Fu san ede wi kon nanga a Nyun-Grontapuvertaling?

Someni tenti yari kaba, Yehovah Kotoigi gebroiki, druk èn prati difrenti sortu vertaling fu Bijbel. Ma wi ben kon si taki a de fanowdu fu kon nanga wan nyun vertaling di ben o yepi sma moro bun fu kon „sabi a tru leri finifini”, bika dati na san Gado wani gi ala sma (1 Timoteyus 2:3, 4). Sobun na ini 1950, wi bigin tyari pisi fu wi Bijbel, Nyun-Grontapuvertaling, kon na doro na ini Ingrisitongo. A Bijbel disi skrifi na a fasi fa sma e taki na ini a ten disi èn a vertaal soifri na ini moro leki 130 tongo.

Wan Bijbel ben de fanowdu di makriki fu frustan. Wan tongo e kenki baka wan pisi ten èn furu Bijbelvertaling abi owru wortu na ini di muilek fu frustan. Boiti dati, sma ben feni owruten dokumenti di e taki moro soifri san den skrifiman fu Bijbel ben skrifi. A sani disi meki taki wi man frustan den pisi moro bun di skrifi na ini Hebrewtongo, Arameisitongo nanga Grikitongo.

Wan vertaling ben de fanowdu di e taki soifri san Gado taki. Na presi taki den sma di vertaal Bijbel kenki den sani di Gado meki sma skrifi, den musu hori densrefi na san den skrifiman fu Bijbel ben skrifi na a bigin. Ma na ini furu vertaling den no gebroiki a nen fu Gado, Yehovah, na ini den Santa Buku fu Bijbel.

Wan Bijbel ben de fanowdu di e gi grani na a Skrifiman (2 Samuel 23:2). Soleki fa a prenki na ondrosei e sori, dan den poti a nen fu Yehovah baka na sowan 7000 presi na ini a Nyun-Grontapuvertaling, pe a nen ben skrifi na ini den moro owru dokumenti (Psalm 83:18). Fu di den ondrosuku sani finifini furu yari langa, meki a Bijbel disi switi fu leisi èn a e sori krin fa Gado e denki fu sani. Efu yu abi a Nyun-Grontapuvertaling na ini yu tongo noso efu yu no abi en, wi e gi yu a deki-ati fu teki en leki wan gwenti fu leisi a Wortu fu Yehovah ibri dei.​—Yosua 1:8; Psalm 1:2, 3.

• Fu san ede wi ben si taki wan nyun vertaling fu Bijbel ben de fanowdu?

• Efu wan sma wani sabi san Gado wani, dan san a musu du ibri dei?