Yu kan kisi wini fu a nyun frubontu

1. San na den tu sani di Yeremia ben musu du?

A WROKO di Yehovah ben gi Yeremia fu du ben abi fu du nanga tu sani. Wan fu den sani, na taki a ben musu ’rutu puru, naki na gron, pori, èn trowe na gron’. Wan tra sani, na taki a ben musu ’bow èn prani tu’. A fosi sani di a profeiti du, na taki a bigin taigi den heimemre Dyu sortu ogri-ati sani den ben e du. A sori den tu taki Gado ben o strafu den èn sosrefi den sma fu Babilon. Ma Yeremia ben e taki profeititori tu di ben e sori taki bun ten ben o kon. A ben taki dati wan ten ben o kon te Gado ben o meki taki den sani di ben musu bow, ben o bow èn taki den sani di ben musu prani, ben o prani. Wan fasi fa Yeremia meki a di fu tu sani disi kon tru, na taki a sori den Dyu taki den ben o drai go baka na a kondre fu den.​—Yer. 1:10; 30:17, 18.

2. Fu san ede Yehovah strafu a pipel fu en, èn fa a du dati?

² Yeremia meki bekènti taki Gado pipel ben o drai go baka na Yerusalem, ma dati no ben wani taki dati Gado ben o pepepepe en pipel fosi a ten dati doro èn taki a ben o tapu fu du san reti. Nôno, a ben o strafu den tranga-ede Dyu. (Leisi Yeremia 16:17, 18.) Furu sma na ini a ten fu Yeremia no ben e „du san reti” noso ’san Gado wani’ èn Yehovah no ben o hori pasensi nanga den moro. A ben taki: „Mi kon weri fu yu. Mi no o sari yu moro” (Yer. 5:1; 15:6, 7). Den Dyu dati ben e „du den srefi ogri di den afo fu den ben e du sensi ten. Den afo fu den ben weigri fu gi yesi na” Yehovah. Boiti dati, den meki Gado ati bron di den gowe libi en fu go huru nanga falsi gado (Yer. 11:10; 34:18). Yehovah ben o gi a pipel fu en piri-ai. A ben o gi den ’a strafu di den frudini’. A sani dati ben kan meki taki son sma ben o kisi densrefi èn drai kon baka na en.​—Yer. 30:11; 46:28.

3. Fu san ede yu musu poti prakseri na a profeititori di e taki fu a nyun frubontu?

³ Gado meki Yeremia taki na fesi taki a ben o seti wan nyun frubontu. A frubontu disi ben o tyari wini kon gi moro sma èn den wini dati ben o de fu wan langa ten. Te wi e luku den profeititori di Yeremia skrifi, dan wi e si krin fu san ede wi musu poti prakseri na a nyun frubontu disi di o tyari furu wini kon gi wi. A frubontu disi ben o kon na ini a presi fu a frubontu di Gado ben meki nanga den Israelsma, baka di den komoto na Egepte. Moses ben de a mindriman fu a frubontu disi. (Leisi Yeremia 31:31, 32.) Di Yesus Krestes seti a neti-nyanyan fu Masra, dan a taki tu fu a nyun frubontu dati. Fu dati ede a frubontu disi prenspari gi wi tu (Luk. 22:20). Na fu a frubontu disi na apostel Paulus ben e taki di a skrifi a brifi gi den Hebrewsma. A ben taki fu a profeititori fu Yeremia èn a sori den sma o prenspari a nyun frubontu de (Hebr. 8:7-9). Ma san na a nyun frubontu dan? Fu san ede a ben kon de fanowdu? Suma de na ini a frubontu disi èn fa yu kan kisi wini fu en? Meki wi go luku.

FU SAN EDE A NYUN FRUBONTU BEN DE FANOWDU?

4. San a Wètfrubontu du gi den Israelsma?

⁴ Fu kan frustan fu san ede Gado meki a nyun frubontu, wi musu frustan fosi fu san ede a ben meki na owruwan, a Wètfrubontu. Na difrenti fasi a frubontu disi ben musu yepi a pipel di ben e fruwakti a Pramisi Pikin, di ben o meki taki furu sma kisi blesi (Gen. 22:17, 18). Di den Israelsma taki dati den ben o hori a Wètfrubontu, dan den tron a „spesrutu gudu” fu Gado. A frubontu dati ben e sori taki den priester fu a pipel ben o komoto na ini a lo fu Leifi. Di Yehovah meki a frubontu nanga den Israelsma na Sinai-bergi, dan a taki dati den ben o tron „wan kownukondre fu priester èn wan santa pipel”. Ma a no taki o ten èn fa dati ben o pasa (Eks. 19:5-8). Solanga a ten dati no ben doro, a frubontu ben o sori krin taki den Israelsma no ben man du ala sani di a Wèt ben e taki. Sobun, a ben e tyari kon na krin taki den ben abi sondu. Dati meki solanga a Wèt ben de, den Israelsma ben musu tyari ofrandi ibri tron baka fu kan kisi pardon fu sondu. Toku a ben de krin taki wan moro bun ofrandi ben de fanowdu. Wan ofrandi di ben bun dorodoro, so taki sma no ben o abi fu tyari ofrandi ibri tron baka. Iya, a ben de fanowdu trutru taki sma kisi pardon fu sondu fu ala ten.​—Gal. 3:19-22.

5. Fu san ede Yehovah ben taki dati a ben o meki wan nyun frubontu?

⁵ Te wi e luku a tori disi, dan wi e frustan fu san ede Gado meki Yeremia fruteri taki wan nyun frubontu ben o meki bakaten, aladi a Wètfrubontu ben de ete. Fu di Yehovah abi lobi nanga switifasi, meki a ben wani taki moro leki wán pipel kisi yepi fu ala ten. Luku san Gado meki Yeremia skrifi fu den sma di ben o de na ini a frubontu: „Mi o gi den pardon fu den ogri sani di den du, èn mi no o memre den sondu fu den moro” (Yer. 31:34). Aladi Gado ben taki a sani dati na ini a ten fu Yeremia, toku a pramisi disi e gi ala libisma howpu fu a ten di e kon. Fa so?

6, 7. (a) Fa son sma e prakseri fu den sondu fu den? (b) Fu san ede a kan de wan deki-ati gi yu te yu e prakseri a nyun frubontu?

⁶ Wi na sondu libisma ete èn nofo tron wi e si dati te wi e meki fowtu. Na so a ben de nanga wan brada di ben e feti nanga wan bigi problema di a ben abi. A e taki: „Te mi ben e fadon go baka na ini a sani, dan mi no ben e firi bun kwetikweti. Mi ben e denki taki noiti mi ben o man kisi pardon trutru fu den sani di mi du. A ben hebi gi mi fu begi. Nofo tron mi ben e bigin so: ’Yehovah, mi no sabi efu yu o arki a begi fu mi, ma . . . ’” Son sma di ben de na ini wan srefi sortu situwâsi noso di ben du wan sondu, ben firi leki „wan bigi wolku” ben e tapu den begi fu den fu doro Gado (Sari 3:44). Trawan di ben du wan ogri e tan broko den ede nanga a sani dati, awinsi na baka omeni yari. Srefi Kresten di de bun eksempre e taki sani son tron di e hati den bakaten.​—Yak. 3:5-10.

⁷ Nowan fu wi no musu denki taki noiti wi o tyari wisrefi na wan fasi di no fiti (1 Kor. 10:12). Srefi na apostel Paulus ben sabi taki a ben e meki fowtu. (Leisi Romesma 7:21-25.) A sani disi musu meki wi prakseri a nyun frubontu. Gado ben pramisi taki wan prenspari blesi di a nyun frubontu ben o tyari kon, na taki Gado no ben o memre den sondu fu wi moro. Wan moro moi sani leki dati no de! A musu de so, taki Yeremia kisi deki-ati di a fruteri sma a sani dati. Wisrefi kan kisi deki-ati tu te wi e leri moro fu a nyun frubontu èn te wi e si fa wi kan kisi wini fu dati.

SAN NA A NYUN FRUBONTU?

8, 9. San Yehovah lasi fu kan gi sma pardon fu sondu?

⁸ O moro yu e kon sabi Yehovah, o moro yu o frustan taki en na wan Gado di e sori switifasi nanga sari-ati gi sondu libisma (Ps. 103:13, 14). Di Yeremia ben e taki nanga sma fu a nyun frubontu, dan a sori den taki Yehovah ben o „gi den pardon fu den ogri sani di den du”, èn taki a no ben o memre den sondu fu den moro (Yer. 31:34). We, kande Yeremia ben aksi ensrefi fa Gado ben o man gi sma pardon na a fasi dati. Toku a ben frustan taki a nyun frubontu di Gado ben taki fu en, ben o de wan kruderi di Gado ben o meki nanga libisma. Awansi fa a no fa, nanga a frubontu disi Yehovah ben o du san a ben meki Yeremia skrifi. Wan fu den sani dati, na taki a ben o gi sma pardon fu den sondu fu den. Te a ten fu Gado ben doro, a ben o tyari kon na krin moro fini fa a profeititori disi ben o kon tru, èn san a Mesias ben o du.

⁹ Kande yu si fa son papa nanga mama e pori den pikin fu den, fu di den no e piri-ai gi den. Yu denki taki na so Yehovah de tu? Kwetikweti! Disi e kon na krin te wi luku a fasi fa a nyun frubontu bigin wroko. Gado no taki nomo dati libisma no abi sondu moro. Na presi fu dati, a hori ensrefi finifini na den wèt fu en di e sori san na retidu, fu di a seti wan sani di ben o gi libisma na okasi fu kisi pardon fu sondu. A du dati aladi dati ben de wan bigi lasi gi en. Yu kan frustan disi moro bun te yu luku san Paulus skrifi di a ben e taki fu a nyun frubontu. (Leisi Hebrewsma 9:15, 22, 28.) Paulus taki dati a ’lusu-paiman meki taki sma kan kon fri fu sondu’. A taki tu dati „efu brudu no kanti trowe, dan sma no kan kisi pardon”. A brudu di Paulus e taki fu en dyaso, a no a brudu fu mankaw noso bokoboko di sma ben e tyari leki ofrandi na a ten di den ben e hori a Wèt di Gado ben gi Moses. Nôno, a nyun frubontu bigin wroko di a brudu fu Yesus kanti trowe. Na ofrandi dati di ben bun dorodoro, meki taki fu ala ten Yehovah ben kan gi sma ’pardon fu den ogri di den du, èn fu den sondu’ fu den (Tori 2:38; 3:19). Ma suma ben o de na ini a nyun frubontu disi, so taki den kisi pardon fu sondu? A no den Dyu. Yesus ben taki dati Gado ben o drai baka gi den Dyu di ben e tyari meti ofrandi soleki fa a Wèt ben e sori, èn a ben o teki tra sma fu tron en pipel (Mat. 21:43; Tori 3:13-15). Den sma dati ben de „na Israel fu Gado”. Sobun, wan grupu Kresten di ben salfu nanga santa yeye. Fu taki en syatu, Yehovah Gado ben meki a Wètfrubontu nanga sma di ben gebore leki Israelsma. Ma a meki a nyun frubontu nanga na Israel fu Gado pe sma fu ala sortu pipel de na ini. A mindriman fu a frubontu disi na Yesus.​—Gal. 6:16; Rom. 9:6.

10. (a) Suma na a „pransun” fu David di ben o „sproiti”? (b) Fa libisma kan kisi wini fu a „pransun” dati?

¹⁰ Yeremia ben abi leti di a taki dati a Mesias di ben o kon, ben o de a „pransun” fu David di ben o „sproiti”. Na wan agersi fasi, a bon di ben e prenki a kownufamiri fu David, ben koti trowe na a ten di Yeremia ben e dini leki profeiti. Ma a tompu no ben dede. Te fu kaba, Yesus gebore na ini a famiri fu Kownu David. Den ben o kari en „wi retidu e kon fu Yehovah”. A sani dati ben e sori taki retidu na wan tumusi prenspari sani gi Gado. (Leisi Yeremia 23:5, 6.) Yehovah ben gi pasi taki a wan-enkri Manpikin fu en di ensrefi meki, pina na grontapu èn taki a dede te fu kaba. Na so Yehovah ben man teki na ofrandi fu a „pransun” fu David, leki pai gi den sondu fu libisma, so taki a ben kan gi den pardon fu sondu. A sani disi ben e kruderi nanga a retidu fu en (Yer. 33:15). Na a fasi disi Gado kan si son sma leki „reti-ati sma, so taki den kan kisi libi”. Dan a e salfu den nanga santa yeye, èn den e kon na ini a nyun frubontu. Wan tra sani di e sori taki retidu prenspari gi Gado, na taki a seti sani so, taki tra sma di no de na ini a nyun frubontu kan kisi wini fu en tu, soleki fa wi o si dyonsro.​—Rom. 5:18.

11. (a) Na tapu san a wèt fu a nyun frubontu skrifi? (b) Fu san ede den „tra skapu” wani kon sabi den wèt fu a nyun frubontu?

¹¹ Yu wani kon sabi tra prenspari sani fu a nyun frubontu? We, wan fu den moro bigi difrenti na mindri a nyun frubontu nanga a Wètfrubontu abi fu du nanga den sani pe den wèt fu den ben skrifi na tapu. (Leisi Yeremia 31:33.) Den Tin Komando fu a Wètfrubontu ben skrifi na tapu plata ston di lasi gowe te fu kaba. Ma Yeremia ben taki na fesi taki den wèt fu a nyun frubontu ben o skrifi na tapu na ati fu libisma èn taki den ben o tan fu ala ten. Den wan di de na ini a nyun frubontu, den salfu Kresten, e warderi den wèt disi trutru. Ma fa a de nanga den „tra skapu” di no de na ini a nyun frubontu ma di abi a howpu fu libi fu têgo na grontapu? (Yoh. 10:16) Den sma disi lobi den wèt fu Gado tu. Te yu luku en bun, dan den de leki den trakondre sma di ben kon libi na ini Israel. Fu di den ben e hori a Wèt di Gado ben gi Moses, meki den ben e kisi wini fu dati tu.​—Lef. 24:22; Num. 15:15.

12, 13. (a) San na a wèt fu a nyun frubontu? (b) Fu san ede yu no o firi leki sma e dwengi yu fu dini Gado, te yu e hori „a wèt fu Krestes”?

¹² San yu o piki efu wan sma aksi yu: ’San na a wèt di skrifi na tapu na ati fu den salfu Kresten?’ We, Bijbel e kari a wèt disi „a wèt fu Krestes” tu. Den fosi sma di kisi a wèt disi na den sma di de na ini a nyun frubontu, na Israel fu Gado (Gal. 6:2; Rom. 2:28, 29). Fu taki en nanga wán wortu, „a wèt fu Krestes” na: lobi (Mat. 22:36-39). Fa den salfuwan e sorgu taki a wèt disi skrifi na tapu den ati? Tu prenspari fasi de fa den e du dati: den e studeri Gado Wortu èn den e begi Yehovah. Te yu luku en bun, dan ala tru Kresten musu abi a gwenti fu du den tu sani disi, srefi den wan di no de na ini a nyun frubontu ma di wani kisi wini fu en.

¹³ Bijbel e kari „a wèt fu Krestes” sosrefi „a wèt di bun srefisrefi èn di e meki sma kon fri”, noso „a wèt fu wan fri pipel” (Yak. 1:25; 2:12). Furu sma ben e hori densrefi na a Wèt di Gado ben gi Moses, fu di den gebore na wan ten di a Wèt dati ben de. Ma den sma di de na ini a nyun frubontu èn di e hori a wèt fu Krestes, no e du dati fu di den gebore na a ten di a frubontu dati meki. Nowan sma di e gi yesi na a wèt fu Krestes e dini Gado fu di sma dwengi en fu du dati. Na presi fu dati, den breiti taki a wèt fu Gado kan skrifi na tapu na ati fu libisma èn taki sma kan kisi wini nownow kaba fu a frubontu di Yeremia ben taki fu en.

DEN SMA DI E KISI WINI FU A NYUN FRUBONTU

14. Soleki fa a sori, dan suma e kisi wini tu fu a nyun frubontu?

¹⁴ Di son sma kon sabi taki na 144.000 sma nomo de na ini a nyun frubontu, dan kande den ben denki taki na den sma disi wawan o kisi wini fu en. Kande den ben prakseri dati fu di na a alayari Memrefesa fu a dede fu Krestes, na soso den salfuwan e nyan fu a brede èn e dringi fu a win di e prenki a „brudu fu a frubontu” (Mark. 14:24). Ma memre taki den wan di de na ini a nyun frubontu de leki „bakapikin” fu Abraham, neleki Yesus. Makandra nanga Yesus, den o meki taki ala pipel fu grontapu kisi blesi (Gal. 3:8, 9, 29; Gen. 12:3). Nanga a nyun frubontu disi Yehovah o du san a pramisi, fu di a o blesi ala libisma nanga yepi fu a „bakapikin” fu Abraham.

15. Sortu wroko den salfuwan o abi, soleki fa Bijbel e taki?

¹⁵ Yesus Krestes, di de a moro prenspari bakapikin fu Abraham, e dini leki Granpriester. A tyari na ofrandi di bun dorodoro èn di e meki taki sma kan kisi pardon fu den ogri nanga den sondu fu den. (Leisi Hebrewsma 2:17, 18.) Toku, Gado ben taki langa ten na fesi kaba taki „wan kownukondre fu priester èn wan santa pipel” ben o kon (Eks. 19:6). Na ini Israel fu owruten, ala priester ben e komoto fu wan spesrutu lo, aladi den kownu ben e komoto fu wan tra lo. Sobun, pe a pipel disi di ben o de leki kownu nanga priester ben o komoto? Na apostel Petrus skrifi a fosi brifi fu en gi den sma di a yeye ben meki kon santa (1 Petr. 1:1, 2). A ben taki dati den sma disi ben de „wan grupu priester di o tiri leki kownu, wan santa pipel, wan pipel di de wan spesrutu gudu” (1 Petr. 2:9). Sobun, den salfu Kresten di de na ini a nyun frubontu o dini leki priester di Krestes e tiri. Prakseri san dati wani taki! Ibri dei wi e feti nanga sondu di e „tiri leki kownu” te na a dei fu tide. Den sma di o dini leki priester ondrofeni den srefi sani dati (Rom. 5:21). Den o sabi fa a de fu meki fowtu èn fu abi konsensi fonfon. Sobun, den nanga Krestes o man frustan fa wi e firi te wi e feti nanga den sondu firi fu wi.

16. Sortu deki-ati a „bigi ipi” e kisi te den e leisi Openbaring 7:9, 14?

¹⁶ Openbaring 7:9, 14 e taki fu wan „bigi ipi” sma di „weri langa weti krosi”. Disi wani taki dati Gado e si den leki sma di krin. Nownowde, Gado e tyari a bigi ipi sma disi kon na wán fu kan pasa a „bigi banawtu” libilibi. Dati meki nownow kaba den sma disi e kon abi wan bun nen na Gado. Fu di Yehovah e si den leki reti-ati sma, meki a e kari den en mati (Rom. 4:2, 3; Yak. 2:23). Dati na wan bigi blesi trutru! Efu yu de na ini a bigi grupu sma disi, dan yu kan de seiker taki Gado wani yepi yu fu tan tyari yusrefi leki wan sma di krin.

17. Na sortu fasi wi kan taki dati Yehovah no e „memre” den sondu fu wi moro?

¹⁷ San e pasa nanga den sondu fu den wan di Gado feni bun? Soleki fa wi si kaba, dan Yehovah meki Yeremia taki: „Mi o gi den pardon fu den ogri sani di den du, èn mi no o memre den sondu fu den moro” (Yer. 31:34). Gado kan du disi gi den salfuwan, fu di Yesus ben gi en libi leki wan ofrandi. Na so a de tu taki a „brudu fu a frubontu” e meki taki Gado kan gi sma fu a bigi ipi pardon fu den sondu fu den. Te Yeremia e taki dati Gado no ben o „memre” den sondu fu den sma moro, dan dati no wani taki dati wan sani ben o pasa nanga Gado, so taki a no ben o man memre moro san pasa. Na presi fu dati, a e sori taki te Yehovah gi wan sma a piri-ai di a musu kisi èn te a gi en pardon fu di a abi berow, dan a e trowe den sondu fu a sma na En baka. Prakseri den sondu di Kownu David ben du nanga Batseiba èn nanga Uria. David kisi piri-ai èn a firi den bakapisi fu a sondu fu en (2 Sam. 11:4, 15, 27; 12:9-14; Yes. 38:17). Toku Gado no tan strafu David fu den sondu fu en. (Leisi 2 Kroniki 7:17, 18.) Soleki fa a nyun frubontu e sori, dan te Yehovah gebroiki na ofrandi fu Yesus fu gi sma pardon fu den sondu, dan a no e memre den sondu dati moro.​—Esek. 18:21, 22.

18, 19. Fa a nyun frubontu e leri wi fu gi trawan pardon?

¹⁸ Na so a nyun frubontu e poti prakseri na wan tumusi moi sani di Yehovah du gi sondu libisma, awinsi na den salfuwan di de na ini a frubontu dati, noso den wan di abi a howpu fu libi na grontapu. Yu kan bribi taki te Yehovah gi yu pardon fu yu sondu kaba, a no o taki fu den moro. A sani di Gado pramisi di a meki a nyun frubontu, e leri ibriwan fu wi wan prenspari sani. Aksi yusrefi: ’Mi e suku fu de leki Yehovah? Mi e du muiti fu no taki ibri tron baka fu den fowtu di trawan meki, te mi ben taigi den kaba taki mi gi den pardon?’ (Mat. 6:14, 15) Disi abi fu du nanga pikinpikin fowtu di trawan e meki, ma sosrefi nanga bigi sondu, soleki te wan Kresten waka gi en trowpatna. Te a tra patna taki dati a gi a wan di meki a fowtu pardon, dan a fiti fu a ’no memre a sondu dati moro’, a no so? A tru taki a no makriki fu no prakseri den fowtu fu trawan moro. Toku disi na wan fu den fasi fa wi kan teki na eksempre fu Yehovah.a

¹⁹ A sani di wi leri dyaso fu a nyun frubontu kan sori wi fa wi musu tyari wisrefi te wan sma di den ben puru fu a gemeente abi berow, so taki den teki en baka na ini a gemeente. Kon meki wi taki dati a sma disi ben meki yu lasi furu sani, noso taki a ben gi yu porinen. Dan now den teki en baka na ini a gemeente. Fa den sani di wi leisi na Yeremia 31:34 o yepi yu fu si a sma na a yoisti fasi èn fu luku bun fa yu e tyari yusrefi? Yu o gi a sma pardon sondro fu tan taki fu a sani di a ben du? (2 Kor. 2:6-8) Fu tru, disi na wan sani di ala sma di abi warderi gi a nyun frubontu musu pruberi fu du na ini den aladei libi.

BLESI DI A NYUN FRUBONTU KAN TYARI KON NOW ÈN NA INI A TEN DI E KON

20. Fa a denki fu yu e difrenti fu a di fu furu sma na ini a ten fu Yeremia?

²⁰ Na ini a ten fu Yeremia furu fu den Dyu ben e taki: „Yehovah no o du nowan bun èn a no o du nowan ogri” (Sef. 1:12). Den ben sabi pikinso suma na Yehovah èn fa a ben e prakseri. Toku den ben denki taki a no ben o du noti èn taki a no ben o fruwakti taki den hori den wèt fu en. Ma yu sabi taki Gado e si ala sani. Yu abi bigi lespeki gi Gado èn a no de fu taki dati yu no wani du nowan ogri (Yer. 16:17). Ma yu sabi tu taki Yehovah na wan Papa di lobi den pikin fu en. A e si den bun di wi e du, awinsi nowan tra sma e si dati.​—2 Kron. 16:9.

21, 22. Fu san ede sma no abi fu taigi yu moro taki „yu musu sabi Yehovah”?

²¹ Wan prenspari sani na ini a nyun frubontu na a tori disi: „Mi o poti mi wèt na ini den èn mi o skrifi en na ini den ati. Mi o tron den Gado . . . Nowan fu den o taigi en mati noso en brada: ’Yu musu sabi Yehovah!’, bika den alamala o sabi mi” (Yer. 31:33, 34). Den salfuwan di de na grontapu ete sori taki a wèt fu Gado de na ini den. Den lobi den tru tori di skrifi na ini a wèt dati èn den no e frutrow na tapu den leri fu libisma. Nanga prisiri den e fruteri den sma fu a bigi ipi den sani di den leri fu Bijbel. Na so fasi den sma disi di abi a howpu fu libi na grontapu e kon sabi Yehovah èn den e kon lobi en tu. Den de klariklari fu teki a tiri fu en èn den e bribi taki a o du san a pramisi. Kande yu na wan fu den sma dati tu. Yu kon sabi Gado leki wan trutru sma èn yu kon tron wan mati fu en. Dati na wan moi blesi trutru!

²² San yepi yu fu kon tron wan moro bun mati fu Yehovah? A no de fu taki dati yu sabi ete fa a piki den begi fu yu na difrenti okasi. Disi meki taki yu kon abi moro warderi gi a fasi fa Gado de. Kande yu memre wan tekst na ini Bijbel di yepi yu fu pasa wan problema. Na a momenti dati yu firi fa Gado horibaka gi yu. Tan memre den momenti dati. Te yu e tan studeri a Wortu fu en, dan dei fu dei yu o kon sabi en moro bun. Dati na wan blesi di yu o tan kisi.

23. Te yu sabi Yehovah, dan fa dati kan yepi yu fu no tan broko yu ede fu soso nanga wan sondu di yu ben du?

²³ Ma ete wan blesi fu a nyun frubontu de di kan tyari wini kon gi wi nownow kaba. Fu di wi kon sabi Yehovah leki a sma di e gi wi pardon fu sondu, soleki fa a pramisi di a meki a nyun frubontu, meki dati e yepi wi fu no tan abi konsensi fonfon. Fu eksempre, a kan taki wan sma ben puru bere, fosi a kon leri sabi den wèt fu Gado. Kande a abi konsensi fonfon èn kande a e sari fu di na en meki taki a pikin di ben e gro na ini en bere lasi libi. Tra sma abi den sortu firi disi fu di den ben kiri sma di den ben e feti orloku. A frulusu-ofrandi fu Yesus, di meki taki a nyun frubontu abi krakti, e sorgu taki sma di abi berow trutru kan kisi pardon. Fu di dati de so, meki wi musu man bribi taki te Yehovah gi wi pardon fu den sondu fu wi, dan gi en a tori dati pasa kaba. A no de fanowdu fu tan prakseri den sondu dati, aladi Yehovah gi wi pardon fu den kaba.

24. Fa a tori di skrifi na Yeremia 31:20 kan de wan deki-ati gi yu?

²⁴ Wi e si krin taki Gado e gi sma pardon te wi e leisi Yeremia 31:20. (Leisi en.) Na ini a tekst disi Efrayim e prenki a tin-lo kownukondre Israel na noordsei, fu di dati ben de a moro prenspari lo. Furu yari fosi a ten fu Yeremia, Yehovah ben krutu a tin-lo kownukondre dati fu di den ben e du afkodrei. Sma ben tyari den go na ini katibo. Toku Gado ben lobi a pipel dati srefisrefi èn a sori den taki a ben e firi gi den. A ben lobi den leki ’a popki fu en ai’. Te a ben e prakseri den, dan en ati ’ben e krei’, dati wani taki dati a ben e sari srefisrefi. A tori disi di skrifi na ini a srefi kapitel di e taki fu a nyun frubontu, e sori taki Yehovah lobi sma trutru èn taki a de klariklari fu gi den pardon te den abi berow fu den sondu fu den.

25. Fu san ede yu kan de nanga tangi taki Yehovah ben seti a nyun frubontu?

²⁵ A pramisi di Yehovah meki fu gi sma pardon fu sondu nanga yepi fu a nyun frubontu, o kon tru dorodoro na a kaba fu a Dusun yari tiri fu Krestes. Na a ten dati, Yesus Krestes nanga den 144.000 priester di e wroko makandra nanga en o meki taki ala libisma di tan gi yesi na Gado kon tron sma di no abi nowan sondu. Baka a lasti tesi, libisma o tron wan pisi fu Yehovah osofamiri fu anbegiman na ini hemel nanga grontapu. (Leisi Romesma 8:19-22.) Hondrohondro yari kaba libisma e geme fu di sondu e kwinsi den. Ma na ini a ten di e kon, ala libisma o „kon fri na wan tumusi moi fasi leki pikin fu Gado”. Den o kon fri fu sondu nanga dede. Sobun, yu kan bribi taki a nyun frubontu di de wan lobi-ati seti, kan meki taki yu kisi furu blesi. A „pransun” fu David kan tyari wini kon gi yu now èn fu têgo. Yu o man nyan bun fu a ten te a o krutu sani na wan „reti fasi na ini a kondre”.​—Yer. 33:15.