Yu de srekasreka fu preiki te yu kisi na okasi?
1. Sortu eksempre e sori taki a kan abi bun bakapisi te wi e preiki te wi kisi na okasi?
1 A kan abi bun bakapisi te wi e preiki te wi kisi na okasi. Bijbel abi furu eksempre fu sma di ben abi bun bakapisi fu di den ben preiki di den kisi na okasi (Yoh. 4:7-15). San wi kan du fu sreka wisrefi fu preiki te wi kisi na okasi?
2. Fa a fasi fa wi e weri krosi èn e moi wisrefi kan meki taki wi de srekasreka fu preiki?
2 A fasi fa wi e weri krosi èn e moi wisrefi: A bun fu poti prakseri ala ten na a fasi fa wi e weri krosi èn e moi wisrefi, fu di dati o yepi wi fu taki fri nanga trawan fu a bribi fu wi (1 Tim. 2:9, 10). Efu wi e firi taki a fasi fa wi weri krosi no fiti, dan a kan taki wi no o wani preiki. Ma te wi weri bun krosi di fiti èn di krin, dan dati kan hari a prakseri fu sma. Fu eksempre, wan Kotoigi trowpaar di ben e reis èn di ben weri krosi na wan fasi di fiti, ben sidon na sei wan man di ben abi a Moslim bribi. Di a man si fa den weri krosi, dan a aksi den efu den na Kresten. Disi meki taki den ben abi wan Bijbel takimakandra, di ben teki dri yuru langa.
3. Fa na eksempre fu Yesus ben yepi yu fu bigin wan takimakandra?
3 Bigin takimakandra: Di Yesus ben miti a Samaria uma na a peti fu Yakob, dan a ben aksi na uma nomo fu gi en pikinso watra fu dringi. Na so a ben bigin a takimakandra. Na a srefi fasi, wi o man bigin wan takimakandra te wi e taki wan syatu sani, noso te wi e poti wan makriki aksi. Aladi wi kan draidrai son tron fu bigin wan takimakandra, toku te wi e frutrow tapu a yepi fu Yehovah, wi kan kisi ’deki-ati’ fu bigin wan takimakandra.—1 Tes. 2:2.
4. Fa wi kan de srekasreka fu preiki te wi kisi na okasi?
4 Suku okasi: Furu preikiman ben feni okasi fu preiki. Luku a situwâsi fu yu èn prakseri sortu sma yu kan miti ibri dei. Tyari publikâsi di yu kan gebroiki èn wan pikin Bijbel. Poti prakseri na san yu e si èn sori taki yu wani kon sabi den sma di yu e miti. Te yu e prakseri na fesi sortu okasi yu kan kisi na ini a dei, dan a no de fu taki dati yu o de srekasreka fu gi wan bun kotoigi.—Fil. 1:12-14; 1 Petr. 3:15.
5. Fu san ede wi musu sreka wisrefi na fesi fu preiki te wi kisi na okasi?
5 Wi abi tu bun reide fu gebroiki den okasi di wi e kisi fu preiki. Dati na lobi gi Gado èn gi tra sma (Mat. 22:37-39). Fu di a de tranga fanowdu fu du a preikiwroko, meki wi musu sreka wisrefi na fesi fu preiki te wi kisi na okasi. Wi musu de srekasreka fu gebroiki ibri bun okasi fu prati a bun nyunsu fu a Kownukondre nanga tra sma, now di ten de ete.—Rom. 10:13, 14; 2 Tim. 4:2.