KAPITEL 8
Fa mi kan feni bun mati?
„Te mi ati e bron, mi musu man taigi wan sma fa mi e firi. Te mi e sari, mi abi wan sma fanowdu fu trowstu mi. Te mi e firi prisiri, dan mi wani taki wan sma e prisiri nanga mi. A prenspari gi mi fu abi mati.”—Brittany
DI YU ben pikin yu ben abi mati fanowdu fu prei, ma now di yu kon moro bigi, yu abi trutru mati fanowdu di e du sani makandra nanga yu èn di e denki neleki yu.
Boiti dati, Bijbel e taki dati „wan trutru mati e sori lobi ala ten. En na wan brada di gebore fu te nowtu de” (Odo 17:17). A no de fu taki dati den sortu mati disi no de leki den wan di yu ben abi di yu ben pikin!
Hori a sani disi na prakseri: Now di yu e kon moro bigi, yu abi mati fanowdu
1. di abi bun maniri
2. di e tyari densrefi na wan fasi di fiti
3. di de wan bun eksempre gi yu
Aksi: Fa yu kan feni den sortu mati disi? Meki wi luku den sani disi wan-fru-wan.
San na wan trutru mati #1—A abi moi fasi
San yu musu sabi. A no ala sma di e taki dati den na yu mati na trutru mati. Bijbel e taki srefi dati „mati de di lobi broko makandra pisipisi” (Odo 18:24). Kande yu e aksi yusrefi fa dati kan. Ma denki a tori disi: Oiti wan sma hori yu leki mati, soso fu di a ben wani wan sani fu yu? Oiti yu ben abi wan mati di ben e taki yu tori noso di ben fruteri lei fu yu? Den sortu sani disi kan meki taki yu no e frutrow a mati dati moro.a No frigiti taki a moro bun fu abi trutru mati leki fu abi furu mati!
Tra sani di yu kan du. Suku mati di abi bun maniri di yu ben o wani abi tu.
„Ala sma e taki soso bun fu mi mati Fiona. Mi wani taki sma e taki so fu mi tu. Mi wani abi wan bun nen tu, neleki en. Na dati mi lobi fu en.”—Yvette, 17.
Pruberi fu du den sani disi.
1. Leisi Galasiasma 5:22, 23.
2. Aksi yusrefi, ’Den mati fu mi abi den fasi di „a yeye e meki sma kisi”?’
3. Skrifi a nen fu den moro bun mati fu yu dyaso na ondrosei. Skrifi tu san na a moro prenspari fasi fu ibriwan fu den.
Nen
․․․․․
Fasi
․․․․․
San yu kan du: Efu yu skrifi soso fasi di no bun, dan kande yu musu suku moro bun mati!
San na wan trutru mati #2—A e tyari ensrefi na wan fasi di fiti
San yu musu sabi. Te yu e feti fu suku mati, dan nofo tron yu o feni mati di no bun. Bijbel e taki: „Te wan sma e waka nanga don sma, dan sani no o waka bun gi en” (Odo 13:20). Den wortu „don sma” no abi fu du nanga sma di e kisi soso onvoldoende na skoro, noso di no koni. Na presi fu dati, den wortu disi abi fu du nanga sma di no wani teki bun rai èn di e tyari den srefi na wan fasi di no bun kwetikweti. A no de fu taki dati yu no wani den sortu mati dati!
Tra sani di yu kan du. No tron mati nanga ala sortu sma, ma luku bun suma yu e teki leki mati (Psalm 26:4). Disi no wani taki dati yu musu desko sma. San prenspari, na taki yu e luku bun fu ’man si krin suma na wan reti-ati sma èn suma na wan ogri sma, suma e dini Gado èn suma no e dini en’.—Maleaki 3:18.
„Mi breiti taki mi papa nanga mama yepi mi fu feni bun mati di e hori densrefi na den wet fu Gado!”—Christopher, 13.
Piki den aksi di e kon now:
Te mi de nanga den mati fu mi, dan mi e frede taki den o dwengi mi fu du wan sani di no bun?
□ Ja
□ Nee
A de so taki mi no wani mi papa nanga mama kon sabi den mati fu mi, fu di mi e frede taki den no o feni den bun?
□ Ja
□ Nee
San yu kan du: Efu yu piki den aksi na tapusei nanga ’ja’, dan suku mati di abi bun maniri èn di de wan bun eksempre na ini a fasi fa den e tyari densrefi leki Kresten.
San na wan trutru mati #3—A de wan bun eksempre gi yu
San yu musu sabi. Bijbel e taki: „Takru kompe e pori bun gwenti” (1 Korentesma 15:33). Wan yongu uma di nen Lauren, taki: „Den pikin na mi skoro ben lobi mi soso te mi ben e du san den taigi mi. Mi ben e firi leki mi ben de mi wawan. Dati meki mi bigin du leki den, so taki den ben kan si mi leki den mati.” Lauren kon si taki te yu e du nomo san trawan e fruwakti fu yu, dan den o du nanga yu san den wani. Yu no abi den sortu mati dati fanowdu!
Tra sani di yu kan du. No bumui moro nanga sma di e dwengi yu fu libi soleki fa den e libi. Te yu e du disi, dan kande yu no o abi so furu mati moro. Ma yu o abi moro lespeki gi yusrefi èn yu o man feni moro bun mati di o gi yu deki-ati fu du bun.—Romesma 12:2.
„Mi bun mati Clint e denki krin èn a e frustan fa trawan e firi. A e gi mi furu deki-ati.”—Jason, 21.
Aksi yusrefi den sani disi:
Te mi e luku a fasi fa mi e weri krosi, a fasi fa mi e taki èn a fasi fa mi e tyari misrefi, dan mi e si taki mi e du sani di no fiti, soso fu di mi wani taki den mati fu mi lobi mi?
□ Ja
□ Nee
Mi e go na presi pe mi no ben o go efu mi no ben de nanga den mati fu mi?
□ Ja
□ Nee
San yu kan du: Efu yu piki den aksi di kari na tapusei nanga ’ja’, dan suku yepi na yu papa nanga mama, noso na wan tra lepi sma. Efu yu na wan Yehovah Kotoigi, dan yu kan aksi wan Kresten owruman fu yepi yu fu feni mati di kan de wan moro bun eksempre gi yu.
YU KAN LEISI MORO FU A TORI DISI NA INI PISI 2, KAPITEL 9
Wan sma di yu e si leki mati, noso na ati fu yu e dwengi yu fu du sani di no bun? A tra artikel o sori san yu kan du fu no meki dati pasa!
[Futuwortu]
a A no de fu taki dati ala sma e meki fowtu (Romesma 3:23). Dati meki te wan mati du wan sani di hati yu e sori taki a e sari trutru fu a sani di a du, dan a bun fu prakseri taki „lobi e tapu bun furu sondu”.—1 Petrus 4:8.
PRENSPARI TEKST
„Wan mati de tu di lobi yu moro leki wan brada.”—Odo 18:24.
SAN YU KAN DU
Efu yu tyari yusrefi na wan fasi di fiti, dan sma di e pruberi fu du a srefi o si dati èn den o wani teki yu leki mati. Den sma disi na den moro bun mati di yu kan abi!
YU BEN SABI A SANI DISI?
Gado no lobi a wan sma moro a trawan, ma toku a e luku bun suma a o gi primisi fu ’kon tan nanga en na ini en tenti’.—Psalm 15:1-5.
SAN MI O DU
Fu man feni bun mati, mi o ․․․․․
Wan tu fu den sma di owru moro mi èn di mi wan leri sabi moro bun na ․․․․․
Sani di mi wani aksi mi papa nanga mama fu a tori disi: ․․․․․
SAN YU E DENKI?
● Sortu fasi yu ben o wani yu mati fu abi èn fu san ede?
● Sortu sani yu musu kenki fu man de wan moro bun mati?
[Prenspari pisi]
Di mi papa nanga mama taigi mi fu no bumui moro nanga son mati fu mi, mi taigi misrefi taki na den mati dati wawan mi ben wani abi. Ma mi papa nanga mama gi mi bun rai. Èn di mi stop fu prakseri soso san mi ben wani, mi kon si taki furu tra sma de di kan tron moro bun mati gi mi.”—Cole
[Faki]
Pruberi fu du den sani disi
Taki nanga yu papa nanga mama fu a tori disi. Aksi den sortu mati den ben abi di den ben abi a yari fu yu. Den e sari taki den no ben moksi nanga den yoisti sma? Fu san ede? Aksi den fa yu kan wai pasi gi son problema di miti den.
Meki yu papa nanga mama kon sabi den mati fu yu. Efu yu e tweifri fu du dati, dan aksi yusrefi: ’Fu san ede mi e tweifri?’ Yu sabi wan sani fu den mati fu yu di yu papa nanga mama no o lobi? Efu dati de so, dan kande yu musu luku moro bun suma yu e teki leki mati.
Arki bun. Sori taki yu e broko yu ede nanga den mati fu yu.—Filipisma 2:4.
De klariklari fu gi pardon. No fruwakti taki trawan no o meki fowtu. „Wi alamala e sondu furu tron.”—Yakobus 3:2.
No denki taki yu musu de nanga yu mati ala ten. Yu no abi fu plak na yu mati. Trutru mati o yepi yu ala ten te yu abi den fanowdu.—Preikiman 4:9, 10.
[Prenki]
Te yu e du san trawan wani, soso fu di yu wani taki den lobi yu, dan den o du nanga yu san den wani.