Gado Wortoe abi libi
Foe wan hoeroe-oema a ben tron wan lobiwan foe Gado
FOEROE sma e doe san takroe sondro foe prakseri dati san den e doe no e plisi Gado. Foe eksempre den kan abi seks nanga tra sma di den no trow nanga den, wan sani di de tége a wet foe Gado (Ex. 20:14; Hebrewsma 13:4). Loekoe pikinso na oema foe Kanaän di nen Rachab èn di e libi na ini Jericho.
Dati na Rachab di e gi wan switi kon na wan kanaän man na ini en oso. A e kon foe wan tra foto. Rachab kande gi en njanjan, e meki a firi prisiri foe na neti èn e sorgoe dati a abi seks. Rachab na wan hoeroe-oema. A de wan wroko a mindri Kanaänsma di den e si leki wan boen sani foe kisi moni foe wan man foe sorgoe gi seks-prisiri.
Wan pisten baka den toe man disi foe Israël e kon na a oso foe Rachab, èn a e teki den na oso. Den de spion foe na kampoe foe Israël di didon abrasé na Jordaanliba foe Jericho. Den no kon na Rachab foe bai seks prisiri. Moro foeroe den e ferstan dati na oso foe Rachab kan de wan boen presi foe kon sondro foe meki sma prakseri poti toemsi a tapoe den.
Ma, den spion sma si den di den e go na ini na oso foe Rachab. A njoensoe foe dati ben gi na a kownoe foe Jericho. Wantewante a seni den man disi foe go na Rachab. Den e gi komando: ’Tjar den man kon na doro di ben kon na joe oso’. Ma Rachab e taki: ’Ija, man kon djaso, ma net di a ben bigin kon doengroe den gwe. Go a den baka.’ Ma a troe foe a tori, de dati Rachab ben kibri den spion a tapoe a dak foe en.
San Rachab ben sa doe now? A e sori bribi na ini Jehovah Gado èn a e meki den spion pramisi en dati den sa kibri en nanga en famiri te Jehovah gi Jericho na ini na anoe foe den Israëlsma. Te den spion e gi na pramisi, dan Rachab e jepi den foe lowe nanga jepi foe wan tité abra na skotoe.
Sjatoe a baka, den legre foe den Israëlsma kon èn waka lontoe Jericho. Tapoe a di foe sébi dé den waka lontoe a foto sébitron èn tapoe wan wondroefasi, den skotoe foe en fadon, ma soleki den spion ben pramisi, Rachab nanga en famiri ben tan a libi. Bakaten, Racha ben tron na oema foe wan Israël man di ben nen Salmon. Baka wan pisten den ben kisi wan manpikin di ben nen Boaz di ben tron na afo foe kownoe David. Foe troe Rachab de wan toemsi moi eksempre foe wan sma di ben doe takroe sani ma di ben kenki en libifasi èn ben tron wan lobiwan foe Jehovah Gado. — Jozua 2:1-24; 6:1-25; Ruth 4:21, 22; Matteus 1:5; Hebrewsma 11:31.