Taki fu na glori fu na Kownuwroko fu Gado
„Den sa taki fu na glori fu yu kownuwroko, èn den sa taki fu na makti fu yu.” — PSALM 145:11
1. San na a moro prenspari reide fu san-ede Yehovah ben gi wi a koni fu taki?
YEHOVAH ben abi wan sani na prakseri di a ben gi unu fu taki (Exodus 4:11). A ben de more furu fu wi mofobuba ’ben sa meki prijse kon gi en’ (Psalm 119:171, 172). Soleki na psalmsingiman David ben taki: „Ala den wroko fu yu sa prijse yu, o Yehovah, èn den loyaalwan fu yu sa blesi yu. Den sa taki fu na glori fu yu kownuwroko, èn den sa taki fu na makti fu yu, fu meki den makti wroko fu en bekenti na den libismapikin èn na glori fu en kownuwroko. Na kownuwroko fu yu na wan kownuwroko fu ala ten di no abi marki, èn na kownuwroko fu yu de gi ala geslagti di e waka baka makandra.” — Psalm 145:10-13.
2. Tapu sortu fasi wi e kisi tranga „fu meki prijse kon” gi Gado?
2 Salfu bakaman fu Yesus Kristus nanga den kompe fu den fu na „bigi ipi” abi na lostu fayafaya fu prijse Yehovah, na „Kownu fu tego” (Openbaring 7:9; 15:3). Nanga a studeri fu na bijbel fayafaya, nanga na Wachttoren nanga tra kristen publikatie leki yepi sani, wi kan kisi soifri sabi fu Gado di de laki wan fonten fu soifri libiwatra di e gi kowru-ati. Na so fasi ini a geval fu wi ’na fonten fu koni e tron wan liba di e kuku kon na tapu’ (Odo 18:4). Wi e kisi na pusu „fu meki prijse opo kon ini wi ati” te wi e gi kotoigi oso-fu-oso èn e teki prati na tra vorm fu velddienst. Ma ooktu wan bijbel reide de fu a gi fu okasi preiki.
Eksempre fu a bijbel
3. Gi wan eksempre fu wan okasi preiki di Yesns ben gi.
3 Na fositron di Yesus ben preiki bakadi a ben kisi salfu nanga santa yeye, ben de na a oso pe a ben e tan èn pe a ben kari Yohannes, Andréas èn ooktu Petrus kon na en. Drape den ben psa a dei, èn a de krin dati den ben kisi wan finifini kotoigi ini na oso sfeer dati (Yohannes 5:35-42). A so a ben de ooktu wan ala dei situwasi pe okasi ben e sori ensrefi — dati wani taki ’di Yesus ben komoto drape go moro fara’ — dati a ben si Mattéus na a belastingkantoro èn a ben abi positief bakapisi di a ben taki: „Tron mi bakaman.” — Mattéus 9:9.
4. San Yesus ben taki di a ben gi kotoigi na wan Samaria-uma èn disi meki san kon?
4 Yesus ben de a moro bun eksempre fu wan ’liba di e kuku kon a tapu’. Aladi a ben sakasdon nanga angri èn weriskin na a peti fu Yakob ini a birti fu Sichar, toku a ben gi kotoigi na wan Samaria uma di ben kon kisi watra. „Ala sma di e dringi fu a watra di mi sa gi en noiti moro no sa kisi dreiwatra,” Yesus ben taki, èn „a watra di mi sa gi, sa tron na ini en wan fonten fu watra, di e kuku kon a tapu fu gi tego libi.” Na okasi preiki disi ben meki dati Yesus ben preiki gi wan grupu sma di na uma ben kari fu kon yere san a ben abi fu taki. — Yohannes 4:6-42.
5. Fa na evangeliumpreikiman Filipus nanga na apostel Paulus ben gi wi wan eksempre ini a gi fu okasi preiki?
5 Na evangelium preikiman Filipus ben kari a sma di ben sdon ini wan wagi di ben e rij psa èn a ben gi a man disi, di ben sdon e leisi na profeititori fu Yesaya, kotoigi na a okasi disi. Bakadi Filipus ben kisi na kari fu teki presi na ini na wagi, a ben ferklari „na bun nyunsu di e go fu Yesus” na a Ethiopia eunuch, di a warderi di a ben sori ben meki a ben kisi dopu (Tori fu den Apostel 8:26-28). Di den straf’oso-bui fu na apostel Paulus ben kon lusu, na a ten fu wan bigi aardbeifi na Filipi, a ben gi okasi preiki na a waktiman fu den strafman. Na bakapisi? „En nanga den sma fu en, nowan sma libi a baka, ben kisi dopu wantewante.” — Tori fu den Apostel 16:19-34.
6. Na sortu activiteit fu Yesus disipel baka a ston di den ston Stefanus kiri okasi preiki ben prei wan rol?
6 Ini a ten disi a gi fu okasi preiki de wan fu den methode fu meki na bun nyunsu bekenti tapu presi pe wi kristenwroko skotu. Ma awinsi wi e kisi ferfolgu, wi ati e pusu wi fu taki fu na glori fu na kownuwroko fu Gado. Bakadi den ston Stefanus kiri, dan moro furu fu den disipel di den ben ferfolgu ben panya gwe. Toku den ben tan meki na bun nyunsu bekenti, èn sondro degedege den ben meki ooktu gebroiki fu okasipreiki ini a muiti fu den fu preiki na Kownukondre. — Tori fu den Apostel 8:4-8; 11:19-21.
7. Fa Paulus ben du di den ben sroto en ini dungru-oso èn sortu aksi e kon na fesi nanga dati?
7 Efu wi de na ini strafoso ofu wi tai na oso leki wan bakapisi fu siki ofu malengri dan a gi fa okasipreiki de wan fu den fasi fu taki fu na glori fu na kownuwroko fu Gado. Paulus ben de tu yari langa ini strafu ondro na Romein waktiman. Ma na presi fu a ben drei-gwe, a ben kari sma konmakandra fu arki en èn „a ben ontvang nanga switifasi ala sma di ben kon na en, èn nanga na more bigi fri fu taki sondro frede a ben preiki na kownukondre fu Gado gi en èn a ben gi leri ini den sani di ben abi fu du nanga Masra Yesus Kristus” (Tori fu den Apostel 28:16-31). Fa disi ben de wan tumsi moi eksempre! Efu leki wan kotoigi fu Yehovah yu tai na oso, yu ben sa kan du ooktu sowan sortu sani dan?
8. O bun na okasi preiki ben de di Paulus ben gi?
8 Fu di den ben kenki den sma di ben e hori wakti gi Paulus ten fu ten, dan difrenti fu den ben yere fa a ben taki nanga trawan fu na glori fu na kownukondre fu Gado. Ma yu kan de seiker dati a ben gi den waktiman dati ooktu kotoigi. Na okasi preiki disi ben de so bun dati Paulus ben kan skrifi: „Den afersi fu mi moro furu ben meki a bun nyunsu go na fesi, sodati a mindri na heri pretoriaanse lijfwacht èn ala tra sma ben kon de bekenti dati mi strafoso-bui de na ini a tori fu Kristus; èn moro furu brada ini Masra e sori fu dat’ede moro dek’ati fu taki a wortu sondro frede, fu di den ben kisi fertrow nanga mi strafoso-bui” (Filipi 1:12-14). Efu netleki Paulus den ben sa kisi wi poti na straf’oso èn wi no ben abi nowan okasi fu gi kotoigi na wan officieelfasi, dan alaten ete wi kan taki fu a kownuwroko fu Gado. Èn fa den brada fu wi sa kisi dek’ati nanga dati!
9, 10. Fa e kon a krin fu grontapu buku dati fosten kristen ben gi okasi preiki?
9 Gi okasipreiki ben de a mindri den kristen sowan gewoon sani dati srefi fu den yari a baka den ben kan taki: „Wan kristen skrifiman, kande seiker ini a ten fu sowan 200 ini Carthago, e skrifi fu sma di ben kisi bun leri srefsrefi. Dri yongu afkati, bun mati, e psa wan fri dei na se-kanti. Tu fu den na kristensma, na di fu dri na wan heiden. A takmakandra fu en esesi e kon na tapu na tori fu bribi . . . A tori fu na langa takmakandra e kon na wan kaba na a fasi disi: ’Wi ala dri ben go nanga wan koloku firi na oso. Na wan ben de koloku fu di a ben teki na kristen bribi, den trawan fu di den ben yepi en kon sofara.’ A buku no e taki dati a de wan historia buku; a de wan apologie (wan buku di e tak bun fu na kristendom), anu fu Minucius Felix. Ma a e sori fa a ben e go a mindri den wan di ben abi en bun” (Church History I — The First Advance: AD 29-500, fu John Foster, blz. 46, 48). Iya, èn fu a tori disi e kon a krin dati a gi fu okasipreiki a mindri sma di ben taki dati den de kristen fu a ten dati no ben komoto na modo.
10 Den ben taki ooktu fu den fosten kristensma: „Alaten yu ben abi wan nomru di ben gro fu aparti kristensma èn di pe den ben go ooktu, efu a ben de now gi den normaal bezigheid ofu fu di na ondro a druk fu ferfolgu den ben mu lon, ben preiki Kristus . . . wan heri ipi sma di ben meki den ambacht, den beroep, den aladei wroko fu sortu fasi den ben de ooktu, tron den yepi-sani fu panya a bribi fu den” (The Missionary Enterprise, fu Edwin Munsell Bliss, blz. 14). Iya, den fosten Kownukondrepreikiman ben gi kotoigi leki fa ben taki dati a mu du èn na okasi tu.
Planning nanga sreka a fesi
11. San wi kan leri fu Yesus fu a fasi tapu san wi kan poti a prakseri tapu a waarheid?
11 Neleki Yesus nanga en fosten bakaman na so wi mu gi kotoigi leki fa a musu de èn na okasi tu. A e aksi planning nanga sreka na fesi fu du disi bun. Efu Yesus ben gi okasi kotoigi ofu leri, dan a ben sori na tapu pikin, nyanyan, krosi, fowru, weersomstandigheden nanga wroko di sma ben e du (Mattéus 4:18, 19; 6:25-34; 11:16-19; 13:3-8; 16:1-4). Ooktu wi kan gebroiki pikinmoro ibri tori leki wan bigin fu poti na prakseri na tapu a waarheid fu Gado.
12. Fa wan sma kan sreka ensrefi tapu a gi fu okasi preiki te a meki plan fu reis?
12 Wi kan gi okasi preiki na sma di sdon ini wan park, di tanapu ini presi pe furu wenkri de ini rij, èn so moro fara. Ini Athene Paulus ben tak-go-tak-kon „ibri dei tapu na wowoyo nanga den di de drape toevallig” (Tori fu den Apostel 17:17). Ma wi musu sreka wisrefi tapu okasiprelki. Yu e meki fu eksempre plan fu wan reis nanga opolani, trein ofu bus? No fergiti dan fu teki wan bijbel èn wantu tractaat, tijdschrift ofu brochure nanga yu. Te wi e leisi publikatie te wi e meki gebroiki fu na publiki vervoer ofu de tapu tra presi a mindri den sma, dan disi nofotron kan gi wan reide fu takmakandra.
13. Gi wan eksempre fu sortu inleiding yu ben sa kan gebroiki te yu wani gi kotoigi na wan grani sma te yu de na reis?
13 A no de fu taki dati den bigin wortu sa de switiwan. Na anubuku Tak-go-tak-kon nanga yepi fu den Buku abi rai fa fu bigin wan takmakandra ini na velddienst, ma sonwan fu den dati kan fiti fu gebroiki na okasi kotoigi. Te yu de na reis èn yu sdon na sei wan owrusma, dan fu eksempre yu ben kan taki: „Mi nen na——. Nofotron mi e denki fu na marki fu na libi. Furu sma de so druk bezig fu wroko moni dati pikinmoro den no abi ten fu denki fu na libi. Ma omoro wi e owru, dan wi e go frustan dati a libi syatu srefsrefi èn wi e aksi wisrefi kande: ’Na disi na ala sani san a libi e pristeri?’ Yu denki dati Gado abi wan prakseri nanga wi?” Gi okasi fu a sma taki. Dan yu ben sa kan taki fu a prakseri fu Gado nanga na libisma-famiri èn kan taki wan sani fu den moi sani di Openbaring 21:3, 4 e pramisi. Fu gi wan tumsi moi okasi preiki dan yu kan gebroiki ooktu wantu tra moi punt di yu ben leri tapu gemeente komakandra èn fu kristen publikatie.
Bun bakapisi de fu ferwakti
14. Sortu bun bakapisi wan brada ben abi di na a ten fu en reis a ben gi okasi preki?
14 Ooktu wi, net soleki Yesus nanga en fosten bakaman, kan gi okasi preiki nanga bun bakapisi. Fu gi wan eksempre: Na a ten fu wan reis nanga wan opolani wan kotoigi ben taki nanga wan legre ofisiri di ben trow twenti yari kaba. Na uma fu a man dati ben e gebroiki drugs, ben du difrenti fasi fu kiri ensrefi èn ben de sofara fu prati nanga en fu go libi nanga wan moro yonguman. Di na kotoigi ben taki fu na yepi fu na bijbel di na Wachttoren èn a sisa tijdschrift Ontwaakt! ben e gi en, na ofisiri ben teki wan abonnementi èn aksi fu seni den tijdschrift go gi en uma. Tra sma di ben de ini na opolani ben yere san a kotoigi ben taki. A bakapisi? Now, fu di na a okasi dati a ben gi kotoigi, a ben sroto 22 abonnement èn ben prati 45 tijdschrift nanga 21 buku.
15, 16. (a) Gi eksempre fu okasi preiki na sma di de na yu wrokopresi di ben waka bun. (b) San den bun bakapisi disi e sori?
15 San de fu taki fu okasi preiki na sma di e wroko nanga yu makandra? Wan brada ben libi tapu en wrokope exemplaar fu wi tijdschrift a baka ini a wasipresi. Wan tra wrokoman ben leisi den tijdschrift, ben suku kontakti nanga na brada èn ben teki wan abonnement tapu alatu tijdschrift, ooktu a man disi ben teki wan bijbelstudi èn ben tyari wan kaba kon na a yayo libi fu en. Ma alatron te a nen fu Gado ben kari, en uma ben waka komoto fu na oso. Di na man ben wani fu den krabu en nen puru fu na kerki fu na presi, dan na preikiman fu a kerki ben kon fu taki pikinso fu dati, èn a ben miti soso na uma fu na man na oso. Na mankeri fu bribi fu na sei fu na fesiman èn den lei fu en di e go fu Yehovah Kotoigi ben seki na uma, bika a ben si fa en man ben kenki kon bun. A ben taigi na fesiman: „Yu kan skrifi mi nen puru ooktu.” Bakaten a man disi nanga en uma ben tron dopu kotoigi.
16 Someni yari psa kaba wan brada di e libi now ini den Verenigde Staten ben gi okasipreiki na wan sma fu en wrokope ini Engeland èn ben teki na yonguman nanga en go na wan film di Yehovah Kotoigi ben orga. Dritenti na wan yari na baka a brada ben kisi na brifi di e kon now: „Mi wani ferteri yu now sote dati na kotoigi di yu ben gi [na a yonguman dati] ben tyari froktu kon, bika sowan tu yari a baka wan tra brada ben taki nanga mi, ben prati tijdschrift èn ben teki en go na a Kownukondrezaal fu a presi . . . A ben tron wan kotoigi, a ben teki dopu ini 1959 èn a de now owruman ini en gemeente . . . Baka sowan tina-fo yari en uma ben tron wan kotoigi èn ooktu en ben teki dopu. Tu yari na baka en uma-pikin ben dopu èn a de now wan gewone pionier ini North Derbyshire . . . Fu na pikin kotoigi dati di yu ben gi na ini a ten dati na a fara Ashford, meki a man dati, en uma nanga umapikin, wan nicht nanga en umapikin, man nanga feifi pikin, èn wan pikin fu wan tra umapikin fu a nicht dati ben tron alamala kotoigi. . . . Mi wani taki yu trutru grantangi fu mi heri ati, Ted, bika mi ben de na staalconstructeur dati, èn na tori di mi ferteri dyonsrode na mi eigi tori fu na gi kotoigi di yu ben gi mi èn san ben kon fu ala dati.”
17. Sortu okasi fu gi okasi preiki, yonguwan di de dienstknegti fu Yehovah abi?
17 Unu, un yonguwan a mindri den dienstknegti fu Yehovah abi ooktu wan moi kontren fu gi kotoigi — den kompe-skoromati nanga den meester fu unu. Unu e gi okasi preiki ini opstel, beurt fu taki, nanga so moro fara? Leki presi fu materiaal gi wan opstel wan umapikin na wan middelbare skoro na Ecuador di ben abi bijbelstudi, ben gebroiki na themaserie fu Ontwaakt! fu 22 augustus 1985: „Hirosjima — Sma fergiti na leri?” Na opstel fu en ben kisi bigi prijse fu juryleden ini wan internationale wedstrijd èn ben kisi wan gratis reis fu go na Japan. A no de fu taki dati a wini fu wedstrijd no de a marki fu kristen publikatie. Ma disi e sori a waarde fu den sortu buku disi èn a bun fasi fu na gi kotoigi tapu skoro fu Gado kisi prijse.
18. San ben de a bakapisi fu wan syatu kotoigi na wan sma di ben wani yuru wan kamra?
18 Wan sisa fu reide fu moni ede ben mu yuru wan kamra gi sma. Di wan sma ben aksi wan kamra nanga yepi fu telefon, dan a ben taigi na uma di ben bel dati a ben de wan sma fu Yehovah Kotoigi èn a no ben kan gi pasi na ini en oso fu abi fri seks. Sma di kon fisiti den ben mu hari gwe fruku, èn fisitiman di ben de mansma alaten sma ben mu man fu si den. Na uma na a tra sei fu a telefon ben degedege èn ben taki: „Mi ben kisi studi leki wan tini, ma a no ben du noti na mi. Sobun mi go na universiteit fu kisi hei leri.” Tapu na aksi efu a ben wani bigin baka nanga bijbelstudi, a ben piki: „Ija.” Baka wan pisten na uma di ben bel, en mama nanga en sisa ben tron dienstknegti fu Yehovah di gi densrefi abra — èn ala disi fu di wan sisa ben gi okasi preiki.
19. San na a bakapisi fu wan okasi preiki di ben gi na wan uma na tapu den Bahama’s?
19 Tapu den Bahama’s wan katholiek uma ben kisi problema nanga en konsensi fu di feifi yari kaba a no ben go na kerki. Fu dat ede meki tapu wan alen sonde mamanten a ben de na pasi e go na kerki. Dri Kotoigi di ben rèi psa ini den oto ben teki en tyari ini a oto èn den ben gi en kotoigi. Di den ben kon na a kerki, a ben wani sote fu sabi moro èn a ben tan na den di den ben rèi moro fara fu go teki wan sma di ben kisi bijbelstudi. Den ben kon psa a kerki baka, ma a ben wani yere moro èn fu dat ede a ben go na a Kownukondrezaal. A publiki taki ben go precies fu asrefi tori fu san den ben taki fu en ini a oto. Wan bijbelstudi ben opo nanga a uma, di ben seni na man nanga suma a ben libi makandra gwe [na papa fu den fo pikin fu en]. èn a ben teki dopu tapu wan kongres ini Nassau ini 1986. Fa a ben prisiri dati wan sma ben gi en okasi preiki!
Tan taki fu na kownuwroko fu Gado
20. (a) Fa wi musu si okasi preiki te wi e luku en nanga na velddienst? (b) Sortu rai e gi te wan sma e feni en muilek fu gi okasi preiki?
20 Gi okasi preiki, no de wan preiki di e kon fu a presi fu na normale velddienst fu Yehovah Kotoigi. A de krin dati na oso fu oso preiki de wan sani di bijbel e taki fu en èn di de ooktu bun (Tori fu den Apostel 5:42; 20:20, 21). Ma ete a de so dati okasi preiki e tyari froktu kon èn Yehovah Kotoigi mu hori densrefi nanga dati bezig. Alape pe sma de — famirman, kompe-studenti, sma na yu wrokope nanga trawan — okasi de fu taki fu na glori fu na kownuwroko fu Gado. No meki fu dat’ede frede ofu syen tapu yu (Odo 29:25; 2 Timotéus 1:6-8). Efu yu e feni en wan muilek sani fu gi okasi preiki, fu san-ede yu no sa begi dan soleki Yesus disipel ben du di den ben ferfolgu den? Den ben begi den: „Yehovah gi yu srafu dati den tan taki nanga ala fri sondro fu frede.” Yehovah ben yere a begi fu den? Iya, bika „na presi pe den ben konmakandra, ben seki èn den alamala sondro fu yu puru wan ben kon furu fu santa yeye èn ben taki na wortu fu Gado fri èn sondro frede.” — Tori fu den Apostel 4:23-31.
21. San kan pusu wan sma fu gi okasi preiki na ondro ala omstandigheden?
21 Sobun kweki wan positief fasi gi okasi preiki. Meki lobi fu Gado pusu yu ondro ala sortu omstandigheid fu gi kotoigi. De nanga faya èn meki na waarheid na ibri okasi kuku kon letterlek ini yu. Ija, tan taki fu na glori fu na kownuwroko fu Gado.
Fa den piki fu yu de?
◻ San na a bijbelgron fu okasi preiki?
◻ San na wantu fasi fu sreka wisrefi na a gi fu okasi preiki?
◻ Sortu bakapisi wi kan ferwakti efu wi e gi okasi preiki?
◻ Fa wi mu si okasi preiki te wi luku en nanga a normale velddienst?
[Prenki na tapu bladzijde 14]
Efu yu tai na oso, yu e gi kotoigi dan soleki Paulus ben du di a ben de na straf’oso?
[Prenki na tapu bladzijde 15]
Sreka wisrefi a fesi sa yepi wi fu gi bun okasi-preiki