Wroko fayafaya fu „gi kotoigi finifini”
1, 2. San yu e feni moi fu a fasi fa Paulus ben si a preiki fu a bun nyunsu? Fa wi kan waka baka na eksempre fu „gi kotoigi finifini”?
1 Neleki Yesus nanga furu tra getrow futuboi fu owruten, na apostel Paulus ben de wan fayafaya preikiman fu a bun nyunsu sosrefi. A ben e „gi kotoigi finifini” awansi na ini sortu situwâsi a ben de. Aladi a ben de na strafu na ini wan oso, toku a ben „gi ala sma primisi fu kon na en; a ben preiki a kownukondre fu Gado, èn noti no ben tapu en fu taki fri nanga den fu den sani di abi fu du nanga Masra Yesus Krestes”.—Tori. 28:16-31.
2 Wi kan de fayafaya sosrefi te wi e „gi kotoigi finifini” ala ten. Disi wani taki tu dati wi e gi kotoigi na den sma di wi e miti te wi de na pasi fu go na a „Gi Gado glori” Distrikt Kongres. Wi kan gi kotoigi sosrefi te wi de na a presi pe a kongres e hori.—Tori. 28:23; Ps. 145:10-13.
3. Fa wi kan gi kotoigi na ibri okasi sondro taki wi e wakti teleki wan okasi de?
3 San a wani taki fu gi kotoigi na ibri okasi? Te wan sma e gi kotoigi na ibri okasi, dan a no e du dati te a firi nomo, noso te dati kan. Efu wan sma ben o du dati, dan a ben o gersi leki a no abi na prakseri fu preiki, noso taki a no e feni a fasi disi fu preiki prenspari. Wi no e du a diniwroko fu wi na so wan fasi. Soleki fa a ben de nanga Paulus, dan a prenspari gi wi fu gi kotoigi fu di dati e gi Gado glori. Te wi e go fu a wan presi na a trawan na ini a fakansi, dan wi musu abi na prakseri fu gi kotoigi na ibri okasi. Ma a fasi fa wi o bigin wan takimakandra nanga trawan sa de na wan okasi, dati wani taki wi sa bigin wan takimakandra na wan switi fasi leki fa wi ben o taki nanga sma na ini na aladei libi. Wi kan abi bun bakapisi te wi e preiki na so wan fasi.
4. San ben meki taki Paulus ben man gi kotoigi na a presi pe a ben tan?
4 Sreka yusrefi fu gi kotoigi: Di Paulus ben de na strafu na ini wan oso na Rome, dan ensrefi ben suku okasi pe a ben kan gi kotoigi. A ben gi den Dyu fesiman fu a presi drape wan kari fu kon na en oso (Tori. 28:17). Aladi wan Kresten gemeente ben de na ini Rome, toku Paulus ben kon si taki a Dyu libimakandra na ini a foto dati no ben sabi so furu fu a Kresten bribi (Tori. 28:22; Rom. 1:7). A no ben draidrai fu „gi kotoigi finifini” fu Yesus Krestes nanga a Kownukondre fu Gado.
5, 6. Na sortu okasi wi kan gi kotoigi èn fa wi musu sreka wisrefi na fesi efu wi wani abi bun bakapisi?
5 Sreka yusrefi na fesi, fu di yu e hori na prakseri taki yu sa miti sma na pasi di no sabi so furu fu Yehovah Kotoigi. Kande den no sabi srefi taki wi e gi sma oso-bijbelstudie sondro fu pai. No draidrai fu suku okasi pe yu kan gi kotoigi na sma di yu sa miti te yu de na pasi, te yu e teki bro na wan presi, te yu e lai oli na wan presi, te yu e bai sani na wenkri, te yu e tan na ini wan hotel, te yu e nyan na wan restaurant, te yu de na ini wan bus, èn go so moro fara. Sreka yusrefi na fesi so taki yu sabi san yu kan taki fu bigin wan takimakandra èn fu preiki syatu gi wan sma. Kande na ini a ten di e kon yu kan bigin leri fu du disi fu di yu e gi kotoigi na yu birtisma, yu famiri, sma nanga suma yu e wroko, nanga tra sma di yu sabi.
6 A de fanowdu taki yu musu sorgu gi nofo publikâsi di yu kan gebroiki te yu e gi kotoigi na ibri okasi. Sortu publikâsi yu kan gebroiki? Yu kan gebroiki a traktaat Yu Ben Sa Wani Sabi Moro fu Bijbel? Poti prakseri na den fosi feifi paragraaf, di e sori den difrenti reide fu san ede a bun fu leisi Bijbel. Sori a sma na bakasei fu a traktaat pe a kan skrifi en nen fu aksi taki wan sma hori wan oso-bijbelstudie nanga en sondro fu pai. Te yu miti wan sma di wani arki, dan pristeri a sma dati a San Gado e aksi-brochure. Fu di yu e fruwakti fu miti sma di e taki wan tra tongo, dan yu kan tyari a brochure Goed nieuws voor alle natiën nanga yu. Bladzijde 2 e sori fa yu kan gebroiki a brochure disi fu gi kotoigi. Efu yu de nanga na oto fu yu, dan yu sa man tyari wan tu tra publikâsi di de gi den wan di trutru wani sabi moro fu a Kownukondre boskopu.
7, 8. Te wi e luku a fasi fa wi e weri krosi èn a fasi fa wi e tyari wisrefi te wi de na pasi èn te wi de na ini wi fri ten baka a programa, dan na sortu warskow wi musu poti prakseri?
7 Poti prakseri na a fasi fa yu e weri krosi èn na a fasi fa yu e tyari yusrefi: Wi musu sorgu taki a fasi fa wi e tyari wisrefi èn a fasi fa wi e weri krosi, no e meki trawan denki takru fu wi, noso dati den e „taki sani teige” Yehovah en organisâsi (Tori. 28:22). Wi no musu du disi wawan te wi de na den kongres, ma sosrefi te wi de na pasi èn te wi e du tra sani na ini wi fri ten baka a programa. A Waktitoren fu 1 augustus 2002, bladzijde 18, paragraaf 14, ben gi a warskow: „Den krosi fu wi no musu de nanga tumusi furu pranpran, den no musu de tumusi aparti, krosi di e wiki den seks lostu fu tra sma, krosi di e poti afu fu wan sma skin na doro, noso kefalek sortu modo krosi. Boiti dati wi musu weri krosi na wan fasi di e sori taki wi abi ’lespeki gi Gado’. Fu tru, dati na wan prenspari sani fu go prakseri, a no so? A no de so nomo taki wi musu weri bun krosi te wi e go na den konmakandra, èn dan te wi de na tra okasi wi e poti ala den warskow disi na wan sei. A fasi fa wi e weri krosi èn e moi wisrefi musu sori ala ten taki wi abi lespeki, fu di wi na Kresten èn sosrefi dinari fu Gado ibri momenti fu a dei.”—1 Tim. 2:9, 10.
8 Wi musu weri krosi na wan fasi di fiti èn di warti. Wi musu sori nanga a fasi fa wi e weri krosi èn na a fasi fa wi e tyari wisrefi, taki wi e bribi na ini Gado. Efu wi e du disi, dan noiti wi sa draidrai fu gi kotoigi na ibri okasi fu di wi no weri krosi soleki fa a fiti.—1 Petr. 3:15.
9. Sortu bun bakapisi Paulus ben abi di a ben gi kotoigi na ini Rome?
9 Wi sa abi bun bakapisi te wi e gi kotoigi na ibri okasi: Den tu yari di Paulus ben de na strafu na ini wan oso na Rome, a ben abi bun bakapisi fu di a ben meki muiti fu gi kotoigi. Lukas ben fruteri dati „son sma ben bigin bribi den sani di a ben taki” (Tori. 28:24). Paulus srefi ben si den bun bakapisi di a „gi kotoigi finifini”. A ben skrifi: „Den sani di miti mi, no ben gens a bun nyunsu, ma a ben de fu a bun fu a bun nyunsu, so taki ala waktiman fu kèiser nanga ala tra sma kon sabi taki na fu Krestes ede, mi de na strafu; dati meki furu fu den brada di e dini Masra abi moro deki-ati now fu taki a wortu fu Gado sondro frede, bika den kisi moro frutrow fu di mi de na strafu.”—Fil. 1:12-14.
10. Sortu bun bakapisi wan trowpaar ben abi di den gi kotoigi ini a yari di pasa?
10 Baka di a fosi dei fu a distrikt kongres ben hori a yari di pasa, wan trowpaar fu Amerkankondre ben abi bun bakapisi di den gi kotoigi na wan uma di ben e wroko na ini wan restaurant. Na uma disi ben aksi den fu a lapelkarta di den ben e weri. Den fruteri en fu a kongres èn sosrefi fu a howpu di Bijbel e gi a libisma famiri na ini a ten di e kon. Den gi en a traktaat Yu Ben Sa Wani Sabi Moro fu Bijbel? èn den fruteri en fu a seti taki a kan kisi wan bijbelstudie na en oso sondro fu pai. Na uma disi ben wani taki wan sma kon na en, fu dati ede a ben skrifi en nen nanga adres bakasei fu a traktaat èn a aksi a trowpaar fu seti sani so taki wan sma ben sa kon na en. Sortu bun bakapisi yu kan kisi a yari disi te yu sa „gi kotoigi finifini”?
11. Sortu fasi wi musu abi efu wi wani prati a bun nyunsu nanga ala sma fu di wi e „gi kotoigi finifini” a yari disi?
11 De fayafaya fu prati a bun nyunsu nanga ala sma: Prakseri fa Paulus ben prisiri di a ben yere taki den brada nanga sisa ben teki na eksempre fu en fu de fayafaya! Meki wi du ala san wi man fu prati a bun nyunsu nanga ala sma fu di wi e gi kotoigi na ibri okasi. Wi sa gi kotoigi fu den sani di wi e bribi di teki puru fu Bijbel èn wi sa kisi wini sosrefi fu a distrikt kongres fu a yari disi.
[Faki na tapu bladzijde 3]
Publikâsi di wi kan gebroiki te wi e gi kotoigi na ibri okasi
■ Yu Ben Sa Wani Sabi Moro fu Bijbel? (traktaat)
■ San Gado e aksi foe wi? (brochure)
■ Goed nieuws voor alle natiën (pikin buku)
■ Tra publikâsi di fiti fu gebroiki
[Faki na tapu bladzijde 4]
No frigiti den sma dati!
Suma wi no musu frigiti? Wi no musu frigiti ala den sma di ben kon na a Memrefesa fu a dede fu Krestes noso na a spesrutu lezing. Wi gi den sma disi wan kari fu kon na a distrikt kongres fu a yari disi? Kande furu fu den sma disi sa kon na a kongres efu wi e gi den a deki-ati fu kon. Den sa prisiri fu abi demakandra di e gi deki-ati te den de na a kongres èn den sa prisiri fu kisi deki-ati na yeye fasi fu a programa. Den sa kon krosibei na Yehovah nanga en organisâsi. Fu san ede yu no e gi den sma disi wan kari èn luku efu den e teki a kari? Fruteri den fa ala sani sa waka na a kongres. Taigi den sortu dei a kongres sa hori, pe a kongres sa hori, o lati wi e bigin èn e kaba nanga a kongres, èn meki den si a programa fu a kongres di skrifi na bakasei fu na Ontwaakt! fu 8 yuni 2003.