PISI 10
San na a Osofamiri Anbegi?
Zuid-Korea
Brasyonkondre
Australia
Ginea
Sensi owruten, Yehovah ben wani taki ibri osofamiri musu teki ten fu kon abi wan bun matifasi nanga En èn fu leri libi moro bun nanga makandra (Deuteronomium 6:6, 7). Fu dati ede, Yehovah Kotoigi e poti wan spesrutu ten ibri wiki fu hori na Osofamiri Anbegi. Den breiti fu du dati bika na so den abi na okasi fu de nanga makandra fu taki fu tori di abi fu du nanga Bijbel èn di na osofamiri abi fanowdu. Srefi efu yu wawan de, toku yu kan kon krosibei na Gado te yu e gebroiki na okasi dati fu studeri wan Bijbel tori di yu feni moi.
Na Osofamiri Anbegi e yepi wi fu kon moro krosibei na Yehovah. „Kon krosibei na Gado èn a o kon krosibei na unu” (Yakobus 4:8). Wi o kon sabi Yehovah moro bun te wi e kon sabi den fasi fu en finifini èn te wi e leisi na ini Bijbel san a du. Wan makriki sani di yu kan bigin du na a Osofamiri Anbegi na te unu e teki ten fu leisi Bijbel makandra. Kande yu kan gebroiki a schema fu a Wi Kresten libi nanga a preikiwroko konmakandra di e sori san wi musu leisi ibri wiki. Ibri memre fu na osofamiri kan leisi wan pisi èn baka dati den alamala kan taki san den leri fu Bijbel.
Na Osofamiri Anbegi e yepi na osofamiri fu libi moro bun nanga makandra. Masra nanga wefi, èn sosrefi papa, mama nanga den pikin fu den e kon abi wan moro bun matifasi nanga makandra te den e studeri Bijbel leki osofamiri. Na Osofamiri Anbegi musu de wan prisiri okasi èn wan fu den moro moi sani na ini a wiki. Papa nanga mama musu hori na prakseri o owru den pikin fu den de te den o luku sortu tori o de wan bun tori fu taki. Kande den kan gebroiki artikel na ini A Waktitoren noso Ontwaakt!, noso artikel fu a website fu wi, jw.org. Unu kan taki tu fu wan problema di den pikin ben abi na skoro èn san den pikin kan du. Unu kan luku wan fu den programa tu tapu JW Broadcasting (tv.jw.org) èn baka dati unu kan taki fu san un si. Kande yu wani singi den singi di wi o singi na den konmakandra. Kande yu wani singi den singi di wi o singi na den konmakandra. Baka na Osofamiri Anbegi, unu kan nyan noso dringi wan switi sani.
Na a spesrutu okasi disi te na osofamiri e anbegi Yehovah ibri wiki, dan dati o yepi ala sma na ini na osofamiri fu prisiri nanga Gado Wortu. Yehovah o blesi a muiti di yu e meki.—Psalm 1:1-3.
Fu san ede wi e poti ten na wan sei gi na Osofamiri Anbegi?
San papa nanga mama kan du fu meki na okasi disi de wan prisiri okasi gi a heri osofamiri?