Yu kan du moro te yu de nanga pensyun?
1 Furu sma di e wroko tranga wani fu go nanga pensyun, fu di na a ten dati den no sa abi fu wroko tranga èn den no sa abi a druk fu den grontapuwroko moro. Ma furu tron, den sma di e go nanga pensyun e sori fu abi wan mi-no-ke fasi, a libi fu den soi, èn den e owru moro esi fu di den no e wroko moro. Efu wan sma no abi wan sani fu du di abi winimarki, dan dati sa meki taki a sma o broko en ede moro nanga ensrefi. Wan koranti na ini Brasyonkondre meki wan raportu di e sori taki den lantiman di go nanga pensyun ’no abi prisiri moro, den e fuga, den e firi taki tra sma no lobi den, èn den e firi taki trawan no abi den fanowdu. Moro ete, den sma disi e firi brokosaka èn den e firi taki a libi fu den no abi wan marki.’
2 Kontrari fu dati, furu Kresten di e go nanga pensyun e si disi leki wan bigi okasi fu du moro na yeye fasi. Wan brada di bigin pionier tu wiki baka di a doro 65 yari, ben taki: „Noiti ete na ini mi libi mi kisi so furu blesi leki na ini den tin yari di mi pionier.” Wan trowpaar ben skrifi: „Den moro bun yari na ini wi libi bigin na a ten di wi bigin pionier.” Fu tru, pensyun na wan bigi okasi gi furu sma fu du moro na ini a diniwroko fu den èn fu kisi bigi blesi fu Yehovah.
3 Tan du furu so taki yu kan abi bun bakapisi: Furu fu den sma di de nanga pensyun now, ben leri fu wroko tranga sensi den yongu yari, fu di den no ben abi den makriki wrokosani noso tra sani di wi abi na ini a ten disi. Aladi den no abi a krakti fu wan yongusma moro, toku den sma disi man du a wroko fu den heri bun. Na ini wan pisi kontren di wan bijkantoro e luku, 22 procent fu den pionier abi sowan 60 yari, dati na sowan 20.000 brada nanga sisa. Den owruwan disi de wan bigi yepi na ini a preikiwroko. Na ondrofeni di den abi èn den fasi fu Gado di den e sori, na winimarki gi a gemeente pe den de.—Yak. 3:17, 18.
4 Te wan sma e tan du furu na ini a Kresten diniwroko, dan dati e meki taki a sma abi wan moro bun gosontu èn wan moro bun libi. Wan sisa fu 84 yari di bigin pionier di a go nanga pensyun, ben taki: „Den furu bijbelstudie di mi e hori nanga den sma di wani sabi moro, e yepi mi fu tan gebroiki mi frustan. Mi e waka furu fu di mi no abi wan oto. Disi e meki mi tan gosontu.” Wan trowpaar di kon owru kaba ben taki: „A diniwroko e meki wi firi bun fu di wi e tan buweigi èn a e meki wi tan gebroiki wi frustan. Ala ten wi de nanga makandra. Wi e lafu furu èn wi abi prisiri na ini a libi.”
5 Dini na wan presi pe moro preikiman de fanowdu: Son Kresten di go nanga pensyun, abi nofo moni fu man froisi go na wan tra presi fu go dini pe moro preikiman de fanowdu. Trawan e du moro na ini a diniwroko fu di den e dini na ini wan kontren pe den sma e taki wan tra tongo. Neleki na apostel Paulus, den fayafaya preikiman disi „e du ala sani fu a bun nyunsu ede, so taki [den] kan prati en nanga trawan”.—1 Kor. 9:23.
6 Wan trowpaar ben go na ini a pionierwroko baka di den kweki den tu manpikin fu den kon bigi. Baka di den pionier wan tu yari den bigin leri Sneisitongo. Now den abi moro leki 70 yari. No solanga pasa, den ben abi a prisiri fu si fa a Sneisi grupu pe den e wroko, kon tron wan gemeente. Disi e sori taki den trowpaar di e du a srefi sani disi, de wan blesi trutru!
7 Yu no kan go nanga pensyun na ini a diniwroko: Aladi moro furu sma e go nanga pensyun fu den grontapuwroko te fu kaba, toku Kresten no e go nanga pensyun na ini a diniwroko di den e du gi Gado. Ala sma musu tan getrow „te na a kaba” (Mat. 24:13, 14). A no de fu taki dati son sma no man du so furu leki fosi na ini a diniwroko fu Yehovah, fu di den kon owru kaba. Ma a e gi wi furu deki-ati fu si taki nanga den heri ati den e du ala san den man! A Wortu fu Gado e gi den a dyaranti taki Yehovah no sa frigiti a wroko di den du nanga a lobi di den e sori gi en nen.—Luk. 21:1-4; Hebr. 6:10.
8 Efu yu e doro a yari fu go nanga pensyun, dan fu san ede yu no e poti a tori disi na ini begi èn prakseri fa yu kan teki bun bosroiti te sani e kenki na ini yu libi? Nanga yepi fu Gado, yu sa si taki te yu go nanga pensyun yu sa abi na okasi fu du moro. Te yu sa du disi dan dati sa tyari prèise gi Yehovah èn yu sa kisi furu blesi.—Ps. 148:12, 13.