Den tra skapoe nanga a njoen froebontoe

„Den freimdesma . . . , ala den wan di e hori sabadei so taki den no e pori a santafasi foe en èn di e hori densrefi na mi froebontoe, mi wani tjari den kon na mi santa bergi toe.” — JESAJA 56:6, 7.

1. (a) San e pasa te den e hori den winti foe a kroetoe foe Jehovah, soleki fa a fisjoen foe Johanes e sori? (b) Sortoe toemoesi aparti ipi Johanes ben si?

NA INI a di foe fo fisjoen na ini a boekoe Openbaring, na apostel Johanes ben si taki den ben hori den winti foe den kroetoe foe Jehovah di e tjari pori kon, ala di a poti di den ben poti lakstampoe na tapoe ala den memre foe „na Israèl foe Gado” ben e kon na wan kaba. Den wan disi na den fosiwan di kisi blesi nanga jepi foe Jesus, a moro prenspari pisi foe a siri foe Abraham (Galasiasma 6:16; Genesis 22:18; Openbaring 7:1-4). Na ini a srefi fisjoen dati, Johanes ben si „wan bigi ipi, di no wan sma ben man teri, di komoto na ala nâsi nanga lo nanga pipel nanga tongo . . . , bari nanga wan tranga sten, e taki: ’Tangi foe wi Gado, di e sidon na tapoe a kownoestoeroe, èn foe a Pikin Skapoe, meki wi kisi froeloesoe’ ” (Openbaring 7:9, 10). Te a bigi ipi e taki: „Tangi foe . . . a Pikin Skapoe, meki wi kisi froeloesoe”, dan den e sori taki den kisi blesi toe nanga jepi foe a Siri foe Abraham.

2. O ten a bigi ipi ben sori densrefi, èn fa den kon sabi den?

² Den ben kon sabi a bigi ipi disi na ini 1935, èn na ini a ten disi den de moro leki feifi miljoen. Foe di den poti aparti foe pasa a bigi banawtoe libilibi, dan den memre foe en sa poti aparti foe kisi têgo libi, te Jesus e prati „den skapoe” foe „den bokoboko”. Kresten foe a bigi ipi de na mindri den „tra skapoe” na ini Jesus en agersitori foe den skapoekoi. Den abi a howpoe foe libi foe têgo na wan paradijs grontapoe. — Mateus 25:31-46; Johanes 10:16; Openbaring 21:3, 4.

3. Fa den salfoe kresten nanga den tra skapoe e difrenti ini a tori foe a njoen froebontoe?

³ Gi den 144.000, den e kisi a blesi foe a froebontoe nanga Abraham nanga jepi foe a njoen froebontoe. Leki sma di de ini a froebontoe disi, den e kon „na ondro a no-froedini boen-atifasi” èn „na ondro a wet ini a tori foe Krestes” (Romesma 6:15; 1 Korentesma 9:21). Foe dati ede, soso den 144.000 memre foe na Israèl foe Gado wawan gebroiki na wan joisti fasi den simbôl na a Memrefesa foe a dede foe Jesus, èn nanga den wawan Jesus ben sroto en froebontoe foe wan Kownoekondre (Lukas 22:19, 20, 29). Memre foe a bigi ipi no de ini a njoen froebontoe. Ma den e moksi densrefi nanga na Israèl foe Gado èn e libi nanga den na ini a „kondre” foe den (Jesaja 66:8). So boen, a de wan reidelek sani foe taki dati so srefi den e kon na ondro a no-froedini boen-atifasi foe Jehovah èn na ondro a wet ini a tori foe Krestes. Ala di den no de ini a njoen froebontoe, tokoe den e kisi winimarki foe dati.

„Freimdesma” nanga „na Israèl foe Gado”

4, 5. (a) Sortoe groepoe ben sa dini Jehovah, soleki fa Jesaja e taki? (b) Fa Jesaja 56:6, 7 kon troe gi a bigi ipi?

⁴ A profeiti Jesaja ben skrifi: „Den freimdesma di go wroko makandra nanga Jehovah foe dini en èn foe lobi a nen foe Jehovah, so taki den kan tron foetoeboi foe en, ala den wan di e hori sabadei so taki den no e pori a santafasi foe en èn di e hori densrefi na mi froebontoe, mi wani tjari den kon na mi santa bergi toe èn meki den prisiri na ini mi oso foe begi. A heri bron-ofrandi foe den nanga den srakti-ofrandi foe den mi sa teki na tapoe mi altari” (Jesaja 56:6, 7). Na Israèl, a sani dati ben wani taki dati „freimdesma”, sma di no de foe Israèl, ben sa anbegi Jehovah — lobi en nen, gi jesi na den kondisi foe a Wetfroebontoe, hori a Sabadei, èn tjari ofrandi na a tempel, na „oso foe begi” foe Gado. — Mateus 21:13.

⁵ Na ini a ten foe wi, „den freimdesma di go wroko makandra nanga Jehovah”, na a bigi ipi. Den wan disi e dini Jehovah makandra nanga na Israèl foe Gado (Sakaria 8:23). Den e tjari den srefi ofrandi leki na Israèl foe Gado, di A feni boen (Hebrewsma 13:15, 16). Den e anbegi Gado na ini a jeje tempel foe En, na „oso foe begi” foe en. (Teki gersi Openbaring 7:15.) Den e hori na alawiki Sabadei? No den salfoewan, no den tra skapoe kisi a komando foe doe dati (Kolosesma 2:16, 17). Ma Paulus ben taigi salfoe Hebrew kresten: „Wan sabadei rostoe libi abra ete gi a pipel foe Gado. Bika a sma di go na ini a rostoe foe Gado, ensrefi rostoe toe foe en eigi wroko, neleki fa Gado ben rostoe foe di foe en” (Hebrewsma 4:9, 10). Den Hebrewsma dati ben go na ini a „sabadei rostoe” disi, te den ben saka densrefi na ondro „a regtfardikifasi foe Gado” èn ben rostoe foe a proeberi di den ben proeberi foe regtfardiki densrefi nanga jepi foe den wroko foe a Wet (Romesma 10:3, 4). Salfoe kresten di ben de heiden, e njan boen foe a srefi rostoe, foe di den e saka densrefi na ondro a regtfardikifasi foe Jehovah. A bigi ipi e go makandra nanga den na ini a rostoe dati.

6. Fa den tra skapoe na ini a ten disi e poti densrefi na ondro a njoen froebontoe?

⁶ Moro fara, den tra skapoe e poti densrefi na ondro a njoen froebontoe, neleki fa freimdesma foe owroeten ben poti densrefi na ondro a Wetfroebontoe. Na sortoe fasi? No foe di den e tron sma di de ini a froebontoe, ma foe di den e saka densrefi na ondro den wet di abi foe doe nanga a froebontoe dati èn e kisi wini foe den seti foe en. (Teki gersi Jeremia 31:33, 34.) Den tra skapoe e meki den skrifi a wet foe Jehovah ’na ini den ati’, neleki den salfoe kompe foe den. Den lobi den komando nanga den gronprakseri foe Jehovah srefisrefi èn e gi jesi na den (Psalm 37:31; 119:97). Den sabi Jehovah, neleki den salfoe kresten (Johanes 17:3). Fa a de nanga a besnijdenis? So wan 1500 jari bifo a njoen froebontoe ben sroto, Moses ben gi den Israèlsma tranga: „Oenoe moesoe besnij a fesisei boeba foe oen ati” (Deuteronomium 10:16; Jeremia 4:4). Ala di a besnijdenis na skin sei di ben de wan froeplekti sani, ben pasa gowe nanga a Wet, tokoe den salfoewan nanga den tra skapoe moesoe „besnij” na ati foe den (Kolosesma 2:11). Te foe kaba, Jehovah e gi den tra skapoe pardon foe a sondoe foe den tapoe a gron foe Jesus en „broedoe foe a froebontoe” di a ben trowe gi wi (Mateus 26:28; 1 Johanes 1:9; 2:2). Gado no e teki den leki manpikin na jejefasi, neleki fa a e teki den 144.000 sma. Ma a e froeklari den tra skapoe regtfardiki, na a fasi disi taki a ben froeklari Abraham regtfardiki leki a mati foe Gado. — Mateus 25:46; Romesma 4:2, 3; Jakobus 2:23.

7. Sortoe froewakti opo gi den tra skapoe na ini a ten disi, di Gado ben froeklari regtfardiki neleki fa a ben doe dati nanga Abraham?

⁷ A froeklari di Gado e froeklari den 144.000 sma regtfardiki, e opo a pasi gi den foe kan abi a howpoe foe tiri makandra nanga Jesus na ini a Kownoekondre na hemel (Romesma 8:16, 17; Galasiasma 2:16). A froeklari di Gado e froeklari den tra skapoe regtfardiki leki mati foe En, e meki taki den kan teki nanga prisiri a howpoe foe libi foe têgo na wan paradijs grontapoe — foe di den e pasa Armagedon libilibi leki wan pisi foe a bigi ipi noso foe di den e kisi na ’opobaka foe den regtfardikiwan’ (Tori foe den Apostel 24:15). A de troetroe wan grani foe abi so wan howpoe èn foe de wan mati foe a Soeverein foe na universum, foe de „wan fisitiman na ini [en] tenti”! (Psalm 15:1, 2) Ija, den salfoewan nanga den tra skapoe e kisi blesi na wan moi fasi nanga jepi foe Jesus, a Siri foe Abraham.

Wan moro bigi Verzoendei

8. San den srakti-ofrandi foe a Verzoendei di ben tjari na ondro a Wet, ben prenki?

⁸ Di Paulus ben e taki foe a njoen froebontoe, dan a ben memre den leisiman foe en na a alajari Verzoendei di ben de na ondro a Wetfroebontoe. Na a dei dati, den ben tjari aparti ofrandi — wán gi a priester lo Leifi èn wan trawan gi den 12 lo di no de priester. Langa ten kaba den ben tjari kon na krin, taki a sani dati ben prenki a bigi srakti-ofrandi foe Jesus di ben sa abi wini gi den 144.000 sma di abi a howpoe foe go na hemel, nanga den miljoenmiljoen sma di abi a howpoe foe libi na grontapoe.a Paulus ben sori taki na ini a kontroe foe a Verzoendei, den winimarki foe a srakti-ofrandi foe Jesus gi nanga jepi foe wan moro bigi Verzoendei na ondro a njoen froebontoe. Leki a Gran-priester foe a moro bigi dei disi, Jesus ben gi en volmaakti libi leki wan zoen-ofrandi, so taki a kan kisi „wan têgo froeloesoe” gi libisma. — Hebrewsma 9:11-24.

9. San den Hebrew salfoe kresten ben kan teki foe di den de ini a njoen froebontoe?

⁹ Foeroe Hebrew kresten foe a fosi jarihondro ben „abi faja gi a Wet [foe Moses]” ete (Tori foe den Apostel 21:20). Dati meki a fiti taki Paulus ben memre den: „[Jesus] de wan mindriman foe wan njoen froebontoe, so taki den wan di kisi wan kari, ben kan kisi a pramisi foe a têgo erfenis, foe di wan sma dede foe froeloesoe den nanga wan loesoe-paiman, foe den sondoe di den ben doe na ondro a fosi froebontoe” (Hebrewsma 9:15). A njoen froebontoe ben meki den Hebrew kresten kon fri foe na owroe froebontoe, di ben poeroe a sondoefasi foe den kon na doro. Tangi foe a njoen froebontoe, den ben kan teki „a pramisi foe a têgo erfenis [foe go na hemel]”.

10. Foe san den salfoewan nanga den tra skapoe e gi Gado tangi?

¹⁰ „Ibriwan sma” di „e sori bribi na ini a Manpikin”, sa kisi wini foe a froeloesoe-ofrandi (Johanes 3:16, 36). Paulus ben taki: „Den ben tjari Krestes leki wan srakti-ofrandi wán leisi gi ala ten, foe tjari a sondoe foe foeroe sma; èn a di foe toe leisi te a sori ensrefi, a sa de aparti foe sondoe èn na den wan di na wan fajafaja fasi e loekoe go na en gi a froeloesoe foe den” (Hebrewsma 9:28). Na ini a ten disi, den salfoe kresten foe na Israèl foe Gado di de na libi ete, nanga den miljoenmiljoen sma di de a bigi ipi èn di abi wan têgo goedoe toe, de na mindri den wan di na wan fajafaja fasi e soekoe Jesus. Ala toe groepoe de Gado tangi foe a njoen froebontoe èn foe den blesi di e gi libi di abi foe doe nanga dati, so srefi foe a moro bigi Verzoendei nanga a diniwroko foe a Gran-priester, Jesus, na ini a Moro Santapresi na hemel.

Abi foeroe foe doe na ini santa diniwroko

11. San den salfoewan nanga den tra skapoe e doe nanga prisiri, now di den konsensi kon krin nanga jepi foe a srakti-ofrandi foe Jesus?

¹¹ Na ini en brifi gi den Hebrewsma, Paulus ben poti krakti tapoe a moro hei waarde foe a srakti-ofrandi foe Jesus na ini a seti foe a njoen froebontoe, te joe e teki en gersi den sondoe-ofrandi di den ben tjari na ondro na owroe froebontoe (Hebrewsma 9:13-15). A moro boen srakti-ofrandi foe Jesus, man „krin wi konsensi foe dede wroko so taki wi kan doe santa diniwroko gi a libilibi Gado”. Gi den Hebrew kresten, „dede wroko” ben wani taki toe „den sondoe di den ben doe na ondro a fosi froebontoe”. Gi kresten na ini a ten disi, den wani taki toe den sondoe di den ben doe na ini a ten di pasa èn di den abi troetroe berow foe den èn di Gado gi den pardon foe den (1 Korentesma 6:9-11). Salfoe kresten e doe „santa diniwroko gi a libilibi Gado” nanga konsensi di kon krin. Èn na so a de toe nanga a bigi ipi. Foe di den krin den konsensi nanga jepi foe „a broedoe foe a Pikin Skapoe”, meki den de na ini a bigi jeje tempel foe Gado, èn „e doe santa diniwroko gi en . . . dei nanga neti”. — Openbaring 7:14, 15.

12. Fa wi e sori taki wi abi „ala djaranti foe a bribi”?

¹² Moro fara Paulus ben taki: „Meki wi kon na en nanga wan opregti ati, na ini ala djaranti foe a bribi, foe di wi ben meki den nati wi ati foe meki a kon krin foe wan godelowsoe konsensi èn ben meki den wasi a skin foe wi nanga krin watra” (Hebrewsma 10:22). Fa wi kan sori taki wi abi „ala djaranti foe a bribi”? Paulus ben gi den Hebrew kresten tranga: „Meki wi hori fasti na a meki di wi moesoe meki a [hemel] howpoe foe wi bekènti na poebliki sondro foe degedege, bika a sma di gi a pramisi, de getrow. Èn meki wi poti ai na makandra, foe gi makandra deki-ati foe sori lobi èn doe boen wroko, foe no libi a kon di wi e kon makandra, soleki fa son wan abi a gwenti foe doe, ma foe gi makandra deki-ati, èn dati moro foeroe, foe di oenoe e si a dei e kon krosibei” (Hebrewsma 10:23-25). Efoe a bribi foe wi de libilibi, dan wi toe no sa „libi a kon di wi e kon makandra”. Wi sa prisiri foe gi den brada foe wi deki-ati èn foe kisi deki-ati foe den foe sori lobi èn doe boen wroko èn foe kisi krakti foe doe a prenspari wroko foe meki a howpoe foe wi bekènti na poebliki, awansi wi abi a howpoe foe libi na grontapoe noso foe go na hemel. — Johanes 13:35.

A „têgo froebontoe”

13, 14. Na sortoe fasi a njoen froebontoe de foe têgo?

¹³ San e pasa te a lastiwan foe den 144.000 e go na hemel? A njoen froebontoe no sa wroko moro? Na a ten dati, no wan memre foe na Israèl foe Gado sa tan abra na grontapoe. Ala sma di de ini a froebontoe sa de nanga Jesus „na ini a kownoekondre foe [en] Tata” (Mateus 26:29). Ma wi e memre den wortoe foe Paulus na ini en brifi gi den Hebrewsma: „A Gado foe vrede . . . ben wiki a bigi herder foe den skapoe . . . na ini dede nanga a broedoe foe wan têgo froebontoe” (Hebrewsma 13:20; Jesaja 55:3). Na sortoe fasi a njoen froebontoe de foe têgo?

¹⁴ Na a fosi presi, tra fasi leki a Wetfroebontoe, noiti den sa poeroe en èn poti wan trawan na ini en presi. Na a di foe toe presi, den bakapisi foe a fasi fa a e wroko sa de foe ala ten, neleki fa a de nanga a kownoewroko foe Jesus. (Teki gersi Lukas 1:33 nanga 1 Korentesma 15:27, 28.) A Kownoekondre na hemel abi wan têgo presi na ini den sani di Jehovah abi na prakseri (Openbaring 22:5). Èn na a di foe dri presi, den tra skapoe sa tan kisi winimarki foe a seti foe a njoen froebontoe. Na ini a Doesoen Jari Tiri foe Krestes, getrow libisma sa tan „doe santa diniwroko gi [Jehovah] na ini a tempel foe en dei nanga neti”, neleki fa den e doe now. Jehovah no sa memre den na den sondoe di den ben doe na ini a ten di pasa èn di den ben kisi pardon foe den tapoe a gron foe Jesus en „broedoe foe a froebontoe”. Den sa tan abi wan regtfardiki posisi leki mati foe Jehovah, èn a wet foe en sa skrifi ete na ini den ati.

15. Taki foe a fasi fa Jehovah sa de nanga den anbegiman foe en na grontapoe na ini a njoen grontapoe.

¹⁵ So boen, Jehovah sa man taki foe den libisma foetoeboi disi: ’Mi na a Gado foe den, èn den na a pipel foe mi’? Ija. „En sa tan nanga den, èn den sa de en pipel. Èn Gado srefi sa de nanga den” (Openbaring 21:3). Den sa tron „a kampoe foe den santawan”, sma na grontapoe di e teki presi gi „a foto di [Gado] lobi”, a trowmisi foe Jesus Krestes di de na hemel (Openbaring 14:1; 20:9; 21:2). Ala den sani dati sa man pasa, foe di den e sori bribi na ini Jesus en „broedoe foe a froebontoe” di a ben trowe èn foe di den e saka densrefi na ondro den hemel kownoe nanga priester, di ben de na Israèl foe Gado di den ben de na grontapoe. — Openbaring 5:10.

16. (a) Sortoe sani den wan di e kisi wan opobaka foe libi na grontapoe sa man doe? (b) Sortoe blesi sa kon na a kaba foe den doesoen jari?

¹⁶ Fa a de nanga den dedewan di e kisi wan opobaka na grontapoe? (Johanes 5:28, 29) Den sa kisi a kari toe foe „blesi densrefi” nanga jepi foe Jesus, a Siri foe Abraham (Genesis 22:18). Den sa moesoe lobi a nen foe Jehovah toe, dini en, tjari ofrandi di a feni boen èn doe santa diniwroko na ini en oso foe begi. Den wan di e doe dati, sa go na ini a rostoe foe Gado (Jesaja 56:6, 7). Na a kaba foe a doesoen jari, ala getrow sma sa kisi libisma volmaaktifasi nanga jepi foe a diniwroko foe Jesus Krestes nanga den 144.000 kompe priester foe en. Den sa de regtfardiki, Gado no sa froeklari den regtfardiki nomo leki mati foe En. Den sa „kon na libi”, èn de fri dorodoro foe sondoe nanga dede di den ben kisi foe Adam (Openbaring 20:5; 22:2). Dati sa de troetroe wan blesi! Foe a fasi fa wi e si a tori na ini a ten disi, dan a gersi taki a priesterwroko foe Jesus nanga den 144.000 sma sa klari na a ten dati. Den blesi foe a moro bigi Verzoendei sa kon troe dorodoro. Moro fara, Jesus sa „gi a kownoekondre abra na en Gado nanga Tata” (1 Korentesma 15:24). Wan lasti tesi sa kon na tapoe a libisma famiri, èn baka dati Satan nanga den ogri jeje foe en sa kisi pori foe têgo. — Openbaring 20:7, 10.

17. Sortoe bosroiti ibriwan foe wi moesoe teki, nanga a prisiri di wi o kisi na prakseri?

¹⁷ Sortoe ròl, efoe dati de, a „têgo froebontoe” sa prei na ini a span ten di sa bigin na a ten dati? Wi no sabi dati. Den sani di Jehovah tjari kon na krin gi wi te so fara, de nofo gi a ten now. A e foeroe wi nanga lespeki moksi nanga frede. Prakseri foe dati — têgo libi leki wan pisi foe „njoen hemel nanga wan njoen grontapoe”! (2 Petrus 3:13) Meki a de so, taki noti no e meki wi lasi na angri foe wi foe kisi a pramisi dati. A kan taki a no de makriki foe tanapoe kánkan. Paulus ben taki: „Oenoe abi horidoro fanowdoe, so taki, baka te oenoe doe a wani foe Gado, oenoe kan kisi a kontroe foe a pramisi” (Hebrewsma 10:36). Ma prakseri taki iniwan problema di wi moesoe wini, iniwan gens di wi moesoe kakafoetoe gi, e tron wan pikin sani te wi e teki den gersi a prisiri di wi o kisi (2 Korentesma 4:17). Foe dati ede, meki a de so, taki no wan foe wi de „den sortoe sma di e drai baka èn e kisi pori”. Na presi foe dati, meki a de so, taki wi e sori foe de „den sortoe sma di abi bribi, meki a sili tan na libi” (Hebrewsma 10:39). Meki a de so, taki wi alamala e froetrow dorodoro tapoe Jehovah, a Gado foe froebontoe, foe a têgo blesi foe ibriwan foe wi.

[Foetoewortoe]

Joe ben froestan disi?

◻ Soema e kisi blesi nanga jepi foe a Siri foe Abraham, boiti den salfoe kresten?

◻ Fa den tra skapoe de leki den proselietsma di ben de na ondro na owroe froebontoe, foe di den e kisi blesi nanga jepi foe a njoen froebontoe?

◻ Fa den tra skapoe e kisi blesi nanga jepi foe a seti foe a moro bigi Verzoendei?

◻ Foe san ede Paulus ben kari a njoen froebontoe wan „têgo froebontoe”?

[Faki na tapoe bladzijde 21]

Santa diniwroko na ini a tempel

A bigi ipi e anbegi makandra nanga den salfoe kresten na ini a fesi djari foe a bigi jeje tempel foe Jehovah na grontapoe (Openbaring 7:14, 15; 11:2). Reide no de foe kon na a bosroiti taki den de na ini wan aparti Djari foe den heiden. Di Jesus ben de na grontapoe, wan Djari foe den heiden ben de na ini a tempel. Ma na ini den plan di Gado ben gi na ondro a krakti foe a santa jeje foe bow den tempel foe Salomo nanga Esekièl, no wan seti ben de foe bow wan Djari foe den heiden. Na a tempel foe Salomo, wan fesi djari ben de dorosei pe Israèlsma nanga proselietsma, mansma nanga oemasma, ben anbegi makandra. Disi na a model na profeiti fasi foe a fesi djari foe a jeje tempel na grontapoe, pe Johanes ben si a bigi ipi e doe santa diniwroko.

Ma soso den priester nanga den Leifisma ben kan go na ini na inisei fesi djari, pe a bigi altari ben tanapoe; soso den priester ben kan go na ini a Santapresi; èn soso a gran-priester ben kan go na ini a Moro Santapresi. Wi e kon froestan taki na inisei fesi djari nanga a Santapresi e prenki na aparti fasi fa den salfoe kresten de na jejefasi na grontapoe. Èn a Moro Santapresi e prenki hemel srefi, pe salfoe kresten e kisi libi sondro foe man dede, makandra nanga a Gran-Priester foe den di de na hemel. — Hebrewsma 10:19, 20.

[Prenki na tapoe bladzijde 23]

Meki wi „abi bribi, meki a sili tan na libi”, nanga a prisiri di wi sa kisi na prakseri