Suma na a koni srafu di de fu frutrow?

Syatu bifo Yesus dede a ben de en wawan nanga den fo disipel fu en, Petrus, Yakobus, Yohanes, nanga Andreas. Di Yesus ben taki fu a marki di ben o sori taki a kon na ini den lasti dei, dan a poti a tumusi prenspari aksi disi: „Suma na trutru a koni srafu di de fu frutrow èn di en masra poti fu luku den futuboi fu en, so taki a kan gi den nyanyan na a reti ten?” (Mateyus 24:3, 45; Markus 13:3, 4) Leki „masra”, Yesus gi den disipel fu en a dyaranti taki a ben o poti sma di ben o gi doronomo nyanyan noso leri fu Bijbel na den bakaman fu en na a ten fu a kaba. Suma ben o de a srafu disi?

Na wan pikin grupu bakaman fu Yesus di salfu nanga santa yeye. A „srafu” na a Tiri Skin fu Yehovah Kotoigi. A e gi nyanyan na a reti ten na den tra anbegiman fu Yehovah. Wi abi a srafu disi fanowdu fu tan gi wi „nofo nyanyan na a reti ten”.​—Lukas 12:42.

A srafu e sorgu na osofamiri fu Gado (1 Timoteyus 3:15). Yesus gi a srafu a hebi frantwortu fu luku a wroko fu a pisi fu Yehovah en organisâsi na grontapu. Den e luku den gudu fu na organisâsi, den e tiri a preikiwroko, èn den e gi wi leri nanga yepi fu den gemeente. Sobun, fu man gi wi san wi abi fanowdu na a yoisti ten, „a koni srafu di de fu frutrow” e gi leri nanga yepi fu den buku nanga tijdschrift di wi e gebroiki na ini wi diniwroko. Boiti dati, wi e kisi leri nanga yepi fu den gemeente konmakandra nanga den bigi konmakandra.

A srafu disi de fu frutrow fu di a e hori ensrefi na den leri fu Bijbel èn a e tan du a wroko di a kisi fu preiki a bun nyunsu. A srafu koni fu di a e luku den afersi fu Krestes na grontapu na wan yoisti fasi (Tori fu den apostel 10:42). Yehovah e blesi a wroko di a srafu e du, fu di a e meki a wroko go na fesi èn A e yepi a srafu disi fu gi furu leri fu Bijbel.​—Yesaya 60:22; 65:13.

• Suma Yesus poti fu gi den disipel fu en leri fu Bijbel?

• Fu san ede a srafu de fu frutrow èn fu san ede a koni?