Yu e firi son leisi leki yu no abi nowan mati èn yu e frede?

Luku a pikin boi na tapu a prenki. A de en wawan èn a gersi leki a e frede. Yu ben firi so wan leisi?​— Ala sma e firi so son leisi. Bijbel e fruteri wi fu son mati fu Yehovah di ben denki taki den de den wawan èn den ben e frede. Wan fu den ben de Elia. Meki wi luku san ben pasa nanga en.

Elia ben libi na ini Israel langa ten fosi Yesus gebore. Akab, a kownu fu Israel, no ben anbegi a tru Gado Yehovah. Akab nanga en wefi Iseibel ben e anbegi a falsi gado Bâal. Dati meki furu Israelsma bigin anbegi Bâal tu. Iseibel, a wefi fu kownu Akab, ben ogri èn a ben wani kiri ala sma di ben e anbegi Yehovah. A ben wani kiri Elia tu! Yu sabi san Elia du?​—

Elia lowe! A lowe go fara na ini wan sabana èn a go kibri na ini wan olo fu wan bergi. Fu san ede a du dati?​— Iya, a ben frede. Ma Elia no ben abi fu frede. Fu san ede? Bika a ben sabi taki Yehovah ben o man yepi en. Yehovah ben sori Elia kaba o tranga a de. Wan leisi di Elia begi, Yehovah piki a begi èn a meki faya komoto na hemel. Seiker Yehovah ben o man yepi Elia now!

Di Elia ben e kibri na ini na olo, Yehovah aksi en: ’San yu e du dyaso?’ Elia piki: ’Na mi wawan e anbegi yu ete. Mi wawan de, èn mi e frede taki sma o kiri mi.’ Elia ben denki taki sma ben kiri ala den tra anbegiman fu Yehovah. Ma Yehovah taigi Elia: ’No, a no tru. Seibi dusun sma de ete di e anbegi mi. No frede. Mi abi moro wroko gi yu!’ Yu denki taki Elia ben breiti fu yere dati?​—

San yu kan leri fu a sani di pasa nanga Elia?​— Noiti yu musu denki taki yu wawan de èn yu no abi fu frede. Yu abi mati di lobi Yehovah èn den lobi yu tu. Yehovah na wan tranga Gado, èn ala ten a o yepi yu! Yu breiti fu sabi taki noiti yu de yu wawan?​—