Moro bigi blesi e kon nanga jepi foe a njoen froebontoe

„Jesus . . . de a mindriman toe foe wan srefi sortoe moro boen froebontoe.” — HEBREWSMA 8:6.

1. Soema ben sori foe de a ’siri foe na oema’ di Gado ben pramisi na ini Eden, èn fa den ben ’masi en na a bakafoetoe’?

BAKA di Adam nanga Eva sondoe, Jehovah kroetoe Satan, a sma di ben kori Eva, èn ben taki: „Mi sa poti feantifasi na mindri joe nanga na oema èn na mindri joe siri nanga en siri. A sa masi joe na a ede èn joe sa masi en na a bakafoetoe” (Genesis 3:15). Di Jesus ben dopoe na ini a Jordan liba na ini 29 G.T., dan a Siri di ben pramisi na Eden ben kon te foe kaba. Di a dede na wan pina-oedoe na ini 33 G.T., dan wan pisi foe na owroeten profeititori dati ben kon troe. Satan ben ’masi a bakafoetoe’ foe a Siri.

2. Fa a dede foe Jesus de wan winimarki gi a libisma famiri, akroederi den eigi wortoe foe en?

² Kolokoe taki a soro dati, ala di a ben hati srefisrefi, no ben de foe ala ten. Jesus ben opo baka na dede leki wan jeje di no man dede èn ben opo go na en Tata na hemel, pe a ben pristeri a waarde foe en broedoe di a ben trowe, leki „wan loesoe-paiman ini a presi foe foeroe sma”. Na a fasi dati den eigi wortoe foe en ben kon troe: „Den moesoe opo a Manpikin foe libisma . . , so taki ibri sma di e bribi na ini en, sa abi têgo libi. Bika Gado ben lobi grontapoe sote, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi” (Mateus 20:28; Johanes 3:14-16; Hebrewsma 9:12-14). A njoen froebontoe e prei wan prenspari ròl na ini a kontroe foe a profeititori foe Jesus.

A njoen froebontoe

3. O ten den ben si a fosi leisi taki a njoen froebontoe ben wroko?

³ Sjatoe bifo Jesus dede, a ben taigi den bakaman foe en dati en broedoe di a ben trowe ben de a „broedoe foe a [njoen] froebontoe” (Mateus 26:28; Lukas 22:20). Tin dei baka di a opo go na hemel, den si taki a njoen froebontoe bigin wroko di santa jeje kanti kon na tapoe 120 disipel di kon makandra na ini wan sodro kamra na Jerusalem (Tori foe den Apostel 1:15; 2:1-4). A tjari di den ben tjari den 120 disipel disi ini a njoen froebontoe, ben sori taki a ’fosi’ froebontoe, a Wetfroebontoe, ben kon owroe now. — Hebrewsma 8:13.

4. Na owroe froebontoe no ben wroko? Tjari dati kon na krin.

⁴ Na owroe froebontoe no ben wroko? Kwetikweti. A troe taki, sensi na owroe froebontoe ben poeroe èn wan njoenwan ben poti na ini en presi, Israèl na skinfasi no ben de a spesroetoe pipel foe Gado moro (Mateus 23:38). Ma dati ben de so, foe di Israèl no ben gi jesi èn ben weigri foe teki a Salfoewan foe Jehovah (Exodus 19:5; Tori foe den Apostel 2:22, 23). Ma bifo a Wet ben poeroe èn wan njoenwan ben poti na ini en presi, a ben doe foeroe sani. Foeroe jarihondro langa, a wet ben gi sma na okasi foe go na Gado èn ben kibri sma gi falsi relisi. A Wet ben abi sani na ini di ben de wan prenki foe a njoen froebontoe èn a Wet ben sori nanga den ofrandi di sma ben tjari ala leisi baka, taki a ben de tranga fanowdoe dati libisma kon fri foe sondoe nanga dede. Foe troe, a Wet ben de wan „leriman gi [den] di e tjari [den] go na Krestes” (Galasiasma 3:19, 24; Romesma 3:20; 4:15; 5:12; Hebrewsma 10:1, 2). Ma a blesi di Gado ben pramisi Abraham ben sa kon troe dorodoro nanga jepi foe a njoen froebontoe.

Den nâsi kisi blesi nanga jepi foe a siri foe Abraham

5, 6. Soema na a Siri foe Abraham na ini a prenspari kontroe na jejefasi foe a froebontoe nanga Abraham, èn sortoe nâsi ben de a fosiwan di ben kisi wan blesi nanga jepi foe en?

⁵ Jehovah ben pramisi Abraham: „Nanga jepi foe joe siri ala nâsi foe grontapoe foe troe sa blesi densrefi” (Genesis 22:18). Na ondro na owroe froebontoe, foeroe safri-ati trakondresma ben kisi blesi foe di den ben moksi densrefi nanga Israèl, a nationaal siri foe Abraham. Ma na ini a prenspari kontroe na jejefasi, a Siri foe Abraham ben de wán volmaakti man. Paulus ben tjari a sani dati kon na krin di a ben taki: „Abraham nanga en siri ben kisi den pramisi. A no e taki: ’Èn den siri’, soleki na ini a kefal foe foeroe siri, ma soleki na ini a kefal foe wán: ’Èn a siri foe joe’, dati na Krestes.” — Galasiasma 3:16.

⁶ Ija, Jesus na a Siri foe Abraham, èn nanga jepi foe En den nâsi e kisi wan blesi di hei srefisrefi moro leki wan sani di man gi Israèl na skinfasi. Foe troe, a fosi nâsi di kisi a blesi disi ben de Israèl srefi. No langa baka a Pinksterfesa foe 33 G.T., na apostel Petrus ben taigi wan groepoe djoe: „Oenoe na den manpikin foe den profeiti èn foe a froebontoe di Gado ben sroto nanga den fositen tata foe oenoe, di a ben taigi Abraham: ’Èn ala famiri foe grontapoe sa kisi blesi nanga jepi foe a siri foe joe.’ Gado ben seni en Foetoeboi kon na oenoe fosi, baka di a opo en, foe blesi oenoe foe di a meki ibriwan foe oenoe drai oen baka gi den godelowsoe doe foe oenoe.” — Tori foe den Apostel 3:25,26.

7. Sortoe nâsi ben kisi blesi nanga jepi foe Jesus, a Siri foe Abraham?

⁷ No langa baka dati, den Samariasma ben kisi a blesi dati èn baka dati den heiden (Tori foe den Apostel 8:14-17; 10:34-48). Wan ten na mindri 50 nanga 52 G.T., Paulus ben skrifi kresten na Galasia na Pikin Asia: „Now foe di Boekoe si na fesi taki Gado ben sa froeklari sma foe den nâsi regtfardiki foe bribi ede, meki a ben meki a boen njoensoe bekènti na fesi gi Abraham, namkoe: ’Nanga jepi foe joe ala nâsi sa kisi blesi.’ Foe dati ede meki den wan di e hori densrefi na bribi, e kisi blesi makandra nanga Abraham di de getrow” (Galasiasma 3:8, 9; Genesis 12:3). Ala di foeroe kresten na Galasia ben de „sma foe den nâsi”, tokoe den ben kisi blesi nanga jepi foe Jesus foe a bribi foe den ede. Na sortoe fasi?

8. San a ben wani taki toe gi kresten na ini den dei foe Paulus foe kisi blesi nanga jepi foe a Siri foe Abraham, èn omeni e kisi so wan blesi te foe kaba?

⁸ Paulus ben taigi den kresten foe Galasia, awansi sortoe background den ben abi: „Efoe oenoe de foe Krestes, dan oenoe na troetroe a siri foe Abraham, erfgenaam ini a tori foe wan pramisi” (Galasiasma 3:29). Gi den Galasiasma dati, foe kisi a blesi nanga jepi foe a Siri foe Abraham ben wani taki toe dati den de ini a njoen froebontoe toe èn de so srefi kompe erfgenaam nanga Jesus, makandra nanga Jesus ini a siri foe Abraham. Wi no sabi a nomroe foe sma di ben libi na Israèl foe owroeten. Wi sabi nomo taki den ben kon tron „leki den ai-santi di de na sekanti” (1 Kownoe 4:20). Ma wi sabi a nomroe foe den sma di de makandra nanga Jesus ini a siri na jejefasi — 144.000 (Openbaring 7:4; 14:1). Den 144.000 dati e komoto na „ibri lo nanga tongo nanga pipel nanga nâsi” foe a libisma famiri èn e teki prati na ini a gi di den e gi den blesi foe a froebontoe nanga Abraham na trawan ete. — Openbaring 5:9.

Wan profeititori kon troe

9. Fa den wan di de ini a njoen froebontoe abi a wet foe Jehovah na den inisei?

⁹ Di Jeremia ben taki na fesi foe a njoen froebontoe, a ben skrifi: „ ’Disi na a froebontoe di mi sa sroto nanga na oso foe Israèl baka den dei dati’, na so den wortoe foe Jehovah de. ’Mi wani poti mi wet na den inisei, èn na ini den ati mi sa skrifi den’ ” (Jeremia 31:33). A de wan eigifasi foe den wan di de ini a njoen froebontoe, taki den e dini Jehovah foe di den lobi en (Johanes 13:35; Hebrewsma 1:9). A wet foe Jehovah skrifi na ini den ati, èn den e angri fajafaja foe doe en wani. A troe taki son getrow sma na Israèl foe owroeten ben lobi a wet foe Jehovah srefisrefi (Psalm 119:97). Ma foeroe foe den no ben lobi a wet foe Jehovah. Tokoe den ben tan de wan pisi foe a nâsi. No wan sma kan tan ini a njoen froebontoe, efoe a wet foe Gado no skrifi na ini en ati.

10, 11. Gi den wan di de ini a njoen froebontoe, na sortoe fasi Jehovah „tron a Gado foe den”, èn fa den alamala sa kon sabi en?

¹⁰ Jehovah ben taki moro fara ini a tori foe den wan di de ini a njoen froebontoe: „Mi wani tron a Gado foe den èn den sa tron mi pipel” (Jeremia 31:33). Foeroe sma na Israèl foe owroeten ben anbegi den gado foe den nâsi, ma den ben tan de Israèlsma. Tapoe a gron foe a njoen froebontoe, Jehovah ben kria wan jeje nâsi, „na Israèl foe Gado”, foe poti dati na ini a presi foe Israèl na skinfasi (Galasiasma 6:16; Mateus 21:43; Romesma 9:6-8). Ma no wan sma e tan de wan pisi foe a njoen jeje nâsi, efoe a e tapoe foe anbegi Jehovah wawan.

¹¹ Jehovah ben taki toe: „Den alamala sa sabi mi, foe den moro mofina wan na mindri den, te leki a moro bigi wan na den mindri” (Jeremia 31:34). Foeroe sma na Israèl no ben poti prakseri tapoe Jehovah, èn te joe loekoe en boen, den ben taki: „Jehovah no sa doe boen èn a no sa doe ogri” (Sefanja 1:12). No wan sma e tan de wan pisi foe na Israèl foe Gado, efoe a no e poti prakseri tapoe Jehovah noso e doti a troe anbegi (Mateus 6:24; Kolosesma 3:5). Den Israèlsma na jejefasi na „a pipel di sabi a Gado foe den” (Danièl 11:32). Den e prisiri foe ’teki sabi na ini den foe a wan-enkri troe Gado èn foe Jesus Krestes’ (Johanes 17:3). Foe di den sabi taki sensi a ten dati, Jesus e meki den kisi moro sabi foe Gado, dan na wan aparti fasi, Jesus „na a sma di tjari [Gado] kon na krin”. — Johanes 1:18; 14:9-11.

12, 13. (a) Tapoe a gron foe sortoe sani Jehovah e gi den wan di de ini a njoen froebontoe pardon foe den sondoe foe den? (b) Fa a njoen froebontoe hei moro leki na owroe froebontoe ini a tori foe a gi di Gado e gi pardon foe sondoe?

¹² Te foe kaba Jehovah ben pramisi: „Mi sa gi den pardon foe den sondoe, èn den sondoe mi no sa prakseri moro” (Jeremia 31:34b). A Wet foe Moses ben abi so srefi hondrohondro skrifi wet na ini di Jehovah ben aksi foe den Israèlsma foe ondrow den (Deuteronomium 28:1, 2, 15). Ala sma di ben pasa a Wet, ben tjari srakti-ofrandi foe tapoe den sondoe foe den (Lefitikus 4:1-7; 16:1-31). Foeroe djoe ben kon bribi taki den ben kan kon de regtfardiki nanga jepi foe den eigi wroko foe den akroederi a Wet. Ma kresten sabi taki noiti den no kan froedini regtfardikifasi nanga den eigi wroko foe den. Den no kan wai pasi foe no sondoe (Romesma 5:12). Na ondro a njoen froebontoe, wan sma ben kan kisi wan regtfardiki posisi na fesi foe Gado soso tapoe a gron foe a srakti-ofrandi foe Jesus. Ma so wan posisi na wan presenti, wan no-froedini boen-atifasi foe Gado (Romesma 3:20, 23, 24). Tokoe Jehovah e aksi foe den foetoeboi foe en taki den e gi jesi. Paulus e taki dati den wan di de ini a njoen froebontoe de „na ondro a wet ini a tori foe Krestes”. — 1 Korentesma 9:21.

¹³ Dati meki wan srakti-ofrandi foe sondoe de toe gi kresten, ma a de wan srakti-ofrandi di warti srefisrefi moro leki den srakti-ofrandi na ondro a Wetfroebontoe. Paulus ben skrifi: „Ibri priester [na ondro a Wetfroebontoe] e teki en presi ala dei foe doe poebliki diniwroko èn foe tjari den srefi srakti-ofrandi foeroetron, foe di disi noiti no kan poeroe sondoe krinkrin. Ma [Jesus] ben tjari foe ala ten wán srakti-ofrandi foe sondoe èn ben go sidon na a reti-anoe foe Gado” (Hebrewsma 10:11, 12). Foe di kresten di de ini a njoen froebontoe e sori bribi na ini a srakti-ofrandi foe Jesus, meki Jehovah e froeklari den regtfardiki, sondro sondoe, èn na so wan fasi den de ini wan posisi foe kisi salfoe leki den manpikin foe en na jejefasi (Romesma 5:1; 8:33, 34; Hebrewsma 10:14-18). Te den e sondoe foe libisma onvolmaaktifasi ede, dan den kan begi Jehovah foe gi den pardon, èn tapoe a gron foe a srakti-ofrandi foe Jesus, Jehovah e gi den pardon (1 Johanes 2:1, 2). Ma efoe den e froekisi foe teki wan pasi foe sondoe foe espresi, dan den e lasi a regtfardiki posisi foe den nanga a grani foe de sma di de ini a njoen froebontoe. — Hebrewsma 2:2, 3; 6:4-8; 10:26-31.

Na owroe froebontoe nanga a njoenwan

14. Sortoe besnijdenis ben de wan sani di den ben moesoe doe na ondro a Wetfroebontoe? na ondro a njoen froebontoe?

¹⁴ Mansma di ben de ini na owroe froebontoe, ben besnij leki wan marki taki den ben de na ondro a Wet (Lefitikus 12:2, 3; Galasiasma 5:3). Baka di a kresten gemeente bigin, son sma feni taki kresten di no de djoe moesoe besnij toe. Ma den apostel nanga den owroeman na Jerusalem, di ben kisi tiri foe a Wortoe foe Gado nanga a santa jeje, ben kon froestan taki a sani dati no ben de fanowdoe (Tori foe den Apostel 15:1, 5, 28, 29). Wan toe jari baka dati, Paulus ben taki: „A no en na wan djoe di de disi na dorosei, èn a besnij di wan sma e besnij, no de wan sani toe di den e doe na a dorosei, na a skin. Ma en na wan djoe di de disi na inisei, èn a besnij di a besnij na di foe na ati, nanga a jeje, èn no nanga wan wet di skrifi” (Romesma 2:28, 29). A besnij di den ben besnij troetroe, srefi a di foe den djoe na skinfasi, no ben abi waarde moro na jejefasi na ini na ai foe Jehovah. Gi den wan di de ini a njoen froebontoe, na ati, èn no a skin, moesoe besnij. Den moesoe koti poeroe ala sani na ini a denki, lostoe nanga boeweigi foe ati foe den, di no e plisi Jehovah noso no de krin na ini na ai foe Jehovah.a Foeroe sma na ini a ten disi na libilibi boeweisi taki a krakti foe a santa jeje e kenki den fasi foe denki na a fasi disi. — 1 Korentesma 6:9-11; Galasiasma 5:22-24; Efeisesma 4:22-24.

15. Fa joe kan teki Israèl na skinfasi gersi na Israèl foe Gado ini a tori foe kownoe tirimakti?

¹⁵ Na ini a seti foe a Wetfroebontoe, Jehovah ben de Kownoe foe Israèl, èn baka ten a ben sori en soevereiniteit nanga jepi foe den libisma kownoe na Jerusalem (Jesaja 33:22). Jehovah de Kownoe toe foe na Israèl foe Gado, Israèl na jejefasi, èn sensi 33 G.T., a tiri nanga jepi foe Jesus Krestes, di ben kisi „ala makti na ini hemel èn na grontapoe” (Mateus 28:18; Efeisesma 1:19-23; Kolosesma 1:13, 14). Na ini a ten disi, na Israèl foe Gado e erken Jesus leki Kownoe foe Gado en Kownoekondre na hemel, di ben opo na ini 1914. Jesus na wan Kownoe di boen srefisrefi moro leki fa srefi Hiskia, Josia nanga den tra getrow kownoe foe Israèl foe owroeten ben de. — Hebrewsma 1:8, 9; Openbaring 11:15.

16. Sortoe priesterwroko na Israèl foe Gado de?

¹⁶ Israèl no ben de soso wan kownoekondre nomo, ma ben abi so srefi wan salfoe priestergroepoe. Na ini 33 G.T., na Israèl foe Gado ben kon na ini a presi foe Israèl na skinfasi èn ben tron Jehovah en „foetoeboi”, den „kotoigi” foe en (Jesaja 43:10). Foe dati ede, den wortoe di Jehovah ben taigi Israèl èn di skrifi na ini Jesaja 43:21 nanga Exodus 19:5, 6, ben fiti tapoe na Israèl foe Gado na jejefasi. A njoen jeje nâsi foe Gado ben de now „wan geslakti di den froekisi, wan kownoe priesterwroko, wan santa nâsi, wan pipel di de wan spesroetoe goedoe”, di abi a frantiwortoe foe ’meki den moi sani foe Jehovah bekènti’ (1 Petrus 2:9). Ala sma na ini na Israèl foe Gado, mansma nanga oemasma, de wan groepoe di e doe priesterwroko (Galasiasma 3:28, 29). Leki a di foe toe pisi foe a siri foe Abraham, den e taki now: „Prisiri, oen nâsi, nanga en pipel” (Deuteronomium 32:43). Den wan foe na Israèl na jejefasi di de na grontapoe ete, de „a getrow èn koni srafoe” (Mateus 24:45-47). Soso te wi e moksi wisrefi nanga den, dan wi kan doe santa diniwroko gi Gado na wan fasi di A feni boen.

Gado en Kownoekondre — A lasti kontroe

17. Sortoe geborte den wan di de ini a njoen froebontoe e ondrofeni?

¹⁷ Den Israèlsma di ben gebore baka 1513 b.G.T. ben kon ini a Wetfroebontoe di den ben gebore. Den wan di Jehovah e teki foe de ini a njoen froebontoe e ondrofeni wan geborte toe — na ini a kefal foe den, wan geborte na jejefasi. Jesus ben taigi a Fariseiman Nikodeimus foe a sani disi di a ben taki: „Foe troe, foe troe, mi e taigi joe: Efoe wan sma no gebore ete wan tron, dan a no kan si a kownoekondre foe Gado” (Johanes 3:3). Den 120 disipel di ben de na a Pinksterfesa foe 33 G.T., ben de den fosi onvolmaakti libisma di ben ondrofeni a njoen geborte disi. Foe di Gado ben froeklari den regtfardiki na ondro a njoen froebontoe, dan den ben kisi santa jeje leki „wan panti di den kisi na fesi” foe na erfenis foe den foe tron kownoe (Efeisesma 1:14). Den ben „gebore foe a jeje” foe tron manpikin di Gado teki, di ben meki den tron den brada foe Jesus èn na so wan fasi de „kompe erfgenaam nanga Krestes” (Johanes 3:6; Romesma 8:16, 17). A gebore di den e „gebore ete wan tron” ben opo a pasi gi moi froewakti.

18. A gebore di den wan di de ini a njoen froebontoe e gebore ete wan tron, e gi na okasi gi sortoe moi froewakti gi den?

¹⁸ Di Jesus ben de a mindriman foe a njoen froebontoe, a ben sroto wan tra froebontoe nanga den bakaman foe en, èn ben taki: „Mi e sroto wan froebontoe nanga oenoe, soleki fa mi Tata sroto wan froebontoe nanga mi, foe wan kownoekondre” (Lukas 22:29). A froebontoe disi foe wan Kownoekondre e sreka a pasi gi a kontroe foe wan aparti fisjoen, di skrifi na ini Danièl 7:13, 14, 22, 27. Danièl ben si taki „wan sma di ben gersi wan manpikin foe libisma” ben kisi kownoe makti foe „a Graniwan ini Dei”, Jehovah Gado. Baka dati Danièl ben si taki „den santawan ben teki a kownoekondre srefi”. Jesus na a sma „di ben gersi wan manpikin foe libisma” di ben kisi a hemel Kownoekondre foe Jehovah Gado na ini 1914. Den disipel foe en di kisi salfoe nanga santa jeje na „den santawan” di abi wan prati nanga en na ini a Kownoekondre dati (1 Tesalonika 2:12). Fa?

19, 20. (a) Sortoe lasti toemoesi moi kontroe a pramisi di Jehovah ben gi Abraham sa abi gi den wan di de ini a njoen froebontoe? (b) Tapoe sortoe tra aksi wi moesoe go poti prakseri?

¹⁹ Baka te den salfoewan disi dede, dan neleki Jesus, den e kisi wan opobaka na dede leki jeje kriatoeroe di no man dede, foe dini makandra nanga en leki kownoe nanga priester na hemel (1 Korentesma 15:50-53; Openbaring 20:4, 6). Fa dati na wan toemoesi moi howpoe! „Den sa tiri grontapoe leki kownoe”, no soso a kondre Kanan (Openbaring 5:10). Den sa ’teki den portoe foe den feanti foe den abra’? (Genesis 22:17) Ija, èn na wan fasi di sa pasa seiker, te den e si a pori foe a feanti relisi hoeroe, Babilon a Bigiwan, èn te den salfoewan disi di kisi wan opobaka e teki prati nanga Jesus foe wei den nâsi „nanga wan isri tiki” èn foe masi na ede foe Satan. Na so wan fasi den sa abi wan prati na ini a meki kon troe foe a lasti pisi foe a profeititori na ini Genesis 3:15. — Openbaring 2:26, 27; 17:14; 18:20, 21; Romesma 16:20.

²⁰ Tokoe wi e aksi wisrefi kande: A froebontoe nanga Abraham nanga a njoen froebontoe abi foe doe soso nanga den 144.000 getrow sili disi nomo? Nôno, tra sma di no de langalanga ini den froebontoe disi, sa kisi blesi nanga jepi foe den, soleki fa wi sa si na ini a tra artikel.

[Foetoewortoe]

Joe e memre disi ete?

◻ O ten den ben si a fosi leisi taki a njoen froebontoe e wroko?

◻ Sortoe sani na owroe froebontoe ben doe?

◻ Soema na a fosi presi na a Siri foe Abraham, èn na sortoe fasi di kon a wan baka a trawan, den nâsi ben kisi blesi nanga jepi foe a Siri dati?

◻ San na a lasti kontroe foe a froebontoe nanga Abraham èn foe a njoen froebontoe, gi den 144.000?

[Prenki na tapoe bladzijde 15]

Foe kisi pardon foe sondoe wani taki moro foeroe gi den wan di de na ondro a njoen froebontoe leki gi den wan di ben de na ondro na owroe froebontoe