi fasi fa Gado ben sori sari-ati?
12 A moro bigi fasi fa Gado ben sori sari-ati, ben de di a ben seni en lobi Manpikin go na grontapoe. A de troe taki a libi di Jesus ben libi na wan soifri retifasi, ben tjari bigi prisiri kon gi Jehovah, èn disi ben e gi en wan volmaakti piki tapoe den falsi kragi foe Didibri (Odo 27:11). Ma na a srefi ten, a loekoe di Jehovah ben e loekoe fa en lobi Manpikin ben pina foe wan ogri-ati nanga sjen dede, sondro tweifri ben meki en firi moro pen leki iniwan libisma papa noso mama oiti ben abi foe tjari. A ben de wan toemoesi lobi ofrandi, di opo a pasi foe froeloesoe a libisma famiri (Johanes 3:16). Neleki fa Sakaria, a papa foe Johanes a Dopoeman, ben taki na fesi, dan a ben meki „a safoe sari-ati foe wi Gado” kon moro bigi. — Lukas 1:77, 78.
13. Na sortoe prenspari fasi Jesus ben prenki a persoonlijkheid foe en Tata?
13 A seni di Gado ben seni en Manpikin kon na grontapoe, ben gi a libisma famiri wan moro krin fasi toe foe si a persoonlijkheid foe Jehovah. Fa so? Na a fasi disi, taki Jesus ben prenki a persoonlijkheid foe en Tata na wan volmaakti fasi, spesroetoe a safoe sari-atifasi fa a ben handri nanga den mendriwan! (Johanes 1:14; 14:9) Ini a tori disi, den dri Evangelie skrifiman Mateus, Markus nanga Lukas e gebroiki wan Griki werkwortoe, splan·chniʹzo·mai, di e kon foe a Griki wortoe gi „inibere”. „Wi kan si foe a wortoe foe san den teki en, taki a no wani taki wan gewoon firi foe sari noso sari-ati, ma wan firi di e boeweigi wan sma te na ini a moro dipi inisei foe ensrefi”, na so bijbel sabiman William Barclay e froeklari. „A de a moro tranga wortoe ini Grikitongo gi a firi foe sari-ati.” Den e vertaal en na difrenti fasi leki „firi sari” noso „sari ben boeweigi en”. — Markus 6:34; 8:2.
Te Jesus ben firi sari
14, 15. Fa a doe kon taki sari ben boeweigi Jesus di a ben de ini wan foto foe Galilea, èn san disi e sori?
14 A presi na wan foto foe Galilea. Wan man di „lai nanga gwasi” e waka kon miti Jesus sondro foe gi en a warskow di gwasiman gwenti foe gi (Lukas 5:12). A de so, taki Jesus e piri-ai gi a man na wan grofoe fasi, foe di a man no bari tranga: „No krin, no krin”, so leki fa a wet foe Gado ben aksi dati? (Lefitikus 13:45) Nôno. Na presi foe dati, Jesus e arki na a tranga begi foe a man, di e sori taki a ben lasi ala howpoe: „Efoe joe wani nomo, joe kan meki mi kon krin.” Foe di „sari e boeweigi” Jesus, meki a e langa en anoe èn e fasi a gwasiman, ala di a e taki: „Mi wani. Kon krin.” Wantewante a man e kisi en gosontoe baka. Na so wan fasi Jesus no e sori wawan den wondroe krakti di a kisi foe Gado, ma so srefi den safoe firi di e boeweigi en foe gebroiki den sortoe krakti disi. — Markus 1:40-42.
15 Wan sma moesoe waka go miti Jesus fosi, bifo Jesus sa sori firi foe sari-ati? Nôno. Wan pisi ten na baka, a e kon miti wan beri di e kon foe a foto Na-in. A no de foe tweifri, taki Jesus si foeroe beri bifo, ma disi na wan di e gi spesroetoe sari. A sma di dede na a wan-enkri manpikin foe wan weduwe. Foe di „sari e boeweigi” Jesus, meki a e waka go miti a weduwe èn a e taki: „No krei moro.” Dan a e doe wan toemoesi aparti wondroe foe di a e opo a manpikin foe a weduwe baka na libi. — Lukas 7:11-15.
16. Foe san ede Jesus e firi sari gi a bigi ipi sma di e waka na en baka?
16 A toemoesi moi lès di wi ben leri foe den sani di pasa, di skrifi na tapoesei, na taki te „sari ben boeweigi” Jesus, a e doe wan boen sani foe jepi sma. Na wan tra okasi, Jesus e ondrosoekoe den bigi ipi sma di e tan waka na en baka. Mateus e skrifi taki „a ben firi sari gi den, bika sma ben pina den èn ben panja den leki skapoe sondro wan skapoeman” (Mateus 9:36). Den Fariseiman no e doe foeroe foe satisferi a jeje angri foe a gewoon pipel. Na presi foe dati, den ben poti hebi lai na tapoe den swakiwan nanga den foeroe wet foe den di no de fanowdoe (Mateus 12:1, 2; 15:1-9; 23:4, 23). A fasi fa den ben si a gewoon pipel ben kon na krin di den ben taki foe denwan di ben arki Jesus: „Na ipi sma disi di no sabi a Wet, froefroektoe den de.” — Johanes 7:49.
17. Fa a sari di Jesus ben abi gi den ipi sma boeweigi en, èn sortoe tiri di de gi wan langa ten, a ben gi drape?
17 Kontrari foe dati, a takroe kondisi pe den ipi sma de na jejefasi ben naki na ati foe Jesus srefisrefi. Ma toemoesi foeroe sma de di abi belangstelling gi a Kownoekondre boskopoe, foe Jesus gi den persoonlijk sorgoe. So boen, a e taigi den disipel foe en foe den begi foe moro wrokoman (Mateus 9:35-38). Akroederi den sortoe begi disi, dan Jesus e seni den apostel foe en gowe nanga a boskopoe: „A kownoekondre foe hemel kon krosibei.” Den leri di a ben gi na a okasi dati, de leki wan warti tiri gi kresten te na ini a ten disi. Sondro tweifri, den sari-ati firi foe Jesus boeweigi en foe satisferi a jeje angri foe a libisma famiri. — Mateus 10:5-7.
18. Fa Jesus e handri te ipi sma e kon na en, ala di a wani de en wawan, èn sortoe lès wi e leri foe disi?
18 Na wan tra okasi, agen Jesus abi broko-ede gi den jeje nowtoe foe den ipi sma. A leisi disi, en nanga den apostel foe en weri, baka di den ben abi wan druk preiki waka, èn den e soekoe wan presi foe go rostoe. Ma no langa na baka, a pipel feni den. Na presi foe Jesus atibron taki den ipi sma kon na den, ala di den ben wani de den wawan, Markus e skrifi taki „sari ben boeweigi” Jesus. Èn san ben de a reide foe den dipi firi disi foe Jesus? „Den ben de leki skapoe sondro wan skapoeman.” Agen Jesus e sori den firi foe en, foe di a e doe wan sani èn a e bigin leri den ipi sma „foe a kownoekondre foe Gado”. Ija, a jeje angri foe den ben naki na ati foe en srefisrefi, taki a ben òfer a rostoe di a ben abi fanowdoe, so taki a ben kan gi den leri. — Markus 6:34; Lukas 9:11.
19. Fa a broko di Jesus ben broko en ede nanga den ipi sma ben go moro fara srefi leki den jeje nowtoe foe den?
19 Ala di a ben broko en ede na a fosi presi nanga den jeje nowtoe foe sma, tokoe noiti Jesus no ben frigiti den moro prenspari sani di den ben abi fanowdoe na skin fasi. Na a srefi okasi dati, so srefi a ben „dresi denwan di abi dati fanowdoe” (Lukas 9:11). Baka dati, na wan tra okasi, den ipi sma ben de nanga en wan langa ten kaba èn den ben de fara foe oso. Foe di Jesus ben froestan san den abi fanowdoe na skin fasi, meki a ben taigi den disipel foe en: „Mi e sari na ipi sma, bika dri dei kaba den tan nanga mi èn den no abi noti foe njan; èn mi no wani seni den gowe sondro den njan wan sani fosi. Kande den sa flaw na pasi” (Mateus 15:32). Now Jesus e doe wan sani foe tapoe a pina di kande den ben sa pina. Na wan wondroe fasi a e gi doesoendoesoen mansma, oemasma, nanga pikin-nengre njanjan di meki foe seibi brede nanga wan toe pikin fisi.
20. San wi e leri foe a lasti kefal di skrifi foe a boeweigi di sari ben boeweigi Jesus?
20 A lasti kefal di skrifi foe a boeweigi di sari ben boeweigi Jesus, de na a lasti waka foe en go na Jerusalem. Bigi ipi sma e waka nanga en foe hori a Paska. Na tapoe a pasi krosibei foe Jerikow, toe breni begiman e tan bari tranga: „Masra, abi sari-ati nanga wi.” Den ipi sma e proeberi foe meki den tapoe den mofo, ma Jesus e kari den kon èn a e aksi den san den wani meki a doe. „Masra, meki den ai foe wi opo”, den e begi tranga. Foe di „sari e boeweigi” Jesus, meki a e fasi den ai foe den, èn den kon si baka (Mateus 20:29-34). Fa disi na wan prenspari lès di wi e leri! Jesus de foe doro a lasti wiki foe en diniwroko na grontapoe. A abi wan lo wroko foe doe bifo a sa pina foe wan takroe dede na den anoe foe den wrokoman foe Satan. Tokoe a no e meki a kwinsi foe a serjoesoe ten disi tapoe en foe sori den safoe firi foe sari-ati foe en gi den nowtoe foe libisma, di no de so prenspari.
Agersitori di e poti krakti na tapoe sari-ati
21. San a fri di a masra ben fri a srafoe foe en foe a bigi paiman di a ben abi, e prenki?
21 A Griki werkwortoe splan·chniʹzo·mai, di den gebroiki ini den verslag disi foe a libi foe Jesus, den gebroiki so srefi ini dri foe den agersitori foe Jesus. Na ini wan foe den tori, wan srafoe ben begi foe kisi moro ten foe pai wan bigi paiman baka. Foe di „sari e boeweigi” a masra foe en, meki a masra e fri en foe a paiman. Na agersitori disi e sori taki Jehovah Gado sori foeroe sari-ati, foe di a e fri ibri kresten persoonlijk di abi bribi ini a froeloesoe-ofrandi foe Jesus, foe wan bigi paiman foe sondoe. — Mateus 18:27; 20:28.
22. San a tori foe a manpikin di ben lasi, e prenki?
22 Dan joe abi a tori foe a manpikin di ben lasi. Prakseri baka san e pasa te a tranga-ede manpikin drai go baka na oso. „Ala di a ben de farawe ete, en papa ben si en èn sari ben boeweigi en, èn a ben lon go na en èn ben brasa en èn ben bosi en na wan safoe fasi” (Lukas 15:20). Disi e sori taki te wan kresten di kon tranga-ede, e sori troetroe berow, dan Jehovah sa firi sari gi en èn na wan safoe fasi a sa teki a sma dati baka. So boen, nanga jepi foe den toe agersitori disi Jesus e sori taki wi Tata, Jehovah, „safoe srefisrefi na ini firi foe lobi èn a abi sari-atifasi”. — Jakobus 5:11, foetoewortoe.
23. Sortoe lès wi e leri foe na agersitori foe Jesus foe a Samariaman di ben doe boen gi sma na en sei?
23 A di foe dri fasi fa den e gebroiki splan·chniʹzo·mai na wan agersifasi, abi foe doe nanga wan Samariaman di ben abi sari-atifasi èn di „sari ben boeweigi” en di a ben si a takroe situwâsi foe wan djoe di sma ben ròs èn di den ben libi na baka pikinmoro leki wan dede sma (Lukas 10:33). Foe di a Samariaman ben doe wan sani na tapoe den firi disi, meki a ben doe ala san a ben man foe jepi a freimde man. Disi e sori taki Jehovah nanga Jesus e froewakti foe troe kresten taki den e waka na baka na eksempre foe den, foe sori safoe firi nanga sari-ati. Na ini na artikel di e kon now, wi sa taki makandra foe wan toe foe den fasi fa wi kan doe disi.
Aksi foe loekoe sani sjatoe baka
◻ San a wani taki foe abi sari-atifasi?
◻ Fa Jehovah ben sori sari-ati gi a nen foe en?
◻ San na a moro bigi fasi fa Gado ben sori sari-ati?
◻ Na tapoe sortoe aparti fasi Jesus e prenki a persoonlijkheid foe en Tata?
◻ San wi e leri foe den fasi fa Jesus ben handri nanga sari-atifasi, èn foe den agersitori foe en?
[Faki na tapoe bladzijde 8, 9]
WAN LIBILIBI FASI FOE TAKI FOE „SORGOE GI SMA NA WAN SAFOE LOBIFASI”
„O MI inibere, mi inibere!”, na so a profeiti Jeremia ben bari. A ben kragi foe wan siki na a inibere foe en, foe di a ben njan wan takroe sani? Nôno. Na wan agersifasi Jeremia ben e gebroiki wan Hebrew wortoe foe sori a broko di a ben broko en ede srefisrefi nanga a rampoe di ben sa kon na tapoe a kownoekondre Juda. — Jeremia 4:19.
Foe di Jehovah Gado abi dipi firi, den e gebroiki a Hebrew wortoe gi „inibere” (me·ʽimʹ) toe foe taki finifini foe den safoe firi foe en. Foe eksempre, someni tenti-jari bifo a ten foe Jeremia, a kownoe foe Asiria ben teki a tin-lo kownoekondre Israèl leki strafoeman. Jehovah ben gi pasi taki den kisi a strafoe disi, foe di den no ben de getrow. Ma Gado ben frigiti den na ini katibo? Nôno. A ben lobi den troetroe ete leki wan pisi foe a pipel di a ben abi wan froebontoe nanga den. Di Jehovah ben sori go na den nanga jepi foe a prenspari lo Efraim, a ben aksi: „Efraim de wan warti manpikin gi mi, noso wan pikin di sma e boboi? Bikasi na a fasi fa mi e taki kontrari en, na so mi sa memre en sondro misi. Dati meki mi inibere kon troeboe foe en ede. Mi sa abi sari-ati gi en foe troe.” — Jeremia 31:20.
Di Jehovah ben e taki „mi inibere kon troeboe”, a ben e taki na wan agersifasi foe froeteri finifini foe en dipi firi foe lobi gi a pipel foe en di ben de na ini katibo. E. Henderson, wan bijbel sabiman foe a di foe tin na neigi jarihondro, ben skrifi ini a komentaar foe en tapoe a tekst disi: „Noti no kan pasa a safoe firi di wan papa nanga mama abi gi wan pikin foe den di ben lasi èn di drai kon baka, di Jehovah e sori djaso. . . . Ala di na so wan fasi a ben taki kontrari [den Efraimsma di ben anbegi kroektoe gado] èn a ben strafoe den . . . , tokoe noiti a no ben frigiti den, ma na presi foe dati, a ben prisiri ini a froewakti di a ben froewakti taki, te foe kaba, den ben sa kon reti baka.”
Den gebroiki a Griki wortoe gi „inibere” na wan srefi fasi ini den kresten Griki Boekoe foe bijbel. Te den e gebroiki en na wan agersifasi, so leki na Tori foe den Apostel 1:18, dan a e sori tapoe safoe firi foe lobi noso sari-ati (Fileimon 12). Sontron den e tai a wortoe makandra nanga a Griki wortoe di wani taki „boen”. Den apostel Paulus nanga Petrus e gebroiki den wortoe makandra, te den e gi den kresten deki-ati foe abi „safoe sari-atifasi”, san wani taki troetroe „wani srefisrefi foe sori sari” (Efeisesma 4:32; 1 Petrus 3:8). A Griki wortoe gi „inibere” kan tai makandra toe nanga a Griki wortoe pol·yʹ. Te den e gebroiki den wortoe disi makandra, dan a wani taki troetroe „foe abi foeroe inibere”. Den wortoe disi, di pikinmoro noiti den gebroiki, den gebroiki wán leisi nomo ini bijbel, èn a e sori go na Jehovah Gado. A Nieuwe-Wereldvertaling e vertaal en na a fasi disi: „Jehovah safoe srefisrefi na ini firi foe lobi.” — Jakobus 5:11.
Wi ati moesoe firi tangi srefisrefi, taki a moro makti sma ini na universum, Jehovah Gado, de heri tra fasi leki den ogri-ati gado di sma, di no abi sari-atifasi meki! Foe di troe kresten e waka na baka a „safoe sari-atifasi” Gado foe den, meki na ati foe den e boeweigi den foe handri na a srefi fasi leki en te den abi foe doe nanga makandra. — Efeisesma 5:1.
[Prenki na tapoe bladzijde 5]
Di a sari-ati foe Gado ben doro en skotoe, dan Jehovah ben gi den Babilonsma na okasi foe wini a tranga-ede pipel foe en
[Prenki na tapoe bladzijde 6]
A loekoe di Jehovah Gado ben moesoe loekoe fa en lobi Manpikin ben dede, ben moesoe meki en firi a moro hebi pen di iniwan sma ben firi wan ten
[Prenki na tapoe bladzijde 10]
Na wan volmaakti fasi Jesus ben prenki a persoonlijkheid foe en Tata di abi sari-ati