Den e kiri Yesus Krestes

BAKA dri nanga afu yari di Yesus preiki èn gi leri, a sabi now taki a libi fu en na grontapu o kon na wan kaba. Den Dyu kerki fesiman ben e span anu makandra fu kiri en, ma den ben frede taki den sma di e bribi taki Yesus na wan profeiti, ben o tyari wan dyugudyugu kon. Na a srefi ten, Satan e meki Yudas Iskariot, wan fu den 12 apostel fu Yesus, tori en. Den kerki fesiman ben agri fu gi Yudas 30 solfru moni fu tori Yesus.

Tapu a lasti neti fu Yesus en libi, a e kon makandra nanga den apostel fu en fu hori a Paskafesa. Baka di a seni Yudas gowe, a e seti wan nyun fesa, èn dati na a Neti-nyanyan fu Masra. A ben teki wan brede, a begi, èn a gi dati na den tra 11 apostel. A ben taki: „Disi e prenki mi skin di mi o gi fu a bun fu unu. Tan du disi fu memre mi.” A ben du a srefi tu nanga a kan nanga win, èn a ben taki: „A kan disi e prenki a nyun frubontu di seti fu di mi gi mi brudu di o lon fu unu ede.”​—Lukas 22:19, 20.

Yesus ben abi furu sani fu taigi den apostel fu en, a neti dati. A ben gi den wan nyun komando, taki den musu sori lobi gi makandra sondro fu denki densrefi. A ben taki: „Na a fasi disi ala sma o sabi taki unu na mi disipel, te unu lobi makandra” (Yohanes 13:34, 35). A ben gi den a rai fu no bruya te den sari sani ben o pasa. Yesus ben begi fayafaya gi den. Den ben singi prèisesingi makandra èn baka dati den go na ini a dyari fu Getseimanei.

Na ini a dyari fu Getseimanei, Yesus saka kindi èn a begi nanga en heri ati. Syatu baka dati, wan grupu srudati, priester, nanga trawan doro fu grabu en. Yudas waka go miti en èn a sori den sma suma na Yesus fu di a gi en wan bosi. Di den srudati tai Yesus, den apostel lon gowe.

Di Yesus ben tanapu na fesi a Dyu hei krutubangi, dan a taki dati en na a Manpikin fu Gado. Den krutu en fu di den feni taki a taki ogri fu Gado èn den ben feni taki a musu dede. Baka dati den tyari Yesus go na a Rome Tiriman, Pontius Pilatus. Aladi Pontius Pilatus no ben feni nowan ogri na Yesus, toku a gi Yesus abra na a grupu sma di ben bari taki a musu dede.

Den tyari Yesus go na Golgota, pe den Rome srudati spikri en na wan postu. Na wan wondru fasi a ben kon dungru aladi a ben de deiten. Moro lati a bakadina dati, Yesus dede, èn wan bigi gronseki ben de. Den ben poti en skin na ini wan grebi di den ben meki na ini wan stonbergi. Na a tra dei, den priester tapu a grebi èn den poti wan waktiman na a mofo fu a grebi. Yesus ben o tan na ini a grebi dati? Nôno. Wan fu den moro bigi wondru ben o pasa.

​—Den tori disi teki puru fu Mateyus kapitel 26 nanga 27; Markus kapitel 14 nanga 15; Lukas kapitel 22 nanga 23; Yohanes kapitel 12 te go miti 19.