Rakab — Den ben froeklari en regtfardiki nanga jepi foe den wroko foe bribi
PRAKSERI pikinso! Wan hoeroe-oema di den ben froeklari regtfardiki na a fasi fa Gado e si sani. „Noiti!”, na so foeroe sma ben sa bari taki. Ma dati na san pasa nanga a motjo-oema Rakab foe Jerikow, wan fositen foto foe Kanan.
A bijbel skrifiman Jakobus e skrifi: „Den e froeklari wan sma regtfardiki nanga jepi foe den wroko foe en, èn no soso foe bribi ede. A no na a srefi fasi den ben froeklari Rakab, a hoeroe-oema, regtfardiki nanga jepi foe den wroko foe en, baka di a ben teki den boskopoeman na en oso nanga switifasi èn ben seni den gowe na wan tra pasi? Ija, so leki fa a skin sondro bro dede, na so bribi sondro wroko dede toe” (Jakobus 2:24-26). Foe san ede den ben froeklari Rakab regtfardiki? San a ben doe foe kisi so wan bigi grani foe abi wan boen matifasi nanga Gado?
Den Israèlsma e kon!
Meki wi go loekoe a jari 1473 bifo Gewoon Teri. Proeberi foe si a situwâsi. Jerikow na wan foto di den ben meki tranga toemoesi. Hei na tapoe a skotoe foe a foto na oso foe Rakab, a hoeroe-oema, de. So leki fa a sori, dan foe a hei presi disi, a kan loekoe na a owstoesei foe pe a kan si den watra di e lon abra den sjoro foe Jordan liba (Josua 3:15). Na a owstoe libakanti, a ben sa kan si a legrepresi foe den Israèlsma, nanga wan feti legre foe moro leki 600.000 man. Den de soso wan toe kilometer foe a presi pe a de!
Rakab ben jere foe den sani di Israèl ben doe ini feti. A ben jere toe fa Jehovah e sori en makti, spesroetoe di Jehovah ben opo wan pasi gi den Israèlsma ini a Redi Se foe lowe. Dan foe troe, den hei watra foe Jordan liba no sa de wan skotoe gi Jehovah. Disi na wan ten foe banawtoe! San Rakab sa doe na tapoe disi?
Rakab e teki wan sei
Heri esi Rakab e teki toe fisitiman di a no ben froewakti — spion foe a legrepresi foe den Israèlsma. Den e soekoe wan presi foe tan, èn Rakab e teki den ini en oso. Ma a kownoe foe Jerikow e kisi foe jere taki den de drape. Wantewante a e seni den ofsiri foe en di e sorgoe taki sma e hori a wet, foe teki den go sroto. — Josua 2:1, 2.
Di den ofsiri foe a kownoe doro, Rakab ben teki a sei foe Jehovah Gado kaba. „Tjari den man kon na doro di ben kon na joe”, na so den ofsiri foe a kownoe e aksi. Rakab ben kibri den spion na mindri den flas tiki (wan sortoe prani) di a ben poti foe drei na tapoe en dak. A e taki: „Ija, den man ben kon na mi oso, èn mi no ben sabi o pe den ben komoto. Èn a ben de na a ten di a ben kon doengroe, di den gwenti foe tapoe den doro foe a foto, dati den ben gowe. Mi no sabi finifini pe den man go. Go esi na den baka, oenoe sa kisi den ete” (Josua 2:3-5). Dati den man foe a kownoe e doe — foe soso.
Rakab ben kori den feanti. Wantewante a e doe moro sani di e sori en bribi ini Jehovah nanga jepi foe en wroko. A e go tapoe a dak èn taigi den spion: „Mi sabi taki Jehovah seiker sa gi oenoe a kondre.” Rakab e taki dati foe troe ala den sma foe a kondre e frede bikasi den ben jere taki Gado „ben drei den watra foe a Redi Se” na fesi foe den Israèlsma, 40 jari na fesi. Den sma sabi toe taki den Israèlsma ben kiri toe Amoriet kownoe. „Di wi ben jere dati”, na so Rakab e taki, „dan wi ati bigin naki, èn no wan sma ben abi deki-ati moro foe oenoe ede, bika Jehovah, oen Gado, na Gado ini hemel na loktoe èn na grontapoe na ondro.” — Josua 2:8-11.
Rakab e begi den tranga taki: „We, grantangi, sweri gi mi na Jehovah taki, foe di mi ben sori oenoe lobi boen-atifasi, oenoe seiker sa sori lobi boen-atifasi na a osofamiri foe mi papa, èn oenoe moesoe gi mi wan marki di mi kan froetrow na tapoe. Èn oenoe moesoe kibri a libi foe mi papa, mi mama, mi brada nanga mi sisa èn ala sma di de foe den.” — Josua 2:12, 13.
Den man e agri èn taigi Rakab san a moesoe doe. Na en fensre a moesoe anga a redi titei di a ben gebroiki foe saka den spion na gron, dorosei den skotoe foe Jerikow. A moesoe tjari en famiri kon makandra ini en oso, pe den moesoe tan foe kisi kibri. Rakab e gi den spion di o gowe bodoi, di den kan gebroiki, foe a fasi fa a kondre didon èn e taigi den fa den kan lowe gi den man di e soekoe foe kisi den. Den spion ben lowe gi den man di ben e soekoe foe kisi den. Baka di a e anga a redi titei meki a de foe si èn e tjari den memre foe en famiri kon makandra, Rakab e wakti loekoe fa sani sa go moro fara. — Josua 2:14-24.
San Rakab ben doe? A no de foe taki, a ben boeweisi taki a e poti bribi ini na Almakti Gado, Jehovah! A sa libi akroederi den markitiki foe en. Ija, èn den sa froeklari en regtfardiki foe den sortoe wroko disi foe bribi.
Den skotoe e fadon!
Wan toe wiki e pasa. Makandra nanga den priester — sonwan nanga toetoe foe manskapoe èn trawan di e tjari a santa ark foe a froebontoe — den fetiman foe Israel è waka lontoe a foto Jerikow. Den ben doe disi na a di foe siksi dei now, wán leisi wan dei. Ma tapoe a di foe seibi dei disi, den ben waka siksi leisi kaba lontoe a foto. Loekoe drape, den e go baka ete wan leisi!
A di foe seibi waka doe kaba, langa bro tapoe den toetoe e foeroe a loktoe. Now den Israèlsma bigin bari boen tranga. Nanga dati Jehovah meki den skotoe foe Jerikow, di ben kibri a foto, fadon nanga wan dondroe babari. Soso a pisi pe Rakab oso de, e tan tanapoe. Den tra pisi foe a foto nanga den wan di e libi drape kisi pori. Di a ben boeweisi en bribi nanga jepi foe den wroko foe en, a motjo-oema di sori berow kisi kibri makandra nanga en osofamiri, èn a e bigin foe libi na mindri a pipel foe Jehovah. — Josua 6:1-25.
Kon wi loekoe den eigifasi foe Rakab
Rakab no ben de wan pori, lesi oema, bikasi na tapoe en dak a ben poti flas tiki foe drei ini son. Den titei foe a flas prani den ben gebroiki foe meki linnen. Rakab ben abi wan ipi foe karmozijn titei toe ini en oso (Josua 2:6, 18). So boen, kande a ben wroko foe meki linnen èn kande a ben sabi fa foe kloroe den krosi. Ija, Rakab ben de wan oema di ben wroko tranga. San ben de moro, a ben kon kisi wan respeki frede gi Jehovah. — Teki gersi Odo 31:13, 19, 21, 22, 30.
Fa a de nanga a tra wroko foe Rakab? A no ben de soso na oema di ben moesoe teki sma ini wan pikin hotel. Nôno, den Boekoe foe bijbel e meki wi kon sabi en foe di den e gebroiki Hebrew nanga Griki wortoe di sori go na wan motjo-oema. Foe eksempre, a Hebrew wortoe zoh·nah’ ala ten abi foe doe nanga wan matifasi di no mag. Foe taki en leti, na mindri den Kanansma hoeroe libi no ben de wan afersi di no abi wan boen nen.
A gebroiki di Jehovah ben gebroiki wan hoeroe-oema e sori en bigi sari-atifasi. San wan sma e sori na dorosei kan kori wi, ma Gado „e si san de na ini na ati” (1 Samuèl 16:7). Foe dati ede, motjo-oema di abi wan opregti ati èn di abi berow foe den hoeroe libi kan kisi pardon foe Jehovah Gado. (Teki gersi Mateus 21:23, 31, 32.) Rakab srefi ben drai en baka gi wan fowtoe libi èn libi wan regtfardiki libi èn a ben kisi a boen foe Gado.
Den spion foe Israèl ben libi akroederi a Wet foe Gado, foe dati ede den no ben tan na Rakab oso foe hoeroedoe reide. Kande a reide foe den ben de foe di sma no ben sa prakseri wan sani te den si den ini na oso foe wan hoeroe-oema. A presi pe na oso tanapoe na tapoe a skotoe foe a foto ben e gi pasi toe foe lowe. So leki fa a sori, dan Jehovah ben tjari den go na wan sondoe sma, di en ati ben naki en, di a ben jere den njoensoe fa Gado ben handri nanga den Israèlsma, so taki a ben sori berow èn ben kenki en fasi foe libi. A froeklari foe Gado taki Israèl ben sa pori den Kanansma foe hoeroedoe libi ede èn en blesi tapoe Rakab èn en blesi na tapoe a teki di den ben teki Jerikow abra, e boeweisi taki den spion no ben doe hoeroedoe. — Lefitikus 18:24-30.
Fa a de nanga den wortoe foe Rakab di a ben taki foe kori den sma di ben e soekoe foe kisi den spion? Gado ben feni a sani dati boen. (Teki gersi Romesma 14:4.) A ben teki wan tjans soso foe kan kibri den foetoeboi foe Gado, na so fasi a ben gi boeweisi foe en bribi. Ala di a taki foe lei foe espresi na wan fowtoe sani ini Jehovah ai, wan sma no de froeplekti foe tjari froetrow bodoi kon na krin gi sma di no abi reti na tapoe dati. Srefi Jesus no ben gi ala finifini piki krinkrin te a ben si taki dati ben kan tjari ogri kon di no ben de fanowdoe (Mateus 7:6; 15:1-6; 21:23-27; Johanes 7:3-10). Ma a de krin, taki wi moesoe si a fasi fa Rakab ben kori den feanti ofsiri ini a leti dati.
A pai di Rakab ben kisi
Fa Rakab ben kisi en pai, foe di a ben sori bribi? A kibri di a ben kisi di Jerikow ben kisi pori, ben de wan blesi foe Jehovah troetroe. Baka ten, a ben trow nanga Salmon (Salma), a manpikin foe na edeman ini a sabana, Nahéson, foe a lo foe Juda. Leki papa nanga mama foe Boas, di ben de wan sma di frede Gado, Salmon nanga Rakab ben e meki wan pisi ini a lin foe lo di e tjari wi go na kownoe David foe Israèl (1 Kroniki 2:3-15; Rut 4:20-22). Moro prenspari, Rakab, di fosi ben de wan motjo, ben de wán foe den fo oema wawan di den nen kari ini a famirilin foe Jesus Krestes di Mateus skrifi (Mateus 1:5, 6). Fa dati ben de wan blesi foe Jehovah!
Ala di a no ben de wan Israèlsma èn fositen ben de wan motjo-oema, Rakab de wan toemoesi moi eksempre foe wan oema di ben boeweisi nanga jepi foe en wroko taki a ben e bribi dorodoro ini Jehovah (Hebrewsma 11:30, 31). Leki trawan, sonwan di ben tapoe nanga wan hoeroe libi, a sa kisi ete wan tra pai — wan opobaka foe dede foe libi ini wan paradijs na grontapoe (Lukas 23:43). Foe en bribi ede di den wroko foe en ben hori baka gi dati, Rakab ben kisi a boen foe wi lobi Tata na hemel di e gi sma pardon (Psalm 130:3, 4). Èn a moi eksempre foe en e gi deki-ati na ala sma di lobi regtfardikifasi, foe loekoe go na Jehovah Gado foe libi foe têgo.
[Prenki na tapoe bladzijde 29]
Den ben froeklari Rakab regtfardiki foe di den wroko foe en ben boeweisi taki a ben abi bribi
[Prenki na tapoe bladzijde 30]
Archeoloogman ben feni sani di ben tan abra foe Jerikow foe owroeten, èn wan pikin pisi foe wan owroe skotoe ben de na ini toe
[Sma di abi a reti foe a prenki]
Pictorial Archive (Near Eastern History) Est.