Yu kan gi kotoigi te yu kisi na okasi!
1. (a) Na sortu okasi wi kan preiki gi sma? (b) Omeni sma na a konmakandra disi yere den tru tori fu Bijbel fu a fosi leisi, di wan sma di ben kisi na okasi, ben preiki gi den?
1 Omeni sma na ini yu gemeente yere den tru tori fu Bijbel fu a fosi leisi, di wan sma di ben kisi na okasi preiki gi den? Kande yu o fruwondru fu kon sabi omeni sma dati de. Te wi kisi na okasi, dan wi e preiki a bun nyunsu gi sma di wi e miti na ini wi aladei libi. Wi e miti sma te wi e go wan presi, te wi e go luku famiriman noso birtisma, te wi e bai sani na wenkri, te wi de na skoro, na wroko, noso na wan tra okasi. Na ini wan grupu fu moro leki 200 dopu Kotoigi, pikinmoro afu fu den ben yere fu a bun nyunsu fu a fosi leisi fu di wan sma gi kotoigi di a kisi na okasi! Sobun, te wi e preiki na a fasi disi, dan dati abi furu bun bakapisi.
2. Sortu eksempre wi e feni na ini Bijbel di e sori taki sma ben e gi kotoigi te den ben kisi na okasi?
2 Nofo tron den preikiman fu a fosi yarihondro ben e gi kotoigi te den ben kisi na okasi. Fu eksempre, di Yesus ben e waka na ini a heri kontren fu Samaria, dan a ben e preiki gi wan uma di ben e teki watra na a peti fu Yakob (Yoh. 4:6-26). Filipus ben bigin wan takimakandra nanga wan heiman fu Etiopia, di a man dati ben e leisi fu a buku Yesaya. Filipus ben aksi a man: „Yu sabi san yu e leisi?” (Tori. 8:26-38) Di na apostel Paulus ben de na strafu na ini Filipi, dan a ben gi kotoigi na wan waktiman fu a strafu-oso (Tori. 16:23-34). Bakaten di Paulus ben de leki strafuman na ini wan oso, dan a „ben sori switifasi gi ala den sma di ben kon na en; a ben fruteri den fu a kownukondre fu Gado, èn noti no ben tapu en fu taki fri nanga den fu den sani di abi fu du nanga Masra Yesus Krestes” (Tori. 28:30, 31). Yu sosrefi kan gi kotoigi te yu kisi na okasi, srefi efu yu e syensyen. Fa yu kan du dati?
3. San kan yepi wi te wi e syensyen?
3 Fa fu bigin: Furu fu wi e feni en muilek fu bigin taki nanga sma di wi no sabi. Srefi efu wi sabi wan sma, toku wi kan syensyen fu bigin taki fu den tru tori fu Bijbel nanga en. Ma wi o kisi a deki-ati fu taki nanga den, te wi e denki dipi fu a bun-ati fu Yehovah, fu den tumusi moi tru tori di a leri den futuboi fu en, èn fu a takru situwâsi di sma fu a grontapu disi de na ini (Yona 4:11; Ps. 40:5; Mat. 13:52). Boiti dati, wi kan aksi Yehovah fu yepi wi fu kisi „deki-ati” (1 Tes. 2:2). Wan studenti fu a Gileadskoro ben taki: „Mi kon si taki begi e yepi te mi e feni en muilek fu taki nanga sma.” Efu yu e frede fu taki, dan yu kan begi syatu na ini yu ati.—Neh. 2:4.
4. Sortu marki wi kan bigin poti gi wisrefi, èn fu san ede?
4 Soleki fa wi sabi, dan te wi kisi na okasi fu gi kotoigi, wi no abi fu bigin a takimakandra nanga wan Bijbeltekst, noso soleki fa wi ben o bigin na ini a preikiwroko. A kan bun fu poti en leki marki fu bigin wan takimakandra, sondro fu denki taki wi musu gi kotoigi wantewante. Furu preikiman e taki dati te den e du disi, dan den e kon kisi a deki-ati di de fanowdu fu bigin taki te fu kaba fu a bun nyunsu. Efu a sma no wani taki, dan yu no musu dwengi a sma fu taki nanga yu. Tapu a takimakandra na wan switi fasi èn go doro nanga san yu ben e du.
5. San e yepi wan sisa di e syensyen fu gi kotoigi te a kisi na okasi?
5 Te wan sisa di e syensyen e bai sani na wowoyo, dan a e luku wan sma, èn a e lafu na wan switi fasi nanga en. Efu a sma e lafu baka nanga en, dan a e taki wan sani syatu. Efu a sma e arki, dan dati e gi a sisa deki-ati fu taki go doro. A e arki a sma bun èn a e pruberi fu si sortu pisi fu a bun nyunsu ben o hari a sma prakseri. Fu di a sisa disi e bigin takimakandra na so wan fasi, meki a ben man prati furu publikâsi èn a ben man bigin wan Bijbelstudie srefi.
6. Fa wi kan bigin wan takimakandra nanga sma?
6 Fa fu bigin wan takimakandra: San wi kan taki fu bigin wan takimakandra? Di Yesus ben bigin taki nanga na uma na a peti, dan a aksi na uma nomo fu gi en pikinso watra fu dringi (Yoh. 4:7). Sobun, kande wi kan bigin wan takimakandra fu di wi e taki odi na wan switi fasi noso fu di wi e poti wan aksi. Te yu e taki nanga a sma, dan kande yu o kisi na okasi fu taki fu wan tori fu Bijbel èn kande yu kan prani wan siri fu a bun nyunsu (Preik. 11:6). Son preikiman ben abi bun bakapisi di den ben taki wan sani di hari sma prakseri èn di e meki wan aksi opo kon. Fu eksempre, te yu e wakti fu go na datra, yu kan bigin wan takimakandra fu di yu e taki: „Mi o breiti te mi no o siki moro.”
7. Te wi e poti prakseri na sani di wi e si, dan fa dati kan yepi wi fu gi kotoigi?
7 Te wi e poti prakseri na sani di wi e si, dan dati sa yepi wi tu fu bigin takimakandra. Efu wi e si wan papa noso wan mama nanga wan pikin di abi bun maniri, dan wi kan prèise a papa noso a mama, èn wi kan aksi: „San e yepi yu fu kweki yu pikin bun?” Te wan sisa e arki den tori di sma na en wrokope e taki, dan a e taki nanga den fu spesrutu sani di e hari a prakseri fu den. Di a sisa disi kon sabi taki wan uma na en wrokope ben o trow, dan a gi en wan Ontwaakt! di e taki fa fu sreka sani gi wan trow. Disi meki taki a ben man taki go moro fara nanga na uma fu Bijbel.
8. Fa wi kan gebroiki den publikâsi fu wi fu bigin takimakandra?
8 Wan tra fasi fa wi kan bigin wan takimakandra, na te wi e leisi den publikâsi fu wi pe trawan kan si wi. Wan brada e opo A Waktitoren noso Ontwaakt! na wan artikel di abi wan nen di o hari sma prakseri èn a e bigin leisi en. Te a si taki wan sma krosibei fu en e luku a tijdschrift, dan a e poti wan aksi noso a e taki wan sani syatu fu na artikel. Nofo tron a kan bigin wan takimakandra na so wan fasi èn a kan gi kotoigi. Te wi e libi wan fu den publikâsi fu wi na wan presi pe trawan kan si dati, dan na so wi kan hari a prakseri fu sma na wrokope noso na skoro. Disi kan meki taki densrefi e kon aksi wi sani di abi fu du nanga a publikâsi dati.
9, 10. (a) Fa wi kan suku okasi fu gi kotoigi? (b) Na sortu fasi yu du disi?
9 Suku okasi: Fu di a preikiwroko de tumusi prenspari na ini a ten disi, meki wi no musu wakti teleki wan okasi opo kon fu man gi kotoigi. Na presi fu dati, wi musu suku okasi fu gi kotoigi te wi e du den sani di wi gwenti du na ini wi aladei libi. Prakseri na fesi sortu sma yu kan miti, èn prakseri fa yu kan bigin wan switi takimakandra nanga den. Abi wan Bijbel na yu èn sosrefi publikâsi di yu kan libi gi den sma di wani sabi moro.—1 Petr. 3:15.
10 Furu preikiman feni difrenti fasi fa den kan gi kotoigi te den kisi na okasi. Wan sisa e libi na ini wan gebow pe waktiman nanga ala sortu kefalek sani de fu kibri den sma gi fufuruman. Na a pisi pe sma fu a gebow e kon fu meki prisiri, a e sidon meki puzzel fu wan moi kontren. Te sma e stop fu taigi en fa a prenki moi, dan a e gebroiki na okasi dati fu bigin wan takimakandra nanga den èn fu taigi den fu a pramisi fu Bijbel di e taki fu „wan nyun hemel nanga wan nyun grontapu” (Openb. 21:1-4). Yu kan prakseri na sortu fasi yu kan suku okasi fu gi kotoigi?
11. Fa wi kan seti sani fu go baka na wan sma di ben arki wi?
11 Go baka na den sma di ben wani sabi moro: Efu yu miti wan sma di ben arki, dan pruberi fu go baka na en. Te a fiti, dan yu kan taigi a sma: „Mi ben feni en moi fu taki nanga yu. Pe mi kan miti yu so taki wi kan taki baka?” Son preikiman e gi a sma den adres nanga den telefon nomru, èn den e taki: „Mi ben lobi a takimakandra di wi ben abi. Efu yu wani sabi moro fu san wi ben taki, dan yu kan miti mi, noso yu kan bel mi.” Efu yusrefi no man go baka na a sma, dan seti sani so taki den sma fu a gemeente na ini a birti kan du dati. No draidrai fu gi a sekretarsi fu a gemeente fu yu a papira Te bezoeken anderstalig adres (S-43), pe yu skrifi a nen nanga na adres fu a sma.
12. (a) Fu san ede wi musu skrifi a ten di wi e gi kotoigi na wan okasi? (b) Sortu moi bakapisi brada nanga sisa ben abi fu di den gi kotoigi di den kisi na okasi? (Luku a faki „Den bun bakapisi te wi e gi kotoigi te wi kisi na okasi!”)
12 Wi musu skrifi a ten di wi e gi kotoigi na wan okasi. Fu dati ede, sorgu taki yu no frigiti fu skrifi dati, srefi efu na wan tu miniti nomo wan dei. Prakseri a sani disi: Efu ibri preikiman gi kotoigi te a kisi na okasi feifi miniti wan dei, dan dati ben o de 17 milyun yuru wan mun!
13. San musu meki taki wi wani gi kotoigi te wi kisi na okasi?
13 Wi abi a moro bun reide fu gi kotoigi te wi kisi na okasi. Dati na fu di wi lobi Gado nanga tra sma (Mat. 22:37-39). Fu di wi abi bigi warderi gi den moi fasi fu Yehovah èn gi den sani di a abi na prakseri fu du, meki wi e taki fu a „kownu [disi] di e tiri nanga furu glori” (Ps. 145:7, 10-12). Fu di wi e broko wi ede trutru nanga tra sma, meki wi e teki ibri okasi di fiti fu prati a bun nyunsu nanga den aladi a ten de ete fu du dati (Rom. 10:13, 14). Te wi e prakseri na fesi fa wi kan gi kotoigi na difrenti okasi èn te wi e sreka wisrefi fu du dati, dan wi alamala o man preiki na so wan fasi èn kande wi o kisi a prisiri tu fu meki wan reti-sma kon sabi den tru tori fu Bijbel.
[Prenspari pisi na tapu bladzijde 2]
A kan de wan yepi gi yu fu poti en leki marki fu miti sma èn bigin wan takimakandra nanga den
[Prenspari pisi na tapu bladzijde 3]
Furu preikiman feni difrenti fasi fa den kan gi kotoigi te den kisi na okasi
[Faki na tapu bladzijde 3]
San yu kan du fu bigin takimakandra
◼ Begi fu kisi yepi so taki yu kan bigin taki nanga wan sma
◼ Suku fu taki nanga sma di gersi leki den abi switifasi èn di no e hasti
◼ Luku a sma, lafu nanga en, èn taki wan sani syatu di un ala tu feni moi
◼ Arki bun
[Faki na tapu bladzijde 4]
Den bun bakapisi te wi e gi kotoigi te wi kisi na okasi!
• Di wan brada ben wakti na wan presi fu meki en oto, dan a ben gi kotoigi na den sma drape èn a gi den a papira fu kari den kon na a publikitaki. Na wan kongres di ben hori wán yari baka dati, wan brada di a no ben sabi taki en odi na wan switi fasi. A ben de wan fu den man di a ben gi wan kari na a presi pe a ben go meki en oto wán yari na fesi! A man ben go arki a publikitaki èn a ben gi en nen fu kisi Bijbelstudie. En nanga en wefi ben teki dopu.
• Wan sisa di kon na ini a tru anbegi fu di wan sma ben gi en kotoigi na wan okasi, ben si taki a abi wan spesrutu kontren pe a ben kan preiki. Dati ben de den sma di den pikin fu en sabi. Na so a e preiki gi birtisma, papa nanga mama fu pikin na skoro èn den sma di a e miti te a musu go na skoro gi en pikin. Te a e taki fa a nen, dan a e taki syatu fu wan moi sani di e sori taki Bijbel na wan prenspari yepisani gi en fu kweki en pikin. Baka dati a e taki fu wan tra tori. Fu di a bigin a takimakandra kaba, meki a e feni en moro makriki fu taki fu Bijbel wan tra leisi nanga a sma. Fu di a e gi kotoigi na a fasi disi, meki a ben man yepi 12 sma fu teki dopu.
• Di wan man di e seri verzekering ben fisiti wan sisa, dan a sisa teki na okasi dati fu gi kotoigi. A sisa aksi a man efu a ben o wani abi a dyaranti taki a gosontu fu en o de bun, taki a o de koloku, èn taki a o libi fu têgo. A man ben wani dati, èn a aksi a sisa fu sortu verzekering bedrijf a ben e taki. A sisa sori a man san Bijbel e pramisi èn a gi en wan fu den publikâsi fu wi, di a man leisi na ini wan bakadina. Sani ben seti so taki a man ben kan studeri Bijbel, èn a bigin go na den konmakandra. Bakaten a man disi teki dopu.
• Di wan sisa ben de na ini wan opolani, dan a bigin taki nanga na uma di ben e sidon na en sei, èn na so a ben man gi en kotoigi. Di na opolani saka, dan a sisa gi na uma en adres nanga telefon nomru èn a gi en a deki-ati fu aksi fu studeri Bijbel te a miti Yehovah Kotoigi wan tra leisi. A tra dei fu en, tu Kotoigi naki na a doro fu na uma. Na uma bigin studeri Bijbel, a go na fesi heri esi, a teki dopu, èn syatu baka dati ensrefi ben e studeri Bijbel nanga dri sma.
• Wan breni brada di abi 100 yari èn di e tan na wan presi pe sma e sorgu gi owrusma, gwenti fu taki: „Wi abi a Kownukondre fanowdu.” Disi meki taki den sma di e sorgu gi den owrusma èn sosrefi sikisma poti aksi gi en. Na so fasi a brada man fruteri san na a Kownukondre. Wan fu den uma di e wroko drape, aksi en san a o du na ini Paradijs. A taigi en: „Mi o si baka, mi o waka baka, èn mi o bron mi rolsturu.” Fu di a brada disi breni, meki a e aksi na uma disi fu leisi den tijdschrift gi en. Di na umapikin fu a brada disi ben kon luku en, na uma disi aksi na umapikin efu a kan tyari den tijdschrift go na oso. Wan tra sma di e wroko drape taigi na umapikin fu a brada disi: „A nyun sani di wi e taki dyaso, na: ’Wi abi a Kownukondre fanowdu.’”
• Wan sisa di ben e wakti na ini wan rij na wan presi pe sma e nyan, ben yere fa wan grupu owru man di ben e sidon krosibei fu en, ben e taki nanga makandra fu politiek afersi. Wan fu den man ben taki dati a tirimakti no man lusu den problema fu wi. A sisa prakseri na ensrefi: ’Now na a okasi fu taki wan sani.’ A begi syatu èn a go na den man. Baka di a taki fa a nen, a taigi den fu wan tirimakti di o lusu den problema fu libisma, èn dati na Gado Kownukondre. Baka dati a gi den wan brochure di a ben abi. Leti na a momenti dati a basi fu a presi waka kon. A sisa ben prakseri taki a basi ben o taigi en fu gowe. Ma na presi fu dati, a taigi en taki a ben e arki èn a ben wani wan brochure tu. Wan uma di ben wroko drape ben e arki tu, èn a waka miti a sisa aladi a ben e krei. Na uma disi ben studeri Bijbel fosi, èn now a ben wani bigin baka.