Yu e frede son leisi èn yu e firi leki yu de yu wawan?

FURU sma na ini a ten disi e firi leki den de den wawan. Den e firi leki nowan sma no de di trutru e broko en ede nanga den. Nofo tron owrusma e firi so. Ma furu pikin na ini a ten disi, srefi den wan di e dini Gado, e frede èn e firi leki den de den wawan. Yu sabi fu san ede?—a

Furu reide kan de fu san ede den e firi so. Meki wi luku na eksempre fu wan man di ben libi langa ten pasa, pikinmoro wan dusun yari bifo Yesus gebore. A nen fu a man disi ben de Elia. A ben e libi na ini wan ten di a pipel Israel no ben e dini a tru Gado, Yehovah, moro. Furu fu den sma ben bigin anbegi a falsi gado Bâal. Elia ben taki: „Mi wawan tan abra.” Ma yu denki taki na Elia wawan ben e dini Yehovah ete?—

Aladi Elia no ben sabi dati, toku tra sma na ini Israel ben e anbegi a tru Gado ete. Ma den ben go kibri. Den ben e frede. Yu sabi fu san ede?—

Akab, a kownu fu Israel, no ben e dini Yehovah. A ben e dini Bâal, a falsi gado fu Akab en wefi Iseibel. Sobun, Iseibel nanga Akab ben e pruberi fu feni den sma di ben e dini Yehovah, fu di den ben wani kiri den, spesrutu Elia. Fu dati ede Elia ben lon gowe. A ben go sowan 483 kilometer te na a sabana fu Horeb. Bijbel e kari a presi disi Sinai tu. Hondrohondro yari bifo a ten fu Elia, dan na a presi drape Yehovah ben gi en pipel den Tin Komando èn sosrefi den tra wet fu en. Elia ben go kibri en wawan na ini wan bergi-olo na Horeb. Yu denki taki Elia ben musu frede?—

Bijbel e sori taki wan pisi ten na fesi, Yehovah ben gebroiki Elia fu du bigi wondru. Wan leisi di Yehovah piki a begi fu Elia, dan a seni faya komoto fu hemel fu bron wan ofrandi. Na a fasi dati Yehovah ben sori taki a no Bâal, ma na En na a tru Gado. Now di Elia ben de na ini a bergi-olo, Yehovah ben taki nanga en.

„San yu kon du dya, Elia?”, na so Yehovah aksi en. Dan Elia taki: ’Na mi wawan tan abra fu den sma di e anbegi yu.’ Na wan switi fasi Yehovah piri-ai gi Elia, fu di a taki: ’Mi abi seibi dusun sma ete di e dini mi.’ Yehovah ben taigi Elia fu drai go baka, fu di A ben abi moro wroko gi en fu du.

San yu denki taki wi kan leri fu na eksempre fu Elia?— Son leisi srefi den sma di e dini Yehovah, kan frede. Sobun wi alamala, yonguwan nanga owruwan, musu hori na prakseri fu aksi Yehovah fu yepi wi. Bijbel e pramisi wi: „Yehovah de krosibei fu ala den wan di e kari en.”

Wan tra sani di wi kan leri na taki wi abi brada nanga sisa na ala sei, di lobi Yehovah èn di lobi wi tu. Bijbel e taki: „Sma e du den srefi sani fu pina ala den brada fu [wi] na heri grontapu.” Yu no breiti fu sabi taki noiti wi de wi wawan?—