Jehovah na wan Gado foe froebontoe
„Mi sa sroto nanga na oso foe Israèl èn nanga na oso foe Juda wan njoen froebontoe.” — JEREMIA 31:31.
1, 2. (a) Nanga sortoe fesa Jesus ben meki wan bigin na a neti foe 14 Nisan 33 G.T.? (b) Foe sortoe froebontoe Jesus ben taki, di abi foe doe nanga en dede?
NA A neti foe 14 Nisan 33 G.T., Jesus ben hori a Paska nanga den 12 apostel foe en. Foe di Jesus ben sabi taki disi ben sa de a lasti leisi di a ben sa njan nanga den èn taki djonsro a ben sa dede na den anoe foe den feanti foe en, meki a ben gebroiki na okasi foe tjari foeroe prenspari afersi kon na krin gi den moro krosibei disipel foe en. — Johanes 13:1–17:26.
2 A ben de na a ten disi taki, baka di Jesus gi Judas Iskariòt primisi foe gowe, a seti a wan-enkri alajari relisi fesa di a ben komanderi kresten foe hori — a Memrefesa foe en dede. A tori e taki: „Ala di den ben e njan go doro, Jesus ben teki wan brede, èn baka di a blesi en, a broko en èn gi dati na den disipel èn taki: ’Teki, njan. Disi wani taki mi skin.’ So srefi a ben teki wan beker, èn baka di a begi foe taki tangi, a gi den dati, ala di a taki: ’Oen alamala dringi foe en; bika disi wani taki mi „broedoe foe a froebontoe”, di sa kanti trowe foe a boen foe foeroe sma foe gi pardon foe sondoe’ ” (Mateus 26:26-28). Den bakaman foe Jesus ben moesoe memre a dede foe en na wan sempel èn warti fasi. Èn Jesus ben taki foe wan froebontoe di abi foe doe nanga en dede. Na ini a tori foe Lukas, den e kari a froebontoe dati „a njoen froebontoe”. — Lukas 22:20.
3. Sortoe aksi sma e poti ini a tori foe a njoen froebontoe?
3 San na a njoen froebontoe? Efoe a de a njoen froebontoe, dan dati wani taki dati wan owroe froebontoe de? Iniwan tra froebontoe abi foe doe nanga a njoen froebontoe disi? Den aksi disi na prenspari aksi, bika Jesus ben taki dati a broedoe foe a froebontoe ben sa kanti trowe „foe gi pardon foe sondoe”. Wi alamala abi so wan pardon foe sondoe fanowdoe srefisrefi. — Romesma 3:23.
Wan froebontoe nanga Abraham
4. Sortoe pramisi di ben gi na owroeten e jepi wi foe froestan a njoen froebontoe?
4 Foe man froestan a njoen froebontoe, dan wi moesoe go baka na a ten, pikinmoro 2000 jari bifo a diniwroko foe Jesus na grontapoe, di Tera nanga en osofamiri — so srefi Abram (baka ten Abraham) nanga Abram en wefi Sarai, (baka ten Sara) — ben teki waka komoto foe a goedoe Ur foe den Kaldewsma go na Haran na noordsei foe Mesopotamia. Den ben tan drape te leki a dede foe Tera. Dan, tapoe a komando foe Jehovah, Abraham di ben abi 75 jari, ben koti na Eufraat liba abra èn ben teki waka go zuid-westsei na a kondre Kanan foe libi na ini tenti leki wan sma di no abi wan fasti tanpresi (Genesis 11:31–12:1, 4, 5; Tori foe den Apostel 7:2-5). Dati ben de na ini 1943 b.G.T. Ala di Abraham ben de na Haran ete, Jehovah ben taigi en: „Mi sa meki joe tron wan bigi nâsi èn mi sa blesi joe èn mi wani meki joe nen kon bigi; èn sori foe de wan blesi. Èn mi sa blesi den wan di e blesi joe, èn a sma di e kari ogri na joe tapoe, mi sa floekoe, èn nanga jepi foe joe ala famiri foe grontapoe foe troe sa blesi densrefi.” Baka ten, baka di Abraham koti abra go na Kanan, Jehovah ben taki moro fara: „Mi sa gi joe siri a kondre disi.” — Genesis 12:2, 3, 7.
5. A pramisi di Jehovah ben gi Abraham abi foe doe nanga sortoe profeititori na ini a historia?
5 A pramisi di ben gi na Abraham, ben abi foe doe nanga wan foe den tra pramisi foe Jehovah. Ija, a ben meki Abraham de wan prenspari sma na ini a libisma historia, wan sma di ben abi foe doe nanga a kontroe foe a fosi profeititori di oiti ben skrifi. Baka di Adam nanga Eva sondoe na ini a djari foe Eden, Jehovah kroetoe den ala toe, èn na a srefi okasi, a ben taigi Satan, di ben kori Eva, taki: „Mi sa poti feantifasi na mindri joe nanga na oema èn na mindri joe siri nanga en siri. A sa masi joe na a ede èn joe sa masi en na a bakafoetoe” (Genesis 3:15). A froebontoe di Jehovah ben sroto nanga Abraham ben sori taki a Siri, di nanga jepi foe en den wroko foe Satan ben sa meki kon tron noti, ben sa kon na ini a famirilin foe a famiri-edeman dati.
6. (a) Nanga jepi foe soema a pramisi di Jehovah ben gi Abraham ben sa kon troe? (b) San na a froebontoe nanga Abraham?
6 Foe di a pramisi foe Jehovah ben abi foe doe nanga wan siri, dan Abraham ben abi wan manpikin fanowdoe di nanga jepi foe en a Siri ben kan kon. Ma en nanga Sara ben kon owroe èn den no ben abi pikin ete. Ma te foe kaba Jehovah ben blesi den, èn na wan wondroe fasi a ben meki a krakti foe den foe meki pikin kon na libi baka, èn Sara ben meki wan manpikin gi Abraham, Isak, èn na so wan fasi a ben meki a pramisi foe wan siri tan libilibi (Genesis 17:15-17; 21:1-7). Foeroe jari baka dati, baka di Jehovah tesi a bribi foe Abraham — so fara srefi taki a tesi a de di Abraham ben de klariklari foe òfer en lobi manpikin, Isak, leki wan srakti-ofrandi — A pramisi Abraham ete wan tron: „Foe troe mi sa blesi joe èn foe troe mi sa meki joe siri kon foeroe leki den stari na hemel èn leki den ai-santi di de na sekanti; èn joe siri sa teki den portoe foe den feanti foe en abra. Èn nanga jepi foe joe siri ala nâsi foe grontapoe foe troe sa blesi densrefi, foe di joe arki mi sten” (Genesis 22:15-18). Foeroetron den e kari a pramisi disi di ben gi ete wan tron, a froebontoe nanga Abraham, èn a njoen froebontoe di ben kon baka ten, ben sa abi foeroe foe doe nanga a froebontoe dati.
7. Fa a siri foe Abraham ben bigin kon foeroe, èn sortoe situwâsi ben meki taki den ben libi na Egipti?
7 Baka ten, Isak ben abi toe boi di ben de twelengi, Esau nanga Jakob. Jehovah ben froekisi Jakob foe de na afo foe a Pramisi Siri (Genesis 28:10-15; Romesma 9:10-13). Jakob ben abi 12 manpikin. A de krin taki a ten ben doro now dati a siri foe Abraham bigin kon foeroe. Di den manpikin foe Jakob ben de bigisma èn foeroe foe den ben abi den eigi osofamiri, dan wan angriten ben dwengi den alamala foe froisi go na Egipti, pe a manpikin foe Jakob, Josef, ben sreka a pasi, foe di Gado ben si èn seti sani na fesi (Genesis 45:5-13; 46:26, 27). Baka wan toe jari, na angriten na Kanan ben kon mendri. Ma a famiri foe Jakob ben tan na Egipti — fosi leki sma di den ben teki na wan switi fasi, ma baka ten leki srafoe. A ben de te leki 1513 b.G.T., 430 jari baka di Abraham koti na Eufraat abra, taki Moses fri den bakapikin foe Jakob komoto na ini Egipti (Exodus 1:8-14; 12:40, 41; Galasiasma 3:16, 17). Jehovah ben sa poti spesroetoe prakseri now tapoe a froebontoe di a ben sroto nanga Abraham. — Exodus 2:24; 6:2-5.
„Na owroe froebontoe”
8. San Jehovah ben sroto nanga den bakapikin foe Jakob na Sinai, èn san a sani dati ben abi foe doe nanga a froebontoe nanga Abraham?
8 Di Jakob nanga den manpikin foe en ben froisi go na Egipti, den ben de nanga tra famiriman, ma den bakapikin foe den ben gowe libi Egipti leki wan bigi groepoe foe lo di ben bigi srefisrefi (Exodus 1:5-7; 12:37, 38). Bifo Jehovah ben tjari den go na Kanan, a ben tjari den go na zuidsei na a foetoe foe wan bergi di nen Horeb (noso Sinai) na Arabia. Drape a ben sroto wan froebontoe nanga den. Den ben kon kari a froebontoe disi „na owroe froebontoe” te joe teki en gersi „a njoen froebontoe” (2 Korentesma 3:14). Nanga jepi foe na owroe froebontoe, Jehovah ben tiri a fosi kontroe foe a froebontoe nanga Abraham.
9. (a) Sortoe fo sani Jehovah ben pramisi nanga jepi foe a froebontoe nanga Abraham? (b) Sortoe tra froewakti a froebontoe di Jehovah ben sroto nanga Israèl ben meki kon de, èn nanga sortoe kondisi?
9 Jehovah ben tjari den kondisi foe a froebontoe disi kon na krin gi a nâsi Israèl: „Efoe oenoe sa gi jesi soifri na mi sten èn troetroe sa hori mi froebontoe, dan seiker oenoe sa tron mi spesroetoe goedoe na mindri foe ala tra pipel, bika heri grontapoe na foe mi. Èn oensrefi sa tron wan kownoekondre foe priester èn wan santa nâsi gi mi” (Exodus 19:5, 6). Jehovah ben pramisi taki a siri foe Abraham ben sa (1) tron wan bigi nâsi, (2) wini den feanti foe den, (3) kisi a kondre Kanan, èn (4) de wan wrokosani foe blesi den nâsi. Now a ben tjari kon na krin taki densrefi ben kan kisi den blesi disi leki en spesroetoe pipel, Israèl, di e tron „wan kownoekondre foe priester èn wan santa nâsi”, efoe den ben o gi jesi na den komando foe en. Den Israèlsma ben agri foe sroto a froebontoe disi? Den ben piki leki wán man: „Ala sani di Jehovah taki, wi wani foe doe.” — Exodus 19:8.
10. Fa Jehovah ben orga den Israèlsma ini wan nâsi, èn san a ben froewakti foe den?
10 Foe dati ede Jehovah ben orga den Israèlsma ini wan nâsi. A ben gi den wet di ben abi foe doe nanga anbegi èn nanga a libi leki wan borgoe. A ben gi den so srefi wan tabernakel (baka ten, wan tempel na Jerusalem) nanga wan priesterwroko foe doe santa diniwroko na ini a tabernakel. A hori di den ben moesoe hori densrefi na a froebontoe ben wani taki dati den ben moesoe gi jesi na den wet foe Jehovah èn spesroetoe, anbegi en wawan. A fosiwan foe den Tin Komando di ben de den moro prenspariwan foe den wet dati, ben de: „Mi na Jehovah, joe Gado, di tjari joe komoto na ini a kondre Egipti, komoto na ini a srafoe-oso. Joe no mag abi no wan tra gado teige mi.” — Exodus 20:2, 3.
Blesi di e kon nanga a Wetfroebontoe
11, 12. Na sortoe fasi den pramisi di ben gi na ini na owroe froebontoe ben kon troe ini a tori foe Israèl?
11 Den pramisi di ben gi na ini a Wetfroebontoe ben kon troe gi Israèl? Israèl ben tron „wan santa nâsi”? Leki bakapikin foe Adam, den Israèlsma ben de sondari (Romesma 5:12). Tokoe na ondro a Wet den ben tjari ofrandi foe tapoe den sondoe foe den. Jehovah ben taki foe den ofrandi di den ben tjari na a alajari Verzoendei: „Na a dei disi den sa verzoen gi oenoe foe froeklari taki oenoe krin. Oenoe sa de krin foe ala den sondoe foe oenoe na fesi Jehovah” (Lefitikus 16:30). Dati meki, te Israèl ben gi jesi na wan getrow fasi, dan den ben de wan santa nâsi, krin foe doe a diniwroko foe Jehovah. Ma a krin posisi disi ben anga foe a gi di den ben gi jesi na a Wet èn foe a tjari di den ben tjari ofrandi doronomo.
12 Israèl ben tron „wan kownoekondre foe priester”? Sensi a ten di a froebontoe ben sroto nanga Israèl, den ben de wan kownoekondre, nanga Jehovah leki Kownoe na hemel (Jesaja 33:22). Moro fara a Wetfroebontoe ben abi sani na ini toe di ben seti foe abi wan libisma kownoe, so taki baka ten den kownoe di ben tiri na Jerusalem ben teki presi gi Jehovah (Deuteronomium 17:14-18). Ma Israèl ben de wan kownoekondre foe priester? We, a ben abi wan groepoe priester di ben doe santa diniwroko na a tabernakel. A tabernakel (baka ten a tempel) ben de a moro prenspari presi foe soifri anbegi gi Israèlsma èn so srefi gi sma di no ben de foe Israèl. Èn a nâsi ben de a wan-enkri kanaal foe waarheid di ben tjari kon na krin gi a libisma famiri (2 Kroniki 6:32, 33; Romesma 3:1, 2). Ala getrow Israèlsma, no soso den priester di komoto foe Leifi, ben de „kotoigi” foe Jehovah. Israèl ben de Jehovah en „foetoeboi”, di ben seti foe ’froeteri foe a prèise foe en’ (Jesaja 43:10, 21). Foeroe trakondresma di ben abi sakafasi ben si a krakti foe Jehovah gi a boen foe en pipel èn a soifri anbegi ben hari den. Den ben tron proselietsma (Josua 2:9-13). Ma foe taki en leti, soso wán lo nomo ben dini leki salfoe priester.
Proselietsma na Israèl
13, 14. (a) Foe san ede wi kan taki dati proselietsma no ben de ini a Wetfroebontoe? (b) Fa proselietsma ben kon na ondro a Wetfroebontoe?
13 San ben de a posisi foe den proselietsma disi? Di Jehovah ben sroto en froebontoe, a ben de soso nanga Israèl; den no ben kari den wan foe a „bigi groepoe di moksi”, leki sma di ben de ini a froebontoe, ala di den ben de drape (Exodus 12:38; 19:3, 7, 8). A fosi geborewan foe den no ben de na ini, di den ben teri a loesoe-paiman gi a fosi geborewan foe Israèl (Numeri 3:44-51). Someni tenti jari baka dati, di a kondre Kanan ben prati na mindri den lo foe Israèl, noti ben poti na wan sei gi bribiman di no ben de Israèlsma (Genesis 12:7; Josua 13:1-14). Foe san ede? Bika a Wetfroebontoe no ben sroto nanga proselietsma. Ma mansma di ben de proselietsma ben besnij foe di den ben gi jesi na a Wet. Den ben hori den wet foe dati, èn den ben kisi winimarki foe den sani di a Wet ben seti. Proselietsma èn so srefi Israèlsma ben kon na ondro a Wetfroebontoe. — Exodus 12:48, 49; Numeri 15:14-16; Romesma 3:19.
14 Foe eksempre, efoe wan proselietsma ben kiri wan sma no foe espresi, dan a ben kan lowe go na wan loweman foto neleki wan Israèlsma (Numeri 35:15, 22-25; Josua 20:9). Na a Verzoendei den ben tjari wan ofrandi „gi a heri gemeente Israèl”. Leki wan pisi foe a gemeente proselietsma ben teki prati na ini den sani di ben feni presi èn na ofrandi ben kibri den (Lefitikus 16:7-10, 15, 17, 29; Deuteronomium 23:7, 8). Den proselietsma ben de so krosibei makandra nanga Israèl na ondro a Wet, taki na a Pinksterfesa foe 33 G.T., di den ben gebroiki a fosi ’sroto foe a kownoekondre’ gi den djoe, proselietsma ben kisi winimarki toe. A bakapisi foe dati ben de, taki „Nikolaus, wan proselietsma foe Antiòkia”, ben tron wan kresten èn a ben de na mindri den „seibi man . . . di abi wan boen nen” di ben kisi a wroko foe sorgoe gi den sani di a gemeente na Jerusalem ben abi fanowdoe. — Mateus 16:19; Tori foe den Apostel 2:5-10; 6:3-6; 8:26-39.
Jehovah e blesi a siri foe Abraham
15, 16. Fa a froebontoe di Jehovah ben sroto nanga Abraham ben kon troe na ondro a Wetfroebontoe?
15 Now di den bakapikin foe Abraham ben orga leki wan nâsi na ondro a Wet, dan Jehovah ben blesi den akroederi a pramisi di a ben gi a famiri-edeman. Na ini 1473 b.G.T., Josua, a sma di ben kon baka Moses, ben tjari Israèl go na ini Kanan. A prati di den ben prati a kondre na mindri den lo baka dati, ben meki a pramisi foe Jehovah kon troe foe gi a kondre na a siri foe Abraham. Te Israèl ben de getrow, dan Jehovah ben meki en pramisi kon troe foe meki den wini den feanti foe den. Disi ben de spesroetoe so na ondro a tiri foe kownoe David. Na ini a ten foe Salomo, a manpikin foe David, wan di foe dri sani foe a froebontoe nanga Abraham ben kon troe. „Juda nanga Israèl ben de foeroe, so foeroe leki den ai-santi di de na sekanti, ala di den ben e njan èn ben e dringi èn ben e meki prisiri.” — 1 Kownoe 4:20.
16 Ma fa den nâsi ben sa blesi densrefi nanga jepi foe Israèl, a siri foe Abraham? Soleki fa wi ben taki kaba, dan Israèl ben de a spesroetoe pipel foe Jehovah, a pipel di ben teki presi gi En na mindri den nâsi. Sjatoe bifo Israèl ben waka go na ini Kanan, Moses ben taki: „Prisiri, oen nâsi, nanga en pipel” (Deuteronomium 32:43). Foeroe trakondresma ben doe wan sani na tapoe dati. „Wan bigi groepoe di moksi” ben waka baka Israèl kaba komoto na ini Egipti, den ben si a krakti foe Jehovah na ini a gran sabana, èn den ben jere a kari foe Moses foe prisiri (Exodus 12:37, 38). Baka ten, Rut, wan oema foe Moab, ben trow nanga na Israèlman Boas èn ben tron wan afo foe a Mesias (Rut 4:13-22). A Kenietsma Jonadab nanga den bakapikin foe en, nanga na Etiopiaman Ebed-melek ben de difrenti foe tra sma foe di den ben hori densrefi na joisti gronprakseri di foeroe Israèlsma na skinfasi no ben de getrow (2 Kownoe 10:15-17; Jeremia 35:1-19; 38:7-13). Na ondro a grontapoemakti foe Persia, foeroe trakondresma ben tron proselietsma èn makandra nanga Israèl den ben feti nanga den feanti foe en. — Ester 8:17, foetoewortoe.
Wan njoen froebontoe ben de fanowdoe
17. (a) Foe san ede Jehovah ben trowe a noordsei kownoekondre nanga a zuidsei kownoekondre foe Israèl? (b) San ben meki taki Jehovah ben weigri foe teki den djoe te foe kaba?
17 Tokoe, foe man kisi a kontroe foe a pramisi foe Gado dorodoro, dan a spesroetoe nâsi foe Gado ben moesoe de getrow. Den no ben de getrow. A troe taki Israèlsma ben de di ben abi toemoesi aparti bribi (Hebrewsma 11:32–12:1). Ma tokoe na foeroe okasi, a nâsi ben drai go na heiden gado èn ben howpoe foe kisi wini na materia sei (Jeremia 34:8-16; 44:15-18). Sma ben gebroiki a Wet na wan fowtoe fasi noso ben poti a Wet na wan sei nomo (Nehemia 5:1-5; Jesaja 59:2-8; Maleaki 1:12-14). Baka a dede foe Salomo, Israèl ben kon prati na ini wan noordsei kownoekondre nanga wan zuidsei kownoekondre. Di a noordsei kownoekondre ben meki oproeroe krinkrin, Jehovah ben meki bekènti: „Bika joesrefi trowe a sabi, mi sa trowe joe toe, so taki joe no dini mi leki priester” (Hosea 4:6). A zuidsei kownoekondre ben kisi hebi strafoe toe, bika den no ben de getrow na a froebontoe (Jeremia 5:29-31). Di den djoe ben weigri foe teki Jesus leki a Mesias, dan na a srefi fasi Jehovah ben weigri foe teki den (Tori foe den Apostel 3:13-15; Romesma 9:31–10:4). Te foe kaba, Jehovah ben seti wan njoen sani, foe tiri a sani taki a froebontoe nanga Abraham kon troe dorodoro. — Romesma 3:20.
18, 19. Sortoe njoen sani Jehovah ben seti, so taki a froebontoe nanga Abraham ben kan kon troe dorodoro?
18 A njoen sani dati di a ben seti ben de a njoen froebontoe. Jehovah ben taki foe a sani disi na fesi di a ben taki: „ ’Loekoe! Dei e kon’, na so den wortoe foe Jehovah de, ’èn foe troe mi sa sroto nanga na oso foe Israèl èn nanga na oso foe Juda wan njoen froebontoe’ . . . ’Disi na a froebontoe di mi sa sroto nanga na oso foe Israèl baka den dei dati’, na so den wortoe foe Jehovah de. ’Mi wani poti mi wet na den inisei, èn na ini den ati mi sa skrifi den. Èn mi wani tron a Gado foe den èn den sa tron mi pipel.’ ” — Jeremia 31:31-33.
19 Disi na a njoen froebontoe di Jesus ben taki foe en na 14 Nisan 33 G.T. Na a okasi dati, a ben tjari kon na krin, taki a ten ben doro dati Jehovah ben sa sroto a pramisi froebontoe nanga den disipel foe en, nanga Jesus leki mindriman (1 Korentesma 11:25; 1 Timoteus 2:5; Hebrewsma 12:24). Nanga jepi foe a njoen froebontoe disi, a pramisi di Jehovah ben gi Abraham ben sa abi wan moro moi kontroe di ben sa de foe têgo, soleki fa wi sa si na ini a tra artikel.
Joe kan tjari disi kon na krin?
◻ San Jehovah ben pramisi ini a froebontoe nanga Abraham?
◻ Fa Jehovah ben tiri a kontroe foe a froebontoe nanga Abraham ini a tori foe Israèl na skinfasi?
◻ Fa proselietsma ben kisi wini foe na owroe froebontoe?
◻ Foe san ede wan njoen froebontoe ben de fanowdoe?
[Prenki na tapoe bladzijde 9]
Jehovah ben tiri wan fosi kontroe foe a froebontoe nanga Abraham nanga jepi foe a Wetfroebontoe