Abi a fasti bosroiti fu gi kotoigi dorodoro
’A taigi wi fu preiki gi a pipel èn fu kotoigi finifini gi den.’—TORI. 10:42.
1. Fu sortu wroko Petrus ben taki di a ben de na Kornelius?
A LEGRE OFSIRI fu Italiakondre ben kari den famiriman nanga den mati fu en kon na wán. A sani di pasa na a okasi dati ben sori taki Gado ben o handri heri tra fasi nanga libisma. A legre ofsiri dati di ben e bribi na ini Gado, ben nen Kornelius. Na apostel Petrus ben taigi den sma drape taki den apostel ben kisi a komando „fu preiki gi a pipel èn fu kotoigi finifini gi den” fu Yesus. A preikiwroko fu Petrus ben abi bun bakapisi trutru. Sma di no ben de Dyu èn di no ben besnèi, ben kisi a yeye fu Gado èn den teki dopu. Boiti dati, den kisi a grani fu tiri leki kownu na hemel makandra nanga Yesus. A preikiwroko fu Petrus ben abi bun bakapisi fu tru!—Tori. 10:22, 34-48.
2. Fa wi du sabi taki a komando di Yesus ben gi fu gi kotoigi, no ben de gi den 12 apostel wawan?
2 A sani disi pasa na ini a yari 36. Sowan tu yari na fesi, wan man di ben e frufolgu den Kresten fayafaya ben ondrofeni wan sani di kenki a libi fu en. Saulus fu Tarsus ben de na pasi e go na Damaskus, di Yesus sori ensrefi na en, èn a taigi en: „Opo go na ini a foto, èn wan sma sa fruteri yu san yu musu du.” Yesus ben gi a disipel Ananias a dyaranti taki Saulus ben o gi kotoigi „na den trakondre sma, den kownu, èn den manpikin fu Israel”. (Leisi Tori fu den Apostel 9:3-6, 13-20.) Di Ananias ben de nanga Saulus, a taigi en: ’A Gado fu wi afo teki yu, bika yu musu de wan kotoigi fu en gi ala sma’ (Tori. 22:12-16). Fa Saulus, di sma kon sabi bakaten leki Paulus, ben si a wroko di a ben kisi fu gi kotoigi?
A gi kotoigi dorodoro!
3. (a) Na sortu tori wi sa poti prakseri? (b) San den owruman fu Efeise du di den kisi a boskopu fu Paulus, èn san wi e leri fu a sani dati?
3 A ben o moi fu ondrosuku finifini san Paulus du baka di a kisi a komando dati. Ma meki wi poti prakseri fosi na wan taki di Paulus ben hori na a ten fu a yari 56. Wi kan leisi dati na ini Tori fu den Apostel kapitel 20. Paulus ben hori a taki disi na a kaba fu a di fu dri zendelingwaka fu en. Di a ben doro na Mileite, wan lanpe na a syoro fu na Egeus Se, dan a seni kari den owruman fu a gemeente na Efeise. A foto Efeise ben de sowan 50 kilometer moro fara fu Mileite, ma fu di den pasi fu go drape ben lai nanga boktu, meki a ben e teki moro langa fu doro drape. Yu kan frustan fa den owruman fu Efeise ben breiti di den kisi a boskopu fu Paulus. (Luku Odo 10:28.) Ma den ben o abi fu seti sani fu go na Mileite. Kande sonwan fu den ben musu teki fri wan tu dei, noso kande den ben musu tapu den wenkri fu den. Furu Kresten na ini a ten disi du disi tu fu di den no wani misi nowan enkri dei fu a distrikt kongres di e hori ibri yari.
4. San Paulus du di a ben de na Efeise wan tu yari?
4 San yu denki taki Paulus du na ini Mileite, na ini den dri noso fo dei fosi den owruman doro na en? San yu ben o du? (Luku Tori fu den Apostel 17:16, 17.) Den sani di Paulus taigi den owruman fu Efeise e yepi wi fu kon sabi pikinso san a du na ini a pisi ten dati. A taki fa a du a preikiwroko na ini den yari di pasa, sosrefi na ini a ten di a ben de na Efeise. (Leisi Tori fu den Apostel 20:18-21.) Nanga wan fasti overtoigi a ben taki: ’Unu sabi heri bun taki fu sensi a fosi dei di mi poti futu na ini a distrikt Asia mi gi kotoigi finifini.’ Iya, Paulus ben abi a fasti bosroiti fu du a wroko di Yesus ben gi en. Fa a du a wroko dati na ini Efeise? Wan fasi fa a du dati, na taki a preiki gi den Dyu èn a go na presi pe a ben o miti furu fu den. Lukas skrifi taki di Paulus ben de na Efeise, na a ten fu a yari 52 te go miti a yari 55, dan a ’hori taki gi den sma na ini a snoga fu pruberi fu overtoigi den’. Fu di den Dyu ’ben trangayesi, èn fu di den no ben wani bribi’, meki Paulus go preiki gi tra sma. A go na tra presi na ini a foto èn a tan preiki. Na so a gi kotoigi na den Dyu èn na den Grikisma na ini a bigi foto dati.—Tori. 19:1, 8, 9.
5, 6. Fu san ede wi kan bribi taki Paulus ben e preiki oso fu oso gi sma di no ben de na bribi?
5 Te fu kaba, sonwan fu den sma di ben tron Kresten, tron owruman, èn Paulus ben taki nanga den na Mileite. Paulus memre den na sortu fasi a ben du a preikiwroko. A ben taigi den: ’Mi no tapu fu fruteri unu ala bun sani, èn mi gi unu leri na fesi fu ala sma èn sosrefi na sma oso.’ Son sma na ini a ten disi, feni taki Paulus ben e taki fu a wroko di a ben e du leki owruman fu go luku den Kresten brada nanga sisa fu en. Ma dati no de so. Den wortu ’gi leri na fesi ala sma èn na sma oso’, nofo tron abi fu du nanga a preiki di sma e preiki gi sma di no de na bribi. Wi kan si dati krin te wi e luku san Paulus e taki moro fara. A ben taki dati a ben fruteri ’den Dyu nanga Grikisma finifini taki den musu sori Gado taki den abi berow, èn taki den musu bribi na ini wi Masra Yesus’. A de krin taki Paulus ben gi kotoigi na sma di no ben de na bribi. Den sma disi ben musu sori taki den abi berow, èn den ben musu poti bribi na ini Yesus.—Tori. 20:20, 21.
6 Wan sabiman di ondrosuku den Kresten Griki Buku fu Bijbel finifini, taki disi fu Tori fu den Apostel 20:20: „Paulus tan dri yari na Efeise. A go na ibri oso, noso wi kan taki dati a preiki gi ala den sma drape (vers 26). A sani disi e sori wi krin taki na oso-fu-oso preikiwroko èn a leri di wi e kisi na den konmakandra, na sani di e kruderi nanga Bijbel.” Awinsi a de so taki Paulus ben e go na ibri oso, soleki fa a sabiman disi taki, noso awinsi a no ben du dati, toku wi sabi taki Paulus no ben wani taki den owruman fu Efeise frigiti fa a ben du a preikiwroko èn san ben de a bakapisi fu dati. Lukas skrifi: „Ala den sma di ben tan na ini a distrikt Asia, namku Dyu nanga Grikisma, kon yere a wortu fu Masra” (Tori. 19:10). Ma fa „ala den sma” na ini Asia ben kan yere a bun nyunsu, èn san disi e leri wi fu a preikiwroko di wi e du?
7. Fa a preikiwroko di Paulus du ben abi krakti sosrefi tapu tra sma di ensrefi no ben gi kotoigi?
7 Fu di Paulus ben e preiki na publiki presi èn sosrefi oso fu oso, meki furu sma kon yere a boskopu fu en. Yu denki taki ala den sma di ben yere a boskopu dati ben tan na ini Efeise? Yu denki taki nowan fu den no go na wan tra presi fu go du bisnis, fu go luku famiriman, noso fu go libi na wan moro tiri presi? Dati no de so. Na ini a ten disi, furu sma froisi go na tra presi fu den srefi reide dati. Kande yusrefi du dati. Na a ten dati, a ben de so tu taki sma fu tra presi ben e kon na Efeise fu kon miti tra sma, noso fu kon du bisnis. A kan taki den miti nanga Paulus drape, noso kande a ben gi den kotoigi. San ben o pasa te den sma disi ben drai go baka na oso? Den wan di ben teki a tru bribi ben o gi kotoigi na tra sma. Kande son sma no ben tron bribiman, ma a kan taki den fruteri trawan den sani di den ben yere na ini Efeise. Kande na a fasi dati famiriman, birtisma, noso klanti ben kon sabi a tru bribi, èn kande sonwan fu den teki a bribi disi. (Luku Markus 5:14.) Sobun, san kan de a bakapisi te yu e gi kotoigi dorodoro?
8. Fa den sma na ini a distrikt Asia ben kon yere a bun nyunsu?
8 Paulus ben skrifi taki di a ben de na ini Efeise, dan wan ’bigi doro ben opo gi en fu go wroko’ (1 Kor. 16:8, 9). Sortu doro na dati èn fa a ben kon opo gi en? Fu di Paulus tan du a preikiwroko na ini Efeise, meki furu sma kon yere a bun nyunsu. Luku fa sani waka na ini Kolose, Laodisea, nanga Hièrapolis, dri foto di ben de moro fara fu Efeise. Paulus noiti no go na den foto dati, ma toku a bun nyunsu doro drape. Epafras ben de fu a kontren dati (Kol. 2:1; 4:12, 13). A de so taki Epafras ben tron wan Kresten, baka di a ben yere a boskopu fu Paulus di ben preiki na ini Efeise? Bijbel no e taki dati. Ma a kan taki Epafras ben teki presi gi Paulus di a preiki a bun nyunsu na ini a kontren pe a ben e tan (Kol. 1:7). A kan de so tu taki den sma na ini den foto Filadelfia, Sardes, nanga Tiatira, kon yere a boskopu na ini den yari di Paulus ben e preiki na ini Efeise.
9. (a) San Paulus ben e angri fu du? (b) San na a yaritekst fu 2009?
9 Dati meki den owruman fu Efeise ben abi ala reide fu bribi a sani disi di Paulus ben taki: „Mi libi no prenspari srefisrefi gi mi, solanga mi kan lon a streilon te na a kaba, èn solanga mi kan klari a diniwroko di Masra Yesus gi mi fu du, namku fu gi kotoigi dorodoro fu a bun nyunsu di e fruteri wi fa Gado e sori sma no-frudini bun-ati.” A yaritekst fu 2009 teki puru fu a vers disi, èn a e taki: „Gi kotoigi dorodoro fu a bun nyunsu.” A no de fu taki dati a tekst disi e gi wi deki-ati fu preiki a bun nyunsu.—Tori. 20:24.
Wi e gi kotoigi dorodoro na ini a ten disi
10. Fa wi du sabi taki wi musu gi kotoigi finifini?
10 Te fu kaba, a komando di Yesus ben gi „fu preiki gi a pipel èn fu kotoigi finifini gi den”, no ben de gi den apostel wawan, ma a ben de sosrefi gi tra Kresten. Baka di Yesus ben kisi wan opobaka, dan a taki nanga sowan 500 disipel di ben kon makandra na ini Galilea. A ben gi den a komando disi: „Fu dati ede, go na sma fu ala kondre èn meki den tron disipel, èn dopu den na ini a nen fu a Tata, fu a Manpikin, èn fu a santa yeye. Leri den fu du ala san mi komanderi unu.” A komando dati na gi ala tru Kresten na ini a ten disi, soleki fa den wortu fu Yesus e sori. Yesus ben taki: „Unu o si taki mi sa de nanga unu ala dei te na a kaba fu a grontapu sistema.”—Mat. 28:19, 20.
11. Sortu prenspari wroko Yehovah Kotoigi e du, soleki fa furu sma sabi?
11 Kresten di e preiki fayafaya, e tan gi yesi na a komando di den kisi „fu gi kotoigi dorodoro fu a bun nyunsu”. Dati meki den e preiki oso fu oso, soleki fa Paulus ben fruteri den owruman fu Efeise. Dati na wan prenspari fasi fa den Kresten na ini a ten disi e meki a bun nyunsu bekènti. David G. Stewart, Jr., ben skrifi wan buku di e taki fu zendelingwroko di abi bun bakapisi. Na ini a buku dati, di kon na doro na ini 2007, a e taki: „A fasi fa Yehovah Kotoigi e leri sma fu fruteri trawan fu a bribi fu den, e tyari moro bun bakapisi kon leki te sma e kisi leri na kerki. Furu Yehovah Kotoigi lobi fu fruteri trawan fu a bribi fu den.” San na a bakapisi? A man disi e taki moro fara: „Na ini 1999, mi taki nanga sma fu tu bigi foto na ini Owstu Europa. Fu ala den sma disi, sowan 2 te go miti 4 procent nomo taki dati den zendeling fu a Mormoon kerki kon preiki gi den. Moro leki 70 procent fu den sma taki dati Yehovah Kotoigi kon preiki gi den, èn nofo tron dati pasa furu leisi.”
12. (a) Fu san ede wi e go preiki „furu leisi” gi sma di e libi na ini a kontren fu wi? (b) Fruteri wan ondrofenitori fu wan sma di no ben wani arki a boskopu fosi, ma di kenki bakaten.
12 Kande den sma na ini a birti fu yu ondrofeni a srefi sani disi. Kande yusrefi yepi fu meki dati pasa. Na ini na oso-fu-oso preikiwroko yu taki nanga mansma, umasma, èn nanga yonguwan. A kan taki sonwan fu den sma disi no arki, aladi yu go na den oso „furu leisi”. Kande trawan fu den arki syatu di yu taki nanga den fu wan bijbeltekst, noso fu wan prakseri na ini Bijbel. Ma kande yu ben man gi wan moi kotoigi na tra sma, èn den sma disi teki a boskopu. Na so sani e waka te wi e „gi kotoigi dorodoro fu a bun nyunsu”. Soleki fa yu sabi, bun furu eksempre de fu sma di no ben wani arki a boskopu, aladi sma taki „furu leisi” nanga den. Ne wan kenki kon. Kande wan sani pasa nanga den sma disi noso nanga wan lobiwan fu den, èn a sani dati opo den ati nanga den frustan gi a bun nyunsu. Now, den sma disi na wi Kresten brada nanga sisa. Fu dati ede, yu musu tan gi kotoigi, awansi furu sma no wani arki. Wi no e fruwakti taki ala sma sa teki a tru anbegi. Ma san Gado e fruwakti fu wi, na taki wi e tan wroko fayafaya fu gi kotoigi dorodoro.
Wi no sabi sortu bun bakapisi a sa abi
13. San kan de a bakapisi fu a preikiwroko di wi e du, sondro fu wi sabi dati?
13 A preikiwroko fu Paulus no ben abi krakti soso tapu den wan di ensrefi ben yepi fu tron Kresten. Na so a de tu nanga a preikiwroko di wi e du. Wi e si en leki wan prenspari sani fu teki prati doronomo na a oso-fu-oso preikiwroko, èn wi e gi kotoigi na so furu sma leki wi man. Wi e taki fu a bun nyunsu nanga birtisma, sma na wi wrokope, pikin na skoro, èn sosrefi famiriman. Wi sabi ala ten san sa de a bakapisi? Son sma e teki a bun nyunsu wantewante. Ma nanga tra sma a de so taki a siri fu a bun nyunsu e tan wan heri pisi ten na ini den ati, fosi a e teki rutu èn e gro. Awansi dati no e pasa, toku den sma di wi fruteri a bun nyunsu, e taki nanga trawan fu den sani di wi taki, fu a bribi fu wi, èn fu a fasi fa wi e tyari wisrefi. Iya, kande sondro fu den sma disi sabi, den e meki taki den siri dati e teki rutu na wan tra presi.
14, 15. San ben de a bakapisi di wan brada gi kotoigi na wan man?
14 Luku na eksempre fu Ryan nanga en wefi Mandi, di e libi na ini Florida, na Amerkankondre. Ryan gi kotoigi na wan man di ben e wroko na a srefi presi leki en. A man dati di ben abi a Hindu bribi, ben lobi a fasi fa Ryan ben e weri krosi, èn fa a ben e taki. Te Ryan ben e taki tori nanga a man disi, dan a ben e taki fu na opobaka, èn fu a situwâsi fu den dedewan. Wan mofoneti na ini yanuari, a man aksi en wefi, Jodi, san a ben sabi fu Yehovah Kotoigi. Jodi, di ben abi a Lomsu bribi, taigi en masra taki a wan-enkri sani di a ben sabi fu den Kotoigi, na taki den e „preiki oso fu oso”. Sobun Jodi go tapu Internet èn a skrifi a nen „Yehovah Kotoigi”, fu kon sabi moro fu wi. Na so a kon feni a Web site fu wi di nen www.watchtower.org. Wan tu mun langa, Jodi leisi sani tapu a Web site dati, soleki Bijbel nanga sani di ben e hari en prakseri.
15 Te fu kaba, Jodi miti Mandi, fu di den ala tu ben e wroko na ati-oso. Mandi ben de klariklari fu piki den aksi fu Jodi. Baka wan pisi ten, den taki tori fu „Adam te go miti Armagedon”, soleki fa Jodi e taki dati. Di Mandi aksi Jodi efu a ben wani studeri Bijbel, dan Jodi ben feni dati bun. Fosi yu denki, a bigin go na a Kownukondre zaal. Na ini oktober, Jodi tron wan preikiman di no dopu ete, èn a teki dopu na ini februari. A skrifi: „Now di mi de na ini a tru anbegi, mi de koloku trutru, èn mi abi wan korostu firi.”
16. Fa na ondrofenitori fu wan brada na ini Florida e leri wi fu gi kotoigi dorodoro?
16 Ryan no ben sabi srefisrefi taki a kotoigi di a ben gi na wan man ben o meki taki wan tra sma ben o teki a tru anbegi. A no de fu taki dati a sani disi leri en fu „gi kotoigi dorodoro”. Kande te yu e gi kotoigi oso fu oso, na yu wrokope, na skoro, noso na wan tra okasi, dan sondro fu yu sabi, dati kan abi leki bakapisi taki tra sma e yere a bun nyunsu. Neleki fa Paulus no ben sabi sortu bakapisi a preikiwroko fu en ben o abi na ini „a distrikt Asia”, na so yu no kan sabi tu sortu bakapisi a sa abi te yu e gi kotoigi dorodoro. (Leisi Tori fu den Apostel 23:11; 28:23.) Ma a de prenspari trutru taki yu e tan du dati!
17. San yu o du na ini 2009?
17 Meki a de so taki na ini 2009, wi alamala e si en leki wan seryusu sani fu preiki oso fu oso èn na tra fasi. Te wi e du dati, dan neleki Paulus wi o man taki: „Mi libi no prenspari srefisrefi gi mi, solanga mi kan lon a streilon te na a kaba, èn solanga mi kan klari a diniwroko di Masra Yesus gi mi fu du, namku fu gi kotoigi dorodoro fu a bun nyunsu di e fruteri wi fa Gado e sori sma no-frudini bun-ati.”
San yu ben sa piki?
• Fa den apostel Petrus, Paulus, nanga trawan ben gi kotoigi dorodoro na ini a fosi yarihondro?
• Fu san ede wi no kan sabi sortu bakapisi a preikiwroko fu wi sa abi?
• San na a yaritekst fu 2009, èn fu san ede yu feni taki a tekst disi fiti?
[Prenspari pisi na tapu bladzijde 19]
A yaritekst fu 2009, na: „Gi kotoigi dorodoro fu a bun nyunsu.” —Tori. 20:24.
[Prenki na tapu bladzijde 17]
Den owruman fu Efeise ben sabi taki Paulus ben preiki oso fu oso
[Prenki na tapu bladzijde 18]
San sa de a bakapisi te yu e gi kotoigi dorodoro?