LES 3
Rakab ben bribi na ini Yehovah
Meki wi du neleki wi de na a foto Yerikow. A foto disi de na ini a kondre Kanan. Den sma fu Kanan no e bribi na ini Yehovah. Wan uma di nen Rakab e libi na ini Yerikow.
Di Rakab ben de wan pikin meisje, a ben yere sma e taki fa Moses ben prati a watra fu a Redi Se èn fa a ben meki den Israelsma komoto na ini Egepte. A ben yere tu fa Yehovah ben yepi den fu wini den sma di ben kon feti nanga den. Ma now Rakab yere taki den Israelsma seti den kampu krosibei fu Yerikow!
Rakab ben yepi den tu man fu Israel fu di a ben e bribi na ini Yehovah
Wan neti, tu man fu Israel go na Yerikow fu luku fa a foto tan. Den kon na a oso fu Rakab. Rakab kari den fu kon na ini en oso. A srefi neti, a kownu fu Yerikow kon sabi taki den tu man de na ini a foto èn taki den go na Rakab oso. Dati meki a kownu seni wan tu man fu go grabu den. Rakab meki den Israel man go kibri tapu a plata daki fu en oso, èn a taigi den man fu a kownu: ’Den tu man ben de dyaso, ma den gowe kaba. Efu unu lon go na den baka now, un kan kisi den ete!’ Yu sabi fu san ede Rakab yepi den tu man fu Israel?— A du dati fu di a e bribi na ini Yehovah èn a sabi taki Yehovah o gi den Israelsma a kondre Kanan.
Fosi den tu Israel man gowe fu Rakab oso, den pramisi en taki noti no o pasa nanga en nanga en famiri te den o kon feti nanga Yerikow. Yu sabi san den taigi Rakab fu du?— Den taigi en: ’Teki a redi titei disi èn meki a anga komoto fu yu fensre. Efu yu du disi, dan noti no o pasa nanga den sma di de na ini yu oso.’ Rakab e du ala san den man taigi en. Yu sabi san pasa baka dati?—
Yehovah meki Rakab nanga en famiri tan na libi
Wan tu dei baka dati, den Israelsma waka lontu a foto sondro fu meki babari. Ibri dei den ben e waka wán leisi lontu a foto èn den du dati siksi dei. Ma na a di fu seibi dei, den waka seibi leisi lontu a foto. Dan den alamala bari bun tranga. Ne Yehovah meki den skotu di ben de lontu a foto, fadon broko. Ma na oso pe a redi titei e anga na a fensre, no fadon broko! Yu man si dati tapu a prenki?— Rakab nanga en famiri tan na libi!
San yu kan leri fu Rakab?— Rakab ben bribi na ini Yehovah fu di a ben yere sortu kefalek sani Yehovah du. Yu srefi e leri furu moi sani fu Yehovah. Yu e bribi na ini Yehovah neleki Rakab?— Seiker yu e du dati!