Prèise Yehovah fu di yu e gi kotoigi na ibri okasi
1 Den getrow futuboi fu Yehovah e suku okasi fu prèise en ibri dei (Ps. 96:2, 3; Hebr. 13:15). Wan fasi fa wi kan du disi na te wi e gi kotoigi na ibri okasi. Furu anbegiman fu Yehovah na ini a ten disi de nanga tangi na ati taki den kon sabi a Kownukondre boskopu fu di wan sma ben gebroiki na okasi fu gi den kotoigi.
2 Te yu e gebroiki ibri okasi fu gi wán sma kotoigi, dan furu tron disi e meki taki trawan kan yere a Kownukondre boskopu tu. Fu eksempre, di Yesus ben taki nanga a Samaria uma na a peti fu Yakob, dan disi ben meki taki furu tra sma ben wani sabi moro fu a bun nyunsu (Yoh. 4:6-30, 39-42). Di Paulus nanga Silas ben de na ini dungru-oso na ini Filipi, dan den ben gi kotoigi na a man di ben e hori wakti drape. A man disi nanga en heri osofamiri ben teki a waarheid.—Tori. 16:25-34.
3 Okasi di wi kan gebroiki fu gi kotoigi: Na sortu okasi yu kan gi kotoigi? Sonwan e gi kotoigi te de e go na wenkri, te den e teki bus, noso te den e wakti fu go na datra. Trawan man gi kotoigi te den abi pauze na den wrokopresi noso na skoro. Te yu e poti wan Bijbel publikâsi na wan presi pe sma kan si dati, dan dati kan meki taki den sa wani sabi moro fu a bribi fu wi.—1 Petr. 3:15.
4 Fa fu bigin gi kotoigi na ibri okasi: Wan meisje di abi seibi yari èn di ben e syensyen, ben yere na wan konmakandra taki a de tumusi prenspari gi ala sma fu preiki. Sobun, di a ben go nanga en mama na wenkri, dan a ben poti tu brochure na ini en tas. Di en mama ben pai gi den sani di a ben bai, dan a meisje ben pristeri wan brochure na wan uma. Na uma disi ben teki a brochure na wan switi fasi. Di en mama ben aksi en fa a du kisi deki-ati fu go taki nanga na uma aladi a e syen, dan a meisje taki: „Mi ben taki ini misrefi: Wan, tu, dri! Dan mi go!”
5 Efu wi wani gi kotoigi na ibri okasi, dan wi alamala musu de fayafaya, neleki a pikin meisje. San kan yepi wi? Begi fu kisi deki-ati fu man taki nanga sma (1 Tes. 2:2). Sreka yusrefi fu poti wan aksi noso fu taki wan sani di e hari sma prakseri, so taki yu kan bigin wan takimakandra. Te yu du dati, dan yu musu frutrow taki Yehovah sa blesi a muiti di yu e meki.—Luk. 12:11, 12.
6 Te wi gebroiki ibri okasi fu gi kotoigi na sma di wi e miti ala dei, dan disi e tyari prèise gi Yehovah èn a e gi wi prisiri. A kan yepi wan sma fu kon na tapu a pasi di e tyari wi go na têgo libi.