Pristeri na bun nyunsu — Fudi wi e gi okasi-preiki
1 Aladi Yesus ben e teki bro na a peti fu Yakob ini na birti fu Sichar, a ben bigin wan takmakandra nanga wan Samaria-uma (Yoh. 4:5-30). Aladi a ben weri èn a ben abi dreiwatra fu na waka, toku a ben gi kotoigi fu na waarheid. A ben de wan okasi-preiki. Disi ben abi bun bakapisi? A ben abi leki bakapisi dati furu Samariasma ben poti bribi ini Yesus (Yoh. 4:39-42). A na wan okasitakmakandra disi ben meki wan tumsi bun kotoigi èn fruwondru bakapisi ben kon!
2 Ini a ten disi furu sma e feni a gi fu okasi-preiki wan tumsi moi fasi fu panya na bun nyunsu èn den kisi leki wan bakapisi fu dati ondrofenitori di ben span srefsrefi. A gi fu okasi-preiki kan tyari froktu kon srefsrefi. Ma yu ben sa kan aksi yusrefi pe èn oten wan sma kan gi okasi-preiki. Fa a kan du?
PE ÈN OTEN
3 Wan sma pikinmoro ini ala sortu omstandigheid ofu tapu ibri presi di de kan gi okasi-preiki. A de prenspari fu luku na okasi aladi wi e du wi aladei wroko. Furu preikiwan e gi okasi-preiki te den e waka nanga openbaar vervoer go na den wroko èn kon baka ofu e meki wan fakansireis. Sonwan e meki gebroiki na ten di ten e teki bro. Trawan e di te den e wenkri okasi di fiti. Wan trowpaar ben gi kotoigi na wan sraktiman ini wan super-markt èn di a ben sori belangstelling gi na waarheid den ben meki wan mofo fu taki go doro na srefi neti dati na en oso.
4 Preikiman di malengri ofu siki abi furu winimarki nanga a gi fu okasi-preiki na sma di kon fisiti den, datra nanga sma di e sorgu fu den. (Luku w80 15/3 blz. 29-31.) Son brada nanga sisa e taki nanga sma di e kon na den doro. Trawan ben kisi moi bakapisi fudi den ben go taki nanga sma di ben de a publiki presi fu nyan switi fu na waran weer. Museum, opolanigron, busstation nanga tra publiki presi de tumsi moi presi fu a gi fu okasi-preiki.
FA A KAN DU
5 Wan Gileadstudenti di ben frede pikinso fu gi okasi-preiki ben taki: „Furutron mi ben si dati begi e yepi mi te mi e feni en muilek fu taki nanga sma”. Sobun, suku na den okasi fu taki nanga sma èn aksi Yehovah efu a wani opo na pasi fu du dati. Meki na faya gi Yehovah nanga na waarheid beweigi yu ati moro fara. De nanga switifasi èn nanga manirifasi te yu e waka go taki nanga sma. Proberi fu luku na sma ini en fesi èn bigin nanga wan takmakandra fu wan sani fu san na ala tu sei belangstelling de. Sori dati yu abi na sma na prakseri, sori switifasi ooktu, awinsi a sma no abi no wan belangstelling.
6 A no de fu taki dati wi wani fu libi wan sani na den sma di abi belangstelling. Dati wani taki dati wi mu meki plan a fesi èn musu abi traktaat, tijdschrift nanga brochure na wi. Den nyun pikin traktaat fu wi sa bewijs taki den de warti yepisani te wi e gi okasi-preiki. Son preikiman ben abi furu winimarki nanga brochure ofu tijdschrift di den ben abi tapu den buro na wrokope ofu tapu wan tafra na oso. Disi kan hari na prakseri fu wan wrokoman ofu wan sma di kon fisiti yu èn meki wan tumsi moi takmakandra nanga bun bakapisi kon.
7 Suku fasi fu gi okasi-preiki. Sorgu fu abi traktaat ofu tra lektuur na yu èn aksi ofu Yehovah wani yepi yu. Seti sani fu go baka na ala belangstelling di sori. Sorgu dati yu skrifi na ten leki velddienst tapu yu rapport. Efu net leki Yesus èn den apostel yu du ala muiti dan Yehovah sa blesi yu te yu sa panya na bun nyunsu nanga yepi fu okasi-preiki.