Wan brifi fu a Tiri Skin

Gi ala lobi Kownukondre preikiman:

Prakseri taki yu na wan fu den apostel di de na tapu Olèif-bergi. Yesus e tnapu na yu fesi. Leti fosi a e opo go na hemel, a e taki: „Unu o kisi krakti te a santa yeye kon na un tapu èn unu o de kotoigi fu mi na ini Yerusalem, na ini heri Yudea nanga Samaria èn te na den moro farawe presi fu grontapu” (Tori 1:8). San yu ben o du?

Kande yu ben o denki taki yu no ben o man du so wan bigi wroko. A kan taki yu ben o aksi yusrefi: ’Fa wi leki wan pkin grupu disipel o man preiki „te na den moro farawe presi fu grontapu”?’ Kande yu ben o memre a warskow di Yesus gi a neti fosi a dede. A ben taki: „Wan srafu no bigi moro en masra. Efu den frufolgu mi, dan den o frufolgu unu tu. Efu den du san mi taki, dan den o du tu san unu taki. Ma na fu di unu na mi disipel, meki den o du ala den sani disi nanga unu, fu di den no sabi a sma di seni mi kon” (Yoh. 15:20, 21). Te yu ben o prakseri den wortu dati, dan a kan taki yu ben o aksi yusrefi: ’Fa mi kan preiki finfini efu sma o gens mi èn o ferfolgu mi?’

Wi na ini a ten disi kan abi den srefi sortu aksi disi. A wroko di Gado gi wi leki Yehovah Kotoigi wani taki tu dati wi musu preiki finfini „te na den moro farawe presi fu grontapu” èn na „sma fu ala kondre” (Mat. 28:19, 20). Fa wi kan du a wroko disi, spesrutu te wi e hori na prakseri taki Yesus ben taki na fesi taki sma ben o gens wi?

Na ini Tori fu den apostel wi kan leisi wan span tori di e sori wi fa Yehovah ben e yepi den apostel nanga den fosi yarihondro Kresten brada nanga sisa fu den fu man du a wroko di den ben kisi. A buku di yu e leisi now meki fu yepi yu fu ondrosuku Tori fu den apostel èn fu meki yu firi neleki yu ben de drape di den span tori disi ben e psa. Yu o ferwondru fu si taki furu fu den sani di psa nanga den futuboi fu Gado na ini a fosi yarihondro, e psa tu nanga Gado en pipel na ini a ten disi. Yu o si taki den sani disi no abi fu du nomo nanga a preikiwroko di wi e du, ma sosrefi nanga a fasi fa wi orga fu du a wroko dati. Te yu e kon si taki den Kresten fu a fosi yarihondro ben e du densrefi sortu sani leki wi, dan a no abi misi taki a o tranga a bribi di yu abi taki Yehovah Gado o tan tiri a pisi fu en organisâsi na grontapu.

Wi e howpu èn e begi taki te yu e ondrosuku Tori fu den apostel, dan dati o gi yu moro fertrow taki Yehovah o horbaka gi yu èn taki a krakti fu en santa yeye o yepi yu. Meki a de so taki disi e gi yu dek’ati fu tan „preiki finfini” fu Gado Kownukondre èn fu yepi trawan fu kisi ferlusu tu.​—Tori 28:23; 1 Tim. 4:16.